Lumà 6 - To kə Kəzə̀ kə̀ Fughu ko

Bo e kôom ki yo daʼa ko a zəŋò sɛ̀

¹ Sɛ̀ fɛ èzəŋ e lo to sɛ̀ e dzâa tsughu êndughō a? A sô yia ki aleghəəŋ nduūŋ nduw ko bo zo to Zə̀ kə̀ e ŋgee deē nduūŋ wo ko dzɔ̂ e wə̄n zo â sɛ̀ ŋkāa?

² Ɛ̂ŋgaŋ dzə̂! Abugho à lò aleghəŋlo ebo, sɛ̀ êzəŋ e lo tò ghî a kpuuwn gho. E fi lo enyəa sɛ̀ kôom ki yo alenaam mughu nduw ko alo ebō.

³ À lǒ mò ghɛ̀ məghaa nù enyəa sɛ̀ a dzə̀m ghəla ghe mò fughu tsughu sɛ̀ â mùghù ŋ Kə̀zə̀ mò enyəa sɛ̀ doʼò kə fəgha kə mɔ̀ʼ sɛ̀ à ghê Kə̀lestò Yɛso fə̌ fi lo aledèe tsughu enyəa sɛ̀ mafə kpuw dzəŋlo sɛ̀ a ghê Kə̀lestò.

⁴ Mùghù ŋ Kə̀zə̀ məla ghe fə̀ fughu â sɛ̀ fə̌ fi lo ko to ghe tsəla dzəəŋ ndùw sɛ̀ à ghê Kə̀lestò to ghî a kpuuwn gho, enyəa to sɛ̀ mô mùghù sugho mughù è fughu zo to aŋghəa Tsele ù te fə̀ zôm nughu kɔʼ Yɛso alo evʉ̄ am fɛ̀ɛn kə kədaʼa kə wə̄n.

⁵ Abugho e lo enyəa sɛ̀ à ghê Kə̀lestò mafə doʼò fəgha ko kə mɔʼ aŋghəa sɛ̌ fə̀ kpuw sugho tǒ wə̄n, sɛ̀ lo kɔʼɔ səa sùghò nù alo evʉ̄, tò aŋghəa Yɛso kɔʼ sə a te alo evʉ.

⁶ Sɛ̀ kwo nû enyəa fəgha kəla sɛ̀ mò bûʼ lo tsəgha ghè kò mafə kpuw nùghùu alo kədàŋlo ghèe Kə̀lestò, enyəa to Zə̀ kə̀ mô wiī maʼa mbuw fə ghəa a biigh gho a zəŋò sɛ̀, alezèe zəghà sɛ̀ am fàŋa kə ghəa à biigh gho.

⁷ Tɔŋlo enyəa ghùw wəla ù kpuw tsughu, ghe fi zê zə̀ghàa wə̄n am fàŋa kə ebo.

⁸ Aŋghəa sɛ̀ lo mò sɛ̀ maā kpuw dzəəŋ sɛ̀ à ghê Kə̀lestò, sɛ̀ kûm kwò nû enyəa sɛ̀ à ghee lo dzeŋe mùghùun sùghò nù.

⁹ Tɔŋlo enyəa sɛ̀ kwo nû enyəa ghəa ghəla ghe fə̀ zôm nughù kɔʼ dzə Kə̀lestò alo evʉ̄, ù kè kòom kpuw kòʼ yò, nu vʉ e kôom ki yo daʼa ko a zəŋò wə̄n.

¹⁰ Vʉ zəla ù fə̀ kpuw ghè zò, ù fə̀ kpuw tən ko êsəŋò alebuū bughuso tsughu kwa wə ebō. Mughù zəla ù mughu ghè zò, ù mùghù â Zə̀ kò.

¹¹ An dzîi è mɔ̀ʼɔ, a lò sugho êzə̀ vʉ e kôom ki yo daʼa ko a zəŋò ghɛ̀, ghɛ̌ êzəŋ e kuuwn mughu â Zə̀ kò aŋghəa ghɛ̀ lô fəgha ko kə mɔ̀ʼ ghɛ̀ à ghê Kə̀lestò Yɛso.

¹² E kwo ko bo e lǒ so e kòom kele daʼa kə li ko aŋ gwə̀n e eghùe zɛʼɛ zəla e lo doʼn təla yo, aŋghəa e lô aletsəə̄n nduw ghùw aleghəə̄ŋ ghəa à biigh ghəla gwən e ughùe e ləghaa.

