Kə̀fwàʼ 3 - To kə Kəzə̀ kə̀ Fughu ko

Pità ghèe Dzɔ̀n baaŋ kə̀ŋgwûundughu

¹ Tsuʼ ù li wo Pità ŋ kɔʼɔ ndùw an ndughu è Kə̀zə̀ e nē ghèe Dzɔ̌n an tàm tə ezūuw tə təgha â tsə̀ tò an nə̀ghà zəla ghe gɔ̂ɔŋlo a te.

² Ghe m bòʼò wò â ghùw ghe fə̀ dzə ko mò ù lǒ kə̀ŋgwûundughu. Ghe fə̀ tûwbʉ̀ghà ù te boʼn bugho naaŋ zee tsəgha a fǔu u mbɛ̀ u ndùghù è Kə̀zə̀ e ne, am fuū u mbɛ̀ wəla ghe mò tɔŋlo enyəa à lò Dzɔ̀ɔdzɔ̀, enyəa ù è nɔɛɛn zee fʉgha wo fughu aŋ ghùu ghì ghəla ghe bughò tsəghàa nyəā nduw an dzeŋe kə ghì a Kəzə̀.

³ A m bùghò Pità ghèe Dzɔ̌n bughòo alebùghò tsəghàa nyə, ù n nɔ̀ɛ ndùw ghee â fəgha ko.

⁴ Ghêe Pità n tɔ̀ʼ fwè wə̄n enyə, dzɛ̀ â wən enyəa, “Lɛɛn wò ghaʼ enyə.”

⁵ Ù n lɛɛn kɔʼ ghee, waa kwo ko enyəa ghe sô fùghuu nǔ ghee â fəgha ko.

⁶ Pità m fwə̀n dzɛ̀ ndùw â wə̄n enyəa, “Ŋ̀ ŋgəmso ki yo kua wo, Ŋ̀ kuuwn fughuu nù ghû â fəgha kə̀là Ŋ̀ ki ghè kò: an zən e Yɛso Kə̀lestò ù Nazalɛ̀t wə̄n, nùghu tee kɔ̀ʼɔ̀ ghù bwii sə nduw.”

⁷ Pità n daŋso kwu kɔʼ tûw vʉ aŋ kwè ù zəa wo, tɔ̀m nùghù kɔ̌ʼ wə̄n; fwee e wə̄n zə n daŋso tùghù è tsughu à kəəŋ tə wə̄n to.

⁸ Ghəa ù ghàʼ nughù teē wo, bwìi sə è nduw, ù n tsə̀ghà nyə dzəəŋ ndùw an ndughukə̀zə̀ ghèe ghê Pità. Ghəa ù ndǔuw, ù n tɛ̂ɛn bə̀la (ŋkāa, buu ndùw ùfwəŋ) ndùw, bə̀əŋ ndùw Kə̀zə̀.

⁹ Ghî ghə̀n à dzə̀m ŋ koʼò ndùw ghəa ù bwìi wo a te bə̀əŋ wò Kə̀zə̀,

¹⁰ ghe ŋ kòʼkɛ̀lɛ kɔʼ enyəa à lǒ ghùw wəla ù dòʼn zeē tsəgha an Dzɔ̀dzɔ̀ kə Fǔumbɛ̀ u ndughu è Kə̀zə̀ e nē; dzughu zə n zum ghee am fəgha kəla kə sə a zəŋo tûwbʉ̀ghà vʉ̀.

¹¹ A m bùghò ù tsò zwən doʼò kɔʼ a zəŋò Pità ghèe Dzɔ̌n, ghî yì à dzə̀m n nyəŋ zùuŋ wò a vʉ̀a ghee am fala kə Solomòn, bùghò tèe enyə dzəəm.

¹² Pità ŋ kòʼ ghəa yì, dzɛ̀ â ghì yi gho enyəa, “Wo ghî ghə Ezə̀lɛ̂ ghò, kwə̀ən kə̀ ghɛ kɔʼɔ aŋ kwò à? À lǒ kwò ghɛ̀ sô gbeē lɛɛ̄n ghaʼ enyə à tò è so à lò daʼa kaʼā ŋkāa enyəa ghàʼ zɔlɔ nù an sə kə Kəzə̀ e ghəŋlo enyəa ghùw wən nughù bwiī wo a?

¹³ À lǒ Zə̀ kəla Abə̀làhâm àsùghò Aezìk àsùghò Yàkɔ̂b fə̀ kɔʼso tsəgha, tɔɔŋ Zə̀ kə ghê tsele a sɛ̀, kə fughu tsughu kɔ̂ɔ fə wən fo Yɛso â kɔʼso n te mò. Ghɛ̀ ŋ kuuwn nì kɔʼ wə̄n fèe fùghù sə̀ ndùw enyəa ghe wi, tùe màʼà sùghò wə̄n an sə kə Paelɛ̀t, mo Paelɛ̀t maā tsə̂m enyəa ghe zəghàa maʼà wə̄n.

