Lûk 6 - To kə Kəzə̀ kə̀ Fughu ko

Yɛso bvùʼ lâŋ kə Tsuʼntsə̄

¹ Tsuʼntsə̄ u Tə̀dzûu ù li wo, Yɛso n tsəghàa dzì am bəghaa zə asāŋ è li zo, tsə̀təndə̄ghā tə wə̄n tə ŋ kə̂aan pfʉ̌a ndùw tuw wə asāŋ.

² Falàsîi tə̀ li tə m bvʉ â ghee enyəa, “Ghɛ̌ chi ghaa kə̀ kwò, ghɛ̀ sô ghəə̄ŋ ghəa ghəla lâŋ kə̀ dòʼŋkè boo nɛ Tsuʼntsə̄ a?”

³ Yɛso m bɛ̀lɛ̀ ndùw enyəa, “Ghɛ̀ kaam tɔɔŋ ghəa ghəla Dɛvìd fə̀ ghəŋlo a, ghəa dzə̀ŋ fə̀ za tsughu wə̄n a, à ghì ghə̀là ghèe ghee fə̀ lo a dzə̀m à?

⁴ Dɛvìd fə̀ nyə nduw an ndùghù è Kə̀zə̀, nyə̀ nì zə kɔʼ bɛ kə Kəzə̀ kəla à ki ko fɔ̀e tò alezə̄, fùghù tsùghù sùghò ghì ghə̀là ghèe ghee fə̀ lo a dzə̀m.”

⁵ Ù n dzɛ̀ â ghee enyəa, “Wɛ ù Ghùw lò mughu ù Tsǔʼntsə̄.”

Kpùuwkə̀kwē

⁶ Tsuʼntsə̄ ù li wo sughò, Yɛso n nyə̀ ndùw alenyəa tsʉ̂ àghì an Ndùghène è Tə̀dzûu, bəghà ù lì n lo a fughu mo kwe u wə̄n ù təma u kpuw dòʼò nù.

⁷ Tə̀ Falàsîi ghèe ghê dèekə̀làŋ à li ghə ŋ welè lɛ̌ɛn ko enyəa Yɛso sə̀ kpɛ̀ʼɛ baaŋ tsughu nǔ ghùw Tsuʼntsə̄ a, to ghe kwu wə̄n.

⁸ Ù n lo mò ù mâa kèle zìi fəgha kela ghe moʼō â ghè kò, ù n dzɛ̀ â kpùuwkə̀kwe vʉ̄ enyəa, “Tee kəŋo wò fɛ.” Ghùw vʉ ndùw těe ndùw fughu.

⁹ Yɛso n dzɛ̀ â ghee enyəa, “Ǹ so M̀ bvʉā wô a ghɛ̀ enyəa, à è yia lo nû lâŋ kò à, aleghəŋlo èdzɔ̀ Tsuʼntsə̄ ŋkāa aleghəŋlo èbo à? Alebəghaasə ghùw ŋkāa alewī ghǔw a?”

¹⁰ Ù n daŋso lɛɛn kaaŋ wò ndughu e dzə̀m, dzɛ̀ â kpùuwkə̀kwe vʉ̄ enyəa, “Nə̀ghǎan sə ndùw kwe ko.” Ghəa ù nə̀ghàan sə nduw, kwe kə te kə ŋ kòom těe wò èbàm an tsə̀n tə wə̄n.

¹¹ Ghe n sàŋ ndùw à chia enyə̄, kàʼ ndùw alesâan ghəa zə̄lā ghe lô aleghəŋlo â Yɛso.

Yɛso shìaa Tsoʼ tə Wə̄n

¹² An tsùʼu n te mò, Yɛso ŋ kɔʼɔ gɔ̀ɔŋ tsə̀ghà aŋ kwàʼ; ù ŋ gɔ̀ɔŋ bwǐi ndùw à Zə̀ kò tsuʼ fì.

¹³ Ghəa tsuʼ u zuw tsughu, ù n tɔŋɔ tsughu tsə̀təndə̄ghā tə wə̄n, shìaa sə̀ wò ghee eghə̄m à ghè ghò a bə̀ghà. Ù ŋ ŋgɔ̄m tsughu tə te to enyəa à lò tətsoʼ.

