Kə̀fwàʼ 7 - To kə Kəzə̀ kə̀ Fughu ko

Shwaʼ u Sìtəfɛ̀ aŋ kaŋsì

¹ Tuw kə fɔ̀e kə̌ fi daŋso nùghù bvʉ̀ ndùw nù â Sìtofɛ̀ enyəa, “Ghəa ghəla ghe kə̂aa ènyə kùu ndùw ghù à lò to esəŋò à?”

² Sìtofɛ̀ m bɛ̀lɛ̀ tsùghù enyəa, “Waazə̂ ghaŋa gho, ghê tsele ghaŋā, zəən tsughu nlò shwaʼ waŋa wo! To tselè ù sɛ̀ Abə̀làhâm è ndûw mughùu an Halàn, à fə̀ lo mò Zə̀ kə nsəghanyəgha kə m bùghò sə̀ a vʉ̀a wə̄n aŋghəa ù mò lo am Mɛ̀sòpòtɛmìa,

³ kə m bùghò dzɛ̀ â wən enyəa, ‘Zə̀ghaa tsughu naʼ zə̀ghà zò à tom ghə̀a ghò ghù nughu nduw an naʼ zəla Ǹ lo dêe wô â ghù.’

⁴ Ù fi zəghàa tsùghù nû naʼ e tə Chàldîan zò, ndùw mùghùu ndùw an Halàn. A m bùghò tsele kpuw tsughu, Zə̀ kə̀ n nì nùghù wò wən fughu, bùghò nàŋa wò fɛ an naʼ zəla ghɛ̀ mughù fɛ â te êzə̄ŋ.

⁵ Zə̀ kə̀ ŋ kè naām fughu wə̄n fùghù èzə̀ â luʼū ko tò kə wə̄n kə kəghū ko, kɛ̀sò fə̀bàa ènyə tǒ tàm è kə̀ghu, ù kaa fughu. Ù ŋ kuūwn to naŋa tsughu ko alo kətō enyəa e kê fùghuu nù â wə̄n ghèe ghê wɛ a wə̄n gho, ghə̂a ù fə̀ bûʼ lo ko mò ù kì yo wɛ̄.

⁶ Zə̀ kə̀ mǒ wə̄n â ghəa a kəaa an dziī zən; enyəa wɛ a wən a kê nɔ̀e mughu tsəgha an tùm kə̀ nughù kò, ghe lo nîi naŋā tsughu ghee tò ukɔ̂, ghe e ki ghee aŋ ŋāŋ am bɔ̀m n tə̀nùu n chìakò.

⁷ Zə̀ kə fə̀ dzɛ tsughu enyəa, ‘Ŋ̀ kê kǔuwn baa mbɛ̄ an tuw kə naʼ zəla ghe fwaʼā a tsəlà ghee, ghe kê daŋso bughò səā nughù wô, ghe bughò kaʼ ghe e kɔʼso mugho an lùʼù kən.’

⁸ Zə̀ n daŋso zə kɔʼ ŋkâa enyəa ghe e sughoo twii u wɛ a wə̄n à nûu ghò. Abə̀làhâm fi daŋso bùghò dzə̀ wò nù Aezìk, sugho tsughu tigh kə wə̄n ghəa wən e fê tsughu. Aezìk n noo dzə̀ wò Yàkɔ̂b, Yàkɔ̂b n noo dzə̀ wò tuw u tə̀ndùm wə̄n èghəm à ghè wò u bʉ̀ghà.

⁹ Tuw u təndùm u sɛ̀ u te wə m mʉʉn tsughu Dzùghùsî, nì fèe tsùghù ndùw wən alo Edzìpt, Zə̀ kə̀ ŋ kuuwn ti an tuw kə wə̄n.

¹⁰ Zə̀ kə̀ m bəghasə̄ kɔʼ wən an tsù u wə̄n u dzə̀m, taʼ kɔʼ ghèe wən aŋ ŋghəa ù ti an sə kə Fɛlòh, fughu tsughu wən â tɔ zo, Fɛlòh n ləgha tsughu wə̄n, nì tsuʼ naŋa kɔʼ wən aŋ ghûwkə̌anchʉ̀a â naʼ zə Edzìpt zò e dzə̀m àsùghò an tɔ̄ʼ.

¹¹ Êzə̄ŋ dzə̀ŋ è lì m bùghò nyə tsughu alo Edzìpt àsùghò an Kanàan, ghî ghə̀ ŋ ŋgee fanlo a te, fəghàzəa kə n tâa dàŋso yo aŋ ghùu ghê bə̀ghàbəgha.

