Lûk 2 - To kə Kəzə̀ kə̀ Fughu ko

Dzə e Yɛso

¹ Ghe fə Dzɔ̌n dzə tsughu an sùghù e Də̀ŋ kə̀ nêe ne kəla kə fə saʼa am mbùʼ e Lumà e dzə̀m tɔŋlo enyəa à lò Agûsì. An tì kə̀n, Agûsì m fùghù sə̀ wò kə̀làŋ enyəa ghe taŋ aghî a fughu am mbùʼ è te e dzə̀m.

² Ghe fə̀ ghî à fɛ zeʼe taŋa nû aŋ ghu è chìa Kwə̀lenùs fə̀ kɔʼ ndàŋ tò gɔvə̀nò ù Silìa.

³ Kə̀chìa n nughùun ndùw ko an naʼ e ghee alendùw tɔm zən e wə̄n.

⁴ Dzùghùsî fi zəghàa tsùghù sùghò nù naʼ e Nazalɛ̀t zò am mbùʼ è Galèlîi, nùghù kɔ̀ʼ ndùw am mbùʼ è Dzùdîa am Bɛtə̀lɛ̀hɛ̂m, an naʼ e Dɛvìd, ù màʼa fə̀ lo mò ù sə̀ an tigh kə Dɛvìd.

⁵ Ù fə̌ fughu nduw alendùw tɔm a ghee gho a zən ghèe Mèle tɔɔŋ wìzən wəla ù fə̀ kpôom naŋā. Wìzən vʉ n lo unʉghà.

⁶ Ghəa ghe sô lo fughu, nəgha e wən è dzəa zə m kpe è tsughu.

⁷ Ù n daŋso chuaso dzə̀ wò wɛ̂ɛnùu, nyəm kɔʼ wə̄n am gbà u təndzʉ̄, nyə̀ŋsò nàŋa nyə tsughu wə̄n an kpaa wəla dzə tə fə̀ zəa a te, bûʼ kə̀ bwii kə màʼa fə̀ buw fughu alo atsə̄ â ghee.

⁸ À n lo êzə̀ mo ghî a baʼā a təndzì à lo fughu am bəghaa è li zo ghe chîin bwiī ghee â ndzì tò.

⁹ Tsə̀ndə̄ghā è Kə̀zə̀ m gbə̀n sə̀ wò fughu an sə kə ghee, daʼa kə Kəzə̀ kə̀ n nùghù mwɛ̀ è tsughu, bàŋ tsùghu tò uwən a zəŋò ghee. Ghe n tɛ̀ è tsəŋ.

¹⁰ Tsə̀ndə̄ghā zə n laam dzɛ̀ â ghee enyəa, “Kà nlò tsəŋ, M̀ bughò ghɛ̀ â Làbəlà è Kə̀zə̀ zəla è lo nîi wô duʼnlo è ne zo â ghì ghò a dzə̀m.

¹¹ Nɛ an tsuʼ u nɛ wən, ghe ŋ ghɛ̀ â tisûŋ dzə an naʼ e Dɛvìd mò à lǒ Kə̀lestò Mughu ù te.

¹² Zən sə̀ lǒ tsə̌a â ghɛ̀, ghɛ̀ sô ndùw kòʼò tsughuu wɛ mo ghe ŋ wə̄n nyəm naŋā alo təndzʉ̄, mò ù nyə̀ŋ alo ukpāa.”

¹³ Ghe mo e koʼò ko mò tsə̀təndə̄ghā tə Kəwālā tə m gbə̀n sə̀ wò ndə̀m, təm dzəəŋ wò è sûesʉ zə̀, ghe n zoo àghəa, fughuu ùnyoʼ â Zə̀ kò, dzàa tsùghuu enyəa,

¹⁴ “Kɔʼso n lo â Zə̀ kə̀ edzuŋ ko. Ghî ghəla ù taʼ sugho ghèe ghee am mbī, ghe n dòʼò nyə̀ wò alo ebughunlo.”