¹⁴ Ù fə̀ ni sə wo Sǎemòn wəla ù fə̀ təghàa tsughu zən zo enyəa à lò Pità, à wàazə̀ Pità ù te, Andùlù, ù n nì sə̀ wò Dzɛ̂ms, nì sə̀ wò Dzɔ̌n, nì sə̀ wò Felêp, nì sə̀ wò Batùlùmîa,

¹⁵ nì sə̀ wò Matìo, nì sə̀ wò Tɔ̀mâs, nì sə̀ wò Dzɛ̂ms, tɔɔŋ wɛ ù Afìus, àsùghò Sǎemòn, tɔɔŋ ghùw ù Zilɔ̀t wən.

¹⁶ Dzudàs n lo sugho a te, tɔɔŋ wɛ ù Dzɛ̂ms, àsùghò Dzudàs Eskàlìot wəla ù mò bughò fêe fughu Yɛso.

Yɛso zòʼn nù, baaŋ sùghò àghì

¹⁷ Yɛso n nùghù sə̀ tsùghù wò aŋ ukwàʼ ghèe ghê tsə̀təndə̄ghā tə wə̄n to, bùghò těe tsughu an nə̀ghàsò kə kəlùʼu ghèe ghê ndə̀m è tsə̀təndə̄ghā tə̀ li tən àsùghò saʼ kə aghì kò ghe fə̀ sə kaāŋ wo an Dzùdîa, an Yɛ̀lusalɛ̀m, àsùghò aŋ ŋgùŋù tə ndzùghùntsòʼ è Tâe àsùghò e Sidɔ̀n zò.

¹⁸ Ghî ghən fə̀ bugho alebùghò zyə̂ən shwaʼ u wə̄n àsùghò alebùghò bâaŋ dzàŋà tə ghee; ghəla ghe fə fəmā sugho aŋ ghùu zʉ̀ ù biigh wo, Yɛso m baaŋ kɔʼ ghee.

¹⁹ Nɔ̂e kə aghì chì kə̀ dzə̀m n dəmà ko alemɔ̀ɔ tsughu wə̄n, nu daʼa kə̀ li kə mò səā wo a zəŋò wə̄n, baaŋ wò ghee a dzə̀m.

Eduʼnlo àsùghò muŋe zo

²⁰ Ù n daŋso nùghùsò kɔʼ kətuw, lɛɛn ndùw tsə̀təndə̄ghā tə wə̄n, dzɛ̀ enyəa, “Dzɔ̀ lò ghɛ ghî à laa gho, tɔŋlo enyəa fɔ̂e u Kəzə̀ ù lɛɛn ghɛ̀.

²¹ Dzɔ̀ lò â ghɛ̀ ghəla ghɛ̀ lô dzəŋ to êzə̄ŋ, nu ghɛ̀ lo kuuwn zəa kuuw nù. Dzɔ̀ lò â ghɛ̀ ghəla ghɛ̀ dînlo êzə̄ŋ nu ghɛ̀ kê tsǒʼn nù.

²² Dzɔ̀ lò â ghɛ̀, abugho ghî à bâa ghɛ̀, bàʼà zə̀ghàan ghɛ̀, sùuwn ghɛ̀, bôon zən ghɛʼɛ̄, bòʼ ghəa e Wɛ ù Ghùw!

²³ Abugho ghe ghəŋlo êzə̀, ghɛ̀ è tsoʼnlo, buu èfwəŋ aŋ ghue è ghaa zo, bòʼ namso kɛʼɛ kə̀ ne kə lo nû alo kəwālā. Nu ghê tsele a ghê tsele fə̀ ghəəŋ sugho êzə̀ â ghiīshʉ̀ghà a Kəzə̀ ghò.

²⁴ Yia a bughò ghɛ̀ ghəla ghɛ̀ kuū êzə̄ŋ, ghɛ̀ kê lò an tsù, nu ghɛ̀ ŋ ghue zɛʼɛ e zə ten.

²⁵ Ghɛ̀ ghəla nə̀ghà mɛʼɛ n də̂mlo êzə̄ŋ, ghɛ̀ kê zǔuw ŋgōʼ, nu ghɛ̀ kê kǔuwn lò tədzəŋ. Ŋgoʼ kê lò sugho â ghɛ̀ ghəla ghɛ̀ tsoʼnlo êzə̄ŋ, nu ghɛ̀ kê kǔuwn lò alo emūŋē, ghɛ̀ è dînlō.

²⁶ Abugho ghî à kɛɛ̄ mɛʼɛ̀ ghɛ, ghɛ̀ ke fala, nu ghê tselè a ghê tsele fə̀ bɔɔm kɛɛ sugho ghê ghiīshʉ̀ghà a Kəzə̀ êzə̀.”

