Kòloshìan 2 - To kə Kəzə̀ kə̀ Fughu ko

¹ Na tò Ǹ dzɛ â wô â ghɛ̀ aŋghəa Ǹ dəma a te aŋ ghəa ghɛʼɛ àsùghò aŋ ghəa a ghì a yia ghe lo an Laòdisia; bùʼù də̀mà sùghò aŋ ghəa a ghì ghəla ghe lo mo ghe kǎam kwâʼ u usʉ waŋā wə ŋ kô kòʼ tsəghà.

² Ŋ̀ ghəa ghən ghəŋlo enyəa to fə̂ŋ tə ghee tə mô nyəā tsughu, ghe nîi kɔʼ eləgha tò fəgha kəla kə kwuu kɔɔn ghee alo fətùʼù, ghe e kwo tən enyəa e lo êzə̀ aŋghəa ghe bughò zuwkɛlɛ̄ tsughu səŋò e te zo. A n dziī zən, ghe lo zuūwkɛlɛ enyəa nàn kə eghəa kəla kə lo aŋ ghəa a Kəzə̀ lǒ Kə̀lestò.

³ Ghəa ghə̀n a dzə̀m a lô alekele kùu ndùw Kə̀zə̀ nàn doʼò a zəŋò Kə̀lestò.

⁴ Ŋ̀ ghəa ghən fɛ â ghɛ̀ dzâa wò enyəa ghɛ̀ tiso kɔʼ tuw ko edzuŋ an dzì zəla ghùw ù lì ki yo alenìi wô àgha ù bugho tsê ghɛ̀ a te, abugho shwaʼ u wə̄n u te u buʼù kpəŋò ko tǒ kə kwò.

⁵ Ghəa M̀ bûʼ lɔʼso lô ko fɛ, fə̀ŋ zaŋa lo fi ezə̀ sɛ̀, yìa Ŋ̀ ki sughò duʼnzo alekòʼ aŋghəa ghɛ̀ mughù dzɔ a te àsùghò aŋghəa ghə̀la boo zɛʼɛ̀ e tɔ̂ʼ ti a te a zəŋò Kə̀lestò.

Mughù e fughu zo ghɛ̀ à ghê Kə̀lestò

⁶ Ghəa e nyɔ̂ʼ lô enyəa ghɛ̀ m boo fughuu â Kə̀lestò Yɛso, Mughu ù te, e ti ko nlò ghuw ko kə mɔ̀ʼ ghɛ̀ à ghee.

⁷ Ghəəŋ tsughu nlò enyəa ghaŋ ghɛʼɛ a nyəā tughuu tsughu a zəŋò wə̄n, ghɛ̀ bəgha nlò mughù zɛʼɛ zo a zəŋò wə̄n, ghɛ̀ tee tən tsughu ko am boo zɛʼɛ̄ a ndziī zəla ghe mò zoʼn ghɛ a te. Ghɛ è fughuu wə̄n â zɔ̀ɔŋ kò nəgha tən tə̀ dzə̀m aŋ ghəa ghəla ù ghəŋlo â ghɛ̀.

⁸ E kwo ko ghùw ù lì lô so è ndûw bùghòo â tɔ u ghì am mbī wo, ù bùghò ghəə̄ŋ tsughu enyəa ghɛ̀ doʼo tsughu kɔ̂ wò â wə̄n, aghəa mò à lò nzə̀azə̀a ŋ kwu mò ghî a mbī a mò moʼn sə kɔʼ, zoʼn ndùuŋ tsùghuu wò àghì a te, àsùghò ghəla a nughùun wo aŋ ghùu shʉ̀ghà u mbī wo, mo a te a kâ sə̀ dzə̀ aŋ ghùu Kə̀lestò.

⁹ Tɔŋlo enyəa Kə̀lestò bɔ̌ɔm ki ko mwam u Kəzə̀ u dzə̀m a zəŋo ghùe u wə̄n,

¹⁰ Zə̀ chia kə̀ fughu ghɛ â ndzə̀m kə emùghù kò aŋghəa ghɛ̀ lô fəgha ko kə mɔ̀ʼ ghɛ̀ à ghê Kə̀lestò wəla ù tughu tsə̀ghàsə zʉ̀ wò u dzə̀m àsùghò dwaʼa u mbī wən u dzə̀m.

¹¹ Ghɛ̀ ka mo wɛ a Kəzə̀ à bughò dòʼò dzə̀ mò ghe sugho tsughu twigh wɛʼɛ tò aŋghəa ghî a sughōo tigh kə ghûw kò a te, à mò lo bòʼ ghɛ̀ mò bughò doʼò fəgha ko kə mɔ̀ʼ ghɛ̀ à ghê Kə̀lestò aŋghəa Kə̀lestò mò tsɔ̀ʼ maʼà ndûw ghue zɛʼɛ zəla e ləghaa bo zo.

¹² Ghe mafə ghɛ tsəla dzəŋlo ghɛ̀ ghê Yɛso Kə̀lestò am mùghù ŋ Kə̀zə̀ mə̀là ghe mò fughu â ghɛ̀. Zə̀ kə̀ m fùghù sùghò ghɛ̀ â mùghù è fughu zo bòʼ ghɛ̀ gaʼ fə̀ŋ aŋ kɔ kə kəfwàʼ kə Wə̄n, tɔ̂ɔŋ Zə̀ kəla kə fə̀ zôm nughù kɔʼ Yɛso alo evʉ̄.

