Lûk 5 - To kə Kəzə̀ kə̀ Fughu ko

Yɛso tɔ̀ŋɔ Tsə̀təndə̄ghā tə sûesʉ to

¹ A fə̀ bugho tsuʼ ù li wo, Yɛso ti aŋ ŋgùŋ è nyʉ̀ e Dzɛ̀nɛ̀salɛ̀t, ghî ghə n nyəŋo zùuŋ wò a vʉ̀a wə̄n, alebùghò zyə̂ən shwaʼ u Kəzə̀.

² Ù ŋ kòʼ tsùghu ùkwə̀n u bʉ̀ghà aŋ ŋgùŋ è ènyʉ̀ mo ghî à kwuu a tətsə̄ghāa ghə n sə̀ nùghù kɔ̀ʼ a te, ghe n nəŋsô ghuūw e ghee.

³ Yɛso n nyə kɔʼ alô kə̀ li ko, kə Sǎemòn kò, dzɛ̀ â wə̄n enyəa ù nyɛʼɛ̄ baŋà nyəā kəŋo ndûw alo enyʉ̀. Ù n dòʼò è tsughu, zoʼn səa wò àghǐ fughu alo kəkwə̀n.

⁴ Ghəa ù zoʼn mɛʼɛ̀ tsughu ghî ghò, ù n dzɛ̀ â Sǎemòn enyəa, “Sěe nyə kəŋo ndǔw nlǒ kwə̀n kò alo kətsə̀m, ghɛ̀ maʼa nyə tsughu ghuūw zɛʼɛ̄ zo, ghɛ̀ kwu tsəghaa to.”

⁵ Sǎemòn n dzɛ̀ â wə̄n enyəa, “Mughùbè, ghàʼ m fɛ də̂m bwǐi, kè kwu kəfəgha; ghəa à dzɛ̀ wô dzə̂ ghû, M̀ màʼn tsùghuu ko nù ghuūw e te zo.”

⁶ Ghəa ghe maʼà tsughu êzə̀, tsəghaa tə n nyə bɛɛ tsughu a te, ghuūw zə m bən lǒ to zə e tenlo.

⁷ Ghe n daŋso nà wò fən a ghee aŋ kwə̀n kə̀ li kə chî, enyəa ghe bughò yosò ghee. Ghe m bùghò bɛ̌ɛ lueso tsughu tətsəgha aŋ kwə̀n u te wo u bʉ̀ghà, wə n lo ko to wə e məla saŋ.

⁸ Ghəa Sǎemòn tɔɔŋ Pità kòʼ ghəa yì, ù n tə̀m ndùw tə̀ŋguʼ a vʉ̀a Yɛso, dzɛ̀ â wə̄n enyəa, “Nùghu a vʉ̀a mùghò a Mughùbè, Ǹ lo ghùw wəla Ŋ̀ ghəə̄ŋ ghəa à biigh gho.”

⁹ Tuw kə màʼa fə̀ ŋge kpuw Pità ghèe ghê fən a wə̄n gho an ŋgòʼ è ndə̀mà tə tətsəgha təla ghe kwu kɔʼ.

¹⁰ Tuw kə m kpuw sùghò Dzɛ̂ms ghèe Dzɔ̌n, wɛ a Zɛbɛ̀dîi; fən a Sǎemòn. Yɛso n daŋso dzɛ̀ â Sǎemòn enyəa, “Kà tsəŋ; nì nùghù tsùghù êzə̄ŋ, ghù lo êzə̄ŋ e kwuu wo ghî ghò.”

¹¹ A m bùghò ghe bâŋ sə wo kwə̀n u ghee wo a ŋgùŋ è dzùghùntsòʼ, ghe n naŋatàʼà tsùghù fʉgha u ghee u dzə̀m nùghù ndùw a bàâ Yɛso.

Yɛso bǎaŋ ghùw ù Tə̀tsùghò

¹² Ghəa Yɛso sə̀ lo an nàʼà fə̀ li fo, ghùw ù lòʼ n ndùw bùghò fughu mò tsùghò tə̀ ŋ wə̄n kwu pfʉ̄. A m bùghò ù kòʼ tsughu Yɛso, ù n tə̀m ndùw tə̀ŋguʼ a vʉ̀a wə̄n, buʼ kəghu â wə̄n enyəa, “Mughùbè, abugho ghù tsə̀m tsughu, ghù lò nû alebaāŋ kɔʼ mugho, Ǹ zɔlɔ̄ tsughu.”

¹³ Yɛso n dàan ndùw kə̀ghu, mɔ̀m tsùghu wə̄n, dzɛ̀ tsùghù enyəa, “M̀ baaŋ nù, tughu kɔ̀ʼɔ̀.” Tsùghò ti tə n daŋso zə̀ghàa tsùghù tûwbʉ̀ghà vʉ̀ an nə̀gha zə̀ èzə̀.

