Kə̀fwàʼ 28 - To kə Kəzə̀ kə̀ Fughu ko

Ghəa zəla e fə̀ sə a zəŋ̀o Pôl am Maltà

¹ A m bùghò a təghasə kɔ̀ʼ wò an dzughùu, a ŋ kəŋ kele kɔʼ aŋ ghùu ghì ghəla ghe mughu a fughu enyəa ghe tɔ̂ɔŋ nàʼà fìa dzùghùu zə dzə̂əŋ ŋgəa kɔʼ enyəa à lò Maltà.

² Ghî ghə enaʼ a te ghə n dè tsùghù ghaʼ â fɛ̀ɛn kə edzɔ̀ kə̀ li ko enyə. A m bùghò à sò lo mo ghuuw zə ŋ kāʼ tsughu zo, fwo wə n lo, ghe m fəghaan kɔʼ uwən enyəa ghàʼ a dzə̀m zʉɛɛ.

³ Pôl n lo mò ù ŋ kūum kaaŋ wò kaʼ kə ŋkàʼ kò, ù m kpɛ̂ɛn nyə̌a ndùw fughu alo etsə̄, ghəa wən u nûm nyə kɔʼ fughu alo ŋkàʼ, zughu n ndùw tì sə̀ wò fughu alo ŋkàʼ, nyəme kɔʼ aŋ kwe kə wə̄n.

⁴ A m bùghò ghî ghə enaʼ yi kôʼ ghəa zughu zə kân aŋ kwe kə Pôl, ghe mo aŋ ghùe e ghee enyəa, “Bəghà wən e wii nû ghî ghò, ghəa ù bùʼ ti sə kɔʼ ko fɛ a n dzughùu, e dêe nù enyəa ghùw wən ki yo zə mbī zən.”

⁵ Pôl ŋ kūun tsò wàn màʼà nyə tsughu ko zughu zə̀ aŋ uwə̀n mo è kâ wən nomso.

⁶ Ghe m moʼò ko enyəa Pôl sò tsòo nùghùun kàʼa tsughuu nù ù è tsoō muūw sə̄a nduw ko enyə, ŋkāa ù nùghù bvʉ̂a kpuūw wô. A m bùghò ghe sô zə̄nlō an də̀ghàa kə kəgha mo ghəa è biigh è li e səa yo a zəŋò wə̀n, ghe ŋ kuūwn kɔʼ moʼnlò e ghee, kàʼ ndùw alekə̀a enyəa ù lǒ zə̀ kə̀ li ko.

⁷ Zə n lo êzə̀ a fughu kùʼŋkùʼnlo, luʼū tə te tə n lo mò à kì tuw kə nàʼà fə dzughùu fì ghe mò tɔŋlo enyəa à lò Pubə̀lìus, ghùw, ù fə̀ nî naŋā ghaʼ kədzûŋ alo ntsuʼu n təgha.

⁸ Zə m bùghò sə kɔʼ enyəa tselè Pubə̀lìus nyə̀ŋ a kə̀chʉ̀a â ghue wo, à nyʉ̂kəfətɔ̀e kò, Pôl n tsə̀ghà nyə̀ ndùw an dzughu e ndughu e wə̄n, nyə gaʼ tsughu aghu a zəŋò wə̄n, gɔ̀ŋlò è tsughu, baaŋ kɔʼ wə̄n.

⁹ Aŋghəa ghəa ghən sə kɔʼ, ghî à dzaāŋ yìa à dzə̀m a fughu an nàʼà fə dzughùu fi n ndùw bùghò è sugho, Pôl m baaŋ kɔʼ ghee.

¹⁰ Ghî a te ghə m fughu ghaʼ â kɔʼso mò an ndə̀mà tə tədzǐi, a mo e bughò nùghùun sùghò nù, ghe n dzə̀n kɔ̀ʼ sùghò ghàʼ â fʉgha wəla u mò lo aleyoso nduw ghaʼ an dzughùu alo kəkwə̀n.

