Kə̀fwàʼ 21 - To kə Kəzə̀ kə̀ Fughu ko

Pôl ndùw an Yɛ̀lusalɛ̀m

¹ A m bùghò a zəghàa tsughu ghee, nùghù ndùw â dàŋ kò alo kəkwə̀n; ghàʼ n nùghù ndùw ko dzì tsəghatsəgha, dàŋ sə̀ ndùw an Kôs, tsʉtsʉ vʉ̀ a n zə̀ghàa tsùghu fughu, ndùw an Lhôds, a n zə̀ghàa tsùghu an Lhôds nùghù dàŋso ndùw am Patālà.

² A m bùghò a kôʼ tsughu kwə̀n kò kə daŋā am Fòenisìa, a n nyə kɔʼ a te, nùghù ndùw â dàŋ kò.

³ A m bùghò a bughò tɛ̂ tsughu an lùʼù kəla a kòʼò ndûw Saepə̀lùs, a n zə̀ghàa tàʼà ndùw naʼ e te zo aŋ kwè ù kwû wò, nùghù ndùw an Sylìa, tɛ̀ sə̀ ndùw an Tâe; nu à mò lo a fughu kwə̀n chi mò ki alendùw shueʼe.

⁴ A m bùghò a bwîin kəŋ kôʼ kaāŋ sə kɔʼ ghî a Kəzə̀ a li gho fughu, ghàʼ n dòʼò kə̀ŋo ndùw ntsuʼu fughu sə̀ghàmbəgha ghàʼ à ghee. Zuʼ tə̀ Zɔlɔ tə te wə n tsom kɔʼ ghee, ghe n dzɛ̀ â Pôl enyəa e kwo ù lò ndûuw daŋso an Yɛ̀lusalɛ̀m.

⁵ A m bùghò a bu maʼà tsughu tsùʼu mì ghàʼ à ghee, a n zə̀ghàa è tsughu, nùghù ghàʼ â luʼū to. Ghee a dzə̀m, ghèe ghê wɛ a ghee gho, à ghii a ghee gho, ghe m bùghò tə̀ma wò ghàʼ a ŋgùŋ è dzùghù, ghǎʼ n tsughu nyaʼa tsughu fughu, gɔ̀ŋlò è tsughu.

⁶ A n tɔɔŋ zuw tsughu eghue, daŋso nì kɔ̀ʼ kəkwə̀n, ghe ŋ kuūwn nùghù ndùw ebàm alô ghee.

⁷ A m bùghò a zəghàa wô Tâe, bwìi ko bùghò tɛ̀ tsughu an Ptòlemàes, a n tɔɔŋ zuw tsughu waazə̂ ghaʼa yì fughu, gaʼ bwii tsughu ghàʼ à ghee fətsuʼ fə mɔ̀ʼ.

⁸ 33 Tsuʼ ù li vʉ̀, ghàʼ ghəla a mò bwîi dzəə̄ŋ wo ghàʼ à ghê Pôl n zə̀ghàa è tsughu, bùghò aŋ Kàesalìa, bùghò nyə̀ ndùw an ndughu alô Felêp wəla ù fə̀ lo èfɔ̀ɔŋgèle, ghùw aŋ ghì ghən sə̀ghàmbəgha ghe mò tsɔʼ kɔʼ an Yɛ̀lusalɛ̀m aleyosō wo, ghàʼ ndùw dòʼò ndùw ghàʼ à ghee.

⁹ Tûw wən ŋ ki wɛ a wən à zən gho a chìakò, mo ghe ki yo num gho, ghe kə̂aa shwaʼ u Kəzə̀ wò.

¹⁰ A m bùghò a doʼò kəŋo nduw tsùʼu n lǐ mǒ fughu, ghùwshʉ̀ghà ù lǐ n ndùw nùghù tsùghù wò an Dzùdîa ghe tɔŋlo enyəa à lǒ Àgabùs.

