Lumà 10 - To kə Kəzə̀ kə̀ Fughu ko

¹ Waazə̂ ghaŋa gho, fəgha kəla Ǹ diī ghè kò àsùghò gɔ̀ɔŋ zaŋa zo lo enyəa, to Zə̀ kə̀ mò ghəŋlo ghî ghə Ezə̀lɛ̂ à zə kətuw.

² Ǹ lo nû alekùum dzâa wô â ghɛ̀ enyəa ghe ki nû ghɛ̂ zò alefwaʼā â Zə̀ kò, à sò kǔuwn lò ko enyəa ghe kwo yo dzì zəla ghe lô aletsə̀ghà a te.

³ Ghe kaam kwo dzə yo dzì zəla Zə̀ kə̀ naāŋ ghùw a te tsəghatsəgha a vʉ̀a wə̄n, Ghe ŋ kuuwn də̀m è tsughu, kəŋ tsughu è ghee dzì alelo tsəghatsəgha a te. Ghe ŋ kè kuuwn boō dzì zəla Zə̀ kə̀ nîi ghî ghò a te enyəa ghe doʼò tsəghatsəgha a vʉ̀a wə̄n.

⁴ Tɔŋlo enyəa Kə̀lestò mafə bughò fwàʼ mɛ̀ʼɛ̀ fəgha kəla lâŋ kə fə̀ ki alefwàʼ, zən fə̀ lo aleghəŋlo enyəa mò à lò ko ndughoo ù boō fughu tsughu dzə̄ â wə̄n, Zə̀ kə n nì ghùw u te aŋ ghûw u tsəghtsəgha.

To aghî a dzə̀m zə kətuw

⁵ Fəgha kəla Musî fə̀ tɔm naŋa kùu ndùw ghùw wəla ù ləghaa aledòʼò tsəghatsəgha mo ù ghə̌əŋ ghəa ghəla lâŋ kə̀ deē fə̀ lo enyəa, “Ghùw wəla ù naāŋ lâŋ kò kì alemughu mò à lò kəlâŋ.”

⁶ Fəgha kə̀là Mwàʼsò kə Kəzə̀ kə̀ kuuwn dzaā kùu ndùw ghəa ghùw bùghò doʼn tsəghatsəgha a te a vʉ̀a Zə̀ kò bòʼ boo e wə̄n lo enyəa, “Ghù ki dzə yo alebvʉa tsughu am fə̂ŋ zə̀ghà enyəa, à kè lò alo kəwala kɔʼɔ ndùw ndùgho.?” (Aledzàa tsughu enyəa, ù so ndûw nîi tsughuu wô Kə̀lestò a),

⁷ Ŋkāa enyəa, “À lò ndughoo ù lò alenyəa tsughuu ndûw an naʼ zə evʉ̄?” (Aledzàa tsughu enyəa, à lǒ mò ù so e ndûw zôo nughù səā kɔʼɔ̄ wô Kə̀lestò alo evʉ̄ a)?

⁸ Kən kuuwn lò fəgha kəla ghe tɔm naŋa am Mwàʼsò kə Kəzə̀ enyəa, “Shwaʼ u Kəzə̀ ù kuʼù lò ko enyə ghɛ̀ à ghee. Ghɛ̀ buʼù kə̀aa nù, vʉa u lô sugho am fə̀ŋ tɛʼɛ” — tɔɔŋ shwaʼ wəla sɛ̀ zughòo kaŋlo enyəa ghî ghə̀ e gaʼa fə̂ŋ tò a zəŋò Kə̀lestò.

⁹ Abugho ghù dzɛ̀ sə wo an dzughu e tughō zo enyəa Yɛso lò Mughu ù te, boo tsùghù sùghò am fə̂ŋ zə̀ghà enyəa Zə̀ kə̀ mafə wə̄n alo evʉ̄ zôm nùghù kɔʼ, ghù lo zəa nù tuw ko.

¹⁰ Bòʼ à lò fə̀ŋ zəla ghùw gaʼā tsughuu a zəŋò Zə̀ kò enyəa è kə̀ ghəŋlo enyəa ghùw ù te doʼò tsəghatsəgha, à lò sugho bòʼ enyəa ghùw dzâa sə̌a wò an dzughu e tughō zo enyəa ù bǒo fughu â Yɛso e ghəŋlo enyəa ù zə kətuw.

¹¹ Mwàʼsò kə Kəzə̀ kə̀ dzɛ̂ enyəa, “Ghùw wəla ù boō fughu â Zə̀ kò, fəgha kə̀ li kə kê ghə̂əŋ kòʼ yò enyəa ù kelê tuw kə̀ dəla ko.”