¹⁴ Yɛso ŋ kwɛ̀ɛn tsùghu wə̄n enyəa, “E kwo ghù lò dzâa â ghùw, kuuwn ndǔw kòʼo ndùw ko fɔ̀e, ghù fughu nduw Zə̀ kò aŋghəa lâŋ kə Musî kə̀ deē, aledèe tsughu enyəa ghù n dzàŋ tùghù, tǒ tsə̌a â naʼ zo enyəa ghù èzəŋ zɔlɔ nù.”

¹⁵ Zɔ̂ŋ u Yɛso wə̀ ŋ kòom kǔuwn fwə̀ən kùm tsə̀ghàsò è tsughu, ndə̀mà tə aghì tə̀ n tsôo bùghòo ndùuŋ ko alebùghò zyə̄ən shwaʼ u wə̄n, àsùghò enyəa ù baāŋ tsughu ghee an dzàŋà tə ghee.

¹⁶ Yɛso ŋ kuuwn nyɛʼɛ nùghùun něe nùghùun tsùghuu, zə̀mà ndùw gɔ̀ɔŋ wò wəlà nəŋ ko an nàn kə kəlùʼu.

Yɛso bǎaŋ Kə̀kə̀ŋlò

¹⁷ Tsuʼ ù li wo, ghəa Yɛso zoʼnlō, Falàsîi tə̀ n doʼ ghèe ghê Dèekə̀làŋ; ghe sə kaāŋ wo an nàʼà ŋ Galèlîi, nàʼà n Dzùdîa à nàʼà n Yɛ̀lusalɛ̀m mə̀n n dzə̀m. Ù n lo êzə̀, mò Zə̀ kə̀ ŋ wə̄n â daʼa kə̀ baaŋ kə aghì kə̀ fughu.

¹⁸ Ghe mo e kôʼ ghî à li a sô sə̀ŋo wò â kə̀əŋ kò alo kəmbùŋ, ghe ŋ kəŋo kèe dzì alebùghò tsəghàa nyəā sueʼē tsughu a vʉ̀a Yɛso.

¹⁹ Ghəa ghe kəŋ ke dzì aletsə̀ghàa nyə â wə̄n, ghî a màʼa fə̀ ŋge tsuŋ, ghe ŋ kɔ̀ʼ ndùw aŋ gɔ̀ŋ kə ndughu, tsʉ̀ è kɔʼ, zə̀ghàa nyə tsughu wə̄n am bùʼ kə te ko a vʉ̀a Yɛso, am bvʉ̄a zə aghì.

²⁰ Ghəa ù kòʼ tsughu enyəa ghe ŋge boo fughu nû, ù n dzɛ̀ tsùghù enyəa, “Ǒo tûwbʉ̀ghà, Zə̀ kə̀ m bòo tə̀ghà tə̀ ghuuw màʼà.”

²¹ Ghê dèekə̀làŋ ghèe ghê ghì a Falàsîi y ghə m bvʉ enyəa, “Fən lǒ fə̀ ndùghò, fə bəlā suūwn Zə̀ kò ènyə à? À lò ndughoo, ù lò aleghuūw maʼà bòo tə aghî a, bugho à buw Zə̀ kò à?”

²² Yɛso ŋ kòʼ tɔ tsughu moʼnlò e ghee, ù m bvʉ â ghee enyəa, “Tuw kə ghɛ kpûuw kwò?

²³ À bùghuun tsə̀ghà è ghɛ zo, aledzàa tsughu enyəa, ‘Zə̀ kə̀ m bòo tə̀ghà tə̀ zə̂.’ Ŋkāa aledzàa tsughu enyəa, ‘Nùghu bwǐi wǒ a?’

²⁴ Ǹ dêe tsùghuu nù â ghɛ̀ enyəa Wɛ ù Ghùw kì nû daʼa ko aleghuūw maʼà bòo tə aghì fɛ am mbī.” Ù n dzɛ̀ â kə̀əŋ chi ko enyəa, “Ǹ dzɛ̂ â ghù enyəa, ghù nughu kɔʼ, ghù ni kɔʼ chʉ̂a wʉ̀a wò, ghù nduw alô ghù.”

²⁵ Kə̀əŋ chi kə n daŋso nùghù kɔ̌ʼ fughu an sə kə ghee, nì kɔ̌ʼ mbùŋ chì ù mò nyəŋ a te, nùghù ndùw alô wə̄n, kɔʼso ndùw Kə̀zə̀.

²⁶ Dzughu zə n zum ghee a dzə̀m, ghe ŋ kɔ̀ʼsō Kə̀zə̀, tsəəŋ kə̀aa tsùghuu enyəa, “Ghàʼ bwîi tsəgha, ghǎʼ ŋ ghəa e nɛ kòʼ.”

