Lumà 13 - To kə Kəzə̀ kə̀ Fughu ko

Ghî a ki alezuuw nduw â ghì ghəla ghe lɛnlō â ghee

¹ Aghî a dzə̀m kì alezuuw nduw â ghì ghəla ghe saʼā tuw u ghee wo. Tɔŋlo enyəa ghùw ù lì ki yo dwaʼa wo alesaʼa tuw u aghì wo à gɔ̀ʼɔ̀ ko mò à dzɛ̀ Kə̀zə̀ enyəa zə e lo êzə̀. Ghî ghə̀n a dzə̀m ghe saʼa tuw u aghì wo u dzə̀m, à mo tsuʼ naŋa Kəzə̀.

² Ghùw wəla u tuū alezūw â ghì ghəla ghe saʼa tuw u ghee wo, ù fi tuu màʼn ghì ghəla Zə̀ kə naŋā. Ghùw wəla ù ghəŋlo êzə̀, ù fi dəghànlò ùlʉ̀ghà enyəa Zə̀ kə lo dâŋ a te alefɔeso wə̄n.

³ Tɔŋlo enyəa ghî ghəla ghe ghəə̄ŋ ghəa à dzûŋ ghò kì dzə yo aletsəŋo ghî ghəla ghe saʼā tuw u ghee wo. À lǎam lò ghî ghəla ghe ghəə̄ŋ boōn ghəa gho ki aletsəŋo ghî ghəla ghe saʼā tuw u ghee wo. Abugho ghɛ̀ ləghaa alelō mò ghɛ̀ ki yo tsəŋ zo ghɛ̀ à ghê ghì ghəla ghe saʼā tuw wɛʼɛ wo, ghɛ̀ è ghəəŋ tsughuu ghəa zəla e dzɔɔ̄, to ghe e kɛɛ ghɛ a te.

⁴ Tɔŋlo enyəa ghe lo ghî a kəfwàʼ Zə̀ kə̀ naŋā wo aleghəŋlo enyəa ghɛ̀ è mughu mughù è dzûŋ zò. Mò ghɛ̀ kuuwn ghəəŋ dzə̀ ghəa à biigh gho, ghɛ̀ ki nû aletsəŋo ghee, nu ghe ki nû daʼa ko alefɔesō ghî ghò. Ghe lo ghî a kəfwàʼ a Kəzə̀, Zə̀ kə̀ naŋā enyəa ghe fɔeso sugho ghî ghəla ghe ghəə̄ŋ ghəa à biigh gho.

⁵ À fi lo enyəa ghɛ̀ ki yo alekaa zuuw ko â ghì ghəla ghe saʼā tuw wɛʼɛ wo bòʼ ghɛ̀ tsəŋo enyəa Zə̀ kə̀ lô fɔeso ghɛ, à kǔuwn lò sugho enyəa ghɛ̀ kwò nû am fə̀ŋ zɛʼɛ enyəa ghɛ̀ ki aleghəŋlo êzə̀.

⁶ Zən lò e ghee ghɛ̀ ki sugho alechuuw ŋgùu kò, tɔŋlo enyəa ghî ghəla ghe saʼā tuw u sɛ̀ wò lò ghî a kəfwàʼ a Kəzə̀, ghe kûu fwàʼà â Zə̀ kò aŋ ghəa ghən.

⁷ Ghɛ̀ e fughuu nduw fəgha kəla ghɛ̀ ki alefughu tsəghà ndûw â ghee: mò à lǒ mwàʼsò kə̀ chuuw ko, ghɛ̀ n chùw è nduw, chuuw ndùw sùghò chuw tɛʼɛ, ghɛ̀ m fughuu ndùw kɔʼso məla m kpe â ghee.

Ghəa ghəla ghî a ki alemùghù a te ghèe ghê ghì à li gho

⁸ Ghɛ̀ ka e kele dzə ghùw u lì â ndàŋ kò. Ndàŋ kəla ghɛ̀ ki ko alekele mîaa ko enyəa ghɛ̀ è ləghaa ghue zɛʼɛ zo; tɔŋlo enyəa ghùw wəla ù ləghaa dzə̂ ghî ghò fi lueso kə̀làŋ.

⁹ Lwâŋ wən enyəa, “Ghùw kì yo alesəā nûŋlò, ghùw kì yo alewī ghùw, ghùw kì yo aletsɔ̄ŋ, ghùw kì yo alenaŋa esə am fəgha kə ghûw.” Àsùghò lwâŋ ù li wə̄n u dzə̀m, à ghee kwu kɔlɔ kɔʼ lâŋ kən enyəa, “Ghù kì aleləgha ghùw wəla ù lo am bùghu zəghà tò aŋ ghəa ghù ləghaa ghue wʉ̀a wò a te.”

¹⁰ Abugho ghùw ləghaa dzə ghùw wəla ù lo am bùghu e wə̄n, ù kòom yò aleghəəŋ ghùw ù te â bo zo. E fi lo enyəa, aledè èləgha â ghùw, à lò alelueso ulwàŋ u dzə̀m.

¹¹ È li zəa e lô sugho enyəa, ghɛ̀ kwo nû nəgha zəla e lo ghè zò êzə̄ŋ, nəgha zə m kpe êzə̄ŋ â ghɛ̀ alezòo nughu kɔʼ alo təmgbii. Tɔŋlo enyəa nəgha zəla sɛ̀ ki alezə kətuw a te mô êzəŋ e su, tsə̀ghàtàʼà aŋghəa a fə̀ kuʼù boo fughu tsughu a te â Zə̀ kò.

¹² A êzəŋ e lo ko tò â lə̌əmlə̌əm tə utsuʼ to, a tsûuŋ tsùghuu ko enyə, tsuʼ u zuūw nyəa wò nù. To sɛ̀ mô bughū naŋa aleghəəŋ ghəa gho a tsəla kələ̄m, sɛ̀ nîi kɔʼ mughù e zɔlɔ zo tǒ ndzʉ tə tsam sɛ̀ dzəlà kele a zəŋo e ughùe.

¹³ To sɛ̀ mô nyòʼn ghəəŋ ndùw aghəa tò ghî ghəla ghe mughu an tsə̂, mò à yò dzə̂ alo kələ̄m. Sɛ̀ ki dzə yo alendùw an lùʼu təla ghe mʉa kala lʉ̀ mò a te, ghəəŋ sùghò ghəa à nuūŋ gho fughu, ŋkāa ki sugho yo alemughu dzə̀adzə̀ kə emùghù ko, ŋkāa alebwiī baā kaaŋ tsəgha ghəa gho, ŋkāa aleki mʉ̌ʉn ko.

¹⁴ Ghɛ̀ dzəla kele tsughu Mughu ù te Yɛso Kə̀lestò a zəŋò ghɛ̀ tò təndzʉ, àsùghò enyəa e kwo ko ghɛ̀ lô naāŋ tuw ko aŋ ghəa ghəla gwən e ughùe e zɛʼɛ e ləghaa enyəa ghɛ̀ e ghəŋlo.