Kə̀fwàʼ 25 - To kə Kəzə̀ kə̀ Fughu ko

Pôl bùʼ kəghu â enyəa ghe niī nduw sàʼ è ghee a vʉ̀a də̀ŋ kə Lumà kə̀ ne

¹ A m bùghò Fɛstùs kɔʼ kɔʼ ndàŋ aŋ Kàesalìa, tsuʼu mə̀ n tsə̀ghà tsùghù n təgha, ù ŋ zə̀ghàa è tsùghù nùghù kɔ̀ʼ ndùw an Yɛ̀lusalɛ̀m.

² Fɔ̀e tə̀ tughu to ghèe ghê ghì a Dzudà à səŋò ghò, ghe n dzɛ̀ ndùw ghəa yia ghe kwuū Pôl a te â wə̄n; ghe m bùʼ ndùw kə̀ghu â wə̄n,

³ nɔ̀e ndùw enyəa ghe nîi tuū kɔʼɔ̄ ndûw bə̀ghà vʉ an Yɛ̀lusalɛ̀m. À n lo mo ghe m fə̀mbɛ̀ kɔ̀lɔ naŋa enyəa ghe kwuū wi wən an dziī.

⁴ Fɛstùs m bɛ̀lɛ̀ ndùw enyəa Pôl lò aŋ Kàesalìa ghe fê naŋā fughu, enyəa ghuūghùe u ghee buʼù lə̀ghaa sùghò alekùʼù ndûw fughu.

⁵ Ù n daŋso dzɛ̀ ndùw â ghee enyəa, “Êzə̄ŋ, ghɛ̀ ghəəŋ tsughu enyəa ghî à səŋò ghò am bvʉa zɛʼɛ tsughuu ndûw ghàʼ à ghee, mo ghəa è li e boo am bà kə tûwbʉ̀ghà ù te, ghe ŋ kwù ndùw wə̄n.”

⁶ A m bùghò ù ndòʼ doʼò sugho ghèe ghee tò ntsuʼu efāa ŋkāa eghə̄m, ù n nùghù tsùghù ndùw aŋ Kàesalìa; tsuʼ ù li vʉ̀ ù ŋ kɔʼ dòʼò tsùghù an ndàŋ è wən an ndùghùtə̀sāʼ, dzɛ̀ tsùghù enyəa ghe nîi wô Pôl.

⁷ A m bùghò ù bùgho, Dzûu təla tə mò nughù tsughu wo an Yɛ̀lusalɛ̀m n nùghù zùuŋ kɔ̌ʼ wə̄n enyə, bòʼò wò ndə̀mà tə tùghùtùghù tə aghəa, naaŋ ndùw an tuw kə wə̄n, mo ghe bûʼ yò aletɔ̀ʼɔ̀ teso.

⁸ Pôl mo e bâaŋ ghue u wə̄n, dzɛ̀ enyəa, “Ŋ̀ kâ làŋ kə Tə̀dzûu kə̀ bvuʼ dzə̀, Ŋ̀ kâ bǒon sùghò ghəa zo an ndughèkə̀zə̀ e ne an Yɛlusalɛ̀m, kè tsoō boōn sughò èghəa â Də̀ŋ kə ne kə Lumà kò.”

⁹ Fɛstùs ŋ kuuwn ləghaa aleghəə̄ŋ tsughu enyəa fə̂ŋ tə̀ è zɔlɔ Dzûu tò a zəŋò wə̄n, ù n dzɛ̀ â Pôl enyəa, “Ghù lə̀ghaa nù enyəa ghù kɔʼ an Yɛ̀lusalɛ̀m a kɔʼɔ̄ saʼ ghû fughu an sə kaŋā a?”

¹⁰ Pôl ŋ kuuwn dzɛ̀ enyəa, “M̀ fɛ ti an tia esāʼ e Də̀ŋ kə Lumà kə̀ ne ko, an lùʼù kəla ghue u Də̀ŋ kə Lumà kə̀ ne ko ù ki alesāʼ mugho a te; Ŋ̀ kâ ghəa è li e bonlo â Dzûu tò, ghue u eghùe zɛʼɛ̄ e kwo sugho nû.

¹¹ Abugho Ǹ lo ghùw wəla Ŋ̀ ghəə̄ŋ boōn ghəa gho, yìa Ǹ lo mò mùghǒ ŋ ghəa è li e bonlo mò Ŋ̀ ki alekpuw a te, Ŋ̀ kəŋo yo dzì alenùghù ti evʉ; abugho à lo enyəa ghəa zəla ghe kwuu mugho a te yo èsəŋo, fəgha kə̀ li kə yo dzə̂ alenìi kɔʼ mugho kə fughuu tsəghàa ndûw â ghì ghən. Ǹ dîi dzàa ndùw â Dəŋ kə̀ ne kə Lumà kò enyəa n ləgha enyəa à saʼ wə̄n saʼ zaŋā.”

¹² Fɛstùs n sāan tsughu ghèe ghê ghì a kaŋsì a wə̄n gho, bɛ̀lɛ̀ tsùghù enyəa, “Ghù dìi alendùw a vʉ̀a Də̀ŋ kə Lumà kə̀ ne ko: ghù kì alendùw a fughu.”

Agelepà zùw dzughu e saʼ e Pôl

¹³ A m bugho tsuʼu n lǐ n tsəghà tsughu, Mbɛ̀ɛ Agelepà m bùghò aŋ Kàesalìa ghèe Bɛ̀nîs alebùghò tɔɔ̄ŋ zuw Fɛstùs.

