Kə̀fwàʼ 24 - To kə Kəzə̀ kə̀ Fughu ko

Sàʼ è te a vʉ̀a Fɛlècks

¹ A m bùghò tsuʼu n tsəghà tsughu n tɛ̀, tuw kə fɔ̀e, Ànànîas n ndùw sə̀ tsùghù wò ghèe ghê tsoʼ tə̀ li to, àsùghò ghùw ù lì mò ù fə lo kəlâŋ ghe fə̀ tɔŋlo enyəa à lò Tɛtūlùs. Ghe n nì dzɛ̀ ndùw fəgha kəla ghe kwuū Pôl a te â gɔvə̀nò.

² A m bùghò ghe daŋso tɔŋɔ̄ nyə wô Pôl, Tɛtūlùs ŋ kàʼ nyə̀ ndùw ko wə̄n a lùʼù kwuu kɔlɔ̄ kaaŋ wo enyəa. “Ghəa ghàʼ bɔɔ̄m mughù dzɔ̂ ènyə alo ebūghūnlō fɛ mò à lò ghû, ghù vʉ̀a ù ghəə̄ŋ sugho a Mbɛ̀ɛ Fɛlècks ghəa yia a bwîi dzɔ̂ɔ fɛ an naʼ zən,

³ an dzìi tən tə̀ dzə̀m àsùghò an lùʼù tən tə̀ dzə̀m, ghàʼ tso boo nù ghəa ghə̀n à dzə̀m am fə̂ŋ zaʼa e dzə̀m.

⁴ À kǔuwn lò ko enyəa, Ŋ̀ ka nəgha zəghà è kôom zə̀ sùghò, Ǹ so M̀ buʼū tsughu kəghu enyəa, am fə̂ŋ zə̀ghà è dzùŋ, ghù nyɛʼɛ zəən tsughu shwaʼ waʼa wo.

⁵ Ghàʼ kôʼ tsùghù enyəa ghùw wən lo ghûw ù ùtsù, ghùw wəla ù sòʼò kaāŋ tsû wò am bvʉa e Tə̀dzûu fɛ am mbī e dzə̀m, vʉ̀a ù lò sughò tuw ko an dzeŋe kə̀ biigh kə ghì a Nazalɛ̀t gho.

⁶ Ù mò buʼū kəŋo sugho dzì aledzəso maʼà ndughu è Kəzə̀ e ne an Yɛlusalɛ̀m, a ŋ kwu kɔʼ wə̄n,

⁸ Abugho ghù tɔ̀ʼ bvʉʉ̄n tsughu wən â ghəa gho, ghù sò lò nû alezoʼn kele kɔʼ ghəa ghə̀n à dzə̀m a kwuū wən fɛ a te, aŋ ghùu wə̄n.”

⁹ Dzûu tə̀ n təmdzəəŋ ndùw sùghò wən a lùʼù kwuu u Pôl wò, boom fughuu ndùw enyəa ghəa yì à dzə̀m lò esəŋo.

Pôl bâaŋ ghue u wə̄n a vʉ̀a gɔvə̀nò Fɛliks

¹⁰ A m bùghò gɔvə̀nò nùghù sɔ̂ʼ ndûw Pôl enyəa ù kə̀aa wô àghəa, Pôl m bɛ̀lɛ̀ tsùghù enyəa, “Ghəa Ŋ̀ kôom kele kɔʼ enyəa ghù n dòʼo ndə̀m è tə̀nùu tǒ ghùw wəla ghù saʼā naʼ zən, M̀ fɛ dzɛ̀ enyəa M̀ bâaŋ ghue waŋa êzəŋ aŋ ghùe ù ghɛɛ̄ŋ wo.

¹¹ E tughuu yo â ghuūghùe wʉ̂a wo alekəŋo kele səā kɔʼ ghəa ghən gho enyəa, tsuʼu ŋ kaān tsəghà dzə̀ eghə̄m à ghè mò m bə̀ghà aŋghəa mùgho mò nduw an Yɛlusalɛ̀m alendùw fughu ŋkɔʼso â Zə̀ kò.

¹² Ghe kaām mugho kòʼ kòʼ M̀ buʼn bɔ̀ŋ mò ghàʼ à ghùw ù lì ŋkāa Ŋ̀ ghəŋlo enyəa Ǹ tsuʼū soʼò kɔʼ aghî aŋ ghəa è li zo an ndughekəzə̀ e ne an Yɛlusalɛ̀m ŋkāa, an ndùghùne ŋkāa enaʼ.

¹³ Ghe bûʼ yò sughò aledè ghəa zə̄lā ghe kwuū mugho fɛ̀ a te.

¹⁴ Zən lò zəla Ǹ so M̀ boō wô â ghù enyəa kùu ndùw Dzì è te, zəla ghe ŋgɔɔ̄ enyəa à lò dzeŋe fə̀ biigh fo, Ŋ̀ kɔʼsô Zə̀ kə ghê Tselè sɛ̀, boom fughuu ndùw ghəa ghə̀n à dzə̀m lâŋ kə̀ deē, ŋkāa ghəla ghiīshʉ̀ghà a Kəzə̀ à tɔm naŋā,

¹⁵ chìi ndùw ko tùʼ alo Kəzə̀ to ghue e ughùe e ghee e chîi sugho, enyəa ghî a tsəghatsəgha ghèe ghê bəən tə aghì tə̀ lo kɔʼɔsə̄a nù alo evʉ ghee a dzə̀m.

