Mâk 3 - To kə Kəzə̀ kə̀ Fughu ko

Yɛso bǎaŋ ghùw mo kwe kə kpuw doʼò nù

¹ Yɛso ŋ kòom ndùw kpèʼe an Ndùghène è te, ghùw ù lǐ n lo a fughu mo kwe kə m kpuw.

² Ghe n tsêe ko wə̄n alekòʼ enyəa to ù mò baāŋ tsughu ghùw vʉ̀ Tsuʼntsə̄, to ghe kwu wə̄n?

³ Yɛso n dzɛ̀ ndùw â kpùuwkə̀kwe vʉ enyəa, “Sə kɔ̀ʼ wò fɛ a vʉ̀a mùghò.”

⁴ Ù n daŋso bvʉ̀ ndùw â ghì yi enyəa, “Lâŋ kə sɛ̀ kə dêe èndùghò kùu ndùw Tsuʼntsə̄ a, aleghəŋlo èdzɔ̀ ŋkāa ebo à? Alebəghaasə ghùw ŋkāa alewī ghǔw a?” Ghe ŋ kè bɛlɛ̀.

⁵ Yɛso n nùghù nə̀m lɛ̌ɛn kaaŋ wò ghee enyə, kòom mùŋe tsùghù sùghò a zəŋò ghee am fə̀ŋ dəla təla ghe ki ghè tò, daŋso nùghù dzɛ̀ ndùw â kpùuwkə̀kwe vʉ enyəa, “Nə̀ghaan sə wò kwe kə̀a kò.” Ù n nə̀ghàan sə̀ è wo, kə ŋ kòom tùghù dòʼò è wo.

⁶ Ghî a Falàsîi ghə̀ n daŋso zə̀ghàa tsùghu Ndùghène, ndùw kǔuwn kwu tsughu kədzəŋe ghèe ghêe ghì a Hɛlɔ̀d à li gho, kɔn naŋa tsughu fə̀mbɛ̀ aŋghəa ghe ki alewī Yɛso a te.

Kwele kə aghì kə̀ bùgho alebùghò kôʼ Yɛso a ŋgùŋ è ènyʉ̀

⁷ Yɛso n daŋso nùghùu ndùw an dzùghùntsòʼ è Galèlîi ghèe ghê tsə̀ndə̄ghā tə wə̄n to, nê kə aghì kə̀ n ndûuw ko a bǎà ghee. Ghî ghən mò nughu sə kaaŋ wo am mbùʼ è Galèlîi, sə̀ wò an Dzùdîa,

⁸ an Yɛ̀lusalɛ̀m, am mbùʼ è Èdumìa, am mbùʼ è bà kə ŋgùŋ kə Dzodàn kə̀ li kə chî, àsùghò an nàʼà mə̀là ŋ kùʼù lô kaāŋ tsəgha an sugho naʼe Tâe àsùghù Sidɔ̀n. Kwele kə aghì kən mò bugho a vʉ̀a Yɛso bòʼ ghe zuw tsughu ndə̀mà tə aghəa təla ù mò ghəŋlo.

⁹ Aŋ ghəa kwele kə aghì kən fə̀ waʼso duūw, Yɛso n dzɛ̀ â tsə̀ndə̄ghā tə wə̄n to enyəa ghe kəŋo naŋā wô wə̄n â kwə̀n kò, e kwo ghe lô laʼn boōn ghee;

¹⁰ tɔŋlo enyəa ghəa ù mò baāŋ tsughu ndə̀mà tə aghì tò, ghî a dzaŋa a te gho a dzə̀m m faʼso nyəa wò ko alebùghò mɔ̂ɔ tsughu wə̄n.

¹¹ Mo ghî ghə̀là zʉ̀ u fə̀ lo a zəŋò ghee, kôʼ ndùw wə̄n, ghe n tì bvʉ̀ ndùw a tsəlà wə̄n, zʉ̀ u te wə n dîi sə̌a kɔʼɔ enyəa, “Ghù lǒ wɛ̀ ù Kə̀zə̀!”

¹² Yɛso n tɔ̀ʼ kʉ̀ɛɛn tsùghu zʉ̀ biigh vʉ enyəa e kwo ghe lô dzâa fughuu ŋgòʼ è ghùw wəla e lo ghè wò.

Yɛso shìaa tum tə wə̄n eghə̄m à ghè tò tə bə̀ghà

¹³ Yɛso n daŋso nùghù nùghù kɔ̀ʼ ndùw aŋ kwàʼ, mò ʉ n shìaa sə̀ wò ghì ghə̀là ù tsə̌m; ghe ŋ kɔ̀ʼ kòʼ ndùw wə̄n.

¹⁴ Ù n daŋso shìaa sə̀ wò àghì eghə̄m à ghè ghò a bə̀ghà, ŋgɔm tsughu ghee enyəa à lò tətum. Ù n dzɛ̀ â ghee enyəa, “Ŋ̀ ghɛ fɛ tsɔʼ kɔʼ enyəa sɛ̀ è lo a dzə̀m, Ǹ lo tuu sə̄a ndùw sùghò ghɛ̀ alendùw kə̂a ghəa a Kəzə̀.

¹⁵ Ghɛ̀ lo e ki sugho dwaʼa wo aledzuū sə̄a zʉ̀ ù biigh wo.”

