Lumà 9 - To kə Kəzə̀ kə̀ Fughu ko

Ghî a Kəzə̀ ghəla kə mò shîaa kɔʼ

¹ Ghəa ghə̀là Ŋ̀ kə̂aa wo yò dzə agha, Ŋ̀ kə̂aa êsəŋò, tɔŋlo enyəa ghàʼ à Kə̀lestò lò kəfəgha kə̀ mɔ̀ʼ. Zuʼ tə̀ Zɔlɔ təla tə lo am fə̂ŋ zaŋa teso dzàa wò nù enyəa Ŋ̀ kaʼn yo gha gho.

² Səŋò e te e lo enyəa Ŋ̀ ŋgee mʉŋe nù, fɔnlo e te zə e yo alemìaa am fə̂ŋ zaŋa.

³ Tɔŋlo enyəa to M̀ buʼù boo enyəa Zə̀ kə̀ tsɔ̂ɔm mùghò, kə gbôo sɛ̂ɛ mùghò ghàʼ a Kə̀lestò abugho e mô lo aleyòsò waazə̂ ghaŋa ghəla ghàʼ a ghee sə alo enaʼ e mɔ̀ʼ.

⁴ Ghe lo ghî ghə Ezə̀lɛ̂, ghî ghəlà Zə̀ kə̌ fə nî enyəa ghe e lo wɛ a wə̄n gho. Kə n dè tsughu sùghò səghanyəgha ŋ wə̄n â ghee. Kə n zə kɔʼ ŋkâa ghèe ghee, fùghù ndùw ghee â làŋ kə ŋkāa kə te ko. Ghe yia kwo alefughu ŋkɔʼso â Zə̀ kò, kwo sugho to kəla Zə̀ kə fə̀ to naŋā.

⁵ Ghe yia lô sughò wɛ a awɛ a ghê tselè tsele a ghì ghə Ezə̀lɛ̂ ghò, mo Yɛso Kə̀lestò sə̀ a fughu an tigh kə te ko. Ù lò Kəzə̀, ù saʼā mbī e dzə̀m, to ghî à mô kɔʼsô tsəghà wə̄n to mbī kê bughò mîaa. Zə e lo ko êzə̀.

⁶ Ŋ̀ ghəa ghən enyəa dzàa wò dzə̀ yo tò a e soō to kə Kəzə̀ kə̀ ka mo kwu dzə̀ ghəa è li zo, tɔŋlo enyəa à yò dzə̂ ghî ghə Ezə̀lɛ̂ a dzə̀m ghe lô ghî a Kəzə̀ ghò.

⁷ À yò dzə̂ aghî a dzə̀m ghe sə an tigh kə Abə̀làhâm ghe lô wɛ a Kəzə̀ ghò, tò aŋghəa Zə̀ kə fə̀ dzɛ̂ naŋa nduw â Abə̀làhâm enyəa, “Ŋ̀ kê wɛ a awɛ ghə̂a ghəla mùgho fə̀ to naŋa â ghù nîi an taŋ an zən zə Esâʼ.”

⁸ Ghəa ghən fɛ mòʼnlò enyəa, à fə̀ yo dzə wɛ a awɛ ghə Abə̀làhâm a dzə̀m ghe fə̀ ni an taŋ enyəa ghe lo wɛ a Kəzə̀, à kuuwn tɔʼ lo ko wɛ ghəla Zə̀ kə fə̀ to naŋā enyəa ghe e ke kuūm lo wɛ a awɛ a wə̄n gho.

⁹ Nu kən lò fəgha kəla Zə̀ kə fə̀ to naŋa nduw â Abə̀làhâm enyəa, “Alebùghò tsəghàa kpeē wô aŋ ghùw ghən êzə̄ŋ alo kənùm, Ǹ lo kòom bùghòo nù, Sàla lo dzəā wô wɛ ù nùu.”

¹⁰ À bùʼ yò ko zə̀, Lɛ̀bɛkà fə̀ wɛ a wə̄n ghən a bə̀ghà dzə ko ghèe num, tɔɔŋ Esâʼ, tsele ù ghê tsele a sɛ̀.

¹¹ Ghəa wɛ a te a fə̀ bûʼ lô ko mo ghe kaām ghee n dzə̄, à n lo sugho mò ghee kaām ghəəŋ naŋa dzə̀ ghəa è dzûŋ zò è li zo ŋkāa è biigh zo, aledèe wô enyəa dzì zəla Zə̀ kə̀ niī kɔʼɔ̄ aleshìa ghùw ù wə̄n a te yo dzə̂ aŋ ghəa è li zo ghùw ghəə̄ŋ tsughu, à kuuwn lò enyəa à tsə̀mà kɔ̀ʼɔ Kəzə̀ aletɔ̄ŋɔ̄ ghùw ù te.

