Lumà 15 - To kə Kəzə̀ kə̀ Fughu ko

E ghəŋlo enyəa ghî a li ghə duʼnlo

¹ Sɛ̀ ghəla sɛ tɔ̂ʼ ti am boo e sɛ̀, a ki alezuūwkɛlɛ tsughu ghî ghəla ghe tɔ̂ʼ ti yo am boo e ghee. A ka ki ko yo aleghəŋlo enyəa fə̂ŋ tə sɛ̀ tə e duʼnlo.

² Sɛ̀ ki alelaam ghəəŋ nduw ko ghəa à dzûŋ gho â waazə̂ a sɛ̀ gho enyəa ghe e lo alo duʼnlo, àsùghò enyəa ghe e tɔʼ ti sugho am boo e ghee.

³ Ghuūghùe u Kə̀lestò ù ka fə ghəa ghəla ù fə̀ ghəŋlo ghəəŋ dzə̀ enyəa to ù mò dùʼnlo a te; tò aŋghəa ghe tɔm naŋa am Mwàʼsò kə Kəzə̀ enyəa, “Aŋghəa ghe mò sùuwn ghû, ghe mo fi suūwn mugho.”

⁴ Ghəa ghəla ghe fə̀ ki tɔm naŋa am Mwàʼsò kə Kəzə̀ fə̀ lo alefughuu sɛ̀ â tsʉ̀ zò, enyəa to tsʉ̀ e te e mô lo aleghəŋlo sɛ̀ e lo alekaā tsughu ezə, e dzəlà tsughu sugho fə̀ŋ tə sɛ̀ aŋghəa a chiī tùʼ a te am fəgha kəla Zə̀ kə fə̀ to naŋa â sɛ̀.

⁵ To Zə̀ kəla kə ghəŋlo enyəa sɛ̀ e kaa zə zo, dzə̀là sughò fə̀ŋ tə sɛ̀ mò ghəŋlo ghɛ̀ e mughu alo kəfəgha kə mɔ̀ʼ ghɛ̀ à ghê waazughù ghò aŋghəa Kə̀lestò Yɛso ləghaa,

⁶ enyəa ghɛ̀ a dzə̀m lo e dzeŋe təma nduw ŋkəma mò â Zə̀ kò, tɔɔŋ Tselè Mughùbè u sɛ̀ Yɛso Kə̀lestò an dzə̂ e mɔ̀ʼ.

Làbəlà è dzùŋ lo sugho â Tòʼò zò

⁷ E fi lò enyəa, e kpeeniī nlò ghue zɛʼɛ zo aŋghəa Kə̀lestò fə̀ kpenî ghɛ a te, to enyəa ghî ghə̀ e fughuu kɔʼso mò â Zə̀ kò.

⁸ Ǹ so Ǹ dzâa wô â ghɛ̀ enyəa Kə̀lestò fə̀ bugho tǒ ghùw u kəfwàʼ â Dzûu tò alebùghò dêe tsughu enyəa Zə̀ kə naaŋ nù dzughu e wən zo am fəgha kəla kə fə̀ to naŋa à ghê tselê tsele a ghee gho.

⁹ Ù fə̀ bugho sugho aleghəŋlo enyəa to Toʼò e mô fùghuu ŋ kɔʼso â Zə̀ kò an se è kwuso zəla Zə̀ kə ki â ghee. Ghe tɔm naŋa am Mwàʼsò kə Kəzə̀ enyəa, “E fi lo enyəa, Ǹ lo təma ŋkəma â ghù am bvʉa zə Etòʼò, mùghò e zoo ghû aŋ ndzàŋ tə ŋkɔʼso to.”

¹⁰ Mwàʼsò kə Kəzə̀ chia kə dzɛ̂ kpeʼe sugho enyəa, “Ghɛ̀ e duʼnlo a Toʼò zo, ghɛ̀ à ghê ghì a Kəzə̀ ghò.”

¹¹ Mwàʼsò kə Kəzə̀ chia kə dzɛ̂ kpeʼe sugho enyəa, “E təma nlò kəma mò â Mughu u te a Toʼò zò, àsùghò enyəa ghî a nàʼà tə mbī ghən a dzə̀m e fughuu wən â kɔʼso mò.”

¹² Ghùwshʉ̀ghà u Kəzə̀ Èzayà vʉ̀a ù dzɛ̀ sugho enyəa, “Ghùw kè sə̌a wò an tigh kə Dzɛsɛ̀, ghùw ù te kê lò tsəgha wəla ù kè bughò saʼa tsəgha tuw kə Etoʼò zò, Toʼò zə̀ e ke chiī tùʼ e ghee a zəŋò wə̄n.”