Ghùw è ləghaa nduw ghùw ù kə̀tuw ù Wə̄n

²⁷ “Yìa Ǹ so Ǹ dzâa wô â ghɛ̀ ghəla ghɛ̀ zyəə̄n shwaʼ waŋa wo fɛ êzə̄ŋ enyəa, ghɛ̀ è ləghaa nduw ghî ghəla ghe bwîi an tàaŋ tə efwēe tɛʼɛ̄, dèe ndùw sùghò èdzɔ̀ â ghəla ghe bâa ghɛ.

²⁸ E tsəa nduw nlò təghàa fò an tuw u ghì ghəla ghe tsɔ̂ɔm ghɛ, gɔ̀ɔŋ ndùw an tuw u ghì ghəla ghe sûuwn ghɛ.

²⁹ Abugho ghùw sə̀ghàa dzôʼ kə̀a kò alo kəsɛ̄ɛ, děe mɛ̀ʼɛ ndǔw wə̄n â kə̀ li kən. Wəlà ù nì nughu kɔʼ sàŋ zəghà, kà sə̂mlò alezə̀ghàa daŋso ndûw fə̀ mʉa nlʉ̀ fəgha â wə̄n.

³⁰ E fughuu nduw fəgha ko â chìa wəla ù nɔe wô; abugho ghùw kuūwn kelebəgha kɔʼ fʉgha wʉ̀a wò nû, kà fʉgha u te u kôom bvʉ̄.

³¹ Ghəa ghəla ghù ləghaa enyəa to ghî à mô ghə̌əŋ wò â ghù, e bɔɔm ghəəŋ nduw sugho êzə̀ â ghee.

³² Abugho ghù ləghaa ko ghî ghəla ghe ləghaa ghû, ghù a te zəa kɔ̄ʼɔ̂ kwò? Tɔŋlo enyəa ghî à biigh bɔɔm ŋgəəŋ ləghaa sùghò ghì ghəla ghe ləghaa ghee êzə̀.

³³ Abugho ghù ghəə̄ŋ ko dzɔ̂ zò â ghì ghəla ghe dêe ghû â dzɔ̀ zò, ghù a te zəa kɔ̄ʼɔ̂ kwò? Ghî à biigh a ŋgəəŋ ghəəŋ sùghò nù êzə̀.

³⁴ Abugho ghù fɔ̀ɔn fughuu ko fʉgha wo â ghî ghəla ghù mòʼò enyəa ghe lo tsəa tsə̀ghàa wò nù ebàm, ghù a te zəa kɔ̄ʼɔ̂ kə̀ kwò? Ghî à biigh a fɔ̂ɔn dzə̂əŋ sùghò nù fʉgha wo aŋ ghùe e ghee, ghe sô kwo enyəa ghe lo kòom kèle kpēen nù ebàm ghe buʼù kele tsəghàsò.

³⁵ E laam ləghaa nduw nlò ghî ghəla ghe bâa ghɛ, ghəəŋ ndùw èdzɔ̀ â ghee. Fɔ̀ɔn fùghuu ndùw sùghò ghee â fʉgha wo, kòom mòʼn yò enyəa ghe lo fughuu tsə̀ghàa wò nù ebàm. Abugho ghɛ̀ ghəŋlo êzə̀, namso kɛʼɛ kə e ke e ghaʼa, ghɛ̀ è ke e lo wɛ a Zə̀ kə̀ ghaʼa kən kə̀ dzə̀m; nu Ù lə̀ghâa ghì ghəla ghe fughuu yô kɛɛ wo, à ghì à mʉa gho.”

Ghue è saʼa zo

³⁶ “Kele nlò se è kwuso zo, to Tsele wɛʼɛ ki se è kwusō zo.

³⁷ Ghɛ̀ ka e saʼa ghî ghò, Zə̀ kə̀ lô saʼā sughò ghɛ; kà nî sùghò enyəa ghùw ghə̌əŋ boon nù, Zə̀ kə̀ lô nîi sughò enyəa ghɛ̀ ŋ ghəəŋ bonlo. Ghuūw maʼa nlò bôo tə aghì tò, Zə̀ kə̀ lo Ghuūw maʼà sughò bòo tɛʼɛ.

³⁸ E bughuu â ghu ko, tò Zə̀ kə̀ è fughuu sugho ghû; Kə lo foʼò kɔʼ fʉgha wʉ̀a ù dzûŋ wò, kə zoʼn luesō tsughu enyə aŋ ghu kə̂a, u luū sə, nu ŋgòʼ è dzì zəla ghù fughu a te, ghe kê ghù bɔ̌ɔm fughuu sùghò èzə̀.”

