Kə̀fwàʼ 20 - To kə Kəzə̀ kə̀ Fughu ko

Pôl kòom ndùw kpeʼe ebàm an Màsɛ̀donìa àsùghò an Gəlês

¹ Aŋghəa ndə̀m kən ke tsughu sɛ tsughu, Pôl n tɔŋɔ zùuŋ tsùghu tsə̀təndə̄ghā tə Kə̀lestò, dzə̀n ndùw fə̀ŋ tə ghee, daŋso sə̀ kwu ndùw dzì è Màsɛ̀donìa.

² Pôl n bwìi mɛ̀ʼɛ̀ tsùghù dəŋò kə te ko kə dzə̀m mo ù dzə̀là ndùw kô fə̀ŋ tə ghì an dzə̂; daŋso bùghò nùghù nyə̀ ndùw aŋ Gə̀lês,

³ ndùw dòʼò fughu tə ndzɔŋɔ tə təgha. Ghəa ù ndzùuŋ ghue wo alendùw an Silìa, ù n zuw tsughu enyəa Dzûu tə̀ li tə bee alewī wə̄n. Ù n dzɛ̀ enyəa e kôom nîi ndû dzì è Màsɛ̀donìa.

⁴ Ghî ghə̀là ghèe ghee mò bwîi nduw a dzə̀m mò lo Sòpatà, wɛ̀ ù Pilhùs, ghùw ù Bɛ̀lêa àsùghò Àlestālkùