Kə̀fwàʼ 26 - To kə Kəzə̀ kə̀ Fughu ko

Pôl bǎàŋ ghue u wə̄n an sə kə Agelepà

¹ Agelepà n dzɛ̀ ndùw â Pôl enyəa, “Ghù kì nû daʼa ko êzəŋ alebâaŋ ghue wʉ̀a.” Pôl n daŋso kele kɔʼ ghu a wən edzuŋ, kàʼ ndùw sùghò ghue ù baaŋ wo:

² “M̀ moʼò enyəa Ŋ̀ ki tuw kə̀ dzûŋ kò a Mughènaʼ Agelepà enyəa à lò an sə kə̂a Ŋ̀ ki alebâaŋ ghue waŋa aŋ ghəa ghəla Dzûu tə̀ kwuū mugho a te,

³ bòʼ enyəa ghù tɔ̀ʼ kwò nû bughōo kə enaʼ kə Tə̀dzûu ko àsùughò ghəla a ghəŋlo enyəa ghî ghə̀ ndzughuun lo, M̀ buʼu kə̀ghu â ghù enyəa ghù maʼa tsughu ghue wo, ghù zəən tsughu shwaʼ waŋa wo.

⁴ Dzûu tə̀n tə̀ dzə̀m kwò nû ghəa M̀ mughùu sə kɔʼ wo a te, ghe yia kwo sugho ghəa mùghò mò a te an naʼ zaŋā àsùghò an Yɛ̀lusalɛ̀m.

⁵ Ghe ki kwo tsəgha nû, abugho ghe mô lô aledzàa wô, enyəa mùghò mò lo tsəgha ghùw an dzeŋe kə ghì a Falàsîi ghəla ghe mò tɔʼɔ̀ ghəəŋ ghəa a kəzə̀ ghaʼa gho.

⁶ M̀ fɛ èzəŋ ti saʼa tə̀sāʼ bòʼ boo zəla ŋ ki an to kəla Zə̀ kə fə̀ to â ghê tselè tsele ghaʼā,

⁷ tɔ̂ɔŋ to kəla naʼā taʼa tən èghəm à ghè tò tə bə̀ghà boō tsughu enyəa ghe lo kele nù, ghəa ghe ghoʼso kɔʼso bwiī nduw Zə̀ kò, kɔʼso zēe ndùw. À lǒ bòʼ boo zən a Mbɛ̀ɛ, ghù kòʼ Dzûu tə kwuū mugho!

⁸ À lǒ kwò ghɛ̀ sô moʼò enyəa Zə̀ kə̀ yo alenìi nughù kɔʼ ghùw alo evʉ̄ a?

⁹ Ghuūghùe waŋā, mùgho mò tso kwo enyəa Ŋ̀ ki aletsoō kəŋo tsughu tədziī tə dzə̀m aletuū maʼà tsughu fwàʼ kə Yɛso ù Nazalɛ̀t wə̄n.

¹⁰ Kən lò fəgha kə̀là mùgho fə̀ fwaʼ ghè kò an Yɛ̀lusalɛ̀m. Fɔ̀e tə̀ tughu tə m fughuu tsughuu kədaʼa, mùghò ŋ kwuu dzə̀là ghì ghəla ghe boo fughu â Yɛso an ndùghètsāʼ, a m bùghò ghe tsəghàsò tsughu lâŋ kò enyəa wiin ghee, mùghò n tso boo è sugho.

¹¹ Mùghò m fɔeso tsughu ghee enyə an ndughu tə̀ ne tə̀n tə̀ dzə̀m, Ǹ dəmà aleghəə̄ŋ tsughu ghee enyəa ghe tuū maʼà tsughu boo zəla ghe ki. Nʉghà wə̀ ŋ ŋgee pfʉa mùghò a zəŋò ghee, mùghò m buʼù nyə̌a kaaŋ ndùw nàʼà tə tətùu Ǹ ndzaŋsō kaāŋ ndûw ko ghee.”