¹⁴ Ghɛ̀ m fwə̀n tùe màʼà tsùghu ghùw ù Zɔ̀lɔ, mò ù lò sughò Tsə̄ghātsə̄ghā, kòom dzɛ̀ ndùw enyəa ghe tsʉā zəghàa səā wô ghɛ̀ â ghùw wəla ù wiī ghî ghò.

¹⁵ Ghɛ̀ mo enyəa ghe fwəlà ndûw wiī maʼà ndûw Ghùw wəla ù fughuu mughùu zo, Zə̀ kə̀ ŋ kuuwn nì nùghù sə̀ kɔ̀ʼ wò ko wə̄n alo evʉ̄; ghue e ughùe zaʼā e maā ghəa a te gho a dzə̀m a kôʼ yia a dzâa wo êzə̄ŋ.

¹⁶ Ghùw wəla ghɛ̀ koʼò wô fɛ, wəla ghɛ̀ mgbaŋ kwo sugho, à fɛ ghəəŋ tsughu boo zəla ù ki an Yɛso vʉ̀a ù tughu dòʼò wo. À lo zən e Yɛso zən, à boo zəla e lo aŋ wə̄n e ghəŋlo vʉ̀a ù tughuu dzɔɔ̄ aŋghəa ghɛ̀ koʼò wô fɛ.

¹⁷ Waazə̂ ghò, Ŋ̀ kwo nû enyəa ghɛ̀ mò ghəa ghən mgbəŋ ghəəŋ nû, tò ghəa ghî ghəla ghe lɛnlō â ghɛ̀ mò mgbə̂ŋ ghəə̄ŋ sugho.

¹⁸ À lò enyəa fəgha kela ghiīshʉ̀ghà a fə̀ naʼnlo enyəa à fə̀ naʼa naŋa Kəzə̀, enyəa Wɛ̀ ù wən ù tsùʼu kê fǎan nù, ù maā lâŋ kə te ko êzəŋ lueso.

¹⁹ À fi lo enyəa ghɛ̀ ki alemàʼà ebo, ghɛ̀ koom fən wo fə̂ŋ tɛʼɛ to a zəŋò Zə̀ kò, tò ù zèe maʼà bòo tɛʼɛ, ù sùuw zɔnso tsughu ghɛ.

²⁰ Abugho ghɛ̀ ghəə̄ŋ tsughu êzə̀ Zə̀ kə̀ lo ghəə̄ŋ tsughu kʉ̀ɛɛ kə̀ nyəā wô ghɛ̀, ù tuū wô sughò Kə̀lestò, tɔɔŋ Yɛso wəla ù fə̀ tsuʼ naŋā kɔʼ â ghɛ̀.

²¹ Yɛso wən lo ki alekɔʼɔ̄ doʼò alo kəwālā, nəgha e Kəzə̀ è kê telè kpeē tsughu â wən alelūesō tsughu lâŋ kə kətō kə wə̄n kəla ù fə̀ ki tum naʼà wô to â ghǐishʉ̀ghà a wə̄n gho â wǐiwì.

²² Zən lǒ bòʼ ghuūghùe u Musî ù mafə̄ dzɛ̂ enyəa, ‘Kə̀zə̀, Mughù ù te kê nìi sə̌a kɔʼɔ ghùwshʉ̀ghà am bvʉ̄a e waazughù tò Ù fə̀ nî sə kɔʼ mugho. Ghɛ̀ kê kì alebɔ̄ɔm zuuw ko â wən aŋ ghəa ghən à dzə̀m ù dzàa wo â ghɛ̀.

²³ E lo bughò doʼò tsughuu sughò, enyəa ghùw wəla ù dòʼkè zuw â ghùwshʉ̀ghà wə̄n, Zə̀ kə̀ lo tsaʼà nughù səā wô wən am bvʉa e ghì a wə̄n, ù dzùuw maʼà tsughu wə̄n.’

²⁴ Ghiīshʉ̀ghà à li ghə̀n à dzə̀m ghe fə̀ kə̂aa sughò ghəa gho alenìi tsughu an Sǎmwɛ̀l ndùw â sə ko, ghe fə̀ bɔɔm bugho kəaa ko ghəa ghəla a nîi bala ko an tì kən.

²⁵ Ghɛ̀ fɛ lǒ, ghɛ̀ lo ghî ghəla ghɛ̀ ki alenì fəgha kəla ghiīshʉ̀ghà ghən dzaā, ghɛ̌ yia lô sugho an to kəla Zə̀ kə fə̀ to naŋā â tselè ghê tsùghò, Abə̀làhâm enyəa, ‘Ghe lo bughusô tum wə̀n ù dzə̀m am bàm e wɛ a kətigh ghə̂a.’

²⁶ A m bùghò Zə̀ kə̀ shîaa sə kɔʼ kɔ̂ɔ fə wə̄n fo, kə m bùʼ tùm wò dzə̀ wə̄n a vʉ̀a ghɛ̀ enyəa ù bùghò bughuso ghɛ̀, àsùghò enyəa ù bùghò ghəŋlo ghɛ̀ ti kuwnlo aŋ ghəa ghɛʼɛ à biigh gho.”