Mâk 11 - To kə Kəzə̀ kə̀ Fughu ko

Dò kə enyə̄ kə Yɛso an Yɛ̀lusalɛ̀m

¹ A m bùghò Yɛso bùghò tɛ̂ tsughu an naʼ e Bɛtfàch, àsùghò an naʼ e Bɛtānì, mo ghe sô kùʼso ndùw Yɛ̀lusalɛ̀m am bà kə kwàʼ u tə̀ Olèf, ghèe ghê tsə̀təndə̄ghā tə wə̄n to, ù n dzə̀ kɔ̌ʼ tsə̀təndə̄ghā tə wə̄n tə bə̀ghà, tùm è tsughu,

² dzɛ̀ â ghee enyəa, “Ndǔw nlò an nàʼà fə̀ fi â sə ko, ghɛ̀ sə nduw koʼ tsughu tsʉa u fəndzàkâs ù nûu wò ghe təŋɔ̀ naŋā; zěe wò nlò â ghè wò.

³ Abugho ghùw bvʉ â ghɛ̀ enyəa, ‘Ghɛ̀ ghəa ghən ghəŋlo enyəa à lǒ kwò à?’ Tsǒo dzǎa tsughu ko nlò enyəa, ‘Mughubè kì kəfwàʼ a te, ù kòom tǔu fughuu wò nù ebàm êzə̀ŋ èzə̀ŋ.’ ”

⁴ Ghe n nùghù è tsughu ndùw kòʼ ndùw tsʉa u fəndzàkâs ù nûu wò mo ghe n tə̀ŋò nàŋa a fǔundughu kə̀ li ko an dziī, ghəa ghe zeē,

⁵ ghî à li gho ghe mò kuʼù ti fughu m bvʉ â ghee enyəa, “Ghɛ̌ chi ghâa kwǒ chìa, ghɛ̀ sô gbəlà zeē ndzàkâs fì à?”

⁶ Ghe m bɔɔm bɛ̀lɛ̀ ndùw ghee aŋ ghəa Yɛso mò dzɛ â ghee; ghe n zə̀ghàa ndùw sùghò ghee â ghè fò.

⁷ Ghe n daŋso nì wò ndzàkâs fə te fo a vʉ̀a Yɛso, zəghaan kɔʼ ndzʉ tə ghee a te; ù ŋ kɔʼ nyaʼa kɔʼ an ndzàkâs fə te fo.

⁸ Ndə̀m è àghì n nîi zìi ndùw ndzʉ tə ghee an dziī, à li ghə m fâan sə̌a wò kùee mə̀ ŋkàʼ n zʉ̀ mò alo esūm, zìi wò an dziī enyəa Ù è bwiī wo a te.

⁹ Ghî ghəla ghe mò tə̂əŋ nduw â sə ko, à ghəla ghe mò tə̂əŋ wo a bǎà wə̄n m fughuu wò mbaŋa enyəa, “Hòsana! Hòsana! Zə̀ kə̀ bughuso ghùw wəla ù bùgho mò ù bùghò an tuw kə Mughubè ù te!

¹⁰ Zə̀ kə̀ bughuso fɔ̀e u tselè ù ghê tselè sɛ̀, Dɛvìd, wəla u bughōo! Ukɛɛ alo kəwālā edzuŋ èdzùŋ!”

¹¹ Ù n daŋso nyə̀ ndùw an naʼe Yɛ̀lusalɛ̀m, tsə̀ghà ndùw an Ndùghèkə̀zə̀ è nē; lɛɛn kaāŋ wò ghəa ghən à dzə̌m fughu; ghəa nəgha e màʼa fə̀ lo mo zə n ndùw, ù n sə̀ nùghù wò an Yɛ̀lusalɛ̀m ghèe ghê tsə̀təndə̄ghā tì èghəm à ghè tò tə bə̀ghà, ghe n nùghù ndùw am Bɛtānì.

Yɛso lɔ̀ʼ kàʼ fə fîʼ

¹² Tsuʼ u tsʉtsʉ vʉ̀, ghəa ghe zəghàan səā wô Bɛtānì, dzə̀ŋ n za tsughu Yɛso.

