Lûk 17 - To kə Kəzə̀ kə̀ Fughu ko

Yɛso zòʼn Tsə̀təndə̄ghā tə wə̄n aleghuūw maʼà èbo, àsùghò alekele tə̀fə̀ŋ

¹ Yɛso n daŋso dzɛ̀ â tsə̀təndə̄ghā tə wə̄n to enyəa, “À lò èsəŋò enyəa ghùw lo nû alekele kə̀tsòmlo aleghəŋlo eghəa, e kuuwn lò enyəa ghùw wəla u tsoō kɔʼɔ ghùw, ù lò an tsù!

² Â wə̄n alekuūwn tsom wɛ̂ɛtùghu u mɔ̀ʼ aŋ wɛghêtùghu ghən enyəa ù ghəŋlo èbo, e bɛso lo enyəa ghe nî də̀làdə̀n kə etia, ghe kɔ̂n a zəŋo ughùe, ghe ndûw maʼà alo kətsə̀m.

³ E ghomlō nlò aŋ ghùe zɛʼɛ̄; abugho wàazùghù ghəə̄ŋ tsughu bo zo, komso ndǔw wə̄n, mò ù n tigh kuwnlo, ghù ŋ ghuuw màʼà bo e wə̄n;

⁴ abugho ù bùʼ ghəə̄ŋ boōn ko ghû â ghəa gho tənəghā sə̀ghàmbəgha alo fətsuʼ, vʉ̀a ù kòom buʼ wô sughò ghu ko tənəghā sə̀ghàmbəgha enyəa e ŋ kūwnlo, ghù ghuuw maʼa bo e wə̄n zo, ghù kì alewuūwmaʼà bo e wə̄n.”

⁵ 5 Tum tə Kə̀lestò tə̀ n dzɛ̀ â Mughu ù te enyəa, “Ghəəŋ tsughu boo zaʼa zə e tughuu.”

⁶ Mughu ù te fi dzɛ̂ nù â ghee enyəa, “Abugho ghɛ̀ mô bûʼ boōm fughuu tsughu ko fənyàŋlò tò aŋ sam e kàʼ fə̀ mostàd fə̀ nyâaŋ toō a te, to ghɛ̀ mò lò nû aledzàa tsughu â faŋkwu kə fəkàʼ kən ko enyəa, ‘Dwə̀la nùghu kɔʼ ghue wʉ̀a wò, ghù tsughu tam tsughu an dzùghùntsòʼ!’ Kâʼ fə te fə sò zuūw wô â ghɛ̀.”

Fəgha kə ghùw ù kəfwàʼ ki alefwaʼā

⁷ “Ghùw wɛʼɛ ù lì kpaʼ lò nû ù ki ghùw ù kə̀fwàʼ ù wə̄n ù gwə̀nlo â wə̄n ŋkāa ù chǐin ndzì tə wə̄n to, ghùw ù kə̀fwàʼ ù te vʉ̀a ù ndùw kwən wo, ghùw wɛʼɛ ù te vʉ̀a ù dzɛ̀ â wə̄n enyəa mba bùghò dòʼo tsughù ghù zə kɔʼ à?

⁸ To ù sə̀ lǔum dzàa ndùw â ghùw ù kə̀fwàʼ vʉ̀ enyəa, ‘Fəghaan tsughu ghue wo, ghù ghəəŋ tsughu fəgha kə̀ zəa ko â mùghò tò Ǹ zəā kɔʼɔ̄ dzə̂, sěe ghù sə̀ zəā mʉā kɔʼɔ sughò lo a?’

⁹ Ù sə̀ fùghuu to nǔ zɔ̀ɔŋ kò â ghùw ù kə̀fwàʼ vʉ̀a fwǎʼ fwàʼ kə̀là ù mò tum wə̄n a te a?