Yɛso tɔ̀ŋɔ Lɛvì

²⁷ Aŋghəa ghəa ghən tsəghà tsughu, Yɛso m bwîin kǎaŋ ndùw, ndùw kòʼ tsughu dzə̀akə̀mwàʼsò ù lì, ghe fə̀ tɔŋlo enyəa à lò Lɛvì, mò ù lǒ an lùʼù kə kəfwàʼ kə wə̄n, dzɛ̀ â wə̄n enyəa, “Bùghò ghàʼàghù nùghù.”

²⁸ Ù n zə̀ghàa tàʼà tsùghù ghəa yì à dzə̀m, nùghù ndùw a bàâ wə̄n.

²⁹ Lɛvì n daŋso bùghò ghə̌əŋ tsughu zə è səŋò zò alô wə̄n an ndughu, tɔŋɔ zɔ̀ʼ tsùghù Yɛso. Ghî ghə̀ n tsuŋ tsughu fùghù èzə̀, ghê dzə̀akə̀mwàʼsò à li ghə n lo sugho ghèe ghee, ghe n dzeŋe zəa.

³⁰ Tə̀ Falàsîi ghèe ghê Dèekə̀làŋ, ghe n nyuuŋ saʼa kâaŋ tsə̀təndə̄ghā tə Yɛso enyəa, “À lǒ kwò ghɛ̀ zəā dzəŋlō, mʉa dzə̄əŋ sùghò nlʉ̀ ghɛ̀ à ghê dzə̀akə̀mwàʼsò àsùghò ghì à biigh gho a?”

³¹ Yɛso n daŋso bɛ̀lɛ̀ ndùw ghee enyəa, “Ghî ghəla ghe dzaŋà yo, ghe ki yo ghəa è ghəəŋ zo ghèe ghê ghùwŋgàŋ, à gɔ̀ʼɔ̀ ko ghəla ghe dzaŋā.

³² Ŋ̀ kâ bùghò dzə̀ ghî à dzûŋ ghò aletɔŋɔ, Ǹ laam bùghò alebùghò tɔŋɔ̂ ghì à biigh gho, enyəa ghe kuwnlo.”

Dzughu è pfʉa zo kùu ndùw dzughu è baa zo

³³ Ghî à lì ghə n dzɛ̀ â Yɛso enyəa, “Tsə̀təndə̄ghā tə Dzɔ̌n àsùghò Falàsîi tò, ghe baa tsə̀ghà nù dzughu zo, gɔ̀ɔŋ tsə̀ghà sùghò, təghà tə̀ kuuwn tsòo zə̌a ko nù, mʉa ndùw sùghò ùfʉgha.”

³⁴ Yɛso m bɛ̀lɛ̀ ndùw ghee enyəa, “Ghù lò nû alenaŋâ fən a nùm ù yìzən, ghe e baa dzughu zo an tsuʼ fə kəmālē fə wə̄n a, mò nùm ù yìzən lǒ ghèe ghee a? Ɛ̂ŋgaŋ!

³⁵ Nəghā e ndoʼò bùghòo nù, zəla ghe lo nîi nughùun kɔʼɔ̄ nùm ù wìzən aŋ ghùu ghee, ghe lo e laʼā baa nduw dzughu zo an nə̀gha zə̀ èzə̀.”

³⁶ Ù n dzɛ̀ â ghee sughò aŋ kwə̀ən kə ushwaʼ enyəa, “Ghùw yò alegbə̀là ndûw bâa wô bà kə ndzʉ̄ kə̀ fughu ko enyəa e so e məghàa an ndzʉ̄ tə̀ wii to. Abugho ù ghəŋlo êzə̀, ù fi boon màʼà ndzʉ tə̀ fughu tə te to, mo bâ kə ndzʉ kə̀ fughu chi kə yo dzə̂ alekpeē dzəŋlo ghèe ndzʉ tə̀ wii tì.

³⁷ Ghùw yò alenìi kɔʼ sə̀ŋ è nlʉ̀, ù kùu naŋā tsughu an sùʼ è gùuwnyòm è wǐi. Abugho ù ghəəŋ tsughu êzə̀, lʉ̀ n te n sô ghə̌əŋ nù sùʼ è wǐi è te gbəla bâa, lʉ̀ n sô kwəlà sâŋlò, suʼ boō tsughuu sughò.

³⁸ Ghùw lǎam ki aledzə̀n sə̀ŋ zə̀ nlʉ̀ an sùʼ è fughu.

³⁹ Ghùw wəla ù mʉ kwoōn tsughu lʉ̀ n tùghu mò, ù kòom mbùuŋ yǒ sə̀ŋ è nlʉ̀, bòʼ ù bɔ̌ɔm dzàa ko enyəa, ‘À dzɔ̀ ko n tùghu mò.’ ”