Pôl zə̀ghàa tsùghù Matà ndùw an Lumà

¹¹ A m bùghò ndzɔŋɔ tə tsəghà tsughu tə tə̄ghā, a n nì kɔ̌ʼ kwə̀n kə̀ li ko kə nughu wo an naʼ e Alɛ̀ʼzandà ghe mò tɔŋlo enyəa à lǒ Zʉ̀ wə Nndzə̀. Kə mò bughuo tee wo a fughu bòʼ à mo lo tî kəla kʉ̌ɛɛ kə biigh kə tsəghaa tsəgha a te.

¹² A n ndùw nyə̀ ndùw an nàʼà fə̀ li fo ghe tɔŋlo enyəa à lǒ Sìlakùs, dòʼò tsùghu a fughu alo ntsuʼu n təgha,

¹³ A n zə̀ghàa tsughu fughu, daŋso nùghù nyə̀ ndùw an Lhɛgìum. A m bùghò tsuʼ fə tsəghà tsughu fə mɔ̀ʼ, kʉ̀ɛɛ kə emàm kə̀ li kə n nùghù kaʼ tsughu etsəghà, tsʉtsʉ vʉ̀, a m bùghò nyə̀ wò am Puteolì.

¹⁴ A m bùghò kòʼ wò waazə̂ ghaʼa à li gho fughu èzə̀, ghe mo enyəa ghàʼ mughùu tsughu ghàʼ à ghee n tsuʼu sə̀ghàmbəgha. A fi bughò nyə̀ wò nù an Lumà.

¹⁵ Waakəzə̀ yi fughu n zuw tsughu zwɔ̂ŋ waʼa, lɔʼso bùghò tɛ̀ mìa wò to am Bekewə̄n kə Apìus àsùghò luʼ kə bəŋo bwii ko ghe fə̀ tɔŋlo enyəa à lò Atsə à Təgha alebùghò kôʼ ghàʼ. A m bùghò Pôl kòʼ tsughu ghee, ù m fughu zɔ̀ɔŋ kə Kəzə̀, fə̀ŋ n daŋso nyə tsughu wə̄n.

Pôl kə̀a shwaʼ u Kəzə̀ an Lumà

¹⁶ Ghəa a nyə ndûw an Lumà, ghe n zə̀ghàa tsùghù Pôl enyəa ù è mughu aŋ ŋgə̄ŋ ghèe sùghugòʼ zəla è chiīn wə̄n.

¹⁷ Tsuʼu mə̀ n tsə̀ghà tsùghù n təgha, Pôl n tɔŋɔ tsughu Dzûu təla tə lô tuw wo fughu; a m bùghò ghe tsuŋ wo, ù n dzɛ̀ â ghee enyəa, “À waagho, à mò lo an Yɛ̀lusalɛ̀m ghe mò nî fughu nyə tsughu mugho aŋ ghùu gɔvəmɛ̀n è Lumà tǒ ghùw ù ndùghūtsāʼ mò Ŋ̀ kâ ghəa e bonlo â ghì a sɛ̀ ghò ŋkāa an làŋ kə ghê tsele â sɛ̀ kò.

¹⁸ A m bùghò ghe sô saʼ mugho, ghe n ləghaa alezə̀ghàa maʼà mùghò, ghəa e màʼà buw an saʼ zaŋā to ghe e wī mugho a te.

¹⁹ A m bùghò Dzûu tə̀ sô tue, mùghò m buʼ tsughu kəghu enyəa to ghe mô nîi tuū wô mugho a vʉ̀a Də̀ŋ kə̀ ne ko an Lumà, dèe èzə̀ mò M̀ bûʼ kì bən sugho yo ghəa zo alekwū naʼ zāŋā a te.

²⁰ Zən lò e ghee M̀ mô dzɛ̂ enyəa Ŋ̀ koʼò tsughu ghɛ, sɛ̀ kə̂aa tsughu aghəa. Ghe mugho fɛ alo tətsāʼ kûm nàŋa aŋ ghəa e ghûw wəla Ezə̀lɛ̂ chǐi tùʼ a te.”