¹⁶ Tum tən èghəm à ghè tò tə bə̀ghà ù mò shîaa kɔʼ mò lo Sǎemòn wəla ù fə̀ təghàa tsughu sughò zən zo enyəa à lò Pità.

¹⁷ Dzɛ̂ms, ghèe wàazə̀, Dzɔ̌n, tɔ̂ɔŋ wɛ a Zɛbɛ̀dîi. [Yɛso n tə̀ghàa tsùghù zən a ghee enyəa à lǒ Bòanɛdzìs, e moʼn tsughuu enyəa Ghî a ghuuw è kəmā zo.]

¹⁸ Andùlù n lo mɔ̀ʼ, àsùghò Felêp, àsùghò Bàtòlòmîa, àsùghò Matìo, àsùghò Tɔ̀mâs, àsùghò Dzɛ̂ms wɛ̀ ù Afìus, àsùghò Tàdîos, àsùghò Sǎemòn, ghùw wəla ù fə̀ ŋeē ləghaa naʼ e wə̄n zo,

¹⁹ àsùghò Dzudàs Eskàlìot wəla ù fə̀ fêe fughu Yɛso.

Yɛso àsùghò Bɛzɛbùl

²⁰ Yɛso n daŋso kwə̀n nyə̀ è nduw, kwele kə aghì chi kə n ndùw bùghò kpèʼe ko nù, ghe m buʼù làʼà kèe nəgha è zəa zo ghèe ghêe tsə̀təndə̄ghā tə wə̄n to.

²¹ Ghəa tom a wə̄n a zuw tsughu, ghe n sə̀ kàʼ ndùw wə̄n a lùʼù kəŋo kaaŋ wo, ghî a màʼà kə̂aa kaŋlō enyəa, “Tuw kə m bō sə.”

²² Ghê dèekə̀làŋ à li gho ghe fə̀ nughù wo an Yɛ̀lusalɛ̀m n dzâa tsùghùu enyəa, “Ù kǐ zʉ̀ u Bɛɛlzɛ̄bùl.” À li ghə n so enyəa, “Ù zʉ̀ ù fɛ dzùu sə̌a an dwaʼa u Də̀ŋ kə Zʉ̀ ù biigh wo.”

²³ Yɛso n daŋso tɔŋɔ tsughu ghee, dzɛ̀ â ghee aŋ kwə̀ən kə ushwaʼ enyəa, “Satàn lò ênzən aledzùu sə Satàn a?

²⁴ Abugho naʼ e ndzughùun lo, e yo aletēe.

²⁵ Abugho ndughu ndzughùun lo, mo ghî a te a təma sùghò tsàm aŋ ghùe e ghee, è yò aletēe.

²⁶ Abugho Satàn nùghù kɔʼ â ŋgè kò aŋ ghùe u wə̄n, dzùghùu è tsughu, ù yò aletēe, ù fi so e bughò tsughuu bvʉ̂.

²⁷ Ghùw yò alenyəa ndûw an ndùghù è ghùw wə̀ esə̀ŋ ù lì, ù fuūw nughù kɔʼ fʉgha u wə̄n, à gɔ̀ʼɔ̀ ko mò ù m bùʼ kɔ̀n nàŋa tsùghù dzə̌ ghùw ù te alo ugbāʼ, sěe ù sə̀ lô alefūw nughù fʉgha u ghûw ù te.

²⁸ Kùmkùm, ghəa Ǹ dzâa wô fɛ â ghɛ̀, Zə̀ kə̀ lo ghuuwmàʼn nù bôo tə aghì tò, àsùghò ghəa ghəla ghe suūwn Zə̀ kò a te,

²⁹ yia bugho ghùw wəla ù kuūwn sûuwn tsughu Zuʼ tə̀ Zɔlɔ to, Zə̀ kə̀ lo ghuuw màʼà kòʼ yò bôo tə wə̄n to, bòʼ ù ŋ ghəəŋ bo zəla e doʼò tən.”

³⁰ Yɛso fə̀ shwaʼ wə̄n kəaa tsughu bòʼ ghî a màʼa fə̀ so enyəa, “Ù kǐ zʉ̀ ù biigh wo.”

Waazə̂ a Yɛso ghèe ghêe zə̀

³¹ Waazə̂ a Yɛso ghə̀ n daŋso ndùw bùghò těe wò a beē ghèe ghêe zə̀ nàʼà nyə̀ ndùw enyəa ghe tɔŋɔ fughuu səā wô wə̄n.

³² À n lo mo saʼ kə aghì kə̀ n dòʼò dzə̀əŋ ŋgəa kɔʼ wə̄n, ghe n dzɛ̀ nyə̀ ndùw â wən enyəa, “Zughù bvʉ̌a ghù a beē ghèe ghêe waazughù ghò.”

³³ Yɛso m bɛ̀lɛ̀ ndùw enyəa, “À lò ndugho nughò à waanughò ghǒ a?”

³⁴ Ù n nùghù lɛ̌ɛn ŋgə̀a tsə̀ghà wò ghì yia ghe mò doʼ a vʉ̀a wə̄n daŋso nùghù dzɛ̀ tsùghù enyəa, “Waazə̂ ghaŋa ghən à, à nùghò.

³⁵ Ghùw wəla ù ghəə̄ŋ dzə̂ ghəa ghəla Zə̀ kə̀ ləghaa, à lǒ wàanùghò ù nùu, ŋkāa wàanùghò ù zən, ŋkāa nughò.”