¹⁵ A m bùghò tsə̀təndə̄ghā ti tə nughù nyə̀ ndùw ebàm alo Kəwālā, ghî à baʼā a təndzì yi n saan tsughu enyəa, “To sɛ̀ mô nughù ndûw am Bɛtə̀lɛ̀hɛ̂m a ndûw kôʼ ghəa zə̄lā Tsə̂ntə̀mbî dzɛ̀ â sɛ̀ enyəa e sə nû.”

¹⁶ Ghe n daŋso nùghù shùaa ndùw èghue fughu, ndùw kòʼ ndùw Mèle ghèe Dzùghùsî àsùghò wɛ̌ vʉ̀, mò vʉ̀a ù nyə̌ŋ alo ukpāa.

¹⁷ Ghəa ghe ndûw kôʼ tsughu ghəa yì, ghe n dzɛ̀ ndùw ghee â ghəa yia tum zə mô bughò naʼà â ghee.

¹⁸ Ghî ghəla ghe mò zuw ghəa a te gho dzughu zə n zūm ghee a dzə̀m.

¹⁹ Mèle m mgbɛɛ mòʼn tsə̀ghà kô ghəa a te gho, kəŋo tsə̀ghà kə̀tuw a te.

²⁰ Ghî à baʼā a təndzì yi n nughùun ndùw èbàm, fughuu ndùw ùnyoʼ, kɔʼso ndùw Kə̀zə̀ alo ezōm aŋ ghəa ghəla ghe mô zuw bɔɔm ndùw kòʼ ndùw sùghò an tə̀ŋ kə̀là tum zə mô dzɛ̂ â ghee.

Zən e wɛ e lo Yɛso

²¹ A m bùghò wən e fê tsughu, aŋghəa ghe dzə tsughu wə̄n, ghe n so e sugho tigh kə wə̄n, ghe n tèlè tsʉ̀ tsughu kô zən e wə̄n enyəa à lò Yɛso, zən zəla tum mò fughu ziī, to ghe e bughò bɔŋ wə̄n.

²² Ghəa ghe dzə̂ kɔʼ ŋgàŋ tə ghee to aŋghəa lâŋ kə Musî kə̀ deē, ghe n daŋso nì kɔ̀ʼ ndùw wɛ an Yɛ̀lusalɛ̀m alendùw dèsò an sə kə Mughu ù te,

²³ (aŋghəa ghe tɔm naŋa an làŋ kə Mughu ù te enyəa, “Ghe lô wɛ à nûu a sûesʉ ghə̀n à dzə̀m nîi tsə̀ghà enyəa ghe lo ghî à zɔlɔ gho â Mughu ù te.”)

²⁴ Ghe fə̀ a fughu nduūw sugho alendùw sâa fughu Kə̀zə̀ â fəgha kə təkàŋ kò, lâŋ kə Mughu ù te kə̀ n dêe enyəa ghe ki alefughuu mbuŋū to tə bə̀ghà ŋkāa kuŋ e təmbùŋu e bə̀ghà.

²⁵ Êzə̄ŋ, noo kə ghûw kə li kə n lo tsəgha an Yɛ̀lusalɛ̀m, ghe fə̀ tɔɔ̄ŋ wə̄n enyəa à lò Simìon. Ghùw wən n lo ghûw ù tsəghatsəgha, boo fùghù sùghò â Zə̀ kò. Ù n ləəm tsə̀ghà tsuʼ fəla Zə̀ kə̀ bəghaasəa Ezə̀lɛ̂ a te. Zuʼ tə̀ Zɔlɔ tə n lo tsəgha ghèe wə̄n.

²⁶ À n lo mò zə̀a fə̀ dzûŋ fi mafə̄ â wə̄n dzɛ̂ fùghù â wən enyəa, vʉ e kê wə̄n â mbàŋ sɔ̂ŋ fùghù yo mò ù kà də̀ŋ kə̀ tsuʼu kə Mughu ù te kə te kə kôʼ nùghù tsùghù dzə̀.

