Bìoball air-loidhne

Lûk 11 - To kə Kəzə̀ kə̀ Fughu ko

Yɛso zòʼn Tsə̀təndə̄ghā tə wə̄n alegɔ̀ŋlò
( Mat 6:9-13 ; 7:7-11 )

¹ Tsuʼ ù li wo Yɛso ŋ gɔ̂ŋlò an luʼu kə̀ li ko, a m bùghò ù gɔ̀ɔŋ mɛʼɛ̀ tsughu, tsə̀ndə̄ghā è wə̄n e mɔ̀ʼ n dzɛ̀ â wə̄n enyəa, “Mughùbè, zoʼn wò ghaʼ alegɔ̀ŋlò, tò ghəa Dzɔ̌n fə̀ zoʼn tsə̀təndə̄ghā tə wə̄n to a te.”

² Yɛso n dzɛ̀ â ghee enyəa, “Abugho ghɛ̀ so e gɔ̂ɔŋ nù, ghɛ̀ n nì tsùghù enyəa, ‘Tsele waʼā, ghî ghə è kɔʼsò zən zəghà zò. Fɔ̂e wʉ̀a ù è bwiī.

³ E fughuu ghaʼ â fə̀ghàzəa ko tsuʼu mən n dzə̀m n dzə̀m;

⁴ ghù ghuūw bôo taʼa to, tò aŋghəa ghàʼ ghuūw maʼà sughò bòo tə ghî ghəla ghe ghəəŋ ghaʼ â bo zo; e kwo ghù lò ghəŋlo enyəa fəghà kə̀ li kə tsoom ghàʼ.’”

⁵ Ù n daŋso dzɛ̀ â ghee enyəa, “Nǐi tsughu enyəa ghùw wɛʼɛ ù lì kǐ fən, vʉ̀a ù kpaʼ ndûw alô fə̀n ù wə̄n ù te â fə̀ŋò ùtsùʼ, dzɛ̀ â wə̄n enyəa, ‘M̀ fə̄n, fɔ̀lɔ fughu wò mugho à sə a ugbɛ gho a təgha;

⁶ fən waŋā ù lì bwîin ndùw nù, vʉ̀a ù bəŋ dâŋ tsəgha an ndughu alô mùghò, yìa Ǹ laʼà kêe fəgha ko alezɔ̀ʼ wə̄n a te.’

⁷ Ghùw ù te vʉ̀a kpaʼ bɛlɛ̀ sə wô enyəa, ‘Kà mugho fə̄msō, mùghò m bàʼ kə̀ dzʉ̂a, ghàʼ à ghê wɛ ghaŋā ghə n nyə̀ŋè, Ǹ yo alekòom nùghù kɔʼ êzə̄ŋ enyəa Ǹ so Ǹ nughù fughu ghû â fəgha ko.’

⁸ Ǹ so Ǹ dzâa wô â ghɛ̀ enyəa, bugho ù sə̀ yô ko alenùghù fughu fə̀n ù wə̄n ù te â fəgha ko aŋ ghəa gho afən yì, ù sə̀ nùghùun fùghuu nù, bòʼ ghùw ù te ghoʼso nɔe tsughu.

⁹ Zən lò e ghee Ǹ sô Ǹ dzɛ̂ wô â ghɛ̀ enyəa, abugho ghù ghoʼso nɔe fəgha ko, ghe mò è fughu. Abugho ghù ghoʼso kə̄ŋ tsughu fəgha ko, ghù mò è koʼ, mò ghù ghoʼso tsʉ̄ʉn tsughu kəbâʼ, ghe mò è tsʉ;

¹⁰ tɔŋlo enyəa chìa wəla ù nɔe tsughu fəgha ko, ghe mò è fughu, bugho ghùw kəŋ tsughu, ù mò è koʼ, mò à lò wəlà ù tsʉʉ̄n tsughu, ghe mò è tsʉ.

¹¹ À lǒ tselèwɛ̀ ù ghɛ̌ wò am bvʉa zɛʼɛ̄ a, wɛ bvʉa nduw wə̄n â tsəgha zo a, ù m fwə̀n fùghù ndùw zùghù à?

¹² Ŋkāa wɛ bvʉa nduw wə̄n â ghum e mbvʉ̄ zo a, ù m fwə̀n fùghù ndùw nàŋ a?

¹³ Abugho ghɛ̀ â biigh ghən laam fughuu fʉgha ù dzûŋ wò â wɛ ghɛʼɛ̄ gho, à è səasəa tsele wɛʼɛ alo Kəwālā, ù bòʼò lò alefughu ênzə̂n Zuʼ tə̀ Zɔlɔ to â ghì ghəla ghe nɔe tsughùu à?”