¹² A m bùghò Yàkɔ̂b sə̀ zuw tsughu enyəa sò à lo an Edzìpt, ù n zeʼe tùm tsùghù ndùw ghê tsele a sɛ̌ fughu, tɔ̂ɔŋ wɛ a wə̄n.

¹³ A m bùghò ghe kôom bughò tsughu kpeʼē nduw fughu, Dzùghùsî n dè fùghù ndùw ghue u wə̄n â waazə̂ ghò, Fɛlò ŋ kele dàŋ tsə̀ghà sùghò waazə̂ a Dzùghùsî.

¹⁴ Dzùghùsî n daŋso bùghò tùm nàʼà ndùw tsēlē, Yàkɔ̂b, à tom a wə̄n gho enyəa ghe bughò kôʼ wə̄n. Ghe mò dzeŋe lo ghə̀m mò àghì sə̀ghàmbəgha à ghì ghò a tɛ̀.

¹⁵ Yàkɔ̂b fi nughù nùghù tsùghù ndùw sùghò nù an Edzìpt. Tò ù tsughu êzə̀, ghèe ghê wɛ ghə m bùghò kpǔuwn ko a fughu.

¹⁶ Ghe fə̌ ghee a dzə̀m bugho tsəla ko ebàm an Shɛchɛ̀m, alo eshìa Abə̀làhâm fə̀ zue aŋ ghùu wɛ a Hamòl ghǒ fughu an Shɛchɛ̀m.

¹⁷ A m bùghò nəgha e kuʼsō wo â Zə̀ kò alelūesô làŋ kə kətō kəla ù fə̀ to naŋā â Abə̀làhâm, à n lo mo kɔ̂n kə ghee kə n tsò dùw an Edzìpt.

¹⁸ Tûwbʉ̀ghà ù lǐ m bùghò dòʼò tsùghu də̀ŋ kə Edzìpt mò ù kwò yo Dzùghùsî.

¹⁹ Tûw wən m bəla an tɔ u ghì a sɛ̀, kɔʼ nyaʼa an tuw kə ghê tsele â sɛ̀, kwuu ghee alo esə̀ŋ enyəa ghe e maʼn taʼn wɛ a ghee à bughuu gho to ghe e kpuwnlo.

²⁰ Ghe fə̀ Musî dzə tsughu an nə̀ghà zən, kôʼ e wən zə n dzɔ̂ɔ â Zə̀ kò. Ghe ŋ kele tsughu wə̄n alô tsele təndzɔŋɔ tə təgha;

²¹ a m bùghò ghe bughò maʼà naŋā tsughu wə̄n, wɛ̀ ù Də̀ŋ kə Edzìpt ù zən ù lì n nì kàʼ ndùw wən a lùʼù tsʉa wo tǒ wɛ̀ ù wə̄n.

²² Ghe fi tsʉ̂ ko nù Musî ènyə lo, tsʉ̀ mɛ̀ʼɛ̀ tsùghu wə̄n an tɔ u ghûw ù Edzìpt u dzə̀m, ù n lo ghûw ù sə̀ŋò aŋ ghə̀a à kəaa gho àsùghò aŋ ghəa à ghəəŋ gho.

²³ A m bùghò ù kpe tsughu ghə̀m n tə̀nùu mò n chìakò, fə̀ŋ è wən n nùghù dè kɔ̀ʼ enyəa to e mô ndûw bwîin kôʼ waazə̂, wɛ ghə Ezə̀lɛ̂.

²⁴ A m bùghò ù ndùw kôʼ nduw ghùw ù Edzìpt ù lì ù nyàa ghùw ù Ezə̀lɛ̂ ù lì alo ŋkwə̀n, ù n tàʼ ndùw ghèe wàazə̀, bu wi tsughu ù Edzìpt vʉ̀.

²⁵ Ù ŋ waa dzàa ko enyəa waazə̂ à sô zǔuwkɛ̄lɛ̄ nù enyəa Zə̀ kə̀ fɛ bəghaasəa ghee am bàm e wə̄n, ghe ŋ kè zuūwkɛ̄lɛ̄.

²⁶ Tsuʼ ù li vʉ̀, ù n ndùw kpěen ndùw â ghì ghə Ezə̀lɛ̂ à li gho a bə̀ghà mo ghe yia zughùu alo eghùe, kàʼ ndùw aledə̀m enyəa e biān tsughu ghee, dzàa ndùw enyəa, ‘Ǒ abūghū, ghɛ̀ lo waazə̂, ghɛ̀ so aŋ ghùe zɛʼɛ̄ zughùu kwò à?’

