Bìoball air-loidhne

Kə̀fwàʼ 9 - To kə Kəzə̀ kə̀ Fughu ko

Kuwnlo e Sôol

¹ Sôol n lo mò ù nǎam kʉ̀aa kǎaŋ ko alewîin tsə̀təndə̄ghā tə Mughu ù te, ù n ndùw kòʼ ndùw tuw kə fɔ̀e,

² bvʉ̀ ndùw mwàʼsò wəla ù ki alendùw fughuu kaŋlo an ndughutə̀ne to an Dàmaskòs, nyəa mo e kôʼ tsùghù ghî à li gho ghe mughu an Dzə̀ tə Mughu ù te, ayînû ŋkāa ayîzən, e ŋ kwù kɔ̀n tsùghu ghee, nì wò ghee an Yɛ̀lusalɛ̀m.

³ A m bùghò ù sò kuūwn kuʼsō mɛʼn nduw Dàmaskòs, tsə̀ è lì n nùghù bàŋ sə̀ tsùghù wò alo kəwālā, bàŋ dzə̀əŋ ŋgəa kɔʼ wə̄n.

⁴ Ù n təghaa bvʉ̀ ndùw à ghueetsə̄, zuw tsughu dzə̀ è ghùw ù dzɛ̀ wo â wən enyəa, “Sôol, Sôol, ghù mùghò dzaŋso kaŋlo aŋ kwò?”

⁵ Ù m bvʉ tsughu enyəa, “À lò ghû ndùghò a Mughùbè?” Fə̀n kə edzughu kə m bùghò enyəa, “Ǹ lo Yɛso wəla ghù bwìi ndzaŋso kaāŋ wə̄n.

⁶ Nùghu kɔʼ ko nû ghù nyə nduw an naʼ e te zo, ghe sô dzàa wò nù ghû â ghəa zəla ghù ki aleghəŋlo.”

⁷ Ghî ghəla ghe mò bwiī wo ghèe ghee n tsô tì ko enyə, dzəəm, ghe sô zuūw nduw dzə̀ è ghùw, kòʼò yǒ ghùw ù te.

⁸ Sôol ŋ ghàaŋ nùghù kɔ̀ʼ a ghuu; a m bùghò ù zə̀ghàa kɔʼ sə gho, ù ŋ kôom yò alekòʼ tə̀luʼū. Ghe mǒ wə̄n kwu tsughu nu aŋ kwē tɛ̀ɛ nyə̀ ndùw an Dàmaskùs aletɛ̀ɛ.

⁹ Ù n dòʼò n tsuʼu n təgha mò ù kòʼò yò luʼū to, bùʼù zə̌a yo, mʉa sùghò yò fəgha ko.

¹⁰ Tsə̀ndə̄ghā è lǐ n lo an Dàmaskùs ghe tɔŋlo enyəa à lǒ Ànànîas. Mughùbè m bùghò dzɛ̀ â wən an dzǒo enyəa, “Ànànîas.” Ù mo enyəa, “Mùghò wən a mughùbè”

¹¹ Mughu ù te n daŋso dzɛ̀ â wən enyəa, “Nùghu tsughùu ghù nduw an dziī e zəā ghe tɔŋlo enyəa à lǒ Dzì è Tsəghatsəgha, ghù nduw an ndughu alô Dzudàs, ghù bvʉ tsughu ghùw ù Talsùs wəla ghe tɔŋlo enyə à lò Sôol. Ù gɔ̀ɔŋ nù,

¹² vʉ̀a ù kòʼ kɔʼ ghù ù lì an dzǒo ghe tɔŋlo enyəa à lǒ Ànànîas ù tsə̀ghà nyə bughò gaʼ wô ghu gho a zəŋò wə̄n enyəa to ù mò kôom kaʼa ndûw luʼu tə̀ koʼo to.”

¹³ Anànîas ŋ kuuwn bɛ̀lɛ̀ tsùghù enyəa, “Mughubè, mùghò n zwɔ̀ŋ u tûw wən u ŋge zuw am bo zəla ù lǒ mò ù n dè â ghì ghə̀a ghò an Yɛ̀lusalɛ̀m.

¹⁴ Ù fɛ lo mò ù daʼa kə nî wò aŋ ghùu fɔ̀e tə̀ tughu to alekwuu kɔlɔ̄ tsughuu ghî ghəla ghe fughuu ghû â kɔʼso mò.”

¹⁵ Mughu ù te m fwə̀n dzɛ̀ â wən enyəa, “Ndùw, nu mùghò ŋ wən shîaa enyəa ù dòʼò tsughu fəgha kə kəfwàʼ kaŋa enyəa ù bòʼò ndûw zən zaŋā a vʉ̀a Tòʼò zò àsùghò a vʉ̀a dwə̀ŋ wò àsùghò a vʉ̀a wɛ ghə Ezə̀lɛ̂ ghò;

¹⁶ tɔŋlo enyəa Ŋ̀ ki aledèe tsughu ghəa ù ki alebisō fala tsughu a te aŋ ghəa zaŋā.”

