Kòloshìan 3 - To kə Kəzə̀ kə̀ Fughu ko

¹ Ghe mafə ghɛ à ghê Kə̀lestò dzeŋe zòm nùghùu kɔʼ alo evʉ̄, e kəŋo ko nlò ghəa e kəwālā zo, a fi a Kə̀lestò dǒʼ aŋ kwe u Kəzə̀ ù təma wo.

² Kà nlò moʼn zɛʼɛ e naŋa dzə̀ aŋ ghəa a mbī gho, laam naŋa ndùw nlò moʼn zɛʼɛ zo aŋ ghəa a kəwālā gho.

³ Nu ghɛ̀ êzəŋ e lo tò ghî a kpuuwn gho, mughù zɛʼɛ zəa e nân doʼò a zəŋò Kə̀lestò, êzəŋ wəla ghɛ̀ à ghê Zə̀ kə̀ lo alo kəfəgha kə mɔ̀ʼ.

⁴ Abugho Kə̀lestò wəla ù ki mughù e sɛ̀ zò lo kôom dê sə wo ghue u wə̄n wo ebàm, ghɛ̀ a ghee e ke dzeŋe lò ko a dzə̀m an səghanyəgha wə̄n.

Tue màʼa nlò mughù è wii zo, ghɛ̀ ni kɔʼ è fughu zo

⁵ Ghɛ̌ fi ki aleŋgəmso kûm tuū maʼà ghəa a mbī ghəla gwən e ughùe è ləghaa, ghəa a te a lo tǒ; ghəa à nuūŋ kaaŋ ghə eghùe ghò, àsùghò aleghəəŋ dzə̀adzə̀ tə aghəa to, àsùghò alemōʼn təla ko aleghəŋlo èbo, àsùghò enyəa ghue u ka e nughuun ghû abugho ghù kòʼ nduw wìzən ŋkāa wìnû, àsùghò alesəa â sə gho am fʉgha u mbī wo, mò à fi lo sugho tǒ zʉ̀ ù li wo ghî a kɔʼso.

⁶ À lǒ bòʼ ŋgòʼ è ghəa à biigh ghən gho Zə̀ kə̀ lo dêe nʉgha ù wə̄n u pfʉa wo a te a zəŋò ghì ghəla ghe zuūw yo â wə̄n.

⁷ Ghuūghùe zɛʼɛ̄ e mò ghəəŋ tsəgha nû ghəa à biigh ghən gho, aŋghəa à mò mughù zɛʼɛ e naām ki tsəghà ghəa a te gho.

⁸ Zə êzəŋ e lo enyəa, ghɛ̀ ki yo alekoōm ghəəŋ ghəa ghən gho; alepfʉso nʉghà wò ŋkāa ki sugho yo ku ko am fə̂ŋ, kàa aleghəəŋ bo zo, ŋkāa a alemaʼn kaaŋ nùʼ tò, ŋkāa aleki shwaʼ ù biigh wo alo edzughu.

⁹ Kà nlò è kaʼn gha gho aŋ ghùe zɛʼɛ̄, tɔŋlo enyəa ghɛ̀ kôom yò dzə̂ fəgha kəla ghɛ̀ mò bûʼ lô tsəgha ghè kò, kòom ghə̌əŋ sùghò yò ghəa à biigh ghəla ghɛ̀ mò buʼù ghəə̄ŋ tsəgha.

¹⁰ Zə̀ kə̀ ŋ ghəŋlo enyəa ghɛ̀ doʼo ghî à fughu gho, dòʼn wò sùghò tǒ ghee, zoʼn kele mɛ̀ʼn wò sùghò ghùw wəla e lo ghè wò.

¹¹ Am mùghù è fughu zən, nəŋōnəŋ è lì kôom yò a zəŋò Toʼò zò ghèe ghê Dzûu tò, ŋkāa ghî ghəla ghe sugho twigh u ghee wo ŋkāa ghe tâʼkè sugho, ŋkāa ghî ghəla ghe lô nyôm tò ŋkàʼ tò, ukɔ̂ ŋkāa ghî ghəla ghe ndzə̂m mughu. Ghəa è səŋò zò aŋ ghəa ghən kuuwn lò ko enyəa, à mìaa ko Kə̀lestò alo aghəa a dzə̀m, Kə̀lestò wəla ù lò a zəŋò ghì ghò a dzə̀m.

¹² Ghɛ̀ tò ghî à zɔlɔ ghəla Zə̀ kə̀ shîaa kɔʼ, kə n naŋa tsughu fə̀ŋ e wə̄n a te, kele tsughu nlò se è kwuso zo, ghɛ̀ è dee nduw dzɔ̂ zò, zumso tsughu èghue, zʉ̀a tsùghuu èghue, kaa tsughu ezə alo eghəa.

¹³ Ghɛ̀ è bughuun ghəəŋ nduw ghəa gho aŋ ghùe zɛʼɛ̄ mò à yǒ ndə̀m kə̀ ndə̀m, mò ghùw ghə̌əŋ bonlo èghəa â wàazə̀, wàazə̀ ù te ŋ ghùw màʼà ghəa e te zo. Ghɛ̀ ki aleghuuw maʼn bôo tə aghì tò aŋghəa Mughu ù te fə̀ ghuw maʼà tɛʼɛ to təbôo.