¹⁴ A m bùghò ghe doʼò kəŋo nduw fughu an ndə̀m è ntsùʼu, Fɛstùs n nì màʼà wò tsù u Pôl â də̀ŋ chì, â wən enyəa, “Ghùw ù lì lò nû Fɛlèks mò nughù naŋā taʼà fɛ an ndùghùtsāʼ;

¹⁵ a m bùghò Ǹ nduw an Yɛ̀lusalɛ̀m fɔ̀e tə̀ tughu to ghèe ghê tsoʼ tə Tə̀dzûu tò ghò, ghe ŋ kə̀aa wò mùghò â ghəa a wə̄n gho, dzàa wò enyəa to a mô saʼ sāʼ è kɔ̀lɔ̀ tsughu Pôl.

¹⁶ Mùghò m bɛ̀lɛ̀ ndùw ghee enyəa e yo tsəghà dzə̂ am bùghòo kə tə̀ Lhumàn enyəa a lo alekwuū fughuu səā ndûw ghùw mò ù kaan ndûw kpènlo an tia e sāʼ ghèe ghùw wəla ghèe wən dəmā, aŋ ghəa ù lò alebɔŋɔ̄ kele sughò dzì alebaāŋ sughò ghue u wə̄n.

¹⁷ A m bùghò ghe dzeŋe ndûw bughò fɛ, mùghò ŋ kè bonlo enəghā, tsʉtsʉ vʉ̀, mùghò n daŋso nyə̀ nì kɔ̀ʼ bala zaŋā an tia e sāʼ, dzɛ̀ ndùw enyəa ghe nîi nyəā wô ghùw ù te.

¹⁸ A m bùghò ghî ghəla ghe kwuū wən nughù teē kɔʼ, ghe ŋ kè kə̂a ghəa è li zo e boō tǒ bòobò tə aghəa təla M̀ mô moʼō:

¹⁹ ghe m fwə̂n kì ko ghə̀alò n lǐ mò ènyə ghe baāŋ fom to a te ghèe ghee mo a mɔ̂ɔ ndùw ghəa a Kəzə̀ a ghee, àsùghò Yɛso ù lì, mò ù maā kpuw, Pôl vʉ̀a kuūwn dzɛ̂ enyəa ù lǒ â tuw ko.

²⁰ A m bùghò Ǹ sô kəŋ ke dzì aŋ ghəa Ǹ lô aletɔ̀ʼn ghəa ghə̀n a te, mùgho m bvʉ tsughu â wən enyəa ù yia ləghaa nù enyəa a ndûw saʼ wə̄n an Yɛ̀lusalɛ̀m aŋ ghəa ghən a.

²¹ A m bùghò Pôl sò kuūwn buʼ ndûw ghu ko ghe zəghàa tsughu ko ghee tò də̀ŋ kə̀ ne kə lô bughò saʼ ghee, mùgho n dzɛ̀ tsùghù enyəa ghe naŋā tsughu wə̄n, Ŋ̀ kê bughò nîi tuū ndûw wən a vʉ̀a Də̀ŋ kə Lumà kə̀ ne ko.”

²² Agelepà n daŋso dzɛ̀ â Fɛstùs enyəa, “Ǹ ləghaa nù alezuūw tsughu shwaʼ u tûwbʉ̀ghà ù te mùghò â mughu.” Festùs n dzɛ̀ enyəa, “Ghù lo zuuw nù shwaʼ u wə̄ wo tsʉtsʉ.”

²³ Tsʉtsʉ vʉ̀, Agelepà ghèe Bɛ̀nîs n ndûw bùghòo aŋ kɔʼso tə aghəa, bùghò tsə̀ghà nyə̀ ndùw an sàŋ ghèe ghê pfʉtəŋgə̄m àsùghò ghì à səŋò ghǒ fughu alo enaʼ. Fɛstùs n daŋso dzɛ̀ è tsughu ghe n nì nyə̀ wò Pôl.

²⁴ Fɛstùs n dzɛ̀ tsùghù enyəa, “Mbɛ̀ɛ Agelepà, à ghɛ̀ ghən à dzə̀m ghɛ̀ lô fɛ sɛ̀, ghɛ̀ koʼò nǔ ghùw wəla Tə̀dzûu ghə̀n à dzə̀m mò tɔm wô mugho â mwàʼsò kò an tuw kə wə̄n, an Yɛ̀lusalɛ̀m àsùghò fɛ̀, nàʼn wò ko enyəa ù kì alekpūw.

²⁵ Mùgho ŋ kòʼ tsughu enyəa ù kamo ghəa e bonlo tò ù è kpuw a te; aŋ ghəa ghuūghùe u wən u mò dî dzɛ̂ ndûw sughò enyəa e so e kô də̀ŋ kə ne ko, mùgho n dzɛ̀ enyəa Ǹ nîi tǔu ndùw nǔ wə̄n.

²⁶ À kǔuwn lò ko enyəa Ŋ̀ ki yo biso kə eghəa ko kùu ndùw wən aletɔɔ̄ fughuu ndûw â mughùbè waŋā. Zən lǒ e ghee Ǹ nî wo wən an sə kɛʼɛ̄, M̀ biso nì wò wən an sə kəā a Mbɛ̀ɛ Agelepà enyəa abugho a sô tɔ̂ʼ bvʉʉ̄n tsughu wən â ghəa gho, Ǹ sô wǎa lò alekele èghəa aletɔ̄m.

²⁷ Nu â mùghò e ghəəŋ yo tɔ wo alenìi tuū ndûw ghùwdùghùtsāʼ mo a kâ tsǔʼn tsughu ghəa ghəla ghe kwuū wə̄n a te.”