¹¹ A m bùghò ù bùghò kôʼ tsughu ghaʼ, ù n nì kɔ̀ʼ kwûu fə Pôl kɔ̀n tsùghù kwe e wə̄n a te àsùghò fwee e wə̄n zo, dzɛ̀ tsùghù enyəa, “Dzûu təla an Yɛ̀lusalɛ̀m lô ghùw wəla ù ki kwûu fən kɔlɔ̀ tsùghuu enyə, ghe nîi fughuu ndûw â Tòʼò tò. À dzɛ̀ Zuʼ tə Zɔlɔ to.”

¹² A m bùghò ghàʼ à ghê ghì yi zuw tsughu ghəa ghən, a m bùʼ ndùw kə̀ghu â Pôl enyəa ù ka kɔʼ dzə̀ an Yɛ̀lusalɛ̀m.

¹³ Pôl n dzɛ̀ â ghee enyəa, “Ghɛ̌ chi ghaa kwò ghɛ̀ sô bâŋsò mugho â fə̀ŋ aledì a? Ghəa à kɔlɔ̄ tsughuu a ghûw yi yo dzə̂ ghəa è li zo, mugho m boo alebùʼù kɔʼɔ̄ kpuūw daŋso an Yɛ̀lusalɛ̀m bòʼ ghəa e Mughubè ù sɛ̀, Yɛso.”

¹⁴ A m bùghò a nyɔ̂n ke wə̄n, a mo è zəghaa, dzɛ̀ tsughu ko enyəa, “Ghəa a te a doʼò ndûw aŋ ghəa Mughu ù te tsəm.”

¹⁵ A m bùghò tsuʼ n te tsəghà tsughu, aŋ kùum tsùghù fʉgha waʼa, nùghù ndùw a lùʼû kɔʼɔ wo an Yɛ̀lusalɛ̀m.

¹⁶ Tsə̀təndə̄ghā tə Yɛso tə̀ li to tə sə wo an naʼ e Kaesalìa fə̀ nduūw ko ghàʼ à ghe a dzə̀m, ghe n nì ndùw an ndughu alô Mnasòn, ghùw u Saepə̀lùs ù lì, tsə̀ndə̄ghā è wǐi, enyəa ghàʼ ndûw nyə alô wə̄n.

¹⁷ A m bùghò a bugho an Yɛ̀lusalɛ̀m, waazə̂ ghaʼa yi fughu m kpènì kɔ̀ʼ ghaʼ aleduʼnlo.

¹⁸ A m bùghò tsuʼ fə̀ li fi, ghàʼ à ghê Pôl n ndùw alendùw kôʼ Dzɛ̂ms; tsoʼ tə n lo fughu ghee a dzə̀m.

¹⁹ A m bùghò ù tɔ̄ɔŋ zuw tsughu ghee, ù n tāŋsō dzɛ̀ kɔ̀ʼ ndùw ghəa ghə̀là Zə̀ kə̀ fwâʼ tsughu â zəŋò Tòʼò tò am bàm e fwàʼ kə ghee.

²⁰ Ghəa ghe zuw tsughu ghəa a te gho, ghe m fughu ukɛɛ â Mughu ù te, dzɛ̀ â Pôl enyəa, “Ŋ wàazə̀ Pôl, kǒʼ ndə̀mà tə təkām tə ghì a Dzùdîa təla tə boo tsughuu, àsùghò aŋghəa dzaŋadzaŋ tə kɔʼn ghee alo kəlàŋ a.

²¹ Ghe ŋ ghù â ghee teso enyəa ghù zòʼn kâaŋ ghì a Dzùdîa ghə̀n à dzə̀m ghe lo am bvʉa e zə Etòʼò enyəa ghe zəghàa maʼà làŋ kə Musî, dzàa ndùw â ghee enyəa ghe ki dzə yo alesughoo twigh u wɛ a ghee wo, ghe ka tso naŋa sùghò bughōo kə enaʼ ko.