¹³ To Zə̀ kəla kə ghəŋlo enyəa a chiī tùʼ alo aghəa a dzə̀m mò fughu ghɛ â bughuun zo, kə ghəŋlo ghɛ̀ e duʼnlo, aŋghəa ghɛ̀ boō fughu tsughu à ghè kò, to enyəa Zuʼ tə Zɔlɔ tə mô ghə̀ŋlo ghɛ̀ e fəghaan ŋgee chiī tsughu tùʼ.

See kə eghəa kəla Pôl dòo tɔɔ̄ wô ghəa ghen gho a te

¹⁴ Waazə̂ ghaŋa gho, aŋ ghuūghuè waŋa Ŋ̀ kûm kwò nû enyəa ghɛ̀ lo ghî a dzûŋ ghò, ghɛ̀ yia a ŋge kwo ghəa gho, kwo sugho alezoʼn ghue zɛʼɛ alo aghəa.

¹⁵ Mùghò ŋ ghəa gho â ghɛ̀ dô tɔ̀m wò kùu ndùw tuw u aghəa u lì wo alezə̀əŋ wô ghɛ̀ a te. Ŋ̀ ghəa ghən dôo ghəŋlo bòʼ dzɔ̀ zəla Zə̀ kə̀ dê tsughu â mùghò,

¹⁶ Zə̀ kə̀ dzɔ̂ zən â mùghò dê tsùghu enyəa mùghò e lo ghùw ù kəfwàʼ ù Kə̀lestò Yɛso alefwaʼa â Tòʼò zò. M̀ fwaʼà fwaʼ kəfɔ̀e aŋghəa Ǹ zughoo wo làbəlà e dzùŋ e Kəzə̀, enyəa to Toʼò e mô lǒ tò kəfughu Zə̀ kə̀ boō enyəa ghe m kpe, mò à ghee nî sùw nàŋa kɔʼ Zuʼ tə Zɔlɔ to a vʉ̀a Zə̀ kò.

¹⁷ Aŋghəa Ǹ lô fəgha ko kə mɔ̀ʼ ghàʼ à Kə̀lestò Yɛso, Ǹ lo nû aletsɔ̀ fə̀ am fwàʼ kaŋa â Zə̀ kò.

¹⁸ Ŋ̀ yo alekə̀a ghəa è li zo mò a gɔ̀ʼɔ̀ ko yo ghəa ghəla Kə̀lestò lo mò ù ghəŋlo enyəa M̀ fwâʼ, to Toʼò zə̀ e zuuw nduw â Zə̀ kò. Kə̀lestò mò ghəa ghən ghəəŋ tsughu aŋ ghəa ghaŋa à kəaa gho àsùghò an shwaʼ waŋa.

¹⁹ Ù fə̀ ghəa ghən ghəəŋ tsughu aŋ daʼa kə kɔ tə tətsə̌a təla mùghò fə̀ dê tsughu àsùghò sə̀ghàa mò, àsùghò an daʼa kə Zuʼ tə Kəzə̀. Zə ŋ ghəəŋ tsughu mùghò n naʼn wò Làbəlà è dzùŋ è Kə̀lestò zən an lùʼu tən tə̀ dzə̀m aŋghəa mùgho mò nughù wo an Yɛ̀lusalɛ̀m lɔʼso ŋgə̀a ndùw alendùw an naʼ zə Èlilekùm.

²⁰ Dî zaŋa e mò lo enyəa to M̀ mô lò alendùw naʼa làbəlà è dzùŋ zən an luʼu təla ghe lo mo ghe kaām zuw kòʼ tsəgha ghəa e li zo a te kùu ndùw Kə̀lestò, enyəa e kwo ko Ǹ lô kôom ndûw naʼn kpeʼe nduw làbəlà zən an lùʼu kəla ghî a li a mafə bùʼ ndùw nàʼa dzə̀.

²¹ Ghe tɔm naŋa am Mwàʼsò kə Kəzə̀ enyəa, “Ghe ghəla ghe lo mo ghe kaām kə̂a kòʼ tsə̀ghà ghəa a wə̄n gho â ghee, ghe lo kòʼò nǔ wə̄n, ghəla ghe lo mo ghe kaām zuw kòʼ tsə̀ghà ghəa zo kùu ndùw wə̄n, ghe lo zuuwkɛlɛ nǔ wə̄n.”

