Lumà 3 - To kə Kəzə̀ kə̀ Fughu ko

¹ À lo ŋgè lò nu dzɔ̀ alelo ghù ù Dzûu tsə̀ghasə alelo ghî ghəla ghe yô Dzûu tò zo a te a? Ŋkāa namso kə̀ li kə lo nû ghùw kele abugho ghe sugho tsughu tigh kə wə̄n ko a?

² Òo, ghəa a te a lo ndə̀m. Alekaʼa nughu tsughu, ghe fə̀ lâŋ kə Kəzə̀ kə̀ fughu naŋa aŋ ghùu Dzûu to.

³ À fə̀ sə kə kwò aŋghəa ghee à li a tɔ̂ʼ tì yo am boo e ghee a? Aŋghəa ghee à li a fə̀ taʼkè ghə̂əŋ ghəa ghəla ghe fə̀ boō naŋa aleghəŋlo, e fə lo nû enyəa Zə̀ kə̀ yo sugho aleghəə̄ŋ ghəa ghəla kə fə̀ to naŋa a?

⁴ Ɛ̂ŋgaŋ dzə̂, e dɔ̂m yò aledòʼò ezə̀. Zə̀ kə̀ lo tsəghatsəgha, abugho aghî a dzə̀m bùʼ kaʼn mɛʼɛ̀ nduw ko gha gho: to aŋghəa ghe tɔm naŋa am mwàʼsò kə Kəzə̀ enyəa, “Ghù ki aledèe tsughuu enyəa ghù lò tsəghatsəgha abugho ghù kə̀aa ghəa gho, mo ghe nî nduw ko ghù an tia e saʼ, ghù n saʼ e zə.”

⁵ Ghî a li a lo nû aledzɛ̀ enyəa abugho a ghəəŋ boo zo, ghî ghə̀ n lo alekòʼ enyəa Zə̀ kə lo nû tsəghatsəgha. A lo nû aledzɛ̀ enyəa, Zə̀ kə ghəəŋ boon nù abugho kə dêe nʉgha u wən ù pfʉa wo a zəŋò sɛ̀ a? (Ŋ̀ ghəa ghən gho enyə kə̀aa an dziī è ghùw nsɔ̌ɔŋnchùw).

⁶ Ɛ̂ŋgaŋ dzə̂! Abugho e lo êzə̀, Zə̀ kə̀ làʼa so mbī kuuwn bòʼò saʼa ènzə̂n?

⁷ Ghî a li a lo aledzɛ̀ enyəa, “Abugho gha ghaŋā à kaʼnlo a ghəŋlo enyəa Zə̀ kə̀ kele ŋkɔʼso an səŋò e wə̄n, à sò lǒ kwò ghe naam dzâa ko enyəa Ǹ lo ghùw ù bǐigh a?

⁸ À lǒ kwò a yo aledzàa tsughu enyəa, bùghò tò sɛ̀ e ghəəŋ nduw ko bo zo a, tò dzɔ̂ e lo sə kɔʼ a te a?” Ghî a li a ŋgaam nɔ̀m wo ndzɔŋ am bì zaŋa enyəa à lo mugho Ŋ̀ kə̂aa ghəa ghən gho. Ŋgòʼ e ghì ghən kpe nû â Zə̀ kò alefɔeso ghee.

Ghùw ù li yo dzə̂ wəla ù tɔ̀ʼ lô tsəghatsəgha

⁹ A èzəŋ lo to a e dzɛ̂ èndugho? A lo nû aledzɛ̀ enyəa sɛ̀ Tə̀dzûu kuuwn nyɔ̀ʼ ti nû à? Ɛ̂ŋgaŋ dzə̂, tɔŋlo enyəa M̀ maa ki dzɛ̀ enyəa ghəa à biigh ghə ŋ kwù ŋgwùu ghî ghò a dzə̀m; Tə̀dzûu àsùghò ghì ghəla ghe yô Dzûu tò.

¹⁰ Ghe tɔm naŋa am Mwàʼsò kə Kəzə̀ enyəa, “Ghùw u li yo dzə̂ ù lo tsəghtsəgha, u mɔ̀ʼ kɔʼkɔʼ ŋgəmso yo dzə̂.

¹¹ Ghùw u li yo dzə̂ ù zuūwkɛlɛ ghəa zəla e lo tsəghatsəgha, ŋkāa ghùw li yo dzə̂ ù lò aletɔ̀ʼɔ̀ fughuu mɛʼɛ̀ tsughu ŋkɔʼso â Zə̀ kò enyə kpekpe.

¹² Aghî a dzə̀m ghə̀ n nyuʼu dzəm to a zəŋò Zə̀ kò, ghe yia a ghəə̄ŋ boōn ndûw ghəa gho. Ghùw ù li yo dzə̂ ù ghəəŋ ghəa zəla e lo tsəghatsəgha, u mɔʼ kɔʼkɔʼ enyə ŋgəmso yò.

¹³ Shwaʼ wəla u səā wo an dzughu a ghee tɔɔŋ wò evʉ, ghe yia tsêe ghî gho aŋ ghəa a ghee à kəaa gho. Ghəa a ghee à kəaa a lo ko tǒ no zughu tsəā səā wo.

¹⁴ Ghe tsɔ̂mlò aghì, kə̀aa kaaŋ tsə̀ghà sùghò shwaʼ ù biigh wo.

¹⁵ Ghe nyômlò â ghu kə̀ wii kə aghì ko.

¹⁶ Ghî a te ndûuw ko ghɛ, ghe m boon màʼnlò àghəa, ghî ghə̂ n dînlò.

¹⁷ Ghe kwo dzə yo aleghəŋlo enyəa bughuun zə e lo am bvʉa zə aghì.

