Lumà 5 - To kə Kəzə̀ kə̀ Fughu ko

Zə̀ kə̀ ghəŋlo enyəa sɛ̀ e lo tsəghatsəgha an sə kə wə̄n

¹ Ghəa e lo êzə̀, Zə̀ kə̀ n nì sɛ̀ aŋ ghì a tsəghatsəgha gho bòʼ enyəa sɛ̀ gaʼ fə̀ŋ a zəŋò wə̄n, sɛ̀ à ghê Zə̀ chia kə lò sugho alo ebughunlo am bàm e Mughùbè ù sɛ̀ Yɛso Kə̀lestò.

² À lò fə̀ŋ zəla sɛ̀ gaʼ tsughu a zəŋò Kə̀lestò è ghəŋlo enyəa a kelê dzɔ̂ e Kəzə̀ zən, zəla a mughu êzəŋ a te, yia a duʼnlo, chìi tùʼ enyəa a lo dòʼn nù an nsəghānyəghā ŋ Kəzə̀ məla n lo à sə̌ ko.

³ Zəla e bûʼ tsəgha taʼa zən lò enyəa, sɛ̀ ki aleduʼn sugho am fala e sɛ̀, bòʼ sɛ̀ kwo nû enyəa fala e ghəəŋ nù sɛ̀ n lo alekɔlɔ fə̀ŋ alo aghəa.

⁴ Abugho sɛ̀ kɔlɔ tsughu fə̂ŋ tò alo eghəa, Zə̀ kə n duʼn sɛ̀ à ghee. A m bùghò kə duʼn sɛ̀ à ghee, ghəa a te ghə ŋ ghəŋlo sɛ̀ n chîi tùʼ enyəa a lo zəa nù tuw ko.

⁵ Tùʼ zəla sɛ̀ chiī yo dzə̂ alebvʉ̀sò maʼà sɛ bòʼ enyəa Zə̀ kə̀ n dzə̀n nàŋa ləgha e wə̄n zo am fə̀ŋ tə sɛ̀ an Zuʼ tə Zɔlɔ təla kə fughu â sɛ̀.

⁶ A fə bugho an tì kəla sɛ̌ fə̀ yo aleyòsò ghue e sɛ̀, Kə̀lestò u m bùghò kpuw an tuw u ghì biigh gho an nə̀gha zəla Zə̀ kə̀ mò fôʼ naŋa enyəa e lo səa a te.

⁷ E ŋgee tughu nù â ghùw aleboo enyəa e kpuw an tuw kə ghùw ù lì, abugho ghùw ù te tso bûʼ lô ko ghùw ù tsəghstsəgha, mò e ŋgəəŋ lò ko nû enyəa to ghùw ù li naām ləghaa alekpuw an tuw kə ghùw ù dzùŋ.

⁸ Zə̀ chia kə kwuun dê tsughu ləgha e wən zo a ghəa zən enyə, a fə bugho sɛ̀ fə̀ naam lô ghî a biigh gho, Kə̀lestò m bughò kpuw an tuw u sɛ̀.

⁹ Êzə̄ŋ wəla Zə̀ kə lo mo kə sɛ̀ nî aŋ ghì a tsəghatsəgha gho bòʼ kâŋ tə Kə̀lestò, sɛ fɛ kwo tən sugho nû enyəa Kə̀lestò lo bəghaasəa nǔ sɛ aŋ ghùu nʉ̀ghà u Kəzə̀ ù pfʉa wo.

¹⁰ Ghəa sɛ̀ fə̀ buʼù lô tsəgha ko ghî a kətuw a Kəzə̀ ghò, Zə̀ kə n naam nì təm dzəəŋ wò ko sɛ a ghee alo kəfəgha kə mɔ̀ʼ an vʉ e wàa wən. Yia abugho êzəŋ wəla sɛ̀ lô ghî a wə̄n gho, sɛ ki alekwo tən enyəa Kə̀lestò lo bəghasəa nǔ sɛ̀ êzəŋ wəla ù lò â tuw ko.

¹¹ À kà yò ko ezə̀, a ki sugho nû duʼn zo â Zə̀ kò bôʼ Yɛso Kə̀lestò, Mughùbè u sɛ̀ wəla ù ghəəŋ tsughu sɛ̀ yia a lò fən gho sɛ̀ à ghê Zə̀ kò.

Adàm nì wò evʉ, Yɛso vʉ̀a ù nì wô mughù zò

¹² Bo e fə nyə wo am mbī mo e kaʼ tsughu a zəŋò ghùw u mɔ̀ʼ. Bo e te zə n nì wò è vʉ. Vʉ zə n ndàŋ nduw a zəŋo ghì ghò a dzə̀m am mbī bòʼ aghî a dzə̀m ma fə ghəəŋ bo zo.