²² Zən lò ghəa zəla e mò ghəə̄ŋ tsəgha enyəa Ŋ̀ ka ghɛ bùghò bwìin kòʼ.

Pôl mòʼò alendùw bwîin kôʼ aghì an Lumà

²³ Aŋghəa e lo êzəŋ enyəa mùgho m fwàʼ mɛ̀ʼɛ̀ kǎaŋ wô fwàʼ kaŋa ko am mbùʼ zən, àsùghò aŋghəa mùgho mò dîi kêe tsəgha an ndə̀mà tə tənùu alebùghò kôʼ ghɛ̀,

²⁴ M̀ ŋgə̀mso kùum mòʼn nù alebəŋo kòʼò daŋa tsəghà ghɛ̀ abugho Ǹ lo nduūw daŋso an naʼ e Spɛ̂ɛn, tò sɛ̀ kê dzeŋe kele tsughu nyàaŋ fə enəgha fə̀ dzûŋ fò a dzə̀m, tò ghɛ̀ e lo alefughu mugho â yòsò zò alendùw daŋso fughu.

²⁵ À sò lò ko êzəŋ enyəa Ŋ̀ ki aletsə̀ghà tsughu ndûw dzì an Yɛ̀lusalɛm alendùw fughuu daŋà tsəghà èyòsò â ghì a Kəzə̀ ghəla ghe lo fughu.

²⁶ Tɔŋlo enyəa dzeŋe kə ghì a Kəzə̀ chi an Masadonia àsùghò an naʼ e Akɛyà mò ŋgee duʼn nû aletsə̀mà tsughu alechuūw tsughu ukʉa enyəa ghe fughuu ndûw tò eyosò â dzeŋe kə ghì a Kəzə̀ gho ghəla ghe ŋgəmso yo an Yɛ̀lusalɛ̀m.

²⁷ Aŋghəa à mò bûʼ tsə̂m tsughu Toʼò zò alefughu eyôso; alekùum nîi tsughu, ghe ki alechuuw ŋgùu kò â Dzùu tò, to ghe e yoso ghee a te. Aŋghəa e lo enyəa Toʼò e mafə kele sugho nwamso wəla Zuʼ tə̀ Zɔlɔ tə fughuu â Dzûu tò, Toʼò e fi ki sugho nû alefughuu Dzûu tò â yòso zò am fʉgha u ghee wəla ghe ki.

²⁸ Abugho Ǹ lo mîaso tsughu fwàʼ kən ko, mò mùghò m fùghù nùghù ndùw sùghò fəgha kəla ghe mò chuw tsughu enyəa Nù ndûw fughu â ghee, Ǹ lo daŋso səā nughù tsughu alendùw an Spɛ̂ɛn, Ǹ bəŋo koʼò daŋà tsəghà ghɛ̀ abugho Ǹ nduūw.

²⁹ Ŋ̀ kwo tən nû enyəa abugho Ǹ lo bugho fì a vʉ̀a ghɛ̀, Ǹ lo ghəəŋ nù Kə̀lestò lo ŋgeē fughu ghɛ â bughuso zo.

³⁰ M̀ buʼu kə̀ghu â ghɛ̀ a waazə̂ ghaŋa gho an zən e Mughu ù te Yɛso Kə̀lestò àsùghò an daʼa kəla Zuʼ tə̀ Zɔlɔ tə fughu â ghɛ̀ enyəa, ghɛ̀ təmadzəəŋ wo mùghò alegɔɔ̄ŋ zee â Zə̀ kò an tuw kaŋa.

³¹ Ghɛ̀ e gɔɔ̄ŋ tsughu enyəa ghî a yia ghe lo an Dzùdîa mo ghe kâ bǒo fughu â Kə̀lestò lò so e nomso mùghò. Ghɛ̀ e gɔɔ̄ŋ tsughu sugho enyəa ghî a Kəzə̀ a yi an Yɛ̀lusalɛm e ke lo alo eduʼnlo alekpeēnî fəgha kəla Ǹ so Ǹ ndûw fughu à ghee.

³² Ghɛ̀ e gɔɔ̄ŋ tsughu sugho enyəa mùghò e lo alebùghò sə fi a vʉ̀a ghɛ̀ abugho Zə̀ kə̀ boō dzə, mò fə̀ŋ zaŋa zɔlɔ nù, àsùghò enyəa M̀ bughò zʉ̂ʉn daŋà tsəghà ughue fì èzə̀ sɛ̀.

³³ To Zə̀ kəla kə fughuu sɛ̀ â bughuun zo e lo ghɛ̀ a ghee a dzə̀m. Zə e lo ko êzə̀!