²¹ Ghî yi mo â Pôl enyəa, “Ghàʼ kaām mwàʼsò kə̀ li kə fɛ kòʼ kə nughù wo an Dzùdîa kùu ndùw ghù. Aŋ waazə̀ a sɛ̀ ghəla ghe buʼù bughòo tsəghà sughò fɛ, ù lì kaām bughò nàʼà kòʼ ŋkāa kə̀aa kòʼ ghəa è biigh è li zo kùu ndùw ghù.

²² Ghàʼ kuuwn ləghaa nù alezūw moʼn zə̀ghà; nu ghàʼ kwo nû enyəa ghe tsôo kə̀aa bǒon kaaŋ tsə̀ghà kô ghəa a dzeŋe kəla ghù lò a te an lùʼu ten tə̀ dzə̀m.”

²³ A m bùghò ghèe ghee ndôʼ boō naŋā tsughu tsūʼ fo, ghe m bùghò kòʼ wò sùghò wə̄n, ghee ndə̀m, an lùʼù kəla ù mò mughu a te. Ù n tesô ghəa e te zo â ghee, alezìi tsughu â bwə̀làbwə̀là tò ndùw kùm ndùw an nə̀gha è gûŋsò zò, dèe fùghuu kɔʼɔ tsə̌a tə fɔ̀e u Kəzə̀, də̀mà ndùw sùghò enyəa e tsʉ̂ʉn nughù kɔʼ ghee kùu ndùw Yɛso aŋ ghəa lâŋ kə Musî kə̀ deē àsùghò shwaʼ u ghǐishʉ̀ghà a Kəzə̀ ghò.

²⁴ Ghî à li ghə m boo fùghù ndùw sùghò am fəgha kəla ù mò kəaa, à li ghə ŋ kè boo.

²⁵ Ghe n nughù ndùw mo ghe baaŋ ndùw tə̀fom, aŋghəa Pôl sò dzɛ̂ nduw â ghee enyəa, “Zuʼ tə Zɔlɔ tə fə̀ lo tsəghatsəgha aledzɛ̀ â ghê tsùghò am bàm zə Èzayà, ghùwshʉ̀ghà, enyəa,

²⁶ ‘Ndǔw kòʼo ndùw ghî ghən, ghù dzɛ nduw enyəa, Ghɛ̀ lo e mgbāŋā zuuw nduw ghəa gho, zuuwkɛ̄lɛ̄ yo, ghɛ̀ è mgbaŋa koʼō nduw, kòʼòkɛ̀lɛ yo.

²⁷ Tɔŋlo enyəa, ghî ghən m fə̀ŋsò dòʼò, tuŋlō u ghee vʉa u tughūu alezūw aghəa; ghe yia kəmā naŋā tsughu sə a ghee gho; enyəa e kwo ko ghe lô so e koʼò àghəa an sə a ghee, ghe lô zuūw sugho, enyəa e kwo ko ghe lô zuūwkɛlɛ̄ sugho am fə̂ŋ è ghee, e kwo ko ghe laʼà bâŋà kôʼò wô mùghò tò M̀ baāŋ kɔʼ ghee.’

²⁸ Ghɛ̀ ki alekele tsughu enyəa ghe n shwaʼ u tùw kə̀ zəa u Kəzə̀ wən nî tùm fùghù ndùw â Tòʼò tò, ghe lo zuuw nù.”

²⁹ [A m bùghò Pôl kə̂aa mɛʼɛ̀ tsughu ghəa ghən, Dzûu ti n zə̀ghàa è tsughu, buʼn ndùw ko m̀bɔ̀ŋ dzîidziī, ghe baāŋ ndûw fom to alo eghùe.]

³⁰ Pôl m mùghùu fùghù nûu tə̀ zəŋè tò tə bə̀ghà mò ù mùghù ko am mbə̀ghà è wə̄n, mò ù tsə̌a ndùughù è wən à nəŋ ko, kpeenìi ghì ghə̀n à dzə̀m ghe bughò koʼō wə̄n,

³¹ kə̀aa ndùw kô ghəa e fɔ̀e u Kəzə̀, zoʼn ndùw sùghò àghì kùu ndùw Mughu ù te Yɛso Kə̀lestò an ndɛ, mo fəgha kə li kə təghàsò sùghò yò wə̄n.