Lumà 14 - To kə Kəzə̀ kə̀ Fughu ko

Kà e saʼa ghùw

¹ Boo tsughu nlǒ waazə̂ ghɛʼɛ ghəla fə̂ŋ tə ghee naām noʼn kaŋlo aŋ ghəa a Kəzə̀ ghe lo am bvʉa zɛʼɛ̄, kǎ nlò è kuuwn baaŋ fom to ghɛ̀ à ghee mɔ̀ɔ ndùw fəgha kə̀là ghe moʼo ghè kò.

² Ghî a li a lo nû ghe boō tsughu enyəa to ghe zə ufʉgha u dzə̀m, ghî a li yia a lo kwo enyəa ghe ki ko alenuum təla ko tuūwfʉgha wo bòʼ enyəa ghe tɔ̀ʼ tì yo am boo e ghee â Zə̀ kò.

³ Ghî ghəla ghe zəā fʉgha wo u dzə̀m kì yo alekòʼò lʉgha ghî ghəla ghe zəā yo fʉgha wo u dzə̀m. Ghî ghəla ghe kuūwn nuūm təla ko tuūwfʉ̄ghā wo ki sugho yo alesāʼ ghî ghəla ghe zəā fʉgha u te wo u dzə̀m, nu Zə̀ kə̀ ŋ ghee boo.

⁴ Ghɛ̀ lò ghê ndugho â ghɛ̀ alesaʼa kɔ̀ɔ ŋ ghùw ù lì mò a? A kè tèlè tsə̀mà tsùghuu ko Mughùbè ù ghee enyəa ghe ŋ ghəəŋ dzɔ̀ ŋkāa ghe ŋ ghəəŋ bonlo. Ghe kê tèlè sə̌a ko nù fəgha ko, tɔŋlo enyəa Mughùbè ù ghee lo nû aleghəŋlo ghe sə kəfəgha.

⁵ Ghî a li a moʼò ko enyəa tsuʼ fə̀ li fə lo nû fə tsəghàtaʼà sə n lì mən, ghî a li yia a lo ghe kuūwn kwō enyəa tsuʼu mən n dzəm bɔ̌ɔm lò ko eghala. Naŋa tò chìa e bɔɔm tsəma tsughu ko e wə̄n zo eghəa.

⁶ Ghî ghəla ghe nî tsughu tsuʼ fə̀ li fo enyəa a lò tsuʼ fə̀ ne fo â ghee, ghe èzə ghəəŋ ko alefughu ŋkɔʼso â Mughu ù te. Ghî ghəla ghe zəa fʉgha wo u dzə̀m, ghe êzə naam ghəəŋ sùghò alefughu ŋkɔʼso â Mughu ù te, aŋghəa ghe fughuu dzə zɔ̀ɔŋ kò â Zə̀ kò a te. Ghî ghəla ghe tiī alezə̄ fʉgha ù li wo, ghe êzə ghəəŋ sùghò alefughu ŋkɔʼso â Mughu ù te, ghe yia fughuu sugho zɔ̀ɔŋ kò â Zə̀ kò a te.

⁷ Ghùw ù sɛ̀ ù lì yo ù mùghù ko an saʼ è wə̄n, ù lì yo sughò ù kpuūw an saʼ è wə̄n.

⁸ Abugho sɛ̀ lo â tuw ko, a mughu aŋ kɔʼso m Mughu ū te, mo a kpuw ko nû, a kpuw aŋ kɔʼso m Mughu ù te; à fi lo enyəa, abugho a lô â tuw ko ŋkāa a kpuw ko nû, à sɛ̀ ki Mughu u te.

⁹ Kə̀lestò fə̀ fɛ kpuw zoō kɔʼ bòʼ ghəa ghə̀ è yi enyəa, ù è lo Mughu ù te â ghì à kpuwn gho àsùghò ghəla ghe lô â tuw ko.

¹⁰ Ghɛ̀ sò waazughù à koʼò kèe mò a lǒ kwò a? Ŋkāa à lǒ kwò ghɛ̀ sô saʼa waazughù ghò a? Sɛ̀ a dzə̀m lo bùghò tènlo an tia e saʼ a vʉ̀a Zə̀ kò.

¹¹ Ghe tɔm naŋa am Mwàʼsò kə Kə̀zə̀ enyəa, “Ghəa Ŋ̀ kûum lô dzə̂ â tuw ko, mùghò Mughu ù te dzɛ̂ nàŋa wò enyəa, ghî ghən à dzə̀m ke tə̀ma tsəghà tə̀ŋguʼ a tsəla mùghò, aghî a dzə̀m e ke dzaā səa wo an dzughu e tugho zo enyəa Ǹ lo Kəzə̀.”