¹³ Ù ŋ kòʼ ndùw ndzə̀mè kə kàʼ fə fîʼ alo kədɛ̀, ù n ndùw alekòʼ enyəa tam kə lô kpaʼ lo mo kə mʉ̀ dòʼò a te. A m bùghò ù bùghò tɛ̂ tsughu fughu, ù ŋ kòʼ kɔʼ ko tə̀fòo, kè kôʼ kə̀tam, nu a fə̀ yo dzə̂ an nəgha e tə̀ fîʼ è mʉa zo.

¹⁴ Ù n dzɛ̀ â kàʼ fi fò enyəa, “Ghù kè kòom mʉ̀ fùghù kòʼ yǒ ghùw â tam ko!” Tsə̀təndə̄ghā tə wə̄n tə n tsò zùw sùghò ghəa yì ù dzɛ̀ tsughu.

Yɛso ndùw alo Ndùghèkə̀zə̀ è nē

¹⁵ Ghe m bùghò an Yɛ̀lusalɛ̀m, ù n daŋso tsə̀ghà nyə̀ ndùw am mbɛ̀, nyə̀ kàʼ ndùw aledzùusə ghî ghəla ghe mò fêen fʉgha wo fughu à ghəla ghe mò zuenlō. Ù n nì təmpfʉʉn tsughu teblè tə ghì à kuuwn ghə ŋ kə̀a ghò, à ndàŋ tə ghì à feēnlō a təbùŋù gho.

¹⁶ Ù ŋ kɛ̀ kə̀fəgha enyəa e kwo ghî à lô niī be kə Ndùghèkə̀zə̀ è nē an Yɛlusālɛ̀m tǒ dzì â ghee alebùghò boʼn tsəghāa â fʉgha wo.

¹⁷ Ghəa ù tsʉ̌a ghee, ù m bvʉ â ghee enyəa, “Ghe kâ mgbaŋ tɔm naŋa enyəa, ‘Ghe lô ndughu zaŋā tɔŋlo enyəa à lǒ è gɔ̀ŋlo â ghì a nàʼà tə̀n tə̀ dzə̀m.’ Ghɛ̌ yia nî naŋā tsughu enyəa à lò bûʼ kə ghì à tsəŋo gho.”

¹⁸ Tuw u təfɔ̀e wə̀ n zuw tsughu ghəa yì ghèe ghê ghǐimwàʼsò ghò ŋ kàʼ tsughu alekə̄ŋ dzì zəla ghe lo alenìi nughù tuw kə wə̄n a te. Ghe mò tsəŋo nu wə̄n, bòʼ tuw u mò kpuuw ghî yì à dzə̀m an tsʉ̀ e wə̄n.

¹⁹ A m bùghò tsuʼ u nyəŋō nyəghàan wo, Yɛso n zə̀ghàa tsùghù naʼ e te zo ghèe ghêe tsə̀təndə̄ghā tə wə̄n to.

Etsʉ̂ kùu ndùw èboo

²⁰ À m bùghò ghe bwəlā tsəghāa dzì, ghe ŋ kòʼ dàŋ tsə̀ghà kàʼ fə fîʼ fia Yɛso mò lɔʼ mo fə ŋ gwə̀n nyə̀ tsùghù tɛ̀ alo təghàŋ.

²¹ Pità n tɛ̀mòʼn wò ghəa a te gho, dzɛ̀ â Yɛso enyəa, “Mughubè, kòʼ kâʼ fə fîʼ fə̀là ghù mò lɔ̂ʼ lo, fə ŋ gwə̀n.”

²² Yɛso m bɛ̀lɛ̀ tsùghù enyəa, “Gaʼ tsughu fə̀ŋ a zəŋò Zə̀ kò.