¹⁷ Ànànîas fi nughù tsùghù nû ndùw nyə tsughu fughu an ndughu. Ù ŋ gàʼ ndùw ghu a wə̄n a zəŋò Sôol, dzɛ̀ tsùghù enyəa, “Sôol ŋ wàazə̀, Mughubè Yɛso, wəla ù mò gbə̂n sə kɔʼ an sə kə̂a an dziī aŋ ghəa ghù mò bughòo fɛ, ù mùghò fɛ tùm wò enyəa to ghù mo koōm kāʼ nduw luʼu tə̀ koʼo to, ghù kele tsughu sugho Zuʼ tə̀ Zɔlɔ to.”

¹⁸ A m bùghò ù dzɛ̀ tsughu êzə̀, fʉgha ù li wo tò bʉghaa u gûw zə̀ etsəgha n nùghù tsɔ̀ʼn nùghù sə̀ tsùghù wò an sə a Sɔl, ù ŋ kòom kàʼ ndùw luʼū tə̀ koʼō to. Ù n nùghù èkɔʼ, ghe m fughu tsughu wə̄n â mùghù ŋ Kə̀zə̀ mò;

¹⁹ a m bùghò ù daŋso zə kɔʼ, ù ŋ kòom kèle tsughu sə̂ŋ e wə̄n e bàm. Sôol n dòʼò ndə̀mà ntsùʼu ghèe ghê tsə̀təndə̄ghā to an Dàmakùs,

Sôol nàʼà làbəlà è Dzùŋ an Dàmaskùs

²⁰ nùghù dàŋso kaʼ tsughu alenàʼà kaaŋ tùm è Yɛso an ndughutə̀ne tə te to, dzàa ndùw enyəa, “Ù lǒ wɛ̀ ù Kə̀zə̀.”

²¹ Dzughu zə n zûu ghì ghə̀n à dzə̀m ghe mò zəə̄n shwaʼ u wə̄n wo, ghe m bvʉ enyəa, “Wən mgbàŋ yǒ ghùw wəla ù mò ndzaŋsō kaāŋ ghî ghəla ghe tɔɔŋ tsughuu zən e Yɛso zò an Yɛ̀lusalɛ̀m à? To ù fɛ mgbaŋ bùghò enyəa e bughò kwuū kɔlɔ̀ tsughu ghee e nìi ndûw fughu â fɔ̀e tə̀ tughu to a?”

²² Sôol n tsôo kèle kɔʼɔ mɛ̀ʼn ndùw ko kə̀daʼa, dèe fùghuu kɔʼɔ â Dzûu təla ghe mò mughu an Dàmaskùs enyəa Yɛso lò Ù tsùʼu, komso ndùw ghee.

²³ A m bùghò tsuʼu n ndôʼ tsəghà tsughu, Dzûu tə te tə n nyə tsughu utsəm an tuw kə Sôol,

²⁴ Sôol m bùghò kèle kɔʼ fə̀mbɛ̀ fə ghee fə te fo enyəa ghe chîin zěe ndùw fuū u ughɔŋ u enaʼ, chìin bwǐi ndùw enyəa to ghe mô kwuū wi ghee;

²⁵ Tsə̀təndə̄ghā tə wə̄n tə ŋ kuuwn nyɛʼɛ nì wə̄n â tsuʼ wo tsuʼ ù li wo, nì sə̀so ndùw wən alo kəbùʼ am bəgha kə ughɔ̄ŋ, zə̀ghàa sə̀ tsùghù ndùw wən alo kəsàʼnlo.

²⁶ A m bùghò ù nyə nduw an Yɛ̀lusalɛ̀m ù ŋ kəŋo dzì aletəmadzəə̄ŋ wô tsə̀təndə̄ghā tə ti a fughu; ghe ŋ kuuwn tsəŋo ghaʼa wə̄n, ghe màʼà kaām boōm yo enyəa ù lǒ tsə̀ndə̄ghā.

²⁷ Bànabàs n nùghù nì kɔ̌ʼ wə̄n nì ndùw wən a vʉ̀a tum to, ndùw tèso kɔ̀ʼ ndùw ghəa Sôol mò kôʼ Mughubè ù te a te an dziī, vʉ̀a ù mò kə̂a wô wən â ghəa gho. Ù n dzɛ̀ ndùw ghəa Sôol mò ndzəmà Kə̀aa ghəa gho a te an zən e Yɛso an Dàmaskùs.

²⁸ Sôol fi daŋso kaʼ tsughu nû aletsə̀ghàan kaŋlo an Yɛ̀lusalɛ̀m am bvʉa e ghee,

²⁹ ù ŋ kə̂aa àghəa, baaŋ təfom ghèeghê Dzûu təla ghe saʼā shwaʼ u Gə̀lêk wò; ghe ŋ kuuwn kəŋo kaaŋ ko dzì alewī wə̄n.

³⁰ A m bùghò ghî ghəla ghe boō fughu â Yɛso kele tsughu ghəa yi gho, ghe n nì nùghùu tsùghù wò wə̄n aŋ Kàesalìa, bùghò tə̀ma zə̀ghàa wò wə̄n enyəa ù nùghù ndûw an Tasùs.