Yɛso kə̀a àghəa kùu ndùw Bɛɛlzɛ̄bùl
( Mat 12:22-30 ; Mâk 3:20-27 )

¹⁴ Tsuʼ ù li wo Yɛso fə̀ shuaan sə̄a zʉ̀ ù kəmùʼ a zəŋò ghùwkə̀mùʼ; ghəa zʉ̀ u te u sə tsughu, mùʼ kə te kə ŋ kə̀a sə̀ wò àghəa, dzughu zə n zum aghî.

¹⁵ Ghî à li ghə ŋ kuuwn kāʼ tsughu alekə̀aa kaaŋ fughu enyəa, “Ù zʉ̀ ù shûaan sə̌a an daʼa kə Bɛɛlzɛ̄bùl, də̀ŋ kə uzʉ̀.”

¹⁶ À li ghə m mɔ̂ɔ kòʼò wə̄n enyəa ù dèe wô tsə̌a enyəa ghəa a te a lo ghəa e Kəwālā.

¹⁷ Ghəa Yɛso kuūwn kele kɔʼ moʼnlò e ghee zo ù n dzɛ̀ â ghee enyəa, “Naʼ zəla e ti yô alo kəfəgha kə mɔ̀ʼ, zə mò è saʼa, kèndughu kəla kə yô sughò dzughu zo e mɔ̀ʼ, kə n lo dzùghù ùghue.

¹⁸ Abugho Bɛɛlzɛ̄bùl ndzùghùun lâ aŋ ghùe u wə̄n, fɔe u wə̄n u lo ênzə̂n aletəme lo a; ghɛ̀ sô so enyəa, Ň zʉ̀ ù fɛ dzùu sə̌a an daʼa kə Bɛɛlzɛ̄bùl lo a?

¹⁹ Êzə̄ŋ, abugho e lô enyəa Ň zʉ̀ ù shûaan sə̌a an daʼa kə Bɛɛlzɛ̄bùl, tɛʼɛ̄ to, tsə̀təndə̄ghā kǔuwn shùaan sə̌a alô kə ndugho ko kədaʼa à? Tsə̀təndə̄ghā tɛʼɛ tə lô fi saʼa nù ghɛ.

²⁰ Abugho a kuūwn lô enyəa, Ǹ shûaan sə̌a zʉ̀ wən an daʼa kə Kəzə̀, à fi lo enyəa Fɔ̂e u Kəzə̀ wə̀ ŋ ghɛ̀ bughò tsə̀là.

²¹ Abugho ghùw ù kə̀daʼa luūm ki kpeen fʉgha wə ntɔ̄ wo, chìin wə̄n â ndughu àsùghò fʉgha wo, fʉgha u wə̄n wə m bɔ̄ɔm ti.

²² Mò ghùw wəla ù kuūwn tughu tsəghà tsughu wə̄n bughò mǎaŋ tsughu wə̄n, ù m baaŋ nùghù kɔ̀ʼ fʉgha wə ntɔ̄ vʉ̀a ù gaʼ tuw ko a te, nì dzùghù tsùghù fʉgha u wə̄n ghèe ghê ghì à nughù ghò.

²³ Ghùw wəla ù zəāfaā yo ghàʼàwə̄n, ù fi bwîi an tàaŋ tə efwe taŋā. Ghùw wəla ù təmā dzəə̄ŋ yô mugho alezùŋlò àghì, ù fì dzûu sàŋà nù.

²⁴ Abugho zə̀a fə̀ biigh fə sə nughù tsughu a zəŋò ghùw, fia fə soʼ ŋgəa, kə̀ŋ kè kǎaŋ wò luʼū kə̀ zʉʉ̄n kə ughùe kò aŋ ŋgwə̄n, fə mo enyəa, ‘Ŋ̀ kôom ndùuw nù ebàm an ndughu zaŋā e zəā mùgho mò zəghàa sə wo.’

²⁵ À m bùghò ù kwən nyə nduw ebàm, ù n ndùw kòʼ ndùw mò ndùghù è wən è te nyoʼn bɔɔm lò nû, zɔlɔ.

²⁶ Ù ŋ kòom ndùw tɔ̀ŋɔ wò nzə̀a sə̀ghàmbəgha mò mə̀ ŋ wə̄n bo tsə̀ghà, ghe n ndùw nyə̀ mùghù ndùw an ndughu zə̀, ghəa a ghûw vʉ ghə̀ ŋ kòom bò tsə̀ghà tsùghù ghəa a mò bûʼ lô a te sûesʉ.”

Duʼnlo è səŋò zò

²⁷ A m bùghò Yɛso kə̀a ghəa ghən, yìzən ù lì n dzɛ̀ sə kɔʼ fughu an saʼ kə aghì an dzə̂ è tughu, â wə̀n à, “Dzɔ̀ lǒ yìzən wəla ù mò dzə nyɔŋso ghû.”

