Lumà 8 - To kə Kəzə̀ kə̀ Fughu ko

Alemùghù aŋghəa Zuʼ tə Kəzə̀ tə̀ ləghaa

¹ Tò aŋghəa e lô êzəŋ, ghùw ù lì kôom bùʼ yò alebɛ mbɛ an tuw kə ghì ghən a dzə̀m ghe lô fəgha ko kə mɔ̀ʼ ghèe ghê Kə̀lestò Yɛso.

² Daʼa kə Zuʼ tə̀ Zɔlɔ kəla tə fughu mughù zò, kə m mùghò zê zə̀ghàa am bàm e Kə̀lestò Yɛso aŋ ghù daʼa kə ebo kəla è nîi wô vʉ zo.

³ Tɔŋlo enyəa ghəa ghəla lâŋ kə fə̀ yo aleghəŋlo, bòʼ ghùw nsɔ̌ɔŋnchùw fə̀ lɛɛ kôom nû, Zə̀ kə̀ ŋ ghəŋlo e tsughu. Zə̀ kə̀ n nì kɔ̌ʼ Wɛ u wə̄n tùm nyə̀ wò an ghueekətsə̄ aŋ kòʼ e ghùw mbī tò kefughu, alewiī maʼà èbo.

⁴ Ù fə̀ enyə ghəəŋ tsughu alekòʼ enyəa ghəa e tsəghatsəgha zəla lâŋ kə̌ fə̀ biso ki aleghəŋlo nî kə̀bəla a zəŋò sɛ̀ ghəla a lo êzəŋ mo a mughu aŋghəa Zuʼ tə̀ Zɔlɔ tə ləghaa, mò à yò dzə̂ aŋghəa gwən e ughùe e sɛ̀ è ləghaa.

⁵ Tɔŋlo enyəa ghî ghəla ghe ghəə̄ŋ ghəa ghəla gwən e eghùe e ghee e ləghaa, ghe fə̂ŋ tə ghee tə bɔɔm gaʼ naŋa ndùw sùghò aŋ ghəa a te gho. Yia a bugho ghî ghəla ghe mughu an daʼa kə Zuʼ tə zɔlɔ to, ghe moʼnlò e ghee bɔɔm gaʼ naŋa nduw sugho aŋ ghəa à Zuʼ tə̀ Zɔlɔ tə ləghaa.

⁶ Abugho ghùw naŋa tsughu fə̀ŋ è wə̄n am fʉgha wəla gwən e ughùe e wə̄n e ləghaa, vʉ zə ŋ kwu wə̄n. À m bùghò ghùw naŋa tsughu fə̀ŋ e wə̄n am fəgha kəla Zuʼ tə zɔlɔ tə ləghaa, ghùw ù tə ŋ kele èmùghù, lò sugho alo ebughunlo.

⁷ Ghùw wəla ù nì kɔʼ fə̀ŋ è wə̄n naŋa tsughu am fʉgha wəla gwən e ughùe e wə̄n e ləghaa, ghùw ù te baam nǔ ghèe Zə̀ kò. Ghùw u te zuuw yo lâŋ kə Kəzə̀ kò, mò ù tsò buʼ yò alenaŋa làŋ kə te ko.

⁸ Ghî ghəla ghe naŋā fə̂ŋ tə ghee to am fʉgha wəla gwən e ughùe e ghee e ləghaa yo aleghə̂əŋ ghəa ghəla fə̀ŋ è Kə̀zə̀ duʼnlo a te.

⁹ E kuuwn lò ko enyəa ghɛ̀ ka fə fə̂ŋ tɛʼɛ tə naŋa dzə̀ am fʉgha wəla gwən e ughùe zɛʼɛ e ləghaa; ghɛ̀ laam naŋa fə̀ŋ tɛʼɛ to am fʉgha wəla Zuʼ tə Zɔlɔ tə ləghaa, abugho e kûm lò dzə̂ enyəa daʼa kə te kə lo nû a zəŋò ghɛ̀. Ghùw wəla ù ki yo Zuʼ tə̀ Zɔlɔ təla tə nughu wo aŋ ghùu Kə̀lestò fi yo dzə̄ ghùw ù Kə̀lestò.

