Lûk 13 - To kə Kəzə̀ kə̀ Fughu ko

Bughu naŋa bo zo ŋkāa vʉ e nî ghù

¹ Ghî à li ghə n lo a fughu an nə̀gha e te zo, ghe n dzɛ̀ fughu tsughu â Yɛso ghəa Paelɛ̀t fə̀ wi ghî a Galèlîi ghò mo ghe fughuu Kə̀zə̀. Ù n nì kɔʼ kâŋ tə ghee nyɔ̀ɔm dzə̌əŋ kɔʼ aŋ kàŋ tə fʉgha vʉa ghe mò saā â Zə̀ kò.

² Yɛso m bɛ̀lɛ̀ tsughu ghee enyəa, “Ghɛ̀ sô yia moʼò enyəa ghî a Galèlîi ghən fə̀ fɛ kpuw ŋgòʼ è vʉ̀ è biigh zən bòʼ ghe fə ŋge lô ghî à biigh gho tsə̀ghàtàʼà ghî a Galèlîi à li ghən ŋkāa a?

³ À yò êzə̀! Ǹ so Ǹ dzâa wô â ghɛ̀ enyəa, à bǔw mò ghɛ̀ kuuwn kɔʼ mwam zɛʼɛ è biigh zo, ghɛ̀ a dzə̀m lo bɔɔm ləŋe sùghò èzə̀.

⁴ Kàa ghɛ̀ moʼò enyəa ghî ghə̀n èghəm à ghè ghò efāa bəgha kə ndughu kə fə̀ bɛlɛ̀ bvʉ̂ winlō an Silɔ̀m, à fə̀ fɛ ŋge lo ghî à biigh gho tsə̀ghàtàʼà ghì ghəla ghe mughu êzə̄ŋ an Yɛ̀lusalɛ̀m ŋkāa a?

⁵ À yò êzə̀! Ǹ so Ǹ dzâa wô â ghɛ̀ enyəa, à bǔw mò ghɛ̀ kuuwn kɔʼ mwam zɛʼɛ è biigh zo, ghɛ̀ a dzə̀m lo bɔɔm ləŋe sùghò èzə̀.”

Gə̂m kəla kə mʉā yo

⁶ Yɛso n daŋso kwə̀ən kə̀a tsùghù â ghee enyəa, “Ghùw ù lì fə̀ ki kâʼ fə kəgə̀m an sum u wə̄n. Ù mo e bughò lɛnlo enyəa kə m mʉ a, kè dɔ̂ɔm kôʼ kə̀tam a te.

⁷ Mughùsum n dzɛ̀ â ghùw vʉ̀a ù lɛɛ̄n sum wo enyəa, ‘Ghù wɛ̀ɛ, à è zəŋ lo tənûu tə̀ təgha mò M̀ mgbɛɛ bùghò tsɔ̂ɔ kèe ko ghue fɛ alo fəkâʼ kòʼò yò tam ko a te. Fə luʼū tə fɛ pfʉso ŋgùʼn nàŋa aŋ kwò? Gbǒo màʼâ.’

⁸ Ghùw vʉ̀a u lɛnlō â sum u te wo n dzɛ̀ enyəa, ‘Mughùbè, fughu kpeʼe tsughu nûm kò kə mɔ̀ʼ â ghè fò, tò Ǹ tsûun tsəghàa wô tsəla kə te ko, Ǹ dzəlà tsughu utwii a te.

⁹ Abugho fə kpaʼ mʉ alo kənùm à fì lǒ dzɔ̀; buw êzə̀, ghù lo gbo maʼa nduw.’”

Yɛso bǎaŋ yìzən an Tsuʼntsə̄ u Tə̀dzûu

¹⁰ A m bùghò ko Tsuʼntsə̄ u Tə̀dzûu ù li wo, Yɛso n zoʼnlo àghì an ndùghènē è lǐ fughu alo enaʼ.

¹¹ Wìzən ù lì n lo a fughu ù dzàŋà tsəghà kwəlā ko mò ù n ndəmā dòʼò alo tənùu eghə̄m à ghè tò efāa, waatsūʼ a fə̀ bu bvuʼ naŋā, ù n yo alenùghùu teē kɔʼ tsəghatsəgha.