³¹ Ghî ghəla ghe mò boō fughu an Dzùdîa, aŋ Galèlîi àsùghò an Sàmalìa ŋ kòom tsə̀ŋo yo, bəgha tiso kɔʼ ughue. Ghəa ghe sô mughu, tsəŋo ndùw ko Mughubè ù te, mo Zuʼ tə̀ Zɔlɔ tə ki sugho ghee aŋ ghù kə̀ dzûŋ kò, kɔ̂n kə ghee kə n nomlo.

Fwàʼ kə Pità an Ledà àsùghò an Dzopà

³² Pità ŋ ŋgəa tsughu tə luʼū tə dzə̀m, kòʼò kǎaŋ ndùw ghì ghəla ghe lo mo ghe m boo fughu, ù n tsùghù bùghò kòʼ wò ghì à Kəzə̀ yia ghe mughu an Ledà.

³³ Ù ŋ kòʼ tsùghù tûwbʉ̀ghà ù lǐ fughu, ghe mò tɔŋlo enyəa à lò Aenìas, mo bâ kə ughùe kə̀ m kpuw mò ù ŋ ghue wo a kə̀chʉ̀a foʼ alo tənùu e fāa, yò alenùghù kɔʼ.

³⁴ Pità n dzɛ̀ â tûw vʉ enyəa, “Aenìas, Yɛso Kə̀lestò fɛ baaŋ ghù; nùghu kɔʼɔ̄, ghù fəghaan tsughu chʉ̂a wʉ̀a wò!” Aenìas n daŋso nùghù è kɔʼ.

³⁵ Ghî ghə̀n à dzə̀m ghe mughu an Ledà àsùghò am bəghaa e Shalɔ̀n ghe mò koʼ wə̄n, ghe m fùghù ndùw fə̀ŋ tə ghee â Mughubè ù te.

³⁶ Tsə̀ndə̄ghā è lǐ n lo an Dzopà ghe mò tɔŋlo enyəa à lǒ Tàbità, mo e moʼò an shwaʼ u Gə̀lês enyəa Dolkàs (tsəfəŋgwū). Nughò vʉ n lo mò ù ŋge gaʼ fə̀ŋ aleghəəŋ ko ghəa à dzûŋ ghò, ù ŋ ki sugho ù m bughuu sùghò â ghu ko.

³⁷ An tì kə te ko, ù m bvʉ̀ tsùghù edzâŋ, bùghò kpùw è nduw. A m bùghò ghe sûw tsughu gwən e wə̄n zo, ghe n nyə̀ŋsò nàŋa tsughu an dzughu e ndughu è li zo edzūŋ an ndùghù è kɔ̀ʼɔ daŋso.

³⁸ Ghəa naʼ e Ledà e mò lo mo e kuʼù dòʼò tsughu ko enyə ghèe naʼ e Dzopà zò, tsə̀təndə̄ghā tə n dzə̀ kɔ̀ʼ aghî a bə̀ghà, tùm è tsughu, ghəa ghe zuw tsughu enyəa Pità lǒ fughu, buʼu ndùw kə̀ghu â wən enyəa, “Kee â ghù, mba bùghò, kà boo gha kə sə.”

³⁹ Pità fi nughù kɔ̀ʼ nû nùghù wò ghèe ghee; a m bùghò ù bùghò tɛ̂ tsughu fughu, ghe n nì kɔ̀ʼ ndùw wən an dzughu e ndughu e te zo edūŋ. yiikpūw ghən à dzə̀m n ti ko ghèe ghee, ghe n dîi dèe tsùghûu gbà ù təndzʉ̄ à ndzʉ tə̀ li to Dolkàs mò təm ghəa ghèe ghee mò naām lo a dzə̀m.

⁴⁰ Pità n dzùm sə̀ ndùw ghee a dzə̀m a beē, tsughu nyaʼa è tsughu, dì dzɛ̀ ndùw â Zə̀ kò. Ù m fə̀n ndùw ùghue aŋ gwən e te zo, dzɛ̀ tsùghù enyəa, “Tàbità, nùghu kɔʼɔ̀.” Tàbità n zə̀ghàa kɔ̀ʼ asə̄, ghəa ù kòʼ kɔʼ Pità, ù n nùghù dòʼò èkɔʼ.

⁴¹ Pità m fùghù ndùw kə̀ghu â wə̄n, tɔ̀ɔm nùghù kɔ̌ʼ wə̄n. Ù n tɔŋɔ tsughu ghî à Kəzə̀ yì à dzə̀m àsùghò yiikpūw yì, dè tsùghù nughò vʉ̀ â ghee, mò ù lò â ghue ù tughu wo.

⁴² Ghî ghə̀ enaʼ a Dzopà e dzə̀m n zuw tsughu ghəa yì kpe, ndə̀m è ghee m boo fughu tsughu â Mughu ù te;

⁴³ Pità n tsùuŋ mùghùu tsùghu an Dzopà ghèe Sǎemòn ù lì ù mò fwaʼà tsəgha aŋ gùw tə tənyòm.

« Roimhe

Air adhart »

2020

Lean sinn:

Ceanglaichean taic

Sanasan