¹³ Yia a bughò ghɛ ghəla ghɛ̌ fə̀ lo tò ghî à kpuuwn gho bòʼ ghəa ghɛʼɛ à biigh gho, aŋghəa ghɛ̀ mò naam lo mò ghɛ̀ kaām boo fughu dzə̀ â Zə̀ kò, Zə̀ kə̀ ŋ ghəŋlo enyəa ghɛ̀ koōm doʼo wo â tuw ko am bàm è Kə̀lestò aŋghəa ù fə̀ ghuūw maʼà ghəa a sɛ̀ à biigh gho a dzə̀m.

¹⁴ Zə̀ kə̀ n zè màʼa ndàŋ kə sɛ̀ kə̀là Ù mò tɔm naŋā. Ndàŋ kəla sɛ̀ mò ki aletsə̄ aŋghəa lâŋ kə̀ deē abugho ghùw bvʉ̂ tsughu lâŋ kò, kə n nì bàan màʼa mwàʼsò u te wo am vʉ zəla Yɛso mò kpuw ghè zò, nì bɛ naŋa kɔʼ ghəa a te gho alo kədàŋlo.

¹⁵ A fughu èzə̀ alo kədàŋlo, Kə̀lestò n tùghù tsə̀ghà tsughu zʉ̀ u mbī wo àsùghò dwaʼa wəla u saʼā mbī. Ù ŋ ghəəŋ tsùghù sùghò enyəa aghî à dzə̀m kòʼò wô aŋghəa ù sèe bwîi nduw a ghee a te tò ukɔ̂, enyəa e n təm zə.

¹⁶ À fi lo enyəa ghùw ù lì ki yo alesāʼ ghɛ am fəgha kəla ghɛ̀ zəā ŋkāa ghɛ̀ mʉā ghè kò. Ghe ki sugho yo alesaʼ ghɛ abugho ghɛ̀ zeē tsəgha yo Tsuʼutəntsə̄ tə Tə̀dzûu tò ŋkāa abugho ghɛ̀ zeē tsəghà yo tsuʼu məla Dzûu tə̀ zəā zə ko a te ŋkāa abugho ghɛ̀ zəā tsəghà yo zə kə Ndzɔ̄ŋ è fughu ko.

¹⁷ Ghəa ghən tsô lò ko tò kəzəŋso kə dêe wô ghəa ghəla a ki alebùghò, ghəa è səŋò zəla e biso lô fɛ aŋ ghəa a te lo Kə̀lestò.

¹⁸ E kwo ko ghɛ̀ lô bomlo enyəa ghùw nìi nughù fəgha kəla kə kûm lô kə̀ kɛʼɛ̄ ko, ghe e tughuso dzaā wo enyəa ghɛ̀ ki alemàʼà naŋā tsughu ghue zɛʼɛ, àsùghò enyəa ghɛ̀ e kɔʼso nduw tsə̀təndə̄ghā tə Kəzə̀ tò, ghe e dzaā wo enyəa ghe ghəa ghən kôʼ wò an ushʉ̀ghà. Ghe moʼnlò enyəa ghe ŋge kwo aghəa, ghəa a te yia a ghəŋlo ghe yia a ghaŋso kaāŋ ghue zo.

¹⁹ 19 Ŋgòʼ è ghì ghən enyə kòom bùʼù zǔuw yo â Kə̀lestò wəla ù lò tuw ko â ghì a Kəzə̀ ghò a dzə̀m; Kə̀lestò wəla ù nì təmdzəə̄ŋ wô ghî a Kəzə̀ ghò a dzə̀m alo kəfəgha kə mɔ̀ʼ enyəa ghe e nomlo aŋghəa Zə̀ kə̀ ləghaa.

Kə̀lestò bùghòo à mùghù è fughu zo

²⁰ Aŋghəa ghɛ̀ mò kpuw dzəəŋ nduw ghɛ̀ à ghê Kə̀lestò, ù mafə zê zə̀ghàa ghɛ am fàŋa kə daʼa kə shʉ̀ghà u mbī wo. À lò kə kwò ghɛ̀ sô lo tò ghɛ̀ naam mùghù ko an lwàŋ u mbī wo a?

²¹ À sò lo kwò ghɛ̀ sô naām zuūw ko lwâŋ wən wo enyəa, “Kà kwu kele fəgha chì ko ŋkāa kən! Kà mɔ̂m zuw kə chi ko ŋkāa kən! Kà bûʼ mɔ̀m kən ko ŋkāa kə chî!”

²² Lwâŋ wən bɔɔm lò ko am fʉghà wəla u kôom ki yo fwàʼ kò abugho a fwâʼ tsəgha dzə a te, à sò ghəa a te bùghòo kɔʼ ghuw, zoʼn ndùw àghì a te. Wən tsò lò ko lwâŋ wəla ghî à tɔm naŋā tsughu, zoʼn wò àghì a te.

²³ Ŋgòʼ è lwàŋ wən u bughōo wə n lo ko to tɔ è li e lo nû a te, u sô dêe enyəa ghî ghə̀ e ŋgee kɔʼso tsəghaso tsughuu Zə̀ kò, enyəa ghî ghə̀ màʼn naaŋ tsughu ghue e ghee zo, àsùghò enyəa ghî ghə̀ e mughu aŋ ŋgōʼ. Lò êzə̀ mo lwâŋ wən biso ki yo daʼa kə̀ li ko aleyòsò ghùw alebughuu naŋâ ghəa à kwu ghəla ù ləghaa aleghəŋlo.