¹³ E kwo ko ghùw wɛʼɛ lò so e nîi kɔ̀ʼɔ̂ bà kə ughùe kə wən kə̀ li ko ù naŋā tsughu tò fəgha kə kəfwàʼ kə ebō. Laam fùghù nduw nlò ghùe zɛʼɛ zo â Zə̀ kò, tò ghî ghəla ghe baāŋ nughù sə tsughu aŋ ghu kə evʉ, naŋa wò ghee â tuw ko enyəa ghɛ̀ e mughu mùghù è fughu zo. Naŋa tsughu nlò ghùe zɛʼɛ zo e dzə̀m zə elo tò fəgha kə kəfwàʼ kə Kəzə̀ kəla kə lô tsəghatsəgha.

¹⁴ Bo e lo kòom kì yo daʼa kə̀ li ko a zəŋò ghɛ̀, mbuu ghɛ̀ kôom yò dzə a tsəlà làŋ kò, nu ghɛ̀ êzəŋ kuuwn mùghu an dzɔ̀ e Kəzə̀.

Kɔ̂ wəla u fwaʼà ghəa a tsəghatsəgha gho

¹⁵ A lo aledzàa tsughu êndughō êzəŋ a? À lò enyəa sɛ̀ ki aleghəəŋ nduw ko ghəa a biigh gho aŋghəa sɛ̀ sô kôom mughu yo a tsəla làŋ ko a, bòʼ a sô kuuwn mùghù an dzɔ̀ e Kəzə̀ à? Ɛ̂ŋgaŋ dzə̂!

¹⁶ Ghɛ̀ kwo yo enyəa abugho ghɛ̀ boo tsughu alezuuw lâŋ kə ghûw kò tò ukɔ̂, ghɛ̌ fi lo ukɔ̂ â ghuw ù te a? Ghɛ̀ lo aledòʼò ùkɔ̀ â ghəa à biigh gho, ghə n nì wò èvʉ, ŋkāa ghɛ̀ e zuuw nduw â Zə̀ kò, to ghɛ̀ e mughu mùghù e tsəghatsəgha zo.

¹⁷ E sô kuuwn lò ko enyəa, a fughu kəzɔ̀ŋlò â Zə̀ kò enyəa ghɛ̀ ghəla ghɛ̀ mo bûʼ lô tsəgha kɔ̂ wò â ghəa a biigh gho, ghɛ̀ bwîi nù aŋ ghəa ghəla ghî ghəla ghe mo zoʼn ghɛ a te fə̀ fughu naŋa â ghɛ̀.

¹⁸ Aŋghəa ghe lo mo ghe ŋ ghɛ̀ am fàŋà kə ebo zê zə̀ghà, ghɛ̌ èzəŋ lo ukɔ̂ â Zə̀ kò aleghəəŋ ghəa ghəla a lô tsəghatsəgha.

¹⁹ Ŋ̀ ghəa ghən fɛ â ghɛ̀ kə̂aa wo tò ghùw nsɔ̌ɔŋnchùw, tɔŋlo enyəa ghəa à li a lo nû a tughuu â ghùw alezuūwkɛlɛ. À fə̀ bugho an tì kə̀ li ko, ghɛ̀ n nì kɔ̀ʼ ghùe zɛʼɛ naŋa tsughu tò ukɔ̂ aleghəəŋ kaaŋ tsə̀ghà dzə̀adzə̀ tə aghəa to àsùghò ndə̀mà tə ghəa a biigh to a te. An ndziī è mɔ̀ʼɔ è te, ghɛ ni kɔʼ sugho ghue zɛʼɛ zo e dzə̀m tò ukɔ̂ aleghəəŋ ghəa ghəla a lǒ tsəghatsəgha, ghəla a ghəŋlo enyəa ghùw e zɔlɔ.

²⁰ Tî kə̀la ghɛ̀ mò lô tsəgha kɔ̂ wò â bo zo, ghɛ̌ fə̀ ki yo ghəa è li zo aleghəŋlo aŋ ghəa ghəla a lô tsəghatsəgha.

²¹ Alebùʼù nîi tsughu, namso kɛʼɛ kə mò lo kwò aŋ ghəa à biigh ghəla ghɛ̀ mò buʼù ghəəŋ tsəghà a, mo a ghəŋlo enyəa ghɛ̀ e ki tuw dəla ko êzəŋ a? Ghəa a te lo ko aletɔŋɔ wo evʉ.

²² À sò kuuwn lò ko enyəa êzəŋ wəla ghe lo mo ghe ŋ ghɛ am fàŋa kə təbòo kə̀ zê zə̀ghà, ghɛ̀ yia lô kɔ̂ wò â Zə̀ kò, namso kɛʼɛ kə lo mughù è zɔlɔ zo. Ghəa a te a nîi wò mùghù è doʼn təla zo.

²³ Ghɛ̀ kele tsughu enyəa, namso kəla ghùw kele am bo zəla ù ghəə̄ŋ tsughu lò evʉ, Zə̀ chia kə kuuwn tsôo ndzə̂əm fughuu ko mughù è doʼn təla zo am bàm e Kə̀lestò Yɛso, Mughùbè ù sɛ̀.