Kə̀fwàʼ 23 - To kə Kəzə̀ kə̀ Fughu ko

Pôl an tia esaʼ

¹ Pôl n sɔʼ lɛɛn ko ghì a kaŋsì enyə, dzɛ̀ â ghee enyəa, “Waazə̂ ghò, fə̀ŋ zaŋa ŋgee zɔlɔ nù an dziī zəla M̀ mughùu kɔʼ wo a te an sə kə Kəzə̀ alebùghò sə nɛ.”

² Tuw kə Fɔ̀e, Ànànîas, n daŋso dzɛ̀ tsùghù enyəa ghî ghəla ghe kuʼù ti ghèe ghee tsɔ̂ɔ nyəā ndûw wən alo edzughu.

³ Pôl fi nughù dzɛ̀ ndùw nù â wən enyəa, “Zə̀ kə̀ lo tsɔ̂ɔ sughò ghù, kə̀bàŋàdzə̀m tò ghû! To ghù fi doʼ enyəa ghù sàʼa mùghò aŋ ghəa lâŋ kə̀ deē mò ghù kòom bvùʼu làŋ kə te ko aledzaā nduw enyəa ghe tsɔ̂ mùgho a?”

⁴ Ghî ghəla ghe mò kuʼù ti fughu m bvʉ â wən enyəa, “Ghù sùuwn ndùw tuw kə fɔ̀e e Kə̀zə̀ à?”

⁵ Pôl mo enyəa, “M̀ mô kwò yo a waazə̂ ghò enyəa wən fɛ lo tuw kə fɔ̀e; tɔŋlo enyəa ghe tɔm naŋa am mwàʼsò kə Kəzə̀ enyəa, ‘Ghù kì dzə yo alekə̀aa bonlo èghəa â ghùw wəla ù lɛɛ̄n ghî ghə̀a ghò.’ ”

⁶ Ghəa Pôl kòʼ tɔ kɔʼ enyəa dəŋò kə̀ li kə mò lo ghî a Sadùwsîi, kə̀ li kə n lo ghî a Falàsîi, ù m buʼ sə kɔʼ kəbɔ̂ŋ aŋ kaŋsì enyəa, “Waazə̂ ghò, Ǹ lo ghùw Falàsîi, wɛ mò à dzə̀ ghî a Falàsîi; ghe mugho fɛ saʼa aŋghəa M̀ boō fughu enyəa ghî a kpuuw kɔʼɔsəa nù alo evʉ.”

⁷ A m bùghò ù daŋso kə̂aa tsughu enyə, shwàʼ wə n nùghù sə̀ è kɔʼ, ghî a Falàsîi ghèe ghê ghì a Sadùwsîi ghò; ndughu n nùghù dzùghùu dòʼò è tsughu.

⁸ Tɔŋlo enyəa ghî a Sadùwsîi à dzɛ̂ enyəa ghî a kpuuw kɔʼɔsə̄a dzə̀ yò alo evʉ̄, enyəa tsə̀təndə̄ghā tə Kəzə̀ tə̀ yo, zʉ vʉa u yô sugho. Ghî a Falàsîi yəa kuūwn dzɛ̂ enyəa ghəa a te gho a dzə̀m lò nû.

⁹ Ndə̀m kə̀ li kə n daŋso nùghù sə kɔʼ fughu, ghî a kəmwàʼsò a Falàsîi à li ghə n nùghù těe è kɔʼ, tsò è tue, dzàa enyəa, “Ghàʼ kâ kòʼ dzə̀ ghəa è li zo tûw wən bonlō. À lò aledòʼò êsəŋò enyəa zə̀ kə̀ li ko ŋkāa tsə̀ndə̄ghā e Kəzə̀ e lì maā wə̄n â ghəa a kûm bùghò kə̀a.”

¹⁰ A m bùghò ndə̀m kə te kə tughu kɔʼ kpe tsughu, pfʉtəŋgə̄m n tsəŋo enyəa ghe lo alenìi sâan tsughu Pôl an ushwà, ù m fughu tsughu kəlâŋ â sùghugòʼ tò enyəa ghe tsughuu nîi nughù kɔʼ wən alo esə̀ŋ am bvʉa e ghee ghe nîi kɔʼɔ̄ wô alo kəbɛ̄lɛ̄.

¹¹ Â tsuʼ wo an tsuʼ fə̀ èfì, Mughu ù te m bùghò těe dzə̄əŋ wò ghèe wə̄n dzɛ̀ tsùghù â wən enyəa, “Dzə̀la tsughu fə̀ŋ, nu ghəa ghù dzɛ̀ sə ndûw dzə̂ ghəa ghaŋa gho an Yɛ̀lusalɛ̀m, ghù kì sugho alendùw ghəəŋ sùghò ghəa e mɔ̀ʼɔ̄ zo Lumà.”