²⁸ Yɛso m fwə̀n dzɛ̀ tsùghù enyəa, “Dzɔ̀ lǎam lò ghî ghəla ghe zuw shwaʼ ù Kəzə̀ wò, bwìi ndùw an tsə̀n tə te to.”

²⁹ Ghəa ghî à sô tsôo luū wô ko nû, Yɛso ŋ kāʼ tsughu alekə̀a enyəa, “Mweē e nɛ̄ zən lo mweē è biigh zo, e bvʉa tsə̌a, e lo kuuwn kòʼ yò, à gɔ̀ʼɔ̀ ko tsə̌a è Dzonàh.

³⁰ Nu ghəa Dzonàh fə̀ bughò doʼō tsə̌a â ghì a Ninīvɛ̀ ghò, Wɛ ù Ghùw kè lò sugho êzə̀ â mweē e nɛ̄ zən.

³¹ A kê bughò tsuʼ u sāʼ, Nàʼtùm wə̀ èmàm kè kòmso nǔ ghee; nu ù fə̀ nughu wo aŋ kàlà tə mbī, alebùghò zyə̂ən tɔ e Solomòn. Kòʼô, ghùw ù lì lò fɛ, ù tsə̀ghàtàʼà Solomòn.

³² Naʼ e Ninīvɛ̀ è kê tì alo efwēe tsuʼ u təsāʼ ghèe ghê mwěe e nɛ zən, ghe kê komso ghee; nu ghe mafə̄ ti kuwnlo aŋ ghəa a ghee à biigh gho aŋghəa Dzonàh fə̀ kə̂a shwaʼ u Kəzə̀ wò â ghee. Kòʼô, ghùw wəla ù tsə̀ghà taʼà Dzonàh, ù lò fɛ.”

Sə ghə̀a a lo tǒ tsə̀ â ghue wʉ̀a wò

³³ “Ghùw ù lì yo ù lò aledàa tsughu kəkɛ̀ʼɛ̀, ù kòom nîi pfʉā naŋā tsughu alo kəkə̌a, ŋkāa ù nìi nalà naŋa ndûw, mò ù kà an num ètsə tiso naŋa kɔʼ enyəa mò ghùw nyə̀ wò nù, ù ŋ koʼò àsə a te.

³⁴ Sə zə̀ghà è lo kəkɛ̀ʼɛ̀ â ghue wʉ̀a wò, bugho sə zə̀ghà è zuūw kədzûŋ ghù fi lo an tsə̂; mo e kuuwn zūuw yo kədzûŋ ghù fi lo alo kələ̄m.

³⁵ À fi lo enyəa ghù kì alenì ènəghā, e kwo tsə̀ zəla è tughūu a zəŋò ghù lò kôom dôʼn ləm ko.

³⁶ Abugho à lò enyəa tsə̀ tùghuu nù aŋ ghùe wʉ̂a u dzə̀m, mo ləm kə yo an də̀ŋò kə̀ li ko, u lô fi tsô lò tsəgha ko an tsə̂, tò kɛ̀ʼɛ̀ kə̀ lô baŋā, dèe ghù â luʼū to an sə̀ghàa kə wə̄n.”

Yɛso kə̀a àghəa ghèe ghê Falàsîi tò àsùghò ghê Dèekə̀làŋ
( Mat 23:1-36 ; Mâk 12:38-40 )

³⁷ Ghəa Yɛso kə̀a tsughu ghəa gho, Falàsîi ù lì n nàʼà tsughu wə̄n enyəa ù bùghò zə; Yɛso n nyə̀ də̀ghàan ndùw èzə alô tûwbʉ̀ghà vʉ̀ an ndughu.

³⁸ Tuw kə m kpuw Falàsîi vʉ̀, ghəa ù kòʼ Yɛso kaʼ ndûw zə zo mò ù kà ghu a sûw.

³⁹ Mughu ù te fi dzɛ̂ nù â wə̄n enyəa, “Ghɛ̌ tə̀ Falàsîi, ghɛ̀ sûuw zɔnso tsughuu ko kə̀kaŋ à wùa tò fɛ̄ a beē, mò ghɛ̀ alo tə fə̀ŋ bɔɔm mòʼò tə̀la ko ŋgaam tə aghəa àsùghò kəff kə ebo ko.

⁴⁰ Fə̀ŋsò u ufʉgha tò ghɛ, ghùw wəla ù bɔm gùw è ùghùe, à mgbàŋ yǒ wə̄n a ù bɔm sugho fə̀ŋ e ghùw à?

⁴¹ Laam gaʼ tsughu nlò fə̂ŋ tò aleyosō ghî à laa gho, ghəa ghɛʼɛ ghə e zɔ̄lɔ̄.