²⁷ Zʉ̀ u te wə n tsom kɔʼ wə̄n, ù m bɔɔm kɔʼ kpeen ndùw mo ghê tselè Yɛso nìi nyə̌a wò sùghò Yɛso am be kə̀ ne ko, alebùghò fôʼn kɔʼ bughōo kə enaʼ ko; aŋghəa lâŋ kə̀ deē,

²⁸ bəghà vʉ n toʼn wò Yɛso, fughu kəzɔ̀ŋlò â Zə̀ kò, taŋ aghəa dzàa tsùghu enyəa,

²⁹ “Tsə̂ntə̀mbî, ghù n to kə̂a kə naŋa aŋghəa ghù fə̀ to naŋa, to ghù mo zəghaa kɔ̂ɔ fə̀ghà fo êzə̄ŋ fə kwəlā nyə nyàʼànyàʼà.

³⁰ Nu mùghò ghùw wəla ghù fə̀ to naŋa enyəa ghù kè ghì a bəghaasə am bam e wə̄n kôʼ an sə ghaŋa a bə̀ghà,

³¹ wəla ghù nì dê sə wo an sə kə aghì ghən a dzə̀m,

³² Tsə̀ zəla è dèe Toʼò zò â ghəa gho, fughuu sùghò ŋkɔʼso â ghî ghə Ezə̀lɛ̂ ghò, ghî ghə̀a.”

³³ Dzughu zə n zuu tsele ghèe zə̀ an ŋgòʼ è ghəa ghəla Simìon taŋa an tuw kə wɛ vʉ̀.

³⁴ Simìon n daŋso gɔ̀ɔŋ tsughu an tuw u ghee, dzɛ̀ â zə̀awɛ̀ enyəa, “Kòʼô, wɛ vʉ̀a ghɛ̀ koʼō fì, Zə̀ kə̌ wə̄n tum wò alebvʉ̀sò maʼà ndə̀m è aghì àsùghò alekɔʼso naŋa à li gho fɛ an naʼ zə Ezə̀lɛ̂. Ù kè lǒ tsə̌a Zə̀ kə̀ tum wo, ndə̀m è àghì kè tsɔ̂mlò,

³⁵ dèe fùghuu wò mòʼn zəla ghe ki am fə̀ŋ tə ghee. Ghù ke e lo alo ese, ghəa e te e kê nyuɛʼɛ̀ ghù, e nyəā tâa ndûw ghù alo kəghoo.”

³⁶ Wìzən ù ùshʉ̀gha ù lì n lo fughu ghe fə̀ tɔŋlo enyəa à lò Anà, wɛ ù Fanwɛ̀l, ghùw ù Ashà. À fə̀ tso lo noo kə yîzən, num fə̀ kpuw naŋā taʼà to mo ghe nî nàŋa ko eghue alo tənùu sə̀ghàmbəgha.

³⁷ Ù n dòʼò ko êzə̀ aŋ wìikpūw noo kpe tsughu ghə̀m n tə̀nùu efāa à ghè tò tə chìakò. Ù m mughu zee ko am be kə̀ ne ko, baa èdzughu, kɔʼso Kə̀zə̀, gɔ̀ɔŋ zěe ndùw, gɔ̀ɔŋ bwǐi ndùw.

³⁸ Yìzən vʉ̀ n daŋso bùghòo sùghò an nəgha e te zo, bùghò fùghu zɔ̀ɔŋ kə Kəzə̀, kə̀a sùghò ghəa a wɛ vʉ̀ â ghì yia ghe fə̀ ləə̄m tsəghà enyəa to Yɛ̀lusalɛ̀m mò zə kətuw.