¹⁸ Ghe tsoo tsəŋo yo Zə̀ kò aŋ ghəa è li zo.”

¹⁹ Sɛ̀ mo èzəŋ kele enyəa abugho lâŋ kə Musì kə̀ dzâa ko êndùghō, kə dzâa ndùw â ghî ghəla ghe mughu â tsəlà làŋ kə te ko. Mò à èzə lo alefèe naŋā dzughu a ghee a dzə̀m enyəa ghe ka e dzaā kaaŋ tsəgha enyəa ghe lo tsəghatsəgha, àsùghò enyəa Zə̀ kə̀ lo saʼa àghì a dzə̀m am mbī.

²⁰ Zə̀ kə lo dzàa dzə̀ yò enyəa ghùw ù lì lò tsəghatsəgha bòʼ enyəa ù mò tɔʼɔ̀ naaŋ tsəghà lâŋ kò, nu lâŋ kə̀ ghəəŋ nù ghùw ŋ kele enyəa e ŋ ghəəŋ bo zo.

Dzì zəla Zə̀ kə̀ nîi a te enyəa sɛ lo tsəghatsəgha

²¹ Ezə̄ŋ, Zə̀ kə̀ n dzì è wən zəla ù naāŋ ghî gho a te tsəghatsəgha a vʉa wə̄n dê fughu wò, mò à yò dzə aŋghəa lâŋ kə̀ deē, aŋghəa e bûʼ lo ko enyəa lâŋ kə Musî àsùghò ghiīshʉ̀ghà a Kəzə̀ à teso dzâa ghəa a te gho.

²² Zə̀ kə̀ ghəŋlo enyəa ghî à dòʼò tsəghatsəgha a vʉ̀a wə̄n abugho ghe boō fughu tsughu â Yɛso Kə̀lestò. Zə̀ kə̀ ghəŋlo enyə â ghì ghən a dzə̀m ghe boō fughu â Yɛso Kə̀lestò, mò nəŋo nəŋ yo a te

²³ Nu aghî a dzə̀m m bo e ghəŋlo, ghe yia bvʉ̂ kômlo aledòʼò an səghanyəgha ŋ Kə̀zə̀.

²⁴ Zə̀ chia kə ghəəŋ tsughu an dzɔ̀ e wə̄n enyəa ghî a doʼo tsəghatsəgha a vʉ̀a wə̄n. Kə fə̀ enyə ghəəŋ tsughu aŋghəa Kə̀lestò Yɛso fə̀ bughò zue sə wô tuw u aghì wò mo ghî kâ fəgha kə̀ li ko a te tsə tsə̀ghà ndùw.

²⁵ Wə̄n wəla Zə̀ kə fə̀ nî fughu sə wo enyəa ù bùghò kpuw vʉ e kəmùwnlo to kâŋ tə wən tə sûuw maʼa bòo tə aghì ghəla ghe boō fughu â wən. Zə̀ kə fə̀ enyə ghəŋlo aledèe tsughu enyəa kə lo tsəghatsəgha. Nu â wǐiwǐi, kə mò kɔɔn tsughu fə̀ŋ, kə̀ n tsò zhə̌ən zə̀ghàa sùgho bòo tə aghì.

²⁶ À fə̀ lo aledèe tsughu êzəŋ enyəa ghuūghùe u wən u lo tsəghatsəgha àsùghò enyəa à lǒ wə̄n ù ghəŋlo enyəa ghùw bùghò dòʼò tsəghatsəgha a vʉ̀a wə̄n bòʼ boo zəla ghùw ù te ki â Yɛso.

²⁷ Sɛ̌ ezə̄ŋ ki aletsɔ̀ fə̀ŋ aŋ kwo a? Fəgha kə̀ li kə tso yò. À lǒ kwò a sô yo aletsɔ̀ fə̀ŋ a? À lò enyəa sɛ̀ tɔʼɔ̀ bwìi aŋghəa lâŋ kə Musî kə̀ dêe ŋkāa? Ɛ̂ŋgaŋ dzə̂, à lǒ bòʼ fə̀ŋ zəla sɛ̀ gaʼ tsughu a zəŋò Zə̀ kò.

²⁸ Tɔŋlo enyəa a n tɔʼn kele sə kɔʼ enyəa à lò ko fə̀ŋ zəla sɛ̀ gaʼ tsughu a zəŋò Yɛso e ghəŋlo enyəa ghùw dòʼo tsəghatsəgha a vʉ̀a Zə̀ kò, mò a yò dzə bòʼ enyəa ghùw tɔ̀ʼɔ bwìi aŋghəa lâŋ kə̀ deē.

²⁹ Alenìi tsughu, à lo mò Zə̀ kə̂ ka lò ko kə Tə̀dzûu kò, chia kə kuūwn buw kə Ghì ghəla ghe yô Dzûu tò à? Ɛ̂ŋgaŋ dzə̂, kə ka yò ko kə Tə̀dzûu tò, kə lo sugho Zə̀ kə ghì ghəla ghe yò Dzûu tò.

³⁰ Zə̀ kə̀ lo ko kə mɔ̀ʼ, e fi lo enyəa kə lo ghəəŋ nù enyəa Tə̀dzûu àsùghò ghì ghəla ghe yô Dzûu tò dòʼò tsəghatsəgha a vʉ̀a wə̄n an dzì è mɔ̀ʼɔ bòʼ fə̀ŋ zəla ghe gaʼ tsughu a zəŋò Yɛso.

³¹ E sò yia fɛ mòʼnlò enyəa lâŋ kə̀ kôom yò aŋghəa a boō fughu dzə â Yɛso Kə̀lestò à? Ɛ̂ŋgaŋ dzə̂, e laam lò enyəa a n lueso lâŋ kə te ko.