²⁷ Ghùw wəla ù mò soʼō ŋgèkò â wàazə̀ ŋ kòom nùghù tùŋù màʼà kə̀ŋo ndùw Musî, â wə̀n à, ‘À ghù alo kətuw naŋa ndùghò enyəa ghù è saʼa tuw waʼa wo a?

²⁸ Ghù lə̀ghaa alewiī sughò mùghò aŋghəa ghù mò wi sugho ghùw ù Edzìpt ù vʉ̂ a te a zɔɔ a?’

²⁹ A m bùghò Musî zuw tsughu ghəa ghən, ù n nùghù ti tsughu â tuw kə wə̄n ko, ndùw nɔ̀e mùghùu ndùw an naʼe Midìan. Ù n dzə tsughu wə̄n â wɛ à nûu ghò a fughu alo enaʼ a bə̀ghà ghèe wì.

³⁰ A m bùghò ghə̄m n tə̀nùu n tsəghà tsughu nchìakò, tsə̀ndə̄ghā è Kə̀zə̀ m gbə̀n sə kɔʼ an sə kə Musî aŋ ŋgwən am bùghu e kwàʼ u Sinàe. Tsə̀ndə̄ghā è te mò gbənsə wo aŋ wə̀n u bəghaan wo an zʉ e bûwsh.

³¹ Musî ŋ kòʼ ghəa zə̀, dzughu zə n zum wə̄n a te; ù mo e səəŋ kə̄əŋ ndùw enyəa e ndûw tɔʼɔ̀ lɛɛ̄n tsughu, ù n zùw ndùw dzə̀ e Mughu u te ù dzɛ̀ sə wo fughu an zʉ e bûwsh enyəa;

³² ‘Ǹ lo Zə̀ kə ghê tselè tsùghò, tɔ̂ɔŋ Zə̀ kə Abə̀làhâm ghèe ghê Aezìk àsùghò Yàkɔ̂b.’ Musî ŋ kaʼ tsughu aletsə̄ŋ, tsəŋlo enyə kàʼkàʼkàʼ, tsəŋ ghaʼ tsughu alelɛɛ̄n ndûw fughu.

³³ Mughu ù te n dzɛ̀ â wən êzəŋ enyəa, ‘Tsɔʼn nùghu tsughu gûw tə̀ghà tò, nu dəŋò kə̀là ghù ti a te êzə̄ŋ, à lo ghueekətsə̄ kə̀baa ko.

³⁴ Mùghò ŋ ŋgoʼ zəla ghî ghaŋa a zùuw alo Edzìpt kôʼ, yìa Ǹ zuw sughò dî e ghee zo, sə̀ tsùghù wò enyəa M̀ bughò bəghāasə̄ ghee. Êzə̄ŋ bùghò Ǹ tuū tsughuu ndûw ghù an Edzìpt.’

³⁵ À lò Musî wə̄n ghe fə̀ tue maʼa ghəa ghe fə̀ bvʉ â wən enyəa, ‘À mò ghû naŋa ndugho alo kətuw enyəa ghù è saʼa tuw u aghì wǒ a?’ À lǒ ghùw ù mɔ̀ʼɔ ù te Wəla Zə̀ kə fə̀ tum sə wo tò kətuw àsùghò Bəghambī am bàm e tsə̀ndə̄ghā zəla ù fə̀ bwə̂n sə kɔʼ an sə kə Musî alo ezʉ.

³⁶ Ù n nì nùghù sə̀ wò ghee an naʼ zə Edzìpt, mò ù ŋ ghee â sə̀ghàa n dê an dzùghùntsòʼ è bàŋa, àsùghò aŋ gwə̄n aŋ ghə̀m n tə̀nùu nchìakò.

³⁷ Wən lò Musî wəla ù fə̀ dzɛ̂ nduw â wɛ ghə Ezə̀lɛ̂ ghò enyəa, ‘Zə̀ kə̀ kê shìa sə̌aa wò ghùwshʉ̀ghà ù Kə̀zə̀ am bvʉa e waazughù tò aŋghəa ù fə̀ shîaa sə wô mugho.’

³⁸ À lǒ wə̄n ù fə̀ lô aŋ ghì ghəla ghe fə̀ lo aŋ gwə̄n ghèe ghê tselè sɛ̀ àsùghò tsə̀ndə̄ghā zəla è mò kə̂a wo wə̄n â ghəa gho aŋ kwàʼ u Sinàe. Ù n nì wò shwaʼ u Kəzə̀ wəla u doʼò tən alebùghò fughu â sɛ̀.

