Bìoball air-loidhne

Mâk 13 - To kə Kəzə̀ kə̀ Fughu ko

Yɛso kə̀a aŋghəa ghe lo saʼà maʼn ə Ndùghèkə̀zə̀ è nē a te an Yɛ̀lusalɛ̀m
( Mat 24:12 ; Lûk 21:5-6 )

¹ 1 A m bùghò Yɛso daŋso nughù sə wo an Ndùghèkə̀zə̀ è nē an Yɛ̀lusalɛ̀m, tsə̀ndə̄ghā è wə̄n e mɔ̀ʼ n dzɛ̀ â wə̄n enyəa, “Tso kòʼo to kɔ tə atīa təla ghe bəgha luʼū to fɛ a te a Wàdè, kòʼo sùghò kɔ tə təndughu tə te to lo a!”

² Yɛso n daŋso nì tsùghù â wə̄n enyəa, “Ghù vʉ̀a ghù kòʼò faŋkwu u təndughu wəla a? Fəgha kə̀ li kə kê kòom nyàʼ yo fɛ a zəŋò wàazə̀ enyəa à lò etia, mo e kâ tsùghù a ghūu.”

Yɛso dzɛ̀ naŋa wò enyəa tsû ù lo â sə ko
( Mat 24:3-14 ; Lûk 21:7-19 )

³ Yɛso ŋ kɔ̀ʼ dòʼò tsùghù aŋ kwàʼ u tə̀ Olèf, lɛɛn dàŋà ndùw Ndùghekəzə̀ è nē an Yɛlusālɛ̀m. Pità ghèe ghê Dzɛ̂ms, à Dzɔ̌n, àsùghò Andùlù n tsèen bvʉ tsughu â wə̄n fughu enyəa,

⁴ “Ghəa ghən kê bala kə nîi zə̀n? Dzǎa wò â ghàʼ, à kè lǒ tsə̌a è ghɛ̀ zò aledèe wô enyəa ghəa ghən fɛ so e bughò sə a?”

⁵ Yɛso n daŋso nì tsùghù â ghee enyəa, “E ghoōm tsughu nlò ghùw lò sêe məŋsō ghɛ.

⁶ Ndə̀m kè ndùw bùghòo fɛ enyəa ghe lo mugho, ghe e dzaā wo enyəa, ‘Ǹ lo wə̄n!’ Ghe sêe məŋsō tsughu ndə̀m è àghì.

⁷ Abugho ghɛ̀ zuw tsughu tsaā tə kuū kaŋlō àsùghò làbəlà tə tətsàa to, e kwo ko fə̂ŋ tɛʼɛ tə lô so e tsə̄əŋ nù, ghəa ghən ki alenì kə̀bala, e fi kuuwn kāam daŋso yò dzə̂ enyəa mbī fi so e mîa.

⁸ Naʼà tə̀ ke e zughū aŋ ghùe e ghee, fɔ̂e zə̀ è ke təma tsaā to ghùe e ghee, ghueekətsə̄ kə e ke boʼn bvʉā kaaŋ dəŋò tə̀ də̀ŋò, dzə̀ŋ è ke lo dəŋo tə̀ də̀ŋò. Ghəa ghən kê ò ko to wɛ lô kaʼā nu tsughuu zəla nʉ̀ghà u wɛ̄.

⁹ Yia a bughò ghɛ, tiso kɔʼ nlò tuw ko edzūŋ; ghe lo kwuū fughuu ndûw ghɛ aŋ kaŋsì, ghe tsɔʼ sa ghɛʼɛ an ndughutə̀ne to; ghɛ̀ lo sə tee an sə kə udwə̀ŋ à ghê gɔvə̀nò bòʼ mùghò, zən kè lǒ dzì alenàʼà tsə̀ndə̄ghā è Kə̀zə̀ â ghee.

¹⁰ Ghe bûʼ kì dzə alenàʼà tùm è dzùŋ zən â nàʼà tò tə dzə̀m.

