Lumà 12 - To kə Kəzə̀ kə̀ Fughu ko

Dzì zəla a ki alemùghù a te tò sɛ̀ e fwaʼa â Zə̀ kò

¹ Yia a bugho êzəŋ a waazə̂ ghaŋa gho, à lǒ bòʼ se è kwuso zəla Zə̀ kə̀ ŋge ki a zəŋò sɛ̀ M̀ buʼū wô ghu ko â ghɛ̀ enyəa; ghɛ̀ Fughu nduw nlò ghue zɛʼɛ zo â Zə̀ kò tǒ fughu kəla ghe sɛ̂ fughu nduw â wə̄n mò ghɛ̀ kuuwn naam lò â tuw ko, mò ghɛ̀ zɔlɔ nù ghəəŋ sùghò enyəa fə̀ŋ e wə̄n e zɔlɔ. Mən lǒ kɔʼso n sə̀ŋò məla ghɛ̀ ki alefughuu â Zə̀ kò.

² Kà nlo kôom mùghù dzə̀ an dzì zəla ghî a mbī a mughū a te, zə̀ghàa tsugu nlò tò Zə̀ kə̀ kuūwn kɔʼ fə̂ŋ tɛʼɛ, tò ghɛ̀ kele moʼnlò è fughu zo. Ghɛ̀ è ke lo aledaŋso kelê fəgha kəla Zə̀ kə̀ ləghaa ghè kò — ghɛ̀ e kwo ghəa è dzûŋ zò, zəla e lô tsəghatsəgha, àsùghò zəla e lo aleghəŋlo enyəa Zə̀ kə̀ e duʼnlo a te.

³ À lǒ bòʼ dzɔ̀ zəla Zə̀ kə̀ mò dê tsughu â mùghò, Ǹ dzâa wô â ghɛ̀ a dzə̀m enyəa, Kà nlò è ŋgeē kɔʼso tsəghaso ghue zo aŋghəa ghɛ̀ ki alekɔʼsō a te. Ghɛ̀ laam maʼa tsughu nlò ghue zo aletɔʼɔ̄ moʼn tsughuu ghəa zo, ghɛ̀ è lɛɛn tsəso tsughuu ko ghue zɛʼɛ zo am fə̂ŋ zəla Zə̀ kə̀ ghəŋlo enyəa ghɛ̀ gaʼ wo a zəŋò wə̄n.

⁴ Sɛ̀ ki ndə̀ma tə lùʼu tə eghùe a zəŋo ghùe e sɛ̀, luʼù tə ughùe tən tə̀ dzə̀m kì nduw ko fwàʼ u ghèe nəŋo nəŋ.

⁵ À lò sugho eghəla aŋghəa sɛ̀ bûʼ lô ko ndə̀m, sɛ̀ êzəŋ lo tò gwən e ughùe e mɔ̀ʼ bòʼ enyəa sɛ̀ lo alo kəfəgha kə mɔ̀ʼ sɛ̀ à ghê Kə̀lestò, sɛ̌ yia a dzeŋe təmdzəə̄ŋ kaāŋ wô ghue e sɛ̀ zò tǒ ndəm è lùʼù tə eghùe təla tə ghəə̄ŋ kɔʼ gwən e ughùe zò e mɔ̀ʼ.

⁶ Kə̀chìa kì ko fughu kə wə̄n nə̀ŋò nəŋ aŋghəa Zə̀ kə fughu â sɛ̀ an dzɔ̀ e wə̄n. Abugho fughu kə ghûw ù sɛ̀ ù lì kə lo aleniī naʼn wo tum è Kəzə̀, ù n naʼn ndùw tum e te am fə̂ŋ zəla ù gaʼ tsughu â Zə̀ kò.

⁷ Abugho ghùw ù sɛ̀ ù lì lo alefwaʼā â ghì a Kəzə̀ ghò, ù e bɔɔm fwaʼā nduw êzə̀; mo fughu kə ù lì kə̀ lo alezoʼn nduw ghî ghò, ù ŋ kûm zòʼn ndùw ghee.

⁸ Abugho fughu kə te kə lo aledzə̀n fə̀ŋ tə aghì, ù ŋ ghəəŋ ndùw êzə̀. Mo fughu kə ghûw kə̀ lo alefughu eyôsò â ghì ghò, ghùw ù m fughuu ndùw aŋ ghùe ù mwaʼā wo. Ghùw wəla ù ki dwaʼa wo alekwuū kele àghì, ù ki alekwuū kele ghee aŋ ghu kə̀ dzûŋ kò. Wə̄n wəla ù ki fughu ko aledè edzɔ̀ â ghì ghò, ù n dêe ndùw dzɔ̀ e te zo aŋ ghùe ù ghɛɛn wo.