³⁹ Ghêe tsele a sɛ̀ n tùe màʼà tsùghù alezūw â wə̄n; ghe ŋ kòom bàʼ nàŋa kɔʼ wə̄n, ki am fə̀ŋ è ghee enyəa ghe kôom ndùuw ko è bàm alo Edzìpt,

⁴⁰ dzàa ndùw â Ɛlɔ̀n enyəa, ‘Ghəəŋ tsughu sɛ̀ â zʉ̀ wə mùʼù ù li wo, u e deē nduw sɛ̀ â dzì. Yia a bugho tûwbùghà Musî wəla ù mò nî nughù sə kɔʼ wo sɛ̀ an naʼ zə Edzìpt, à wən yia a kwu kwò à? Òo.’

⁴¹ À fə̀ lo an tì kən ghe daŋso bɔm tsughu mùʼù fə mbɔ̀ŋ fò, fughuu ùfughu â ghè fò, səŋso ndə̀m alo kəfəgha mò à fə̀ghaan tsughu ghee.

⁴² Zə̀ kə̀ n nyuʼu dzə̀m â ghee, fùghù zə̀ghàa ndùw ghee enyəa ghee e kɔʼso nduw sə̀ghàbəlà mò, ndzɔŋ à zuuw zo; aŋ ghəa ghe tɔm naŋā am mwàʼsò kə ghǐishʉ̀ghà enyəa, ‘Wo ghî ghə Ezə̀lɛ̂ ghò, ghɛ̀ fə yia gbo fughu nû mugho â nyòm tò, ŋkāa ghɛ̀ fə̀ bugho fughu kəfughu â mùghò aŋ ghə̀m n tə̀nùu mə̀n n chìakò aŋ ŋgwən a?

⁴³ Ɛ̂ŋgaŋ; ghɛ̀ fə̀ boʼn bwiī â pfʉ̌a kə mùʼù fə̀ li fo ghe fə̀ tɔŋlo enyəa à lò Molòk, àsùghò sə̀ghàbəlà fə zə̀a fɛʼɛ fəla ghɛ̀ tɔŋlo enyəa à lò Lɛfàn, mùʼù məla ghɛ̀ fə̀ fəghàa tsughu enyəa ghɛ̀ è fughuu kɔʼso mò â ghə̀ mò. Bòʼ ghəa ghə̀ è ghən, Ǹ lo ghəə̄ŋ tsughu enyəa ghe lo dzûu sə ghɛ fɛ alo enaʼ, ghe lɔʼso nughu miaso nduw mo tsə̀ghà taʼà Babilɔ̀n.’

⁴⁴ Ghê tsele ghê tsele a sɛ̀ fə̀ ki tsəgha pfʉ̌a kəla kə fə̀ dêe enyəa Zə̀ kə̀ lo ghèe ghee aŋghəa ghe fè lo aŋ ŋgwə̄n. Ghe fə̌ pfʉ̌a kən kə tsuŋ kɔʼ aŋghəa Zə̀ kə fə̀ teso dzɛ̂ wô a te â Musî, enyəa ù bɔɔ̄m tsuŋū kɔʼɔ̄ ko aŋghəa ù mò koʼ fòʼ e te a te.

⁴⁵ Ghê tselè ghê tsele â sɛ̀ ghə̀ ŋ kòom nì nyə̀ wò pfʉ̌a kə te ko aŋghəa ghèe ghê Dzoshùa fə̀ nduūw alendùw nîi kele ghueekətsə̄ aŋ ghùu ghì ghəla Zə kə̀ fə̀ dzûm sə kɔʼ an nàʼà tə ghee aŋghəa ghe nduūw. Pfʉ̌a kə te kə lo tsəgha ko fughu aletâa wô an tì kə Dɛvìd.

⁴⁶ Dɛvìd wəla Zə̀ kə fə̀ taʼ ghèe wə̄n, ù bvʉ̀ ndùw sùghò enyəa to e mô fəghaan naŋa tsughu kə luʼu kəla Zə̀ ke Yàkɔ̂b kə̀ ki alelo a te.

⁴⁷ À ŋ kuuwn kòom lò Solomòn ù fə̀ bughò bəgha mùghùu kə te ko.