¹² Bòʼ ghəa ghən, Zə kə n dzɛ̀ â Lɛ̀bɛkà, tɔɔŋ zə̂ u wɛ a te gho enyəa, “Wìnoo kê fwàʼà tsə̀ghà a tsəlà wɛ̂ɛtùghu.”

¹³ Tò aŋghəa ghe tɔm naŋā am Mwàʼsò kə Kəzə̀ enyəa, “Ǹ tsâʼ Yàkɔ̂b a zəŋò Ɛsàu.”

¹⁴ À fɛ̀ êzəŋ lo to a e dzâa tsughu êndūghō? À lò enyəa Zə̀ kə̀ bâa nù kpiī wo ŋkāa? Ɛ̂ŋgaŋ dzə!

¹⁵ Nu Zə̀ kə fə dzɛ â Musî enyəa, “Ǹ se è kwuso e dêe a zəŋò ghùw wəla Ǹ tsə̂m tsughu, muūwn chia kə kɔʼɔ mugho a zəŋò ghùw wəla fə̀ŋ zaŋa tsə̂m tsughu.”

¹⁶ E fi lo enyəa, à lò Kəzə̀ kə tsəmà tsughuu aledè ghùw â se è kwuso zo, à yò dzə̂ bòʼ fwàʼ kə ghûw ŋkāa à ləghaa tsughuu ghùw enyəa zə e lo êzə̀.

¹⁷ Nu ghe tɔm naŋa am Mwàʼsò kə Kəzə̀ enyəa, “Zə̀ kə fə̀ dzɛ̂ ndùw â də̀ŋ kə Edzìpt kò enyəa, ‘Soo kə eghəa kəla mùghò fə̀ tsuʼ naŋa kɔʼ ghû a te an ndàŋ è kədə̀ŋ fə̀ lo enyəa, Ŋ̀ kê nî ghù Ǹ dê dwaʼa waŋā a te, enyəa zwɔ̂ŋ waŋa u kê kûu ŋgəaa wô mbī e dzə̀m.’ ”

¹⁸ E fi lo enyəa, Zə̀ kə̀ dêe se è kwuso zo a zəŋò ghì ghə̀là kə tsəma tsughu, kə ŋ kuuwn ghəə̄ŋ tsughu ghî à li gho enyəa ghe tughu â tuw wo aŋghəa kə tsə̀m tsughu.

Nʉghà u Kəzə̀ ù pfʉa wo àsùghò se e wə̄n è kwuso zo

¹⁹ Ghùw wɛʼɛ sô bvʉ̂a wò nù â mùghò enyəa, “Abugho e sô lo êzə̀, Zə̀ kə ghùw kuuwn saʼa aŋ kwò? À lò ndughoo u lò aletūe fəgha kəla Zə̀ kə̀ ləghaa a?”

²⁰ Ghù kǔuwn lò ndughoo, ghùw nsɔ̌ɔŋnchùw to ghû alekuêen nduw ghəa zo an dzughu e Kəzə̀ a? To ndzə̀ŋ fə̀ n nùghù bvʉ̀ ndùw â ghùw wəla ù mò bɔm ghè fò enyəa, “À lǒ kwò ghù mò bɔm mugho enyə a?”

²¹ Ghùw wəla u bɔɔ̄ ndzə̀ŋ tò kì kədaʼa an tsaʼ zəla e lo a vʉ̀a wə̄n alebɔ̄m fəgha kəla ù ləgha tsughu a te; ù bɔ̌ɔ səā kɔʼɔ n ndzə̀ŋ m bə̀ghà an tsaʼ e te zo, fə mɔ̀ʼ mò à lò fə kùu èghəa fo, fə loʼ fən e lo alefwaʼā zee a te.

²² À lò sugho ghəa è mɔʼɔ̄ zo enyəa, Zə̀ kə̀ ki nû daʼa ko aledè nʉ̀ghà u wə̄n ù pfʉa wo aŋghəa kə ləghaa àsùghò aledè daʼa kə wə̄n aŋghəa kə ləgha tsughu, chia kə kuūwn naām kɔɔ̄n tsughu ko fə̀ŋ è wə̄n ghèe ghê ghì ghəla ghe ghəŋlo enyəa nʉghà u pfʉ wə̄n, ghî ghəla ghe fə̀ fôʼ naŋa enyəa ghe lo dzùuw màʼn ghee.