³⁹ A m bùghò ghe fwâʼ mɛʼɛ̀ kɔʼ ghəa gho an lwàŋ u Tsə̂ntə̀mbî, ghe n nùghù ndùw èbàm an tsə kə ghee, tɔɔŋ Nazalɛ̀t am mbùʼ è Galèlîi.

⁴⁰ Wɛ vʉ̀ n nùghù bwìi è kɔʼ; ù ŋ ki utɔ, Zə̀ kə̀ n ti sugho an tuw kə wə̄n.

⁴¹ Êzə̄ŋ, ghê tsele Yɛso n ndûuw tsə̀ghà an Yɛ̀lusalɛ̀m nûutə̀nùu alendùw zə zə kə̀ Zə̄ŋsō naaŋ ko.

⁴² A m bùghò Yɛso noō kpe tsughu nûu tò eghə̄m à ghè tò tə bə̀ghà, ghe n nùghù kɔ̀ʼ ndùw alendùw zə zə kə te ko aŋghəa bughōo kə enaʼ kə deē.

⁴³ A m bùghò tsuʼu ŋ kə̀zə n te n tsəghà tsughu, ghê tselè Yɛso n sə kwu ndùw dzì ebàm an Nazalɛ̀t, ghî fì, tɔɔŋ Yɛso, fə m bə̀n dòʼòdòʼò ndùw ebàm an Yɛ̀lusalɛ̀m. Ghê tsele n sô kǔuwn kwo yo.

⁴⁴ Ghe m bwìi zěe ndùw tsuʼ fə̀ zəŋè fò fə mɔ̀ʼ, kwo ko enyəa Yɛso lǒ ghèe ghee. Ghe fi daŋso nùghù lɛ̌ɛn kè tsùghù nu wə̄n, kāʼ ndùw wə̄n alekəŋo kaŋlo am bvʉ̄a e tom a ghee àsùghò am bvʉ̄a e fən a ghee.

⁴⁵ A m bùghò ghe kəŋ kê tsughu wə̄n, ghe n nùghù ndùw èbàm an Yɛ̀lusalɛ̀m alendùw kəŋ wə̄n.

⁴⁶ Ghe ŋ kəŋ wə̄n ntsuʼu n təgha, ndùw kòʼ ndùw wə̄n am be kə̀ ne ko, mò vʉ̀a ù dòʼ am bvʉ̄a e ghê wàdè, zyə̂ən ghəa ghəla ghe kəaa, bvʉʉn sùghò ghee â ghəa gho.

⁴⁷ Dzughu zə n zuu àghì aŋghəa ù zuūwkɛlɛ ghəa gho a te, tɔ̀ʼɔ̀ bɛ̀lɛ̀ sùghò.

⁴⁸ Dzughu zə n zum sùghò ghê zə̀ ghəa ghe kôʼ tsughu wə̄n: zə̂ mo â wə̄n enyəa, “Ŋ wɛ, ghù ghàʼ ènyə am bàŋ kə fə̂ŋ naŋa bòʼ kwò, ghàʼ à tsùghò sə̀ laʼā kaāŋ ko luʼū to enyəa a kəŋo ghù a?”

⁴⁹ Ù m bvʉ â ghee enyəa, “Ghɛ̀ mô mùghò kəŋo aŋ kwò, ghɛ̀ məghaa nù enyəa Ŋ̀ ki alelō alô bə̀ghà à?”

⁵⁰ Ghe ŋ kè buʼù zuūwkɛlɛ̂ ghəa yìa ù kə̀a â ghee.

⁵¹ Yɛso n nùghù tsùghù ndùw ghèe ghee an Nazalɛ̀t. Ù m bɔɔm zuuw ndùw ko â ghê tsele, zə̂ n tsôo mìin nǎaŋ tsə̀ghà sùghò ghəa a te gho am fə̂ŋ, e wə̄n zo.

⁵² Yɛso m məla wò aŋ ghûw, sə ghə n tee wò sùghò, ghî ghə n ləghaa wə̄n, Zə̀ kə n tsuʼu sùghò wə̄n.