⁹ E kuūm deē nduw nlò ləgha zo â ghì ghò. E baā nlò ghəa ghəla a dzɔ̂ɔ yo, tughu ndùw aleghəəŋ ghəa à dzûŋ ghò.

¹⁰ E kûu ləghaa nduw nlò ghue zo tò waazə̂, ghɛ̀ è ki mbuuw mò aledeē nduw kɔʼso mò aŋ ghùe zɛʼɛ.

¹¹ E fwaʼā tsughuu nlò alo kədaʼa, kà nlò è lɛɛ dzə, ghɛ̀ e fwaʼā nduw â Mughu ù te am fə̂ŋ zɛʼɛ e dzə̀m.

¹² Ghɛ̀ e duʼnlo an tùʼ zəla ghɛ̀ chiī ghè zò. Ghɛ̀ kɔlɔ tsughu nlò fə̂ŋ tò an tsù wɛʼɛ, ghɛ̀ è gɔŋlo an nə̀gha tən tə̀ dzə̀m.

¹³ E teen nduw nlò fʉgha wɛʼɛ wo ghɛ̀ à ghê ghì a Kəzə̀ ghɛʼɛ ghəla ghe ki yo. Ghɛ̀ naŋa tsughu ndughu tɛʼɛ to tughō â ghì ghəla ghe bwîin wo alo ghɛ̀.

¹⁴ E dii dzaā nduw nlò tsû wɛʼɛ wo â Zə̀ kò enyəa kə bughusô ghî ghəla ghe ndzaŋso kaāŋ ghɛ, ghɛ̀ n dzâa ndùw enyəa Zə̀ kə̀ bughuso ghe, ghɛ̀ ka ghe e tsɔɔ̄m dzə.

¹⁵ E lo nlò alo duʼnlo ghɛ̀ à ghê ghì ghəla ghe duʼnlo, ghɛ̀ e dinlo ghɛ̀ ghê ghì ghəla ghe dîin sugho.

¹⁶ E mughu nlò alo kə fəgha kə mɔ̀ʼ ghɛ̀ à ghê ghì ghò a dzə̀m. Kà nlò è kɔʼso ghue zo, laam bǒo tsughu nlò aleghəəŋ zumso tə aghəa to ghɛ̀ à ghê ghì a ulwən gho. Kà nlò è moʼō enyəa ghɛ̀ tɔ tsə̀ghà ghì à li gho.

¹⁷ Kà nlò è tsəa bo zo alo ebō. E dəma tsughu nlò aleghəəŋ ghəa ghəla a dzɔɔ̄ an sə kə aghì.

¹⁸ Abugho e lo alelo êzə̀, ghɛ̀ è dəma təla tsughu nlo aŋ ŋgəŋ zɛʼɛ aleghəəŋ ghəa ghəla a nîi wô bughun zo â ghɛ̀ à ghê ghì ghò a dzə̀m.

¹⁹ Waazə̂ ghaŋa gho, kà nlò è diī ŋgə̀mà tò a zəŋò ghì ghò; mò ghùw ghə̌əŋ boon tsughu ghɛ â ghəa zo, ghɛ̀ n zə̀ghàa ndùw â Zə̀ kò, kə n dè nʉghà u wə̄n u pfʉa wo a te; tɔŋlo enyəa ghe tɔm naŋa am Mwàʼsò kə Kəzə̀ enyəa, “Ǹ lo dìi tə̀ŋgə̀mà a zəŋò ghì ghəla ghe ghəə̄ŋ bo zo, Ǹ lo tsəā tsəghà ghì ghəla ghe fəmso ghî à li gho. À dzɛ̀ mùghò, Mughu ù te.”

²⁰ Mwàʼsò kə Kəzə̀ chia kə kuūwn dzɛ̂ sugho enyəa, “Abugho ghùw ù kə̀tuw wʉ̂a dîi dzə̀ŋ, ghù ŋ ki alefughū nduw wə̄n â fə̀ghàzəa ko, mò ù dìi fə̀ŋ è zuʼso, ghù m fughu ndùw wə̄n â fəgha kə̀ mʉa ko; tɔŋlo enyəa abugho ghù ghəə̄ŋ dzə êzə̀, ghù ghəəŋ nù ù n lo an tuw kə̀ dəla ko.”

²¹ E kwo ko ghəa à biigh a lô tughū tsəghàa ghɛ, ghɛ̀ kuuwn ki aletughū tsə̀ghà ebo an dzɔ̀ zɛʼɛ zəla ghɛ̀ ghəə̄ŋ nduw à ghì gho.