¹¹ Abugho ghe kwu tsughu ghɛ, nì ndùw ghɛ̀ enyəa ghɛ̀ nduw tee an tia e sāʼ, e kwo ghɛ̀ lô so e bâŋsò tə̀fə̀ŋ mo nəgha e kaam kpe enyəa ghɛ̀ sô fughu yia kə̂aa ndùw êndughō. Bɔɔm kə̌aa ko fəgha kəla kə sə wo an dzughu ghɛʼɛ̄ an nə̀gha e te zo, tɔŋlo enyəa à kè kə̀aa yò ghɛ, à kè kə̀aa Zuʼ tə̀ Zɔlɔ to.

¹² Ghùw ke e feēn fughuu nduw wàazə̀ enyəa ù ndùw kpuw. Tsele ke feēn fughuu nduw wɛ, wɛ ghə e ke kɔʼɔ an tuw u ghê tsele, ghəəŋ sùghò enyəa ghe e wiin sugho ghee.

¹³ Ghî ghə̀n à dzə̀m lo bɛ̂ ghɛ̀ bòʼ mùghò. Ghî ghəla ghe lo kuūwn dzəlà mɛ̂ʼn daŋso ndûw ko fə̂ŋ tò alendùw kûu ndûw, ghe lo zə kətuw.

¹⁴ Abugho ghɛ̀ kòʼ sàasɛ̀ kə ghəa kə nîi bəla ko an lùʼù wəla kə mô ki yô alesə̄ a te, (à ghùw wəla ù tɔɔ̄ŋ ghəa ghən gho: Də̀mà tən tsughu aletɔɔ̄ zuūwkɛlɛ̂ ghəa a te), ghî ghəla ghe lo an Dzùdîa kì aletiīn kɔʼ alo təkàʼà,

¹⁵ e kwo ko wəlà ù lǒ aŋ gɔ̀ŋ kə ndughu lô so e səa tsughuu wò nù, ŋkāa ù bùghò nyə an ndughu alenyəa nî fə̀ghà kə̀ li ko.

¹⁶ E kwo vʉ̀a â ŋgwən lô nughùun kwəlā wô enyəa e so e bughò nî ndzʉ tə wə̄n.

¹⁷ Tsû ù kê lǒ â yìzən ghəla ghe lo nə̀ghà mə̀ à wɛ mò, àsùghò ghəla ghe kê nyɔŋsō wɛ gho an tsùʼu n te mò.

¹⁸ Gɔ̌ɔŋ tsughu ko nlò enyəa e kwo ghəa a te a lô so e səa am mbuw mə̀ èghuuw.

¹⁹ Tɔŋlo enyəa fəm kə kê lò an tsuʼu n te mò, mo kə kaam doʼò kòʼ ghuêchia Zə̀ kə fə̀ bɔm tsughu mbī alebùghò tâa wô nɛ̄, ŋkāa ghəa è li e kê kòom lò koʼ nû tò zən.

²⁰ Abugho Mughu ù te mò doʼŋkè gbôo kə̂aa tsughu tsùʼù mən, to ghùw nsɔ̌ɔŋnchùw kà tuw kə zə. Bòʼ ghì a wə̄n ghəla ù shìa kɔʼ, vʉ̀a ù gbò kə̂a tsughu tsùʼu n te mò.

²¹ Mò à dzɛ̀ ko ndùghò â ghɛ̂ an nə̀gha e te zo enyəa, ‘Kòʼô! Mɛ̀sayà wən fɛ̄!’ Ŋkāa ‘Lɛɛn ndùw, u vʉ fî!’ E kwo ghù lò se boom nù.

²² Tɔŋlo enyəa ghê Mɛ̀sayà ghə agha, àsùghò ghǐishʉ̀ghà ghə agha a lo vùuŋ nùghùn sə̌a kɔʼɔ nù, ghe e deē wo tsə̌a to à sə̀ghà mò alesèe məŋso ghì ghə̀là Zə̀ kə̀ mò shîaa kɔʼ.

²³ Kuuwn nǐi kɔʼ ko nlò ghôom zò, nu mùghǒ ŋ ghɛ̀ â ghəa ghən à dzə̀m dzɛ̂ zìi nàŋa wò.”