¹⁰ Abugho e kuuwn lô dzə̂ enyəa Kə̀lestò lò nû am fə̀ŋ tɛʼɛ, aŋghəa e bûʼ lo ko enyəa gwən e ughùe zɛʼɛ e kpuw dòʼò nù bòʼ bòo tɛʼɛ, Zuʼ tə̀ Zɔlɔ tə fughuu nù ghɛ â mùghù zo bòʼ enyəa Zə̀ kə̀ ŋ ghɛ̀ nî enyəa ghɛ̀ lo ghî a tsəghatsəgha gho.

¹¹ Abugho e kuuwn lô enyəa Zuʼ tə Zə̀ kəla kə fə̀ zôm nughu kɔʼ Yɛso alo evʉ lo nû a zəŋo ghɛ̀, e fi lo enyəa wə̄n wəla u mò zôm nughù wo Kə̀lestò Yɛso alo evʉ lo ghəəŋ nù ghue zɛʼɛ zəla e kpuūw lo kôm kele èmùghù, bòʼ Zuʼ tə Kə̀zə̀ təla tə lo a zəŋò ghɛ̀.

¹² Waazə̂ ghaŋa ghò, e fi lo enyəa sɛ̀ ki kəndàŋ, mò ndàŋ kə te kə kuuwn yò dzə̂ alenaam ghəəŋ nduw ko ghəa ghəla gwən e ughùe e sɛ̀ è ləghaa enyəa sɛ̀ è ghəŋlo.

¹³ Tɔŋlo enyəa abugho ghù mughu aŋghəa ghue u ghûw ù ləghaa, ghù lo kpuw. Abugho ghù kuuwn nî kɔʼ daʼa kə Zuʼ tə̀ Zɔlɔ to wì màʼà tsughu ghəa à biigh ghəla a lo a zəŋo ghùe u ghùw a te, ghùw ù te lo mughù.

¹⁴ Ghî ghə̀n a dzə̀m ghe bwiī aŋghəa Zuʼ tə Kəzə̀ tə̀ ləghaa, à lò ghee wɛ a Kəzə̀ gho.

¹⁵ Tɔŋlo enyəa Zuʼ təla Zə̀ kə fughu wo â ghɛ̀ ghə̂əŋ dzə̀ yo enyəa ghɛ̀ doʼò tsughu kɔ̂ wò tò ghɛ̀ è kòom tsəŋo ghəa gho; tə laam ghəŋlo enyəa ghɛ̀ dòʼo tsughu wɛ a Kəzə̀ gho. À lò Zuʼ tə Kə̀zə̀ tə te to tə ghəŋlo enyəa, sɛ̀ è nughuun diī ndùw â Zə̀ kò enyəa; “Bàba! Tsele waŋa!”

¹⁶ Zuʼ tə Kə̀zə̀ àsùghò fə̀ŋ tə sɛ̀ tə̀ ŋ ghəŋlo sɛ̀ yia a kele tsughu enyəa sɛ̀ lo wɛ a Kə̀zə̀.

¹⁷ Ghəa sɛ̀ lò wɛ a wə̄n gho, sɛ̀ lo zəa sùghò nù fʉgha wəla Zə̀ kə fə̀ to naŋa â ghî a wə̄n gho. Sɛ̀ à ghê Kə̀lestò lò dzeŋe zəa sùghò nù fəgha kəla Zə̀ kə mò naŋa â wə̄n; tɔŋlo enyəa, abugho sɛ̀ fala dzəŋlo sɛ̀ à ghê Kə̀lestò, sɛ̀ à ghee e ke dzeŋe lo sugho a dzə̀m an səghanyəgha ŋ wə̄n.

Səghanyəgha məla n naām ki alebùghò

¹⁸ Ŋ̀ kwo nû enyəa fala zəla sɛ̀ fanlo êzəŋ kâ mbùʼ kɔʼ kpe alebàan ndûw ghèe səghanyəgha məla Zə̀ kə̀ lo naāŋ sɛ̀ a te.

¹⁹ Tɔŋlo enyəa fʉgha wə̄n u dzə̀m ghe gbə̂n wô fɛ am mbī lə̀mlo alo mbūw alekòʼ aŋghəa Zə̀ kə̀ lo dêe fughu wô ghî ghəla à kùum lô wɛ a wə̄n gho a te.