¹² Ghùw e ke taŋso dzaā nduw ko ghəa a ghùe u wə̄n gho â Zə̀ kò, taŋso dzàa ndùw sughò soo kə eghəa kəla kə fə̀ ghəŋlo enyəa ù ghəŋlo êzə̀.

Kà ghəŋlo enyəa wàazùghù ghə̂əŋ ghəa è biigh zo

¹³ À fi lo enyəa sɛ̀ e ka e koōm saʼa ghue e sɛ̀ zò, sɛ̀ e laām dəma tsughuu enyəa a ka e naaŋ dzə tia e utwaʼ zo an dziī ŋkāa kə̀ fàŋa â waazə̂ a sɛ̀ gho tò â ghee aleghəŋlo èbo.

¹⁴ Ŋ̀ kwo nû aŋghəa Ǹ lô fəgha ko kə mɔ̀ʼ ghàʼ à Mughu ù te Yɛso enyəa fʉghazəa ù li yo dzə̂ u dzɔ̂ɔ yo â ghì ghò alezəa. Abugho ghùw ù li kuuwn moʼnlò enyəa fʉghazəa u te u dzɔ̂ɔ yo alezə, a fi lo enyəa e dzɔ̂ɔ yò â wə̄n alezəa fʉghazəa u te wo.

¹⁵ Abugho e lo enyəa fəgha kəla ghù zəa kə fəmso wàazùghù, a fi lo enyəa ghù dèe yò ləgha zo â wə̄n aŋghəa ghù naam zəa ko fʉghazəa u te wo. Kà e ghəəŋ dzə enyəa fəgha kəla ghù zəa boōn maʼà ghùw mò Kə̀lestò maā bugho kpuw an tuw kə wə̄n

¹⁶ Kà nlò è ghəŋlo enyəa fəgha kəla ghɛ̀ kwo enyəa kə dzɔ̂ɔ nù â ghɛ̀, ghî ghə̀ è kuuwn moʼnlò enyəa kə dzɔ̂ɔ yò.

¹⁷ Nu Fɔ̂e u Kəzə̀ u ki yo ghəa e li zo aleghəŋlo ghèe ghəa a zəa gho ŋkāa a mʉa a kəfəgha gho, à kǔuwn lò alemughu alo ebughunlo àsùghò an duʼn zəla Zuʼ tə̀ Zɔlɔ tə fughuu, àsùghò enyəa a e mughu mughù zəla e zɔlɔ an sə kə Kəzə̀.

¹⁸ Abugho ghùw fwàʼa â Kə̀lestò an dziī zən, zə ŋ ghəŋlo Zə̀ kə̀ n duʼnlo, ghî ghə ŋ kɛɛ ghùw ù te.

¹⁹ Sɛ̀ ki aledəma tsughu ko aleghəŋlo enyəa sɛ̀ e lo alo ebughunlo àsùghò enyəa sɛ̀ e tughu dzɔɔ̄ am fə̀ŋ zəla sɛ̀ gaʼ tsughu a zəŋò Zə̀ kò.

²⁰ E kwo ko fəgha kəla ghɛ̀ zəa kə lô so e boon màʼn fwàʼ kə Kəzə̀ kò. Ghɛ̀ lo nû alezə ufʉgha u dzə̀m, e kǔuwn boo ko alezə fəgha kəla kə lo aleghəŋlo enyəa ghùw u lì bvʉ̀ aleghəŋlo èbo.

²¹ E dzɔ̂ɔ yò alepfʉa nyòm ŋkāa alemʉa lʉ̀ mò, ŋkāa aleghə̂əŋ ghəa è li zo e lô aleghəŋlo wàazùghù ù lì ghə̂əŋ ghəa e biigh zo.

²² Fəgha kəla ghɛ̀ boo fughu a te, ghɛ̀ naŋa tsughu ko am fə̀ŋ tɛʼɛ ghɛ̀ à ghê Zə̀ kò. Dzɔ̀ lo â ghì ghəla ghe saʼa yô ghue e ghee zo abugho ghe ghəə̄ŋ ndûw ghəa zəla ghe kwo enyəa e lo tsəghatsəgha.

²³ Ghùw wəla tuw kə kpuūw wən am fəgha kəla ù zəa ghè kò, Zə̀ kə̀ n nì ghuẁ u te enyəa ù m bvʉ̌ saʼ abugho ù zə fʉghazəa u te wo, nu ù kà ghə̌əŋ dzə̀ ghəa zəla ù e dêe enyəa ù boō fughu â Zə̀ kò. Ghəa zəla ghùw ghəə̄ŋ tsughu mo e dêe tsùghù enyəa ù kà bǒo fughu â Zə̀ kò lò ghəa è biigh zo.