¹³ Bo e fə̀ ki lo ziī nu am mbī sěe lâŋ kə̀ sô bughoō, zə e sô kuuwn lô enyəa luʼu kəla lâŋ kə̀ buw a te, ghe naaŋ tsə̀ghà yǒ taŋ è tə̀bòo a fughu èzə̀.

¹⁴ Zə e naam lô enyəa vʉ e fə̀ dəghaan tsughu a zəŋò Adàm bughò kùm wò a zəŋò Musî. Zə n kwu daŋso ndùw sùghò ghì ghəla bo e ghee e fə̀ yô dzə̂ enyəa ghe zaʼ lâŋ kə Kəzə̀ tò Adàm. Adàm fə̀ lo tǒ tsə̌a â ŋgòʼ è ghùw wəla ù fə̀ ki alebùghò.

¹⁵ Namso kəla Zə̀ kə̀ ndzə̂əm fughuu wo yo dzə tò bo e Adàm. Tɔŋlo enyəa ndə̀m e aghì fə̀ kpuwnlo bòʼ bo e ghûw u mɔ̀ʼ. Dzɔ̂ e Kəzə̀ zəa e kuūwn ŋgeē duūw àsùghò ndzə̀əm kə kənamso kə wə̄n kəla ù fughu â ndə̀mà tə aghì tò am bàm e dzɔ̀ e ghùw ù mɔ̀ʼ sughò, tɔɔŋ Yɛso Kə̀lestò.

¹⁶ Namso kəla Zə kə̀ ndzə̂əm fughu â ghì ghò yo to tsû wəla bo e ghùw ù te u mɔ̀ʼ e nîi wo. Tɔŋlo enyəa aŋghəa ghùw wə̄n u mɔ̀ʼ fə̀ ghəəŋ tsughu bo zo, Zə̀ kə n saʼ wə̄n enyəa ù bvʉ̌ saʼ. Zə kə̀ n dè ndə̀m e aghì ghəla ghe mò ghəəŋ tsughu bo zo â dzɔ̀ e wə̄n zo, nì nàŋa wò ghee enyəa ghe lo tsəghatsəgha.

¹⁷ E kûm lò êsəŋò enyəa vʉ e fə̀ am mbī nyə wo bòʼ bo zəla ghùw mɔ̀ʼ fə̀ ghəə̄ŋ tsughu tɔɔŋ Adàm. Zəa e kuuwn ŋgee zɔlɔ enyəa fəgha kəla ghùw ù mɔ̀ʼ wən tɔɔŋ Yɛso Kə̀lestò fə̀ bughò fwâʼ tsughu ŋ ghəŋlo enyəa ghî ghən a dzə̀m ghe lo mo ghe ŋ kòʼ dzɔ̂ e Kəzə̀ è nêe ne zo, Zə̀ chia namso sugho ghee enyəa ghe e lo sugho tsəghatsəgha an sə kə wə̄n lo ki nû daʼa ko alemughu am bàm e Kə̀lestò.

¹⁸ Ghəa e lô enyəa aŋghəa bo e ghûw u mɔ̀ʼ e fə̀ ghəŋlo Zə̀ kə̀ n dzɛ̀ enyəa aghî a dzə̀m ghə̀ m bvʉ̂ sāʼ, e fi lo nû enyəa ghəa e ghûw e dzûŋ zò e mɔ̀ʼ zə ŋ ghəŋlo Zə̀ chia kə zê zəghà ghî yia a bughò doʼò tsəghatsəgha a vʉ̀a wə̄n, chia kə fughuu sughò ghee a mùghù zò.

¹⁹ À fə̀ lo bòʼ tughu e kətuw e ghùw u mɔ̀ʼ ndə̀mà tə aghì tə fə̀ ndûw bugho ghî à biigh gho, à lo sugho eghala bòʼ ghùw ù mɔ̀ʼ fə̀ zuw sugho lâŋ kò e fə̀ ghəŋlo ndə̀mà tə aghì tə lo bugho doʼn tsəghatsəgha.

²⁰ Ghəa lâŋ kə bugho am mbī, bo zə n kôom fəghan dùw e tsughu. A m bùgho bo ŋge dûw tsughu am mbī, dzɔ̂ e Kəzə̀ zə ŋ kuuwn tsə̀ghàsə̀ è tsughu.

²¹ Tò aŋghəa daʼa kə ebo kə fə̀ nî wô vʉ zo, à lò sugho eghəla dzɔ̂ è Kəzə̀ è ki daʼa ko aleghəŋlo enyəa ghuw e lo tsəghatsəgha â wən alekele mùghù è doʼn təla zo am bàm e Yɛso Kə̀lestò Mughùbè ù sɛ̀.