Pôl teso dzɛ̀ aŋghəa ù m boō tsughu Kə̀lestò a te

¹² “À mò lo bòʼ ghəa ghən fɔ̀e tə̀ tughu tə mò fughu tsughu daʼa ko, mùgho n nyə̀ ndùw an Dàmaskùs.

¹³ Â ŋgàlàtsə̀ ènyə a Mbɛ̀ɛ, ghəa Ǹ nduūw an dziī, mùgho ŋ kòʼ tsə̀ è lì nùghù bâŋ sə tsughu wô alo kəwālā, mò è bàŋ tsə̀ghà èzuuw, zə̀ m bàŋ ŋgəa kɔʼ dəŋò kə̀là mùgho mò lo a te à ghì ghə̀là ghàʼ à ghee mò nduūw a dzə̀m.

¹⁴ A m bùghò ghàʼ bvʉ̂ ndûw a ghueetsə̄, mùgho n zuw dzə̀ è ghùw ù lì è dzàa wo â mùghò an shwaʼ u Hebə̀lù enyəa, ‘Sôol, Sôol, à lǒ kwò ghù sò ndzaŋsō mugho à? Ghù tsò wii sùghò ghue wʉ̀a kə̀nùghùnùghù enyəa ndzàŋso mùghò.’

¹⁵ Mugho m bvʉ tsughu enyəa, ‘À lò ghû ndùgho a Mughubè?’ Mughubè ù te n daŋso dzɛ̀ tsùghù enyəa, ‘Ǹ lo Yɛso wəla ghù ndzaŋsō kaŋlo.

¹⁶ Nùghu tee kɔʼ am fwēe zəghà, tɔŋlo enyəa soo kə eghəa kəla M̀ bughò dê wô ghue waŋā wo â ghù, à lò alenìi kɔʼ ghû enyəa ghù è fwaʼā â mùghò; teso dzàa ndùw ghəa ghaŋa ghəla ghù lǒ mò ghù ŋ kòʼ àsùghò ghə̀là Ŋ̀ kê dêe wo â ghù.

¹⁷ Ǹ lo bəghaasəa ghù aŋ ghu kə ghì ghə Ezə̀lɛ̂ àsùghò aŋ ghu kə Tòʼò tə̀là Ǹ lo tuū ndûw ghû fughu.

¹⁸ Ghù kì aletsʉ̄ sə a ghee, ghù ni nughu sə wo ghee alo kələ̄m, ghù naŋa sə wo an tsə̂, ghù ni nughu tsughu sugho ghee aŋ ghu kə Satàn, ghù ni wo ghee a vʉ̀a Zə̀ kò, to abugho ghe lo gaʼ tsughu fə̂ŋ tò a zəŋò mùghò, a lo ghuūw māʼà kɔʼ bôo tə ghee, ghe nîi kɔʼ bala e ghee am bvʉa e ghì ghə̀là Zə̀ kə̀ shîaa kɔʼ.’ ”

Pôl teso dzàa aŋghəa ù mò naʼn Làbəlà è dzùŋ a te

¹⁹ “Mbɛ̀ɛ Agelepà, mùghò fə̀ bɔɔm zuw nduw fəgha kəl a ghùw wəla ù nùghù wo alo kəwālā bughò dzɛ̂ wo à mùghò an udzǔo.

²⁰ Sʉ̂esʉ mùgho n dzɛ̀ tsùghù an Dàmaskùs, daŋso ndùw an Yɛ̀lusalɛ̀m, daŋso zùghòo ŋgə̀a wò Dzùdîa edzə̀m, dzɛ̀ ndùw â Tòʼò tò, enyəa ghe kuuwn kɔʼ fə̂ŋ tə ghee, ghe boō ndûw Kə̀zə̀, ghe e fwaʼā nduw sugho ghəa ghəla a dêe tsughu enyəa ghe ŋ kūwnlō.

²¹ Zən lò e ghee Dzûu tə̀ mò kwu tsughu mugho am ndughènêkə̀zə̀ an Yɛlusalɛ̀m, dzɛ̀ enyəa a wii tsughuu nù.