³⁹ Yɛso n dzɛ̀ kpèʼe ndùw â ghee aŋ kwə̀ən kə ushwāʼ enyəa, “To ghùw ù fǒo ŋ wàazə̀ ghùw ù fǒo mboʼo tɛ̀ɛ bwìi to a? To ghe dzeŋe ndûw bvʉ̂a nyəa tsughu alo kɓɔ̀ʼ ghee a te gho a bə̀ghà.

⁴⁰ Wàakə̀mwàʼsò kà wàdè ù wə̄n tsəghà sə, kə̀chìa wəla ù kuūwn ŋge zoʼn tsughu ghəa gho, to ù dòʼò tǒ wàdè ù wə̄n.

⁴¹ Ghù kòʼò kô sugho e fəkàʼ zəa e lô an sə e wàazùghù, ghù kuuwn kòʼò yò bâŋ chia kə lô alô è zəghà zò esə a?

⁴² Ghù lò ênzə̂n aledzɛ̀ â wàazùghù enyəa, ‘Ŋ wàazə̀, na M̀ foō maʼà səā wô sugho e fəkàʼ zəa e lô an sə zəghà,’ mo ghuūghùe wʉ̂a ù koʼò yò bâŋ chia kə lô alo e zəghà zò esə à? Bəən kə ghûw tò ghû, bùʼu fo màʼa sə wò dzə̀ bâŋ chia kə lô alô è zəghà zò esə, sěe ghù sə̀ tɔʼɔ̀ koʼò alefoō maʼà səā sughò zəla e lô an sə e wàazùghù.”

Fəkâʼ àsùghò twam u wə̄n wo

⁴³ “Nu kâʼ fə̀ dzûŋ fə̀ li fə yo fə mʉā tam kə̀ biigh ko, fə̀ biigh fə̀ li fə yo sughò fə mʉā tam kə̀ dzûŋ kò;

⁴⁴ nu a kâʼ fə̀ kele ko an tam kə wə̄n, tɔŋlo enyəa, a yo alekùɛɛ àŋgəm aŋ kàʼ fə echwàn ŋkāa a kûɛɛ àdzʉ aŋ kàʼ fə nyɔ̌ɔŋmgbê.

⁴⁵ Ghùw ù dzùŋ bɔ̌ɔm ghəəŋ ko èdzɔ̀ kùu ndùw fə̀ŋ è wə̄n è dzùŋ. Ù bǐigh, vʉ̀a ù ghəə̄ŋ sughò bo zo kùu ndùw sùghò fə̀ŋ è wə̄n è bǐigh; nu dzughu e bɔɔm kə̀a sə̌a wò kô ghəa ghəla a lue doʼō ghùw an unʉ̀ghà.”

Ghî à bɔɔ a təndughu gho a bə̀ghà

⁴⁶ “Ghɛ̀ mugho biso ŋgɔɔ kaŋlo enyəa, ‘Mughùbè, Mughùbè,’ aŋ kwò, mò ghɛ̀ fwaʼà yò fəgha kə̀là Ǹ dzâa â ghɛ̀ a?

⁴⁷ Ghùw wəla ù ləgha wô mugho, zuw tsughu shwaʼ waŋa, bwìi ndùw a te, Ǹ dêe wò nù fəgha kə̀là ù lò â ghè kò.

⁴⁸ Ù lǒ tǒ ghùw wəla ù fə̀ so e bəgha ndughu, tsə̀m dzɔ̀ nyə̀ tsughu kəbəghànlò; tsùghù zìi sə̀ kɔ̀ʼ wò è kuʼ an lùʼu kə̀ tughu ko; fʉ̀ghàdzughù tə̀ mo e səa nù, bùghò tə̀m ughue a an ndughu è te, zə̀ ŋ kè nôʼ, ghe màʼa fə̀ bəgha dzɔ̂ kɔʼ.

⁴⁹ Ghùw wəla ù kuūwn zuw, kè bwîi aŋ ghəa a te gho lo tǒ ghùw wəla ù fə̀ bəgha ndughu mo ù kà kùʼ bəghàan kò; fʉ̀ghàdzughù tə̀ mo e bughò tə̀ma wò ko ughue a te, zə̀ n daŋso seʼe bvʉ̀ e tsughu, biso seʼê tsughu seʼe è fɛɛ̄n zo.”