Kə̀fwàʼ 6 - To kə Kəzə̀ kə̀ Fughu ko

Ghe tsɔʼ ghî à tɔɔ̄m gho sə̀ghàmbəgha

¹ Ghəa kɔ̂n kə tsə̀təndə̄ghā tə Yɛso kə̀ dûuw wo, Dzûu təla tə mò kə̂aa shwaʼ u Gə̀lêk wò n tàm ndùw Tə̀dzûu təla ghe mò kə̂aa shwaʼ u Hebə̀lù wò an shwaʼ bòʼ ghe mò baā ukpiī am fʉ̀ghàzəa wəla ghe mò dzughùu fughuu tsəgha â yiikpūw gho alo fətsūʼ.

² Tum tì èghəm à ghè tò tə bə̀ghà n tɔŋɔ naŋa tsughu ghî ghə̀n à dzə̀m ghe mò lo mo ghe m boo fughu â Kə̀lestò, dzɛ̀ â ghee enyəa, “À yò dzə̂ ghəa è dzûŋ zò alebàʼà naŋā kɔʼ alekə̀aa shwaʼ u Kəzə̀, a kôom nughù təŋò doʼò ndûw aŋ ghəa fʉ̀ghàzəa.

³ Waazə̂ ghaŋa gho, ghɛ̀ tsɔʼ sə wò nlò ghî ghǒ sə̀ghàmbəgha am bvʉa zɛʼɛ, ghî ghəla ghɛ̀ kwo enyəa ghe tɔ̂ʼ tì nû, tɔ̀ʼɔ̀ tɔ̌ɔ sùghò, ki sugho Zuʼ tə Kəzə̀, a lô alenaŋā tsughu ghee am fwàʼ kən,

⁴ ghàʼ, am bà kaʼa, a kuūwn doʼò təla tsughuu ko alegɔ̀ŋlò, ghàʼ e zoʼn nduw sugho ghî ghò an shwaʼ u te wo.”

⁵ Fə̂ŋ tə ghee yìa à dzə̀m tə̀ n zɔ̀n ndùw ènyə am fəgha kəla ghe dzɛ̂ tsughu; ghe n tsɔʼ kɔʼ Sìtəfɛ̀, ghùw mò ù bǒo fùghù bùʼ nù, ki sugho Zuʼ tə̀ Zɔlɔ to, ghèe Felêp, àsùghò Pə̀lokolùs, àsùghò Nìkanò, àsùghò Timòn, àsùghò Palmɛ̄nàs àsùghò Nikɔ̀lɔ̂s tɔɔŋ ghùw ù Antìok ù fə̀n doʼò wô Dzûu.

⁶ Ghe n nì tìso naŋa sə̀ wò ghì ghən an sə kə tum tì, tum ti tə ŋ gaʼ n naŋa ndùw àghu a zəŋò ghee, gɔ̀ŋlò è tsughu.

⁷ Shwaʼ u Kəzə̀ wə̀ n ndûuw ndûuŋ ko â sə ko; kɔ̂n kə aghì kəla ghe mò boō fughu tsughu, kə m biso dùw tsùghù ènyə an Yɛ̀lusalɛ̀m, ndə̀mà tə tə̀fɔ̀e tə̀ m boo tsughu aŋ Kə̀lestò.

Ghe kwu Sìtofɛ̀

⁸ Sìtofɛ̀ mò lo ghùw mò ù kì bughuso e Kəzə̀ a zəŋò wə̄n ndə̀m, ki kədaʼa kə ŋ ghəŋlo è tsughu ù n dè sə̀so tsughu nsəghàa ènyə â ghì yì.

⁹ Ghî à li gho ghe mò lô ghî ghò aŋ ghì a Sàŋ è tə̀ Fə̀lɛ̂dmɛ̂n (aŋ ghəa ghe mò tɔŋlo a te), n daŋso nùghù těe è kɔʼ, kàʼ nyə̀ ndùw fom tə̀ baaŋ to ghèeghê Sìtofɛ̀. Ghən mò lo aghî ghe sə wo an Sìlɛ̂n, àsùghò an Alɛ̀ʼzandà, an Sìlesìa asùghò an Ɛshìa.

¹⁰ Ghe ŋ kuūwn ghà kè alebàan ghèe ghê Sìto an tɔ àsùghò an daʼa kə Zùʼ tə̀ Zɔlɔ kəla ù mò kə̂aa ghəa gho a te.

¹¹ Ghe n daŋso tsɔŋ tsuʼ kaaŋ wò ghì à li gho enyəa ghe e dzaā tsughuu enyəa, “Ghǎʼ mò zuw ù təghaso kə̂aa boōn ghəa a Musî ghò àsùghò a Kəzə̀ ghò”

¹² Ghe n tsùʼ sòʼ kɔ̀ʼ aghî, tsuʼ sòʼ kɔ̀ʼ tətsōʼ à ghǐimwàʼsò ghò; ghe n daŋso nùghù bàʼn kwu kɔʼ Sìtofɛ̀, nì wò wən aŋ kaŋsì.

¹³ Ghe n nì nàŋa wò təbvʉ̂nɔ̄ʼ enyəa ghe ŋgaām bughò dzâa wô enyəa, “Tûw wən kaān tsō dòʼò kòʼ mò ù kə̀aa bǒon yo ghəa a Ndùghù è Kə̀zə̀ e ne zən àsùghò làŋ kə Musî kò,

¹⁴ nu ghàʼ maā zuw ù kə̀aa enyəa Yɛso ghùw Nazalɛ̀t wən lo sàʼà màʼn tsùghûu Ndùghù è Kə̀zə̀ e ne, ù kuūwn kɔʼ ghəa ghə enaʼ a sɛ̀ ghəla Musî fə̀ fughu naŋā â sɛ̀.”

¹⁵ Ghî ghə̀n à dzə̀m ghe mò lo a fughu aŋ kaŋsì n tɔ̀ʼ fwè wən enyə, kòʼ tsùghù enyəa sʉ u wən u nyəghaan ko tò sʉ u tsə̀ndə̄ghā è Kə̀zə̀.