Ghe nyə utsəm alewi Pôl

¹² A m bùghò tsuʼ u zuw tsughu, Dzûu tə̀ li tə n nyə tsughu utsəm, zə kɔʼ ŋkāa enyəa ghe lô tsàʼ tùŋ yo, ghe lô fəgha kə tso mʉ̀ sùghò yò, mo ghe kâ Pôl wì tsùghù dzə̀.

¹³ Ghee ghəla ghe mò nyə tsəm wə̄n mò tsəgha taʼā ghə̀m mò àghì nchìakò.

¹⁴ Ghe n ndùw kòʼ ndùw fɔ̀e tə̀ tughu to àsùghò tsoʼ to dzɛ̀ â ghee enyəa, “Ghàʼ ŋ kàa zə enyəa lô tsàʼ tuŋ mò ghàʼ kâ Pôl wi tsughu dzə̀.

¹⁵ Ghɛ̀ ghî a Kaŋsì, ghɛ̀ ghəəŋ tsughu enyəa pfʉtəŋgə̄m enyəa ghe nîi tsughuu wô wə̄n fɛ a vʉ̀a ghɛ̀, tò è so ghɛ̀ so e fəghaan tɔʼɔ̀ tiso tsughu sàʼ è wə̄n. Ghǎʼ ŋ ghue e ndzûuŋ nàŋa tə̀n sùghò enyəa a wii wə̄n tò ù è buʼù bughò tâa wô fɛ.”

¹⁶ Wɛ ù wàazə̀ ù Pôl n zuw fə̀mbɛ̀ fə ghee fə te fo, ndùw tsə̀ghà nyə̀ dzɛ̀ ndùw â Pôl alo kəbɛ̄lɛ̄.

¹⁷ Pôl n daŋso tɔŋɔ tsughu komndzūghū u mɔ̀ʼ, dzɛ̀ â wən enyəa, “Nǐi kɔʼ wɛ̂ɛtùghuu wən ghɛ à wən, ghɛ̀ à wə̄n nduw a vʉ̀a pfʉtəŋgə̄m, ù kì ghəa è li zo aledzɛ̀ â wə̄n.”

¹⁸ Ù n nì kɔ̀ʼ sùghò wɛ̌ɛtùghu vʉ̀, ghèe wən m bùghò kòʼ wò sùghò pfʉtəŋgə̄m, ù n dzɛ̀ ndùw â wən enyəa, “Pôl, ghùw ù ndughutsaʼ wən dzɛ̀ enyəa Ǹ nîi wô wɛ̂ɛtùghùu wən a vʉ̀a ghù, enyəa ù kì ghəa è li zo aledzɛ̀ â ghù.”

¹⁹ Pfʉtəŋgə̄m vʉ ŋ kwu kɔʼ ghî fi aŋ kwē, a m bùghò ghèe wən nyɛʼɛ̄ bəŋso teē tsughu, ù m bvʉ â wə̄n enyəa, “À lò ghəa è ghɛ zo ghù so e dzɛ̂ â mùghò a?”

²⁰ Wɛ̂ɛtùghu vʉ n dzɛ̀ â wən enyəa, “Dzûu tə̀ tsughu boo tsughu enyəa ghe dzâa wô â ghù enyəa ghù ni tsughu wo Pôl aŋ kaŋsì tsʉtsʉ, to è so ghe se tɔ̂ʼn səā kɔʼ ghəa à li gho kùu ndùw wə̄n.

²¹ E kwo ghù lò soe kuūwn zuūw ghəa a ghee a te gho; tɔŋlo enyəa ghî à li a bêe těe wə̄n an dziī mo ghe tsəghàtàʼà ghə̀m mə̀ àghì n chìakò, mo ghe ŋ kàa n zə kɔʼ enyəa ghe lô tsàʼ tuŋ yo ŋkāa ghe lo fəgha kə mʉ̀ yo mo ghe kà Pôl wì. Ghe fi êzəŋ bɔɔm ləəm ko dzə̀ zə̀ghà.”

²² Pfʉtəŋgəm vʉ n dzɛ̀ enyəa ghî fi ndûuw ko nù, mò ù ŋ wən tɔ̂ʼ kùɛɛn tsughu enyəa, “E kwo ghù lò dzaā â ghùw enyəa ghù ŋ ghəa ghən â mùghò dzɛ̂.”