¹² A m bùghò Yɛso kòʼ nduw wə̄n, ù n tɔŋɔ tsə̀ghà ndùw wə̄n, dzɛ̀ â wə̄n enyəa, “Êwɛ̀, Zə̀ kə̀ ŋ ghù bəghasə an dzàŋ zə̀ghà.”

¹³ Ghəa ù dzɛ̀ tsughu êzə̀, ù ŋ gaʼ ndùw kə̀ghu a zəŋò nùghò vʉ̀, kwəlā chi n daŋso è mia; yìzən vʉ n daŋso nùghù nə̀ghàan těe kɔʼ tsəghatsəgha, fughu ŋkɔʼso â Zə̀ kò.

¹⁴ Nʉghà wə̀ m pfʉ̄ ghùw wəla ù fə lô tuw ko fughu an Ndùghènē è Tə̀dzûu enyəa Yɛso bǎaŋ tsughu ghùw Tsuʼntsə̄, ù n dzɛ̀ â ghì ghò a fughu an ndughu enyəa, “Tsuʼ ŋ kə̀fwàʼ n lo tǔu alo ewə̄n, e bugho bāŋlō nlò ghue zo an tsùʼu n te mò, à yò nɛ Tsuʼntsə̄.”

¹⁵ Mughu ù te n daŋso bɛ̀lɛ̀ ndùw wə̄n enyəa, “Ghê kə̀bàŋàdzə̀m tò ghɛ! Yìa n so ghɛ̀ mgbaŋa səa ko fɛ â kʉ̀anyòm wò Tsuʼutəntsə̄ ten tə̀ dzə̀m à, ndùw fùghuu ghee â mùghù mò a?

¹⁶ To ghɛ̀ fɛ dzɛ̀ enyəa, yìzən wə̄n, wɛ ù Abə̀làhâm wəla ù fala tsɛlɛ̄ am fàŋà kə Satàn alo tənùu eghə̄m à ghè tò efāa, a ka wə̄n nɛ Tsuʼntsə̄ dɔ̂ɔm zè zə̀ghà a?”

¹⁷ Ghəa Yɛso dzɛ̀ tsughu ghəa yì èzə̀, tuw kə n də̀n ndùw ghì ghə̀là à dzə̀m ghe fə̀ bâa tsəghà Yɛso ènyə. Ghî yi fughu an ndughu a dzə̀m n duʼn səso tsughu enyə an ndə̀mà tə aghəa tə̀ dzûŋ təla ù fə̀ ghəə̄ŋ fughu.

Kwə̀ən kə ushwaʼ am Fɔ̀e u Kəzə̀

¹⁸ Yɛso n nùghù bvʉ tsughu enyəa, “Fɔ̂e u Kəzə̀ ù lo tǒ kwò? Ǹ lo aleboʼō dzâa tsughu enyəa u lo tǒ kwò?

¹⁹ U lo tò sam e mostàd ghùw ù lì fə nî tam tsughu an sum u wə̄n, sam e te zə n noo tughu tsughu aŋ kàʼ fə̀ ne fo, nwə̀n mə̀ m bəghaa tə̀ndughu aŋ kwèe tə te to.”

²⁰ Ù m bvʉ kpeʼe tsughu enyəa, “Ǹ lo aledzàa tsughu enyəa, Fɔ̂e u Kə̀zə̀ ù lo kpeʼe sugho tǒ kwò mboʼ a?

²¹ U lo tǒ mbvùŋ yìzən nì kɔʼ, dzə̀n ndùw an tɔ̀e tə ŋkəa tə təgha, zə̀ n nyə̀ŋ kǎaŋ ndùw aŋ kəa n te mò n dzə̀m.”

Kwə̀ən kə̀ ushwaʼ aŋ fanso fə fù u ndughu

²² Yɛso n zoʼn ndùw àghì naʼà tə̀nàʼà, ghəa ù ndǔuw an Yɛ̀lusalɛ̀m.

²³ Ghùw ù lì m bvʉ â wə̄n enyəa, “Mughùbè, à lò enyəa, à kè tuw kə fɛ e zəā kô sə fə aghì a?” Yɛso n daŋso dzɛ̀ â ghee enyəa,

²⁴ “Də̀ma tən tsughu nlò aletsə̀ghàa nyə am fanso fə fù u ndughu, nu Ǹ so Ǹ dzâa wô â ghɛ̀ enyəa, ndə̀m è àghì kè lə̀ghaa nù aletsə̀ghàa nyə, dzì è ke kuuwn m buw.