¹⁶ Zən lò e ghee M̀ bughōo mùghò Ǹ nì kɔ̀ʼ mbāŋ kə te ko enyəa mùghò è ki ko fə̀ŋ è zɔ̀lɔ a zəŋò Zə̀ kò àsùghò a zəŋò ghì ghò.

¹⁷ Êzə̄ŋ, ghəa nûu tə̀ li tə tsəghà tsughu, mùgho n ndùw bùghò enyəa M̀ bughò fughu eyosò â naŋa zo àsùghò fughu kefughu â Zə̀ kò.

¹⁸ Ghəa Ŋ̀ ghəə̄ŋ ghəa ghən, ghe ŋ kòʼ tsùghù mùgho am ndughèkə̀zə̀ e ne an Yɛlusalɛ̀m, mò n zɔlɔ nù, mò n yo dzə saʼ kə aghì kò, ndəm kə̀ n kè səa sughò. Dzûu tə̀ li to sə wo an Ɛshìa —

¹⁹ ghe mô kì alelō fɛ an sə kə̂a ghee e kwuu wo sugho mugho, abugho ghe kpaʼ ki ghəa zo ghe kwuū mugho a te.

²⁰ Ŋkāa na to ghuūghùe e ghì ghən e dzâa wô ghəa è biigh zəla mùghò mò ghəŋlo aŋ ghəa mùgho mò ti, kə̀aa ndùw àghəa aŋ kaŋsì.

²¹ Ghəa zə̀n è mɔ̀ʼ ko mùgho mo naʼ səa kɔʼ aŋ kaŋsi mò ti am bvʉa e ghee mò lo zən enyəa, ‘À lǒ bòʼ Ǹ naŋa tsughu lâŋ kən enyəa ghî à kpuuw kɔʼɔsə̄a nù alo evʉ̄, ghe mugho fɛ nɛ an sə kə̂a sàʼa a te.’ ”

²² Fɛlècks, ghəa ù màʼà lô sugho mò ù tɔ̀ʼ kwò nû ghəa a Dzì è te gho, ù m gbò kə̀aa kɔ̌ʼ sàʼ è ghee è te enyəa, “Abugho pfʉtəŋgə̄m Lysìas laʼà tsughu wo, Ǹ lo saʼ saʼ zɛʼɛ̄.”

²³ Ù n daŋso fughu tsughu kəlâŋ â komndzūghū enyəa ghe ki alenaŋā tsughu Pôl ghe e chiinlō, ghe e nyɛʼɛ zəghaan tsughuu sugho ù è niī kɔʼɔ kʉ̀ɛɛ ko, dzɛ̀ tsùghù sùghò enyəa ghe ka e dzûu baʼà fən a wə̄n gho enyəa ghe ka wən â fʉgha u bughò fùghù.

Pôl an sə kə Fɛlècks

²⁴ A m bùghò tsuʼ n lǐ n tsəghà tsughu, Fɛlècks n ndùw sə̀ tsùghù wò ghèe wì, Də̀lùsilà, mò à lò zən à Dzûu; ù n dzɛ̀ tsùghù enyəa ghe nîi wô Pôl. Ù n tɔ̀ʼ zə̌ən sùghò ghəa yìa ù kə̌a kùu ndùw fə̀ŋ è gàʼa a zəŋò Kə̀lestò Yɛso.

²⁵ A m bùghò Pôl tɔ̀ʼ teso tsughu tuŋlō u ghee wo aŋghəa ghî a ki alelo tsəghatsəgha a te, àsùghò aŋghəa ghî a ki alenaŋso ghuw kə e bwìi kə ghee ko a te, àsùghò aŋghəa Zə̀ kə̀ lo saʼā ghî ghò a te an tsuʼ fə̀ guŋso fo, Fɛlècks n tɛ̀ ètsəŋ, nùghù dzɛ̀ tsùghù enyəa, “Kə̌aa nùghu ndùw ezə̀ŋ, abugho Ǹ sô ndôʼ kele tsughu nəgha zo, Ǹ sô kôom tɔŋɔ̄ wô ghù.”

²⁶ Ù n chîi ko tùʼ an nə̀gha e te zo sughò enyəa Pôl so waā dzə̂a fughuu wô wən â kua wo. Ù n tsùuŋ ko êzə̄ŋ nùghù tɔ̀ŋɔ tsughu Pôl ghèe wən ŋ kə̀aa tsùghù aghəa.

²⁷ A m bùghò nûu tə̀ mîa tsughu tə bə̀ghà, Pôlshius Fɛstùs ŋ kɔʼ kɔʼ ndàŋ è Fɛlècks tò gɔvə̀nò. A m bùghò ù sò ləghaa aleghəə̄ŋ tsughu enyəa fə̂ŋ tə̀ è zɔlɔ Dzûu tò a zəŋò ghee, ù n zə̀ghàa tàʼà ndùw Pôl an ndùghàtsāʼ.