Ghe nî tùm fùghù ndùw Pôl alô gɔvənɛ Fɛlecks

²³ Pfʉtəŋgə̄m vʉ n daŋso tɔŋɔ tsughu ghê komndzūghū a bə̀ghà, dzɛ̀ â ghee enyəa, “Ghəəŋ naŋa tsughu nlǒ bɔ̀m n tə̀sùghugòʼ mò m bə̀ghà, àsùghò ghə̀m sùghugòʼ mǒ səghāmbəgha ghe nyəŋo kʉ̀anyòm wo, àsùghò mbɔ̀m n tə̀sùghugòʼ mò m bə̀ghà ghe shʉ̂aan ghɔŋ gho, ghe ki alendùw aŋ Kàesalìa nɛ â tsuʼwo an tàm tə ezuuw tɛ̀ndzūghū â tsuʼ wo.

²⁴ Ghəəŋ tsùghù sùghò nlǒ kə̀anyòm ù li wo â Pôl alenyəŋo nduw a te, ghɛ̀ bɔɔm ni nduw wə̄n alô Fɛlècks, gɔvə̀nò mò kǎakàa fə̀ kâ wən kɛ̂.”

²⁵ Ù n daŋso tɔ̄m tsughu kəmwàʼsò aŋ ghəa zən: ù n tɔm tsughu enyəa,

²⁶ “À lo mugho Claudìus Lysìas, M̀ tɔɔ wo mwàʼsò kən ko. Mbɛ̀ɛ, M̀ fùghù wò ghù â tɔɔŋ zo, Gɔvə̀nɛ̀ Fɛlècks.

²⁷ Dzûu tə̌ fə̀ kwu kɔʼ tûw wə̄n, ləghaa alewī, ghàʼ à ghê sùghugòʼ tə̀ n sə kpeen ndùw à tè, bəghasə̄ tsughu wə̄n ghəa a zuw tsughu enyəa à lǒ ghùw u Lumà.

²⁸ A m bùghò Ǹ sô ləghaa alezūw ghəa zəla ghe kwuū wə̄n a te, mùghò n nì tsùghù wò wən aŋ kaŋsì è ghee.

²⁹ Mùghò m bùghò kəŋ kele kɔʼ enyəa ghe wən kwuu kùu ndùw ghəa e làŋ kə ghee, mò à kǔuwn yò dzə̂ eghəa to ghe ewī wə̄n a te ŋkāa mo ghe lo aledzə̀n wə̄n a te an ndùghùtsāʼ.

³⁰ Yia bugho ghe sô tsɔŋ dzɛ̂ fughu tsughu â mùghò enyəa ghe nyəm tsəm wo an tuw kə tûwbʉ̀ghà vʉ̀, yìa Ǹ daŋso nî tum fughu wo wə̄n a vʉ̀a ghù, dzɛ̀ tsùghù sùghò â ghì ghəla ghe kwuū wən enyəa ghe bughò taŋsô dzɛ̂ ghəa ghəla ghe kwuū wən a te fì à vʉ̀a ghù.”

³¹ Sùghugòʼ tə̌ fi tsughu nì kɔ̀ʼ sùghò nù Pôl, an làŋ chia ghe nî kɔʼ, nì ndùw wən an Antipātə̀lìs â tsuʼ wo.

³² Tsuʼ u tsʉtsʉ vʉ̀, ghe ŋ kòom nyə̀ wò èbàm alo kəbɛ̄lɛ̄, mo ghe ŋ ghì a ukʉ̀anyòm à zəghàa ndùw enyəa ghe nughù daŋso ndûw ghèe ghê Pôl.

³³ A m bùghò ghî a ukʉ̀anyòm ghən bugho tɛ̂ tsughu aŋ Kàesalìa ghèe ghê Pôl, ghe m fùghù ndùw mwàʼsò chì â gɔvə̀nò, ghe fùghù tsəghà ndùw sùghò Pôl â wə̄n.

³⁴ A m bùghò ù tɔɔ̄ŋ kɔʼ mwàʼsò kə te ko, ù m bvʉ â Pôl enyəa ghù sə̀ am mbùʼ è ghɛ̌ zò. A m bùghò ù zuw tsughu enyəa Pôl sə̀ an Sìlishìa,

³⁵ ù mo enyəa, “Ǹ sô shwaʼ wʉ̀a ù zəənlo abugho ghî ghəla ghe kwuū ghû bùgho.” Ù n dzɛ̀ tsùghù enyəa ghe e chiīn tsughuu wə̄n am mbɛ̀ e Hɛlɔ̀d.