¹⁰ E bɔɔm lò sugho êzə̀ à ghɛ̀, abugho ghɛ̀ fwâʼ mɛʼɛ̀ tsughu fwàʼ kə̀là ghe fughu â ghɛ̀, ghɛ̀ ki aledzàa tsughu enyəa, ‘Ghàʼ lo ko bvùʼù mə̀ ŋkɔ̀ɔ, ghàʼ fɛ fwàʼà kô fwàʼ kaʼa.’ ”

Yɛso bǎaŋ ghî a tətsùghò eghə̄m

¹¹ Yɛso n tsəghàa dzì an twee Sàmalìa ghèe ghê Galèlîi, ù tsughuu an Yɛ̀lusalɛ̀m.

¹² Ghəa ù kuʼso ndûw naʼà fə̀ li fo, ù m kpeen ndùw ghèe ghê ghì ghò eghə̄m mo ghe dzaŋà tə̀tsùghò, ghe n lɔʼso ti alo kədɛ̀,

¹³ nàʼn zɛ̀ʼɛ wò an dzə̂ tə̀ tughu to enyəa, “Kee â ghù a Mughùbè Yɛso, kwuso se zo a zəŋò ghàʼ.”

¹⁴ A m bùghò ù kòʼ nduw ghee, ù n dzɛ̀ â ghee enyəa, “Ndǔw děe ndùw nlò ghue zo â fɔ̀e tə Kəzə̀ tò.” A m bùghò ghe nduūw, ghe n tùghù kòom kɔ̀ʼ an dziī.

¹⁵ Ghəa ghùw ù ghee u mɔ̀ʼ zyəə̄n zuw tsughu enyəa dzâŋ zə̀ ŋ wə̄n zəghàa, ù ŋ kòom kɔ̀ʼ ebàm, kɔʼso ndùw Kə̀zə̀ dzîidziī.

¹⁶ Ù m bɔ̄ɔm ndùw nyə̀ŋè pfʉ̌a ndùw ùsʉ̄ a tsəlà Yɛso, fughu zɔ̀ɔŋ kə wə̄n. Tûw wən fə̀ lo ghùw ù Sàmalìa.

¹⁷ Yɛso fi daŋso bvʉ nû enyəa, “Yìa Ǹ so a mô ghɛ̀ baŋlo èghəm a? Ghən tɛ̀ndzughu sô kǔuwn lò ghɛ â ghee à?

¹⁸ To e fɛ kùum lò enyəa ghùw mò ŋgə̀mso yò alekòom bughò fughu kəzɔ̀ŋlò â Zə̀ kò a, gɔ̀ʼɔ̀ ko yo ghùw ù kə̀tum wən à?”

¹⁹ Yɛso fi dzɛ̂ nù â bə̀ghà vʉ enyəa, “Nùghu kɔʼɔ̀, ghù nduw è zəghà zò, boo zəghà zə ŋ ghù bəghasə.”

Nəghā zəla Fɔ̂e u Kəzə̀ ù kê bughòo a te

²⁰ Ghəa Falàsîi tə̀ bvʉ â Yɛso enyəa Fɔ̂e u Kəzə̀ ù laʼà bughòo zə̀n a, ù m bɛ̀lɛ̀ tsùghu ghee enyəa, “Fɔ̂e u Kəzə̀ ù lo bùghòo yò wə e deē wo tsə̌a to, tò ghùw è koʼōkɛlɛ enyəa Fɔ̂e u Kəzə̀ wə̀ ŋ kaʼ,

²¹ ghùw mɔʼɔ̄ yo ù kè sɔʼɔ̀ dêe tsughuu â ghù enyəa, ‘Kòʼô, wən à!’ Ŋkāa, ‘Vʉ̀a!’ Tɔŋlo enyəa Fɔ̂e u Kəzə̀ ù lo ziī am bvʉa zɛʼɛ̄.”

²² Ù n daŋso dzɛ̀ â tsə̀təndə̄ghā tə wə̄n to enyəa, “Nəghā e kê kpěe nù, ghɛ̀ ke di kē tsughu alekɛ̀sò kôʼ Wɛ ù Ghùw alo fətsuʼ fə mɔ̀ʼ etɔ̀ŋ, ghɛ̀ ke ŋgəmso yo alekòʼ.