²³ Ǹ so Ŋ̀ kûu dzâa wô â ghɛ̀ enyəa, abugho à lò ko ndughoo ù dzɛ̀ tsughu â kwàʼ wən wo enyəa, u nùghu kɔʼɔ̀ u bvʉ nyə tsughu ndûw an dzùghùntsòʼ, mò ghùw ù te ki yo ndzùghùun kə emòʼn kò, vʉ̀a ù kuuwn ki ko am fə̂ŋ enyəa ghəa zəla ù dzɛ̀ tsughu ki nû alesə̄, Zə̀ kə̀ sô ghəə̄ŋ fughuu kɔʼ â wə̄n.

²⁴ Zən lò e ghee Ǹ so Ǹ dzâa wô â ghɛ̀ ènyə̀a abugho ghù bvʉ ko kwò kò mò ghù gɔ̀ɔŋ tsùghù nù, ghù vʉ̀a ù boo tsughu enyəa ghù ŋ kele, à sə̀ lò kə̀ kə̂a kò.

²⁵ À kǔuwn lò ko enyəa abugho ghù gɔ̀ŋlo, bùʼu ghuuw màʼa tsughu dzə̀ ghəa à biigh ghəla ghî à ghəŋlo â ghù, tò Tsele wʉ̂a alo kəwālā e lo sugho aleghuūwmaʼà ghəa ghə̀a à kwu gho.”

²⁶ [Abugho ghù kuūwn yô alewuūwmaʼà bòo tə ghì à li to, Tsùghò alo kəwālā yo sughò alewuūwmaʼà bòo tə̀ghà.]

Ghì a bvʉnlo enyəa Yɛso daʼa kə wə̄n kə nì wə ghɛ̀

²⁷ Yɛso ŋ kòom bùghò kpeʼe an Yɛ̀lusalɛ̀m ghèe ghê tsə̀təndə̄ghā tə wə̄n to. A m bùghò ù ŋgəaā kaāŋ tsəgha an Nùghìkə̀zə̀ è nē, tuw u təfɔ̀e ghə̀ n ndùw bùghò ghèe ghê tsoʼ to àsùghò ghê dèekə̀làŋ,

²⁸ bùghò bvʉ â wə̄n enyəa, “Ghù ghəa ghən ghəŋlo an daʼa kə̀ ghɛ ko a, ŋkāa à ghù â daʼa kə fughu ndughoo aleghəəŋ ghəa ghə̀n à?”

²⁹ Yɛso n dzɛ̀ â ghee enyəa, “Ǹ so Ǹ bvʉā wô ghɛ̀ â ghəa zo; bɛ̀lɛ̀ wò nlò mugho, Ǹ dzâa wô sughò luʼū kəla daʼa kəla Ŋ̀ ghəə̄ŋ ghəa ghə̀n a te nughù wo a te.

³⁰ Ghəa Dzɔ̌n mô mùghù ŋ Kə̀zə̀ m fughu mò a daʼa kə te kə fughu Kəzə̀ ŋkāa mò à fùghù aghî a? Bèle wò nlò mugho.”

³¹ Ghe ŋ kàʼ ndùw tuw ù sughuu wo fughu aŋ ghùe e ghee enyəa, “A sô yəa e dzâa ndûw èndūghō, abugho a bɛlɛ̀ ndûw enyəa, ‘À fùghù Kəzə̀.’ U è sò dzɛ̂ enyəa, ‘Ghɛ̀ ŋ kè sô boō fughuu ndûw â wə̄n bòʼ kwò à?’

³² A yo aledzɛ̀ enyəa, ‘À fùghù aghî.’ ” Ghe fə̀ tsəŋo ghaʼa aghî bòʼ ghee a dzə̀m fə̀ boo fughu nû enyəa Dzɔ̌n mò lo kùm kə ghûwshʉ̀ghà ù Kə̀zə̀.

³³ Ghe fi nughù bɛ̀lɛ̀ ndùw nù Yɛso enyəa, “Ghàʼ kwo yo.” Yɛso n dzɛ̀ â ghee enyəa, “À fi lo enyəa Ǹ yo sughò aledzɛ̀ luʼū wəla daʼa kə nughù wo a te â mùghò aleghəəŋ ghəa ghən.”