Bìoball air-loidhne

Lumà 7 - To kə Kəzə̀ kə̀ Fughu ko

Ghəa ghəla nî zə eghùe a deē kùu ndùw kəlàŋ

¹ Waazə̂ ghaŋa gho, ghɛ̀ kwo nû lâŋ kò. À lǒ mò ghɛ̀ məghaa nù enyəa lâŋ kə̀ ki ko kədaʼa a zəŋò ghùw an nə̀gha zəla ghùw ù te naām lo â tuw ko a?

² Zə̀ lò e ghee wizən wəla ù ki num ki alebɔɔm lo ko ghee num ù wə̄n abugho num nāam lô dzə â tuw ko; mò à kuuwn lò enyəa num ù te m kpuw, lâŋ kə te kə ŋ kôom gěen yo wìzən ù te ghè num ù wə̄n u te.

³ Abugho wìzən ù te ti nî nduw wìnû ù lì mò num ù sʉesʉ wən naam lǒ â tuw ko, à fi lo enyəa a ki aletɔŋɔ wìzən ù te enyəa à lò nùuŋ kə wîzən. Abugho e kuuwn lô enyəa num ù sʉesʉ u te kpuw nû, à fi lo enyəa wìzən ù te n sə̀ nùghù an làŋ kə te ko. Mò ù ndùw nì ko num ù nùghù, e te e yo dzə e nûŋlò.

⁴ Waazə̂ ghaŋa gho, à lò sugho ghəa è mɔʼɔ zo â ghɛ̀, ghɛ̀ êzəŋ e lo tò ghî a kpuuwn gho abugho e bugho alo kəlàŋ am vʉ zəla Kə̀lestò fə̀ kpuw ghè zò. Sɛ̀ êzəŋ e ndzə̂əm lo ghî a ghûw wəla ghe fə̀ zôm nughù kɔʼ alo evʉ̄, tò sɛ̀ è lo ghî ghəla mughù e ghee e fughuu kɔʼso mò â Zə̀ kò.

⁵ Tɔŋlo enyəa nəgha zəla sɛ̀ mò naam mughu mughù e mbī zo, a ŋ ki mmbuuw aleghəəŋ ghəa a biigh gho, mò à soʼn kɔʼɔ kəlâŋ enyəa a e fəghaan ghəəŋ ghəa à biigh a te gho. Sɛ̀ m fwaʼà fughuu ndùw â vʉ zo.

⁶ Yia kuuwn bugho ezəŋ, ghe n sɛ̀ am fàŋà kə kəlàŋ zê zə̀ghà, sɛ̀ èzəŋ e lo tò ghî à kpuuwn gho â fəgha kəla kə mò ki tsəgha daʼa ko a zəŋò ghɛ̀. Sə̀ kôom fwàʼà yo aŋghəa làŋ kə deē, sò kǔuwn mughu mùghù è fughu zəla Zuʼ tə̀ Zɔlɔ tə fughuu.

Lâŋ kə̀ dêe fùghu bo e ghûw

⁷ A yia fɛ èzəŋ kə̂aa èndughō? À sò lo enyəa lâŋ kə̀ lo ebō ŋkāa? Ɛ̂ŋgaŋ, à dɔ̀m yò dzə̂ èzə̀. Zəa e kuuwn lô enyəa abugho à mò buw â làŋ kò mùgho mò sô ŋ kele yò fəgha kəla bo e lo ghè kò. Mùgho mò so Ŋ̀ kele dzə̂ yò enyəa sə à səa à lo ebo, abugho lâŋ kə̌ fə̀ taʼ kə̀ dzâa tsughu enyəa, “Kà â sə gho e səa am fʉgha u aghì.”

⁸ À kuuwn lò ko enyəa, lâŋ kə fughuu dzì â bo zo aleghəŋlo enyəa mùghò è səa â sə gho. Dèe êzə̀ abugho à mò buw â lâŋ kò, to bo e mò kì yo daʼa kə̀ li ko.

⁹ Ghuūghùe waŋā, mùgho fə̀ mughu tsəgha mò Ŋ̀ kwo yo lâŋ kò, a m bùghò lâŋ kə Kəzə̀ kə̀ ndûw bugho, bo e fi dê sə̀ wò sùghò nù ghue wo, mùghò ŋ kuuwn lǒ tò m kpuw dòʼò nù.

¹⁰ Lâŋ kə Kəzə̀ kə̀ mɔʼɔ̄ kəla ghe fə̀ dzɛ̂ enyəa kə nîi wò èmùghù, â ŋ kuuwn lò â mùghò to kə nîi wò èvʉ.

¹¹ Tɔŋlo enyəa lâŋ kə Kəzə̀ kə fə̀ fughu tsughu dzì â bo zo enyəa e nɔɔ̄ fughu mugho, zə ŋ ghəəŋ ko êzə̀ wì maʼà tsughu mugho.