¹² Tɔŋlo enyəa, abugho e bugho aŋ ghəa a zəa a kətuw gho, nə̀ŋònəŋ è li yo a zəŋò ghì a Tə̀dzûu ghò àsùghò Tòʼò zò. Ghe dzeŋe ki ko Mughu ù te u mɔ̀ʼ, ù lo Mughùbè ù ghee, vʉ̀a ù mwàʼa â ghì ghəla ghe gɔ̂ɔŋ nduw â wə̄n.

¹³ Tɔŋlo enyəa Shwaʼ u Kəzə̀ ù dzɛ̂ enyəa, “Abugho ghùw tɔŋɔ tsughu zən e Mughu ù te zo, ù n zə kətuw.”

¹⁴ Ghî à sô lo ênzə̂n alenɔɔ nduw èyôsò zò â wə̄n a, mo ghe kâ â wə̄n boo fughu a? Ghe lo sugho ênzə̂n aleboō fughu â wə̄n a, mo ghe kaām ghəa è li zo zuw kòʼ tsə̀ghà kùu ndùw wə̄n a? Ghe lo sugho ênzə̂n alezuw ghəa a wə̄n a, mò ghùw ù lì kâ bùghò nàʼà wò shwaʼ u te wo â ghee a?

¹⁵ Ghùw lò sugho alebùghò naʼà ênzə̂n tum lo, mo ghe kâ wə̄n tum sə wo a? Tò aŋghəa ghe tɔm taŋā am Mwàʼsò kə Kəzə̀ enyəa, “À ŋgè lǒ dzɔ̀ɔdzɔ̀ kə eghəa enyəa ghî ghəla ghe naʼn wo làbəlà è dzùŋ bùghòo nù.”

¹⁶ À sò kǔuwn lo ko enyəa à yò dzə aghî a dzəm ghe lo mo ghe m boo làbəlà è dzùŋ è te. Tɔŋlo enyəa ghùwshʉ̀ghà ù Kə̀zə̀, Èzayà fə dzɛ̀ naŋa enyəa, “Mughu ù te, à mò lo ndugho ù mò boo fughu â shwaʼ u sɛ̀ wò?”

¹⁷ Ghùw gàʼa ko fə̀ŋ alo eghəa mò ù ŋ ghəa e te e zuw, ghùw tum è tè zuuw ko abugho ghe naʼn wo làbəlà è Kə̀lestò â wə̄n.

¹⁸ Ǹ sô fɛ kuuwn bvʉā wô enyəa, à lò enyəa ghe ka mo tùm è dzùŋ zən zuw ŋkāa? Ŋ̀ kwo enyəa ghe mafə zuw, nu Shwaʼ u Kəzə̀ u dzɛ̂ enyəa, “Ghe n zùghòo ŋgəa tsughu shwaʼ u te wo am mbī e dzə̀m. Bâ kə mbī kə̀ li ko yo mo ghe kaām shwaʼ u te wo a fughu zuw.”

¹⁹ Ǹ so ŋ kôom bvʉa kpeʼē tsughu enyəa; À lò enyəa ghî ghə Ezə̀lɛ̂ à ka fə zuwkɛlɛ̄ ŋkāa? Nu Musî fə lo ghùw ù sûesʉ aledzàa wô shwaʼ u Kəzə̀ wən â ghee enyəa, “Ǹ lo nìi wò aghì an naʼ zəla ghɛ̀ moʼò enyəa à yò dzə̂ naʼ e səŋò zò, Ŋ̀ ghəə̄ŋ tsughu ghî ghaŋa ghə e ki mʉ̌ʉn ko a te. Ǹ lo nîi wô ghì a laŋà kə enaʼ kə li ko enyə, Ŋ̀ ghəə̄ŋ tsughu nə̀ghà mə̀ è pfʉa ghe a te.”

²⁰ Ghùwshʉ̀ghà Èzayà fə̀ do dzɛ sə wo shwaʼ u Kəzə̀ â ghee an dzughu e tugho zo enyəa, “À fə̀ mugho laam kəŋ kele ghî ghəla ghe fə̀ kəŋo dzə̂ yo mugho. Mughò m bùgho dè wò ghue waŋa â ghì ghəla ghe fə̀ buʼù bvʉā tsəghà yô mugho.”

²¹ A ŋ kuuwn bùghò â ghì ghə Ezə̀lɛ̂ ghò, Zə̀ kə̀ n dzɛ̀ enyəa, “Mùgho ŋ ghu ghaŋa a tsʉ naŋa zee alekpeē nîi nyəa wô ghì ghəla ghe zuūw yo â mùghò àsùghò ghəla ghe tuū màʼn ghəa ghaŋa gho.”