²⁵ Abugho tsuʼ u kê kpe, mughù ù ndughu ù te nughù dzʉ̂a kɔʼ bâʼ kò, ghɛ̀ lo e ti a beē tsʉʉn kə̀bàʼ enyəa, ‘Mughùbè tsʉ tsughu ghaʼ â bàʼ kò.’ Ù ke e so â ghɛ̀ enyəa, ‘Ŋ̀ kwo yo luʼū kəla ghɛ̀ sə a te.’

²⁶ Ghɛ̀ ke e dzaā keē nduw enyəa, ‘Sɛ̀ mò mgbaŋa dzeŋe zəa tsəgha ko a dzə̀m, mʉa sùghò a dzə̀m, ghù n zoʼn kaaŋ sùghò ghàʼ alo enaʼ.’

²⁷ Ù kè kuūwn dzâa wô â ghɛ̀ enyəa, ‘Nùghu nlò a vʉ̀a mùghò, Ǹ dzɛ̀ â ghɛ̀ enyəa, Ŋ̀ kwo yo luʼū kəla ghɛ̀ sə a te; ghî à biigh ghən,’

²⁸ Abugho ghɛ̀ kê kôʼ Abə̀làhâm, Aezìk, àsùghò Yàkɔ̂b ghèe ghê ghiīshʉ̀ghà gho a dzə̀m am fɔ̀e u Kəzə̀ mò ghe ŋ ghɛ̀ bâʼ nàŋa sə̀ wò a beē, ghɛ̀ ke e dinlō, pfʉā àsɔŋ.

²⁹ Ghî à kê səā kaāŋ wô am bàa tə mbī ten tə̀ dzə̀m, ghe ke e doʼ am fɔ̀e u kə Kəzə̀, zəa èghue.

³⁰ Kòʼ nlò, ghî ghəla ghe lô â bam ko êzə̄ŋ, ghe kê lò kəsə, ghəla ghe kuūwn lô sə ko, ghe kê lo kəbam.”

Yɛso mùŋe a zəŋò ghì a Yɛ̀lusalɛ̀m ghò

³¹ Falàsîi tə̀ li tə n ndùw an nəgha zə̀ èzə̀, dzɛ̀ â Yɛso enyəa, “Nùghu tigh â tuw kə̀a kò, Hɛlɔ̀d so e wi ghû.”

³² Yɛso n dzɛ̀ â ghee enyəa, “Ndǔw dzɛ̀ â kəŋo fə te fo enyəa, Ǹ shûaan sə̌a zēe ùzʉ̀ a zəŋò ghì ghò nɛ àsùghò tsʉtsʉ, mùghò è miasō kɔʼɔ fwàʼ kaŋa ko â fǐigh.

³³ Abugho à lò ko kwò, mùghò è nduūw ko â fwàʼ kaŋa ko â sə ko aŋghəa Ǹ tsughuu nduw an Yɛ̀lusalɛ̀m, nu ghùwshʉ̀gha yǒ tò ù è kpuw a beē, mò à yò an Yɛ̀lusalɛ̀m.

³⁴ Wo Yɛ̀lusalɛ̀m, wo Yɛ̀lusalɛ̀m, ghɛ̀ ghəla ghɛ̀ wiīn ghîishʉ̀gha, tə̄əm sùghò ghì ghəla Zə̀ kə̀ tum wô â ghɛ̀ alo atia! À è zəŋ lo tənəghā tə sòʼ Ŋ̀ ghâa kêe alezùuŋ naŋā tsughu ghɛ to zə̂ ù mbvʉ lô kəŋò naāŋ tsughuu wɛ a wə̄n gho alo təghwò a, ghɛ̀ yia ləghaa yo à?

³⁵ Kòʼô, Zə̀ kə̀ ŋ ghu ko a zəŋò ghɛ̀ nî nùghù, Ǹ so Ǹ dzâa wô sughò â ghɛ̀ enyəa, ghɛ̀ kê mùghò alo esə̄ tsuʼ yo, à gɔ̀ʼɔ̀ ko mò ghɛ̀ kê dzɛ̀ tsughù enyəa, ‘Bughuso e lo â ghùw wəla Mughu ù te tum wo.’”