⁴⁸ Alebùʼù nîi tsughu, Tsə̂ntə̀mbî bûʼ mùghù dzə yo alo təndughu mò à bəgha kɔʼ ghùw. E bɔɔm lò aŋ ghəa ghùwshʉ̀ghà dzɛ̀ tsughu enyəa,

⁴⁹ ‘Mughu ù te dzɛ̂ tsùghù enyəa: Wala kə lo ndàŋ è kə̀də̀ŋ zaŋa, ghueekətsə̄ chia kə lô fəgha kaŋa kə̀ gaʼŋ kə aghùw kò. À lǒ ŋgòʼ è ndughu è ghɛ̌ zò ghɛ̀ lo bəghāa â mùgho a, ŋkāa luʼū kaŋā kə̀ zʉʉ̄n kə lo ghɛ?

⁵⁰ À mgbàŋ yò mugho mùgho fə̀ bɔm fʉgha wə̀n ùdzə̀m à?’ ”

⁵¹ Sìtofɛ̀ ŋ kə̀a ndùuŋ ndùw enyəa, “Ghɛ̀ ghê tùghùu kə̀tuw ghən, ghɛ̀ bɔɔm ki ko fə̂ŋ tə ghì ghəla ghe doʼŋ̀kè boō fughu â Zə̀ kò, zuuw sùghò yò tuūŋ wo, ghɛ̀ fɛ mgbɛɛ tūu bàʼn tsə̀ghà ko alezūw ndûw â Zuʼ tə̀ Zɔlɔ to. Ghɛ̀ bɔɔm ghəəŋ kô ghəa ghəla ghê tsùghò fə̀ ghəə̄ŋ tsəgha.

⁵² À fə̀ lo ghùwshʉ̀ghà ù ghɛ̌ wò aŋ ghǐishʉ̀ghà ghê tsùghò fə̀ doʼŋkè fəmso à? Ghe ŋ wiin sùghò ghì ghəla ghe fə̀ naʼn wô bughò e Ghûw ù tsəghatsəgha zo, wəlà ghɛ̀ fêe fughu tsughu êzə̄ŋ, wì màʼà è tsughu:

⁵³ ghɛ̀ ghəlà ghɛ̀ mò zuw lâŋ kə Kəzə̀ kò aŋ ghəa tsə̀ndə̄ghā tə Kəzə̀ tə̌ fə̀ dzaā, kè naŋa.”

Ghe təəm wī Sìtofɛ̀ alo atīa

⁵⁴ A m bùghò ghî a ghî a Kaaŋsì à zəə̄n ko shwaʼ u sìtòfɛ̀ wò, ghe ŋ ŋgɛlɛ ndùw ènyə, pfʉa àsɔŋ enyəa a zəŋò Sìtofɛ̀ an nə̀ghà m pfʉ̌a mò.

⁵⁵ Aŋghəa à fə̀ lo mo Zuʼ tə̀ Zɔlɔ tə ŋ wēn nyənlo, ù n lɛ̄ɛn kɔ̀ʼ ndùw kəwālā, kòʼ ndùw səghanyəgha ŋ Kə̀zə̀, mo Yɛso vʉ̀a ù ti aŋ kwe u Kəzə̀ ù təma wo.

⁵⁶ Ù n dzɛ̀ tsùghù enyəa, “Koʼô, Ŋ̀ koʼò ndùw kəwālā kə tsʉ doʼō, Wɛ u Ghùw vʉ̀a ù ti aŋ kwe u Kəzə̀ ù təma wo!”

⁵⁷ Ghe ŋ kaʼ tsughu bɔ̀ŋ m bùʼn mò, fè nàŋa kɔʼ tuŋlō u ghee, dzeŋe tə̀ŋɔ̀ ndùw ko an tuw kə Sìtofɛ̀.

⁵⁸ Ghe n sè nùghù sə̀ ndùw wən alo enaʼ, ndùw kàʼ ndùw wən alo atīa a lùʼù təəm wo; ghî ghəla ghè fə̀ tɔ̂ʼ ti aŋ ghəa e te zo ghe n ndoʼò tsɔ̀ʼn kɔʼɔ̂ ndzʉ tə ghee màʼn nǎaŋ ndùw a tsəlà wɛ̂ɛtùghu ù lì ghe mò tɔŋlo enyəa à lò Sôol.

⁵⁹ Aŋ ghəa ghe təə̄m Sìto êzə̀ alo atīa, ù ŋ gɔ̀ɔŋ tsùghù enyəa, “Mughubè Yɛso, nǐi ndǔw fə̀ŋ zaŋa.”

⁶⁰ Ù n daŋso tsughu nyaʼa è tsughu nàʼà sə̀ wò kə̀bɔ̀ŋ enyəa, “Mughubè, kà bo zən nî nàŋa dzə̀ an tuw kə ghee.” A m bùghò ù dzɛ̀ tsughu èzə̀, ù n daŋso mìa è tsughu.