²³ Ghî à ke so â ghǔ a, ‘Ghù wɛ̀ɛ, à lò fɛ!’ Ŋkāa, ‘Ghù wɛ̀ɛ, à lò fî!’ E kwo ghɛ̀ è ke e ndûw, kà kê è nlò dɔ̂ɔm tsə̀ghà tə̀ŋò a bàâ ghee;

²⁴ Tɔŋlo enyəa ghɛ̀ lo kòʼòkɛ̀lɛ̂ tsuʼu Wɛ ù Ghùw tò aŋghəa ghɛ̀ koʼòkɛlɛ kɔʼɔ aŋghəa ghuuw e nughùun mwâa tsughuu a te alo kəwālā.

²⁵ À kǔuwn lò ko enyəa, ù lo ki alebùʼù fala dzə̂ an ndə̀mà tə aghəa, ghɛ̀ a nɛ ghən ke tue maʼa tsughu wə̄n.

²⁶ Tî kə Wɛ ù Ghùw kə̀ kê bɔ̌ɔm nyoʼn lò sugho tò kə Nôa ko.

²⁷ An tì kə Nôa kə te ko, ghî a fə̀ zuuw ko alezə̄a, mʉa, duʼnlo, zuʼso nìi kǎaŋ ko àyi, yîzən ghə n nîi ndùw ànum, ndùw tɛ̀ ndùw an nə̀gha zəla Nôa fə̀ nyəā kɔʼɔ̄ alo kəkwə̀n. Fʉ̀ghàdzughù tə̀ n daŋso è sə, bùghò lə̀ŋe tsughu ghee a dzə̀m.

²⁸ À fə̀ lo sugho eghəla an tì kə Lɔ̂t, ghî ghə̀ n zuuw ko èzə, mʉa ndùw zuʼso zueen ndùw sùghò bekewə̄n, ghəəŋ ko ghee â bekewə̄n ko, gwə̀ən ndùw èsum, bəghaa ndùw tə̀ndughu.

²⁹ Tsuʼ wəla Lɔ̂t fə̀ zəghàa tsughu Sodòm, Zə̀ kə̀ n zə̀ghàsò sə̀ tsùghù wò chia tə ŋwə̀n, tə n tsughu a zəŋò ghee tò eghuuw, ləŋe tsughu ghee a dzə̀m.

³⁰ À kè bɔ̌ɔm lò sugho êzə̀ tsuʼ wəla Wɛ ù Ghùw kè dêe wô sʉ wo a te.

³¹ An tsuʼ fə̀ è fì, mò ghùw kè lo an gɔ̀ŋ kə ndughu, mo fʉgha u wə̄n u lo an ndughu, e kwo ù lò lɛso ndûw səā tsughuu wô enyəa e se bughò kûum sə, wəla ù kè lo aŋ ŋgwə̄n, e kwo ù lò kôom lɛsō kwəlā wo.

³² Mòʼn tsughu nlò ghəa zə̄lā e fə̀ sə a zəŋò wì ù Lɔ̂t.

³³ Ghùw wəla ù bəghāa səā mughù e wə̄n zo, ù lo gùuŋ nù, wə̄n ù laam nî tsughu enyəa e yo dzə̂ fəgha ko, ù lo zə kətuw.

³⁴ M̀ fɛ dzàa wò nù â ghɛ̀, â tsuʼ wo, an tsuʼ wə e vʉ̀, ghî ghə̀ e kē nyəŋ a bə̀ghà akə̀ ùchùa, ghe n nì ù mɔ̀ʼ, naŋatàʼà ù mɔ̀ʼ.

³⁵ Yîzən ghə e ke e dzoo fʉgha wo ghee a bə̀ghà an tia è gwuūn zo, ghe n nì ù mɔ̀ʼ, naŋatàʼà ù mɔ̀ʼ.”

³⁶ [Mo yînûu à lo a bə̀ghà an usum, a n nì ù mɔ̀ʼ, naŋatàʼà ù mɔ̀ʼ.]

³⁷ Ghe fi daŋso bvʉ nû â wə̄n enyəa, “À kè lò ghɛ a Mughùbè?” Ù n dzɛ̀ â ghee enyəa, “Dzʉghadzʉgha u alo kəlùʼù zuʼù ko abugho gwən e nyôm è nyəŋ fughu.”