²⁰ À ka fə tsə̂m kɔʼ dzə̀ fʉgha wə̄n fɛ am mbī enyəa u e lo kə̀nughùnùghù, à lǒ bòʼ à fə̀ tsəm tsughu Kəzə̀ enyəa ghəa a te ghə e lo êzə̀. Zə̀ kə mafə fôʼ nàŋa tən enyəa,

²¹ e lo zèe zə̀ghà nù fʉgha wən wo u dzə̀m enyəa e kwo u lò kôom kpuūw fîanlo, u e kuuwn ndzəə̄m mughu sugho alo nsəghanyəgha tò wɛ a Kəzə̀.

²² A kwo nû enyəa alekaʼā nughù wô bùghò tɛ̀ wò êzə̄ŋ, fʉgha wən u dzə̀m ghe fə̀ gbə̂n wo dînlo am fɔɔn zəla ghe zuūw tò wìzən lò soʼō wɛ.

²³ À bùʼ kà yo ko fʉgha u te wo u dînlo am fɔnlo e te zo, ghuūghùe e sɛ̀ ghəla sɛ̀ bûʼ ki Zuʼ tə̀ Zɔlɔ to tǒ fughu kə Kəzə̀ kə sûesʉ ko, sɛ̀ zuuw efɔnlo, dìi sughò nʉghà ù nʉ̀ghà aŋghəa sɛ̀ ləmlo enyəa Zə̀ kə̀ lo bughò nîi naŋa tsughu sɛ̀ tò wɛ a wə̄n; asùgho enyəa kə zuū səā sughò tuw kə sɛ̀.

²⁴ À lò bòʼ tùʼ zəla sɛ̀ mò chiī ghè zò aŋ ghəa ghən e mò ghəŋlo ghe bəghasə̄ sɛ̀. Abugho a ki dzə̂ fəgha ko, a kôom kì yo alechì tùʼ a te. À lò ndugho a bugho ù ki fəgha ko a, ù n naam kòom chìi ko tùʼ a te?

²⁵ Abugho sɛ̀ moʼnlò alekele fəgha kə̀là a kaām ki yo, a ŋ ka tsughu ko èzə alechì tùʼ am fəgha kə te ko.

²⁶ À lò sugho eghəla, Zuʼ tə̀ Zɔlɔ tə bughò yòsò nû sɛ̀ aŋghəa a bûʼ ki ko yo nûŋ wò. Tɔŋlo enyəa sɛ̀ bûʼ tɔ̀ʼ kwò yo ghəa zəla sɛ ki alegɔŋlō a te; ghuūghùe u Zuʼ tə̀ Zɔlɔ tia tə buʼù gɔ̂ŋlo an tuw u sɛ̀ alo edì mò ghùw yò dzə̂ aleteso dzɛ̂ shwaʼ u te wo.

²⁷ Zə̀ kəla kə koʼò tɔɔ̄n nyəā wô fə̂ŋ tə sɛ̀ tò kwò nû moʼnlò e Zuʼ tən to: bò Zuʼ tə̀ Zɔlɔ tə te tə gɔ̂ŋlò an tuw ghì a Kəzə̀ an dziī zəla Zə̀ kə̀ ləghaa ghè zò.

²⁸ Sɛ̀ kwo nû enyəa alo aghəa a dzə̀m, Zə̀ kə̀ fwaʼa ko alekòʼ enyəa ghî ghəla ghe ləghaa wə̄n e mugho dzɔ̄. Ghən lò ghî ghə̀là kə̀ fə̀ tɔŋɔ̄ aleghəŋlo enyəa ghəa ghəlà kə mò fôʼ naŋa a bughò sə êzə̀.

²⁹ Ghî ghəla Zə̀ kə mò ki kwo ziī ŋ ghee tsuʼ naŋa enyəa ghee e lo sugho tǒ wɛ ù wən ù nùu wən, enyəa wɛ ù wə̄n ù nùu ù wən e lo wɛ ù sûesʉ am bvʉa e ndə̀m è ghì ghəla ghe boō fughu â Zə̀ kò.