¹² À fi lo enyəa lâŋ kə̀ lo fəgha kəla kə zɔlɔ̄. Lâŋ kə Kəzə̀ chia kə zɔlɔ, lò tsəghatsəgha, dzɔ̀ɔ sùghò.

¹³ À sò yia fi lo enyəa fəgha kə̀ dzûŋ kə̀ mò koōm ni wo mugho â vʉ zo a ŋkāa? Ɛ̂ŋgaŋ dzə, à fə̀ lo ebo e fə̀ nî wô vʉ zo a zəŋò mùghò a m bàm e kəlàŋ, mò à lò fəgha kə dzɔɔ̄ ko, aleghəŋlo enyəa Ŋ̀ kele fəgha kəla bo e biso lo ghè kò, to lâŋ kə Kəzə̀ kə̀ e lo aledèe fughuu wô enyəa bo e ŋge lo fɛ̀ɛn kə kəfəgha.

Də̀m kəla kə lo aŋ ghùe e sɛ̀

¹⁴ Sɛ̀ kwo nû enyəa lâŋ kə̀ lo fəgha kə ushʉghà, yìa Ŋ̀ kuuwn lo ghùw nsɔ̌ɔŋnchùw ghe fêe fughu nduw â bo zo to kəkɔ̀.

¹⁵ M̀ buʼu zǔuwkɛlɛ yo ghəa ghaŋa à gho, nu Ŋ̀ ghəəŋ yo ghəa zəla M̀ bughoo mùghò n ləghaa aleghəəŋ ghè zo, mùghò ŋ kuuwn ghəəŋ ghəla M̀ bɛ̂ buʼ.

¹⁶ Abugho e lo enyəa Ŋ̀ ghə̂əŋ ghəa ghəla M̀ bɛ̂ buʼ, à fi lo enyəa mùghò m boo enyəa lâŋ kə̀ lo fəgha kə̀ dzûŋ kò.

¹⁷ À fi lo enyəa à kòom yò dzə̂ mugho ù mɔ̀ʼɔ ù te Ŋ̀ ghəə̄ŋ ghəa a te gho, à lò bo zəla e lo am fə̂ŋ zaŋa e ghəŋlo enyəa mùgho e ghəəŋ ghəa a te gho.

¹⁸ Ŋ̀ kwo nû enyəa ghəa e dzûŋ e li yo dzə̂ am fə̂ŋ zaŋa, tɔɔŋ mùghò tǒ ghùw wə nsɔ̌ɔŋnchùw. Nù Ŋ̀ ki nû moʼnlò e te zo aleghə̂əŋ ghəa e dzûŋ zò, mùghò ŋ kuuw yò aleghə̂əŋ ghəa e te zo.

¹⁹ Tɔŋlo enyəa Ŋ̀ ghəəŋ dzə̀ yò ghəa a dzûŋ ghə̀là M̀ bugho mùghò n ləghaa aleghəəŋ ghè ghò. Mùgho ŋ kuuwn ghə̂əŋ bo zəla Ǹ ləghaa yo aleghəŋlo.

²⁰ Abugho Ŋ̀ kuuwn ghəə̄ŋ ghəa ghəla Ǹ ləghaa dzə̂ yo aleghəŋlo, à kòom nǎam yo dzə mugho ù mɔ̀ʼɔ u te Ŋ̀ ghəə̄ŋ ghəa a te gho, à lo bo zəla e lo am fə̀ŋ zaŋa e ghəŋlo enyəa mùghò è ghəəŋ ghəa a te.

²¹ À ndòʼ lǒ tò ghəa è foʼō naaŋ zo enyəa abugho M̀ moʼn tsughu aleghəəŋ ghəa è dzûŋ zò, à m bughòo kô ghəa è biigh zo.

²² Ǹ ləghaa làŋ kə̀la à fughu wo Zə̀ kò am fə̂ŋ zaŋa e dzə̀m.

²³ Yìa à sò kuūwn lô ko enyəa lâŋ kə̀ nughù kə̀ lo nû kə zughù kaāŋ tsəgha a zəŋò mùghò ghèe kəla Ŋ̀ gaʼ fə̀ŋ zaŋa a te, mo lâŋ kə te kə ghəəŋ nù yìa Ǹ doʼn ndûw kɔ̂ kô â bo zo.

²⁴ Ghî fə faan fo enyə tò mugho, à ndà lò ndugho ù lo lô alebəghaasə mugho aŋ gwən e ughùe zaŋa zəla e ki alekpuw a?

²⁵ Zɔ̀ɔŋ kə̀ lo â Zə̀ kò, kəla kə lo alebəghaasə mugho a m bàm e Yɛso Kə̀lestò Mughùbè ù sɛ̀! À fi lo enyəa mùghò am moʼn zaŋa, M̀ fughuu nu kɔʼso mò â làŋ kə Kəzə̀ kò. À m bùghò Ǹ lo an ghùe waŋa mùghò m bwîi nduw an daʼa kə ebō.

« Roimhe

Air adhart »

2020

Lean sinn:

Ceanglaichean taic

Sanasan