¹⁴ Ghəa è səŋò zò aŋ ghəa ghən à dzə̀m lò enyəa ghɛ̀ a dzə̀m è ləghaa nduw ghue zɛʼɛ zo, tɔŋlo enyəa abugho ghɛ̀ ləghaa ghue zo ghɛ̌ fi lo kəfəgha ko kə mɔ̀ʼ.

¹⁵ Bughun zəla Kə̀lestò fughuu â ghɛ̀ lò aledeē nduw ghɛ â fəgha kə̀là ghɛ̀ ki aleghəŋlo, bòʼ Zə̀ kə̀ mò ghɛ̀ fɛ tɔŋɔ enyəa ghɛ̀ bugho doʼo tǒ ghùw u mɔ̀ʼ enyəa ghɛ̀ kele bughuun zən zo, tò ghɛ̀ è fughuu zɔ̀ɔŋ kò â Zə̀ kò.

¹⁶ To mughù zɛʼɛ e dzə̀m e mò lò tən ko ghəa ghəla tùm è dzùŋ zən kùu ndùw Kə̀lestò děe ghè ghò, ghəa ghɛ̀ kûm zoʼn ghue zɛʼɛ zo, tsʉ̀a ndùw sùghò an tɔ zəla ghɛ̀ ki. Ghɛ̀ è zɔ̀ŋɔ̀ nduw zɔ̀ŋ kò, zoo ndùw tə̀ zòo àsùghò zòo tə̀ baa to am fə̀ŋ tɛʼɛ tə̀ dzûŋ tò, alefūghuu zɔ̀ɔŋ kò â Zə̀ kò.

¹⁷ Mò ghɛ̀ ghaa ko kə̀ kwò, ŋkāa ghɛ̀ so e kə̂aa ko ghəa è kwò, ghɛ̀ ki aleghəəŋ nduw ghəa a te gho an zən e Mughu ù te, tɔɔŋ Yɛso, abugho ghɛ̀ fughuu zɔ̀ɔŋ kò â Tsele ù sɛ̀ Kə̀zə̀, mò ghɛ̀ tsəghà am bàm e Kə̀lestò.

Dzì zəla ghî a Kəzə̀ a ki alemùghù a te

¹⁸ Yi ghə a anūm gho, e zūu nduw nlò â num ghɛʼɛ gho, tɔŋlo enyəa ghən lò ghəa ghəla ghî ghəla ghe boō fughu â Mughu ù te ki aleghəŋlo.

¹⁹ Yia a bughò â ghɛ a num gho, ghɛ̀ è deē nduw ləgha zo â yi ghɛʼɛ̄ gho, ghɛ̀ è ka e tɔɔn dzə a zəŋò ghee.

²⁰ Wɛ gho, e zuuw nduw nlò â ghê tsùghò ghèe ghê zùghù alo aghəa a dzə̀m, tɔŋlo enyəa zən lò ghəa zəla Zə̀ kə̀ ləghaa ghè zò.

²¹ Ghɛ̀ a ghê tselè wɛ̀, kà nlò è ghəŋlo enyəa nə̀ghà mò pfʉa wɛ ghɛʼɛ̄ gho, ghe lô səa ndûw fʉgha ù nughù wò.

²² Â ghɛ̀ a kɔ̂ wò, e zuuw nduw nlò â ghê mughùbè ghɛʼɛ alo aghəa a dzə̀m. E dəmā təla tsughuu ko nlò aleghəŋlo enyəa fə̂ŋ tə ghee tə e duʼnlo, kà è kaa fwaʼā ko nlò â ghee mò ghùw chìin ghɛ̀. E tsəŋo nlò Mughu ù te, ghɛ̀ è fwaʼā â ghì ghəla ghe lo ghê mughùbè ghɛʼɛ am fə̀ŋ tə̀ dzûŋ tò.

²³ Abugho ghɛ̀ ghaā ko kwò kò, e ghəəŋ nduw nlò am fə̂ŋ e mɔ̀ʼ, tò enyəa ghɛ̀ fwaʼà â Mughu ù te, mò à yò â ghê mughùbè ghɛʼɛ ghən fɛ am mbī,

²⁴ Abugho ghɛ̀ fwaʼā êzə̀, ghɛ̀ kwo tən enyəa Mughu ù te lo fughu nù ghɛ̀ namso kəla ù fə̀ to naŋā â ghì a wə̄n gho; tɔŋlo ghɛ̀ fwaʼā â Kə̀lestò wəla ù biso lô Mughùbè wɛʼɛ.

²⁵ Abugho ghùw wɛʼɛ ghəə̄ŋ dzə̂ bo zo, Zə̀ kə̀ lo fɔeso nǔ wə̄n, tɔŋlo enyəa Zə̀ kə̀ kuuwn bàa yò kpiī wo an sàʼ e wə̄n.