²³ Zə̀ kə fə̀ ghəa ghən enyə ghəəŋ tsughu aledèe fughuu wô daʼa kə səghanyəgha ŋ wə̄n â ghì ghò a dzə̀m enyəa ghe kele tsughu enyəa kə kê dèe se è kwuso zo a zəŋò ghì ghəla kə̀ fə̀ fôʼ naŋa, tɔɔŋ ghì ghəla kə fə̀ biaān naŋā enyəa ghe kê lò tsəgha an səghanyəgha ŋ wə̄n.

²⁴ Ghəa ghən lo sugho â sɛ̀ ghəla ghe mò shîaa sə wo a m bvʉa e Tə̀dzûu àsùghò a m bvʉa zə Etòʼò.

²⁵ Kən lò fəgha kəla Zə̀ kə̀ dzɛ̂ am mwàʼsò kə Hosìa enyəa, “Ghî ghəla ghe fə̀ yô ghî ghaŋa gho, Ǹ lo ghee tɔŋlo enyəa a lò ‘Ghî ghaŋa.’ Naʼ zəla mùgho fə̀ buʼù ləghaa tsəgha yo, Ǹ lô naʼ e te zo êzəŋ e gɔɔ enyəa a lò ‘Ləgha zaŋa zo.’

²⁶ A m bùghò an lùʼu təla ghe mò dzɛ â ghì a te gho enyəa, ‘Ghɛ̀ yo dzə̂ ghî ghaŋa gho.’ Ghe lô ghee êzəŋ e tɔŋlo enyəa ghe lo Wɛ a Zə̀ kəla kə mughu.”

²⁷ Ghùwshʉ̀gha Èzayà n naʼn wô an dzə̂ e tughu kùu ndùw Ezə̀lɛ̂ enyəa, “Ghəa ghî ghə Ezə̀lɛ̂ a tso bûʼ lô ko an ndə̀m tò kəshiashia a mǎakùw, à lô tuw ko aŋ ghì a te zəa kô sə fə aghì enyə.

²⁸ Tɔŋlo enyəa Mughu ù te lo ki yo nəghaa zo aleboōn zeē mò ù kà mbà dzə̀n tə̀n ndǔw mbə̀ghà è ghùw aŋghəa ù ki aledzə̀n a te abugho ù lo saʼa mbī.”

²⁹ Èzayà mafə dzɛ̀ zìi nàŋa enyəa, “Abugho Mughu ù te wəla ù Ghaʼa fə̀ taʼkè baʼà naŋa səa kɔʼ sə fə a ghì fə li fo tǒ sɛ̀, to ghe mafə sɛ̀ dzûw màʼà sùghò tò aŋghəa ghe fə̀ dzûw maʼa naʼ e Sodòm zò àsùghò e Gòmolà zò.”

Dzûu tə lo nû aledòʼò sughò tsəghatsəgha

³⁰ A lo aledzàa tsughu èndugho êzəŋ à? E lo enyəa Toʼò zəla e mò buʼù kəŋo yo alebùghò doʼò tsəghatsəgha a vʉ̀a Zə̀ kò m bùghò dòʼò, mo ghe bùghò dòʼò tsəghatsəgha bòʼ ghe boō fughu tsughu â Zə̀ kò.

³¹ Ghî ghi Ezə̀lɛ̂ ghəla fə̀ kuūwn kəŋo aledòʼò tsughu tsəghatsəgha a vʉ̀a Zə̀ kò mo ghe ghə̂əŋ ghəa ghəla lâŋ kə̀ deē, ghe m bvʉ̀ kòmlo alelueso làŋ kə te ko.

³² Ghe mò bvʉ komlo bòʼ kwò? À mò lo enyəa ghe fə̀ dəma yo aledòʼò tsəghatsəa am boo zəla ghe ki â Zə̀ kò, ghe fə̀ koōm niī nduw enyəa à lò am fwàʼ kə gheē. Ghe n tàaŋ bvʉ̀ an tia e utwāʼ.

³³ E lo tò aŋghəa ghe tɔm naŋa am Mwàʼsò kə Kəzə̀ enyəa, “Koʼô, Ǹ tamso naaŋ tsughûu tia è li zo aŋ Zayòn, ghî ghə̀ e ke taāŋ bvʉā a te, (kənɛ kə lo ghəŋlo ghe tsəghàa bvʉ̂). Ghùw wəla ù gaʼ fə̀ŋ a zəŋo Zə̀ kò kè kèle kòʼ yò tuw kə dəla ko.”