²² Alebùghò sə nɛ, M̀ mughu mò à mùghò yosò Kə̀zə̀, zən lò e ghee Ǹ ti fɛ, tesô dzàa wò ghəa ghən â ghì ghə̀n à dzə̀m, ghî a ulwə̄n àsùghò ghì à səŋò ghò. Ŋ̀ kə̂aa dzə̀ yò ghəa è fughu è li zo, M̀ bɔɔm kə̀aa kô fəgha kəla ghiīshʉ̀ghà a Kəzə̀ a fə̀ dzɛ̂ naŋā ghèe ghê Musî enyəa kə kê bùghò sə̌aa nù.

²³ Ghe fə̀ dzâa enyəa, ‘Kə̀lestò ki aletèlè bughò kpuūw tsughuu dzə̂, ù dòʼò tsughu ghùw sʉ̂sʉ alekɔʼɔ̄sə̄ alo evʉ̄, alebùghò tsʉ sə a aghì àsùghò a tətòʼò ghò.’ ”

²⁴ Aŋghəa Pôl naām baāŋ ghue wo êzə̀, Fɛstùs n nùghù dzɛ̀ sə kɔʼ an dzə̂ è tughu enyəa, “Pôl, ghù zə̀ghaa nù! Mwàʼsò kə̀a kə̀là ghù ŋge zoʼn tsughu enyə, kə n tuw kə̀a kə̀ sâʼ màʼà.”

²⁵ Pôl mo enyəa, “Ǹ zəghaa dzə̀ yò à Mbɛ̀ɛ, Fɛstùs. Ghəa ghə̀là Ŋ̀ kə̂aa səā wô fɛ, à lò êsəŋò, yia a kwuū ghəa zo.

²⁶ Mughènaʼ Agelepà kwò nû ghəa ghə̀n à dzə̀m: Ǹ ndzəmà kə̀aa ndùw nù ghəa a te gho â wə̄: tɔŋlo enyəa Ŋ̀ kwo nû enyəa ghəa ghə̀là Ŋ̀ kə̂a fɛ à dzə̀m, è li e yo a te mò à lǒ è fughu zo â wə̄n; nu ghəa ghən ka mo tsɔŋ sə̀ dzə̀.

²⁷ Mbɛ̀ɛ Agelepà, ghù bǒo nû fəgha kəla ghiīshʉ̀ghà a Kəzə̀ a fə̀ dzɛ̂ naŋā? Ŋ̀ kwo nû enyəa ghù m boo.”

²⁸ Agelepà n daŋso nùghù bvʉ tsughu â Pôl enyəa, “Ghù mòʼò enyəa aŋ kə̀mà fə̀ enə̀ghà fən ghù lò nû aleghəŋlo Ǹ doʼò ghùw Kə̀lestò?”

²⁹ Pôl mo enyəa, “Kàa à lò kəma fə kəgha ŋkāa dəghàa kə kəgha, gɔ̂ɔŋ zaŋa â Zə̀ kò e lo enyəa à ka bûʼ kà dòʼò ko ghû, to ghî ghə̀n à dzə̀m ghe zəə̄n shwaʼ waŋa wo nɛ̄ mò doʼò tsughu ghî a Kə̀lestò tò mugho, mò à kǔuwn yò dzə ghùwndughūtsāʼ tò aŋghəa Ǹ lo êzəŋ.”

³⁰ Də̀ŋ chi kə n daŋso nùghù kɔ̌ʼ ghèe ghê gɔvə̀nò à Bɛ̀nîs àsùghò ghì ghə̀là ghèe ghee mò doʼ a dzə̀m:

³¹ a m bùghò ghe nughù sə nduw, ghe n sə̀ kə̀aa tsùghù aŋ ghùe e ghee enyəa, “Tûw wən ghəəŋ dzə̀ yò ghəa è li zo tò ù è kpuw a te ŋkāa tò ù è kɔʼ ndùghùtsaʼ a te.”

³² Agelepà n daŋso dzɛ̀ tsùghù â Fɛstùs enyəa, “To a mâa tûw wən zəghàa abugho ù mò doʼŋkè nɔɔ̄ wô enyəa a nîi tuū ndûw saʼ e wə̄n a vʉ̀a Də̀ŋ kə ne ko an Lumà.”