⁴² Ghɛ̌ tə̀ Falàsîi kpùwso chuuw ko nǔ chuw tə tuūwfʉ̄ghā tɛʼɛ̄ to, tò mîn, lûe, à fʉgha ù li wo; ghɛ̀ kuuwn lò ko an tsù enyəa ghɛ̀ naaŋ yo lâŋ kò, ləghaa sùghò yǒ Zə̀ kò. Ghɛ̀ mô kì aleghəəŋ ghəa a te gho a dzə̀m, naaŋ tàʼn yǒ è li zo.

⁴³ Ghɛ̌ tə̀ Falàsîi lò an tsù! Nu ghɛ̀ bɔɔm ləghaa kô luʼū tə̀ ne to an ndùghènē zɛʼɛ̄, ləghaa sùghò enyəa ghî ghə̀ è ŋgɔɔ wo ghɛ an lùʼù tə gbe wə ewə̄n.

⁴⁴ Utsû a zəŋò ghɛ̀! Nu ghɛ̀ lo tò shîa təla tə lo mo tə ŋ kūŋē, ghî yia a bughò bwîi tsəghāa a te, kwo yo.”

⁴⁵ Dèekə̀làŋ ù lì m bɛ̀lɛ̀ ndùw wə̄n enyəa, “Wàdè, ghəa yìa ghù kə̌aa fì, ghù sùuwn dàŋà tsə̀ghà sùghò ghàʼ a te lo.”

⁴⁶ Yɛso n dzɛ̀ tsùghù enyəa, “Tsû ù lo sugho â ghɛ̀ ghê dèekə̀làŋ; nu ghɛ̀ ŋgee fughuu àghì â mbùŋ kəla ghe yô alebòʼò, kə̀mbùŋ mo ghuūghùe zɛʼɛ̄ e yo aletsoō buʼù mɔ̂m aŋ ghu.

⁴⁷ Utsû a zəŋo ghɛ̀! Nu à bɔ̌ɔ ghɛ̀ shîa tə ghê ghiīshʉ̀ghà ghəla ghê tsùghò fə̀ winlō.

⁴⁸ Ghɛ̌ fi dêe fùghuu wò nù enyəa ghɛ̀ m boo fughu fəgha kəla ghê tsele ghɛʼɛ̄ fə̀ fwaʼ ghè kò, ghe yia a ki sugho ghu ko a te; tɔŋlo enyəa ghe fə̀ wiin ghîishʉ̀gha, ghɛ̀ yia a kuūwn bɔɔ̄ shîa tə ghee to.

⁴⁹ Kən lò soo kə eghəa kəla Zə̀ kə fə̀ dzɛ tsughu an dzì è ùtɔ enyəa, ‘Ǹ lo tūu wò ghîishʉ̀gha â ghee, à tum to, ghe kê ndzaŋso à li gho, ghe winlo à li gho.’

⁵⁰ Zə̀ lò e ghee ghɛ̀ lo ndâaŋ bôʼn mbùŋ kə ghê tsùghò kò aŋ ghùwshʉ̀gha tə̀là ghe fə̀ winlō.

⁵¹ Ghê ghùwshʉ̀gha ghə̀là ghê tsùghò fə̀ winlō, alenìi nughù wô am vʉ e Ɛbɛ̀l, bùghò tɛ̀ wò am vʉ e Sàkàlîa; Sàkàlîa wəla ghe fə̀ wi an də̀ŋò kəla kə dzughùu nyə tsughu ti kə̀ kpɛɛ̄n kə enyěe ko, à tsughu è baa zo. Òhoŋò, M̀ fɛ dzɛ̀ nù â ghɛ̀, enyəa ghe lo kwūu ghɛ̀ ghən êzə̄ŋ a te.

⁵² Utsû a zəŋò ghɛ̀ ghê dèekə̀làŋ! Nu ghɛ̀ ŋ kwu naŋa tsʉ kə utɔ ko, mo ghuūghùe zɛʼɛ̄ e kôom bùʼ yò aletsə̀ghàa nyəā sùghò a te. Ghɛ̀ yia a təghàsò sùghò ghî ghəla ghe ləghaa aletsə̀ghàa nyə.”

⁵³ Ghəa Yɛso nùghù tsughu an lùʼu chì, Falàsîi tì ghèe ghê dèekə̀làŋ yi ŋ kɔʼ kɔʼ ŋgāŋ alebvʉʉn wə̄n â ghəa gho. Ghe n tsuʼn kaaŋ ko wə̄n enyəa ù ŋgee kə̂aa wô àghəa,

⁵⁴ ghe kəŋo enyəa ù kə̀aa boōn səā wô ghəa è li zo, to ghe kwu wə̄n a te.

« Roimhe

Air adhart »

2020

Lean sinn:

Ceanglaichean taic

Sanasan