²² Ghe lo kele ko nù enyəa ghù m bùghò. A sô êzəŋ e ghəŋlo ênzə̂n êzəŋ à?

²³ À fi lo enyəa ghù kì aleghəəŋ nduw ghəa ghəla ghàʼ dzâa wo â ghù; ghî à lo fɛ a chìakò mo ghe maā kàa n zə ghèe ghê Zə̀ kò.

²⁴ Nǐi kɔʼ ghî ghə̀n, ghɛ̀ à ghee nduw sūw maʼa tsughu ghue zo, ghù tsə fughu nduw kua u ghee wo, to ghe kɔɔ̄ maʼà tsughu tuw u ghee. Ghee a dzə̀m kele tsughu enyəa ghə̀a ghəla ghe mò kə̂aa â ghee lo kə̀nughùnùghù; nyəa ghuūghùe wʉ̂a ù laam naaŋ sùghò kə̀làŋ.

²⁵ Yia a bughò Toʼò zəla e boō fughu tsughuu, a m mwàʼsò kò â ghee tɔm ndùw, tsughu tsən tsughu a te enyəa ghe ka e zəa fʉgha wəla ghe fughu nduw ŋkāa ghe sɛ̂ nduw â mùʼù mò, àsùghò kàŋ tò, asùghò nyòm təla ghe wi mo bɔe wī nû, ghe zəghàa maʼà sughò ènùŋlò.”

²⁶ Tsuʼ ù li vʉ̀, Pôl n daŋso nì kɔ̀ʼ ghî yì, ghèe ghe n ndùw sùw màʼà tsùghu ghue ghee, tsə̀ghà nyə̀ ndùw alo etsūghū alendùw ghəəŋ tsughu enyəa ghe kele tsughu tsùʼù məla ghe ki aledòʼò kəŋo ndûw aŋ ghəa ghe sûw tsughu ghee zo, sěe ghe lo bughò fughuu fughu ko an tuw u ghee a dzə̀m.

Ghe kwu Pôl

²⁷ A m bùghò tsùʼù mən sə̀ghàmbəgha mîan mɛʼn kəə̄ŋ wo, Dzûu təla tə mo lô tə Ɛshìa tò, ghəa ghe kôʼ tsughu Pôl am Ndughu è Kə̀zə̀ è ne, ghe n tsùʼ sòʼ kɔ̀ʼ aghî, ghe ŋ kwu kɔʼ wə̄n.

²⁸ Ghî a te ghə m buʼnlo mbɔŋ, dzàa tsùghù enyəa, “Wo ghî ghə Ezə̀lɛ̂ ghò, tɔ̌ɔ wò nlò! Wən lò tûw wəla ù tsʉ̀ boōn tsughu ghî ghò luʼū ten tə̀ dzə̀m enyəa ghe ka e zuuw â ghì ghò, ghe ka e naaŋ lâŋ kò, ghe ka e kɔʼso sugho luʼū kən: vʉ̀a ù mò fəghaan ndûw nî nyə wô sughò ghî a Gə̀lês ghò fɛ am bêne ko, nùʼn bǒon tsughu luʼū kə̀ baa kən!”

²⁹ Ghe mò enyə kəaa ghe màʼa fə̀ lo mo ghe maā wən enaʼ bûʼ kòʼ ghèe Tə̀lòfimùs, ghùw Ɛfɛ̄sùs, tûw wəla ghe mò moʼò enyəa Pôl maā wə̄n am be kə ndughene è Kəzə̀ nî nyə̀ wò.

³⁰ Naʼ zə n nùghù těe kɔʼ enyə alo efwēe e dzə̀m, ghî ghə̀ n nyə̀ŋ zùŋlò è wò; ghe n nì kɔ̀ʼ Pôl, sè nùghù sə̀ ndùw wən am bêne ko, daŋso dzʉ̀ʉn kɔ̀ʼ ugbâʼ.

³¹ Ghəa ghe dəmà kaŋlō alewī wə̄n, kɔmdzūghū wəla ù mò lô tuw ko an saʼ kə təsùghugòʼ n zuw làbəlà è te enyəa Yɛ̀lusalɛ̀m e dzə̀m tì alo efwēe.

³² Ù n daŋso mbā nì kɔ̀ʼ təsùghugòʼ à ghê dzə̀kɔm a ghee, nyə̀ŋ nyə̀ tsùghù ndùw a zəŋò ghee: a m bùghò ghe nughù kôʼ kɔʼ komndzūghū ghèe ghê sùghugòʼ tò, ghe m bughu naŋa tsughu alebū Pôl.

³³ Komndzūghū vʉ ŋ kuʼso kəŋo è wo, nì nùghù kɔ̀ʼ Pôl, dzɛ̀ tsùghù enyəa ghe kûu tsughu wə̄n alo tətsāʼ tə bə̀ghà. Ù m bvʉ̀ tsughu enyəa Pôl lò ndughoo, àsùghò fəgha kə̀là ù bonlō.

³⁴ Ghî à li gho an nɔ̀e kə aghî chi m buʼn dzàa kɔ̀ʼɔ alo mbɔ̀ŋ enyəa à lò kən, à li gho enyəa à lò kəchî. A m bùghò ù sə̀ yô aletɔ̀ʼɔ̀ kelê soo kə eghəa, dəm kə màʼà ŋge lo, ù n dzɛ̀ tsùghù enyəa ghe nîi ndûw â wən alo kəbɛ̄lɛ̄.

³⁵ A m bùghò ù bùghò tɛ̂ tsughu alo ŋkɔʼɔ, sùghugòʼ tə̀ m biso bòʼò kɔ̌ʼ wə̄n alebòʼò, bòʼ ndə̀m kəla nɔ̂e kə aghì chi mò ghəə̄ŋ wo ghè kò.

³⁶ Tɔŋlo enyəa nɔ̂e kə aghì kə̀ mò səŋo wo ko ebàm buʼn wò m̀bɔ̀ŋ enyəa, “Wi màʼa nlǒ wə̄n!”

Pôl bǎaŋ ghue u wə̄n an dzə̂

³⁷ A m bùghò ghe so e naŋā nyə̄ ndûw Pôl alo kəbɛ̄lɛ̄, ù m bvʉ tsughu â kɔmdzūghū vʉ enyəa, “Ǹ lo nû aledzàa wô ghù â ghəa è li zo a?” Komndzūghū vʉ mo enyəa, “Ghù kwò nû shwaʼ u Gə̀lês wò à?

³⁸ À yò ghû ghùw ù Edzìpt wəla ù mò sôʼ kɔʼ tsû wò, nì nùghù sòʼ ndùw â kam tə àghì tə chìakò aŋ gwə̄n mo ghe wii àghì à?”

³⁹ Pôl m fwə̀n dzɛ̀ â wən enyəa, “Ǹ lo ghùw Dzûu, ghe dzə an Talsùs am mbùʼ è Sìlishìa, Ŋ̀ sə an nàʼ è ne zo. Kee â ghù, M̀ buʼu kə̀ghu, na tò ŋ kə̂aa ndûw àghəa â ghì ghən.”

⁴⁰ A m bùghò Komndzūghū vʉ fughu tsughu wə̄n â bùʼ kò, Pôl n tee kɔʼ kɔʼ alo ŋkɔʼɔ, fòʼn ndùw ghee â ghu gho enyəa ghe doʼò tsughu mɔŋ. A m bùghò ghe ndôʼ də̂m sugho, ghî à nughù zuw doʼò tsughu mɔ̄ŋ, Pôl ŋ kàʼ ndùw ghee â ghəa à kəaa gho an shwaʼ u Hebə̀lù, dzɛ̀ â ghee enyəa.