³⁰ Zə e lô sugho enyəa, ghî ghəla Zə̀ kə̀ lo mo kə m bàʼ nàŋa sə̀ wò bâ kə̀ mɔ̀ʼ, à lò ghəla kə fə̀ tɔŋɔ̄ enyəa ghe e lo ghî a wə̄n gho. Ghe a te ghəla kə fə̀ tɔŋɔ̄, kə ŋ ghəŋlo, ghe yia doʼò tsəghatsəgha a vʉ̀a wə̄n, chia kə ghəŋlo enyəa ghe kele sughò kɔʼso məla kə ki.

Ləgha zəla Zə̀ kə ki â ghì a wə̄n gho

³¹ Abugho ghəa alo enyə, a n lo to a e dzɛ̂ èndugho a te à? Abugho Zə̀ kə̀ ti sɛ̀ à ghee, ghùw wəla ù kòom lo tò ù è tsûuwn lɔ̀m kə sɛ̀ à lò ndughoō?

³² Wən wəla ù fə̀ tâʼkè ghôʼ wɛ ù wə̄n, kuuwn nì fùghù sə̀ wò wə̄n tò kəfughu an tuw u sɛ̀ a dzə̀m. Abugho ù fə̀ lô alenìi fughuu səā wô Wɛ ù wə̄n ù nùu, fəgha kə̀ li kə kôom lò nû à ghèe wɛ u wə̄n lo aledòʼò mò ghe kâ â sɛ̀ nî fùghù wò à?

³³ À lo fəgha kə̀ nsɔ̌ɔŋnchùw kə̀ ghɛ ko kə lô alekòom bamsô dzughu e ghûw mò Zə̀ kə̀ ŋ wə̄n shîaa a? À lò Kəzə̀ kə ghəŋlo enyəa ghî à doʼò tsəghatsəgha a vʉ̀a wə̄n.

³⁴ À lò ndugho ù lò aledzɛ̀ enyəa a m bvʉ̌ saʼ a? À lǒ mò à lǒ Kə̀lestò Yɛso wəlà ù mò kpuw dzə a, ŋkāa à lǒ wən wəla ghe mò zôm nughù kɔʼ alo evʉ a, vʉa u doʼ ezəŋ an kwe u Kəzə̀ u təma wo, dìi fughû dì e sɛ̀ à?

³⁵ À lò kə kwò kə lò alesɛ̀ɛ nughù səā wô sɛ̀ an ləgha zəla Kə̀lestò ki â sɛ̀ a? À lò utsû u lô alesɛ̀ɛ maʼa sɛ̀ a ŋkāa efala a, ŋkāa kə̀fə̀mso, ŋkāa à lǒ dzə̀ŋ, ŋkāa elɛ ŋkāa kə̀tsə̀ŋso a, ŋkāa à lò evʉ?

³⁶ Ghe tɔm naŋa am Mwàʼsò kə Kəzə̀ enyəa, “Ghe wiin ghàʼ tsùʼù mən n dzə̀əm dzə̀m aŋ ghəa zəghà, ghe yia ghe lɛɛ̄n ghaʼ ghən tǒ ndzì təla ghe ki sughoo wī.”

³⁷ Ghəa è bûʼ lô ko ezə̀, sɛ̀ yia tsôo naam tughu tsəghà nduw ghəa a te gho a dzə̀m am bàm e Kə̀lestò wəla ù ləghaa sɛ̀.

³⁸ Tɔŋlo enyəa Ŋ̀ kwo nu enyəa evʉ, kàa emughù, tsə̀təndə̄ghā tə Kəzə̀, ŋkāa dwə̀ŋ ù saʼa wo, fʉgha wəla u lo, ŋkāa wəla u naām ki alebùghò ŋkāa udwaʼa,

³⁹ ŋkāa fʉgha wəla u lo edzuŋ ŋkāa àsùghò wəla u lo aŋ ghueekətsə̄, ŋkāa fəgha kə nsɔ̌ɔŋnchùw kə̀ li kə̀ yo dzə̂ am mbī e dzə̀m kə lo yò dzə̂ alegbòo sɛ̂ɛ sɛ̀ an ləghaa zəla Zə̀ kə̀ ki a sɛ̀ a m bàm e Yɛso Kə̀lestò Yɛso Mughùbè ù sɛ̀.