Bughò e Wɛ ù Ghùw
( Mat 24:29-31 ; Lûk 21:25-28 )

²⁴ “A kê so e kuūwn bùghòo an tsùʼu n te mò, mo fala zə m mìa. Ləm kə kê nughù bvʉ̂a tsughu â tsə̀ tò, ndzɔŋ ke nyəmā tsughuu sughò.

²⁵ Sə̀ghàbəlà ŋ kê tsɔʼn tsughuu wô alo kəwālā, dwaʼa u kəwālā u kê noʼò kaāŋ ndûw.

²⁶ Ghe lo daŋso kôʼò ko mò Wɛ̀ ù Ghùw sò bùghòo am mbàʼ, à kɔ kə kədaʼa ko, alo nsə̄ghānyə̄ghā.

²⁷ Ù lo daŋso tuū səā ndûw tsə̀təndə̄ghā tə kəwālā, ù zùuŋ kaāŋ wô ghì a wə̄n am buw ghən à chìakò aŋ kàlà tə mbī, ndùw tɛ̀ ndùw aŋ kàlà tə kəwālā.”

Etsʉ̂ kùu ndùw kàʼ fə fîʼ
( Mat 24:32-35 ; Lûk 21:29-33 )

²⁸ “Zoʼŋ kɔʼ nlò tɔ wo aŋ kàʼ fə fîʼ. Abugho kwèe tə wə̄n tə bughuun dzɔ̂ tsughu, kaʼ tsughu alezùw, à fi lo enyəa wuuw zə n su aletsughūu kwə̄n.

²⁹ À lò sugho eghəla abugho ghɛ̀ kôʼ ghəa ghən nîi bəla ko, kele tsughu nlò enyəa nəgha e wə̄n e bughōo zə n sū.

³⁰ Ghəa Ŋ̀ kûu dzâa fɛ â ghɛ̀, mweē e nɛ zən lo tsə̀ghà mìa yò mo ghəa ghən kâ bəla kə nî.

³¹ Wala kə lo tsə̀ghàa mìan nù à ghueekətsə̄ ko: shwaʼ waŋa u kê kǔuwn tsə̀ghà mìa yò.

Ghùw ù lì kwò naŋa yo nəgha zəla Wɛ ù Ghùw lo bughōo a te
( Mat 24:36-44 )

³² Alekuūwn nîi tsughu, ghùw mɔʼɔ̄ kwo naŋa yo tsuʼ wəla Wɛ ù Ghùw kè bughōo a te ŋkāa nəgha e te zo, tsə̀təndə̄ghā tə Kəzə̀ alo kəwālā tə bûʼ kwò sugho yo. Wɛ bûʼ kwò sugho yo, à gɔ̀ʼɔ̀ ko Tsele ù te.

³³ Nǐ nlò ghôom zò; naŋso tsughu nlò ghuw kə ebwìi kò, tɔŋlo enyəa ghɛ̀ kwò naŋa dzə yo tsuʼ fə te fo ŋkāa nəgha e te zo.

³⁴ À lǒ tò ghùw lò səā bwînlo, à m bùghò ù zə̀ghàan tsughuu ndughu, ù naŋa tsughu ŋkɔ̂ɔ enyəa mə̀ è chiīn tsughuu, chìa am fwàʼ kə wə̄n, chìa a lô kə wə̄n ko; naŋa tsughu u mɔ̀ʼ a fǔundughu enyəa ù è tseē luʼū to.

³⁵ Tɔ̀ʼɔ têe nlò, nu ghɛ̀ kwo naŋa yo nəgha zəla mughùbè ù te lo kwəlā nyəā a te. Ù lò alevùuŋ bughò an nə̀gha è gûŋsò zò, ŋkāa â fə̀ŋ è ùtsùʼ, ŋkāa â zùwzùw kə utsūʼ ko, ŋkāa â bwə̀làbwə̀là tò.

³⁶ E kwo ko ù lò vûuŋ ndûw bughōo mò ghɛ̀ yia bwiī.

³⁷ Ghəa ghəla Ǹ dzɛ̂ tsughu â ghɛ̀, M̀ fɛ dzɛ̀ â ghì ghò a dzə̀m: tiso kɔʼ nlò tuw ko.”

« Roimhe

Air adhart »

2020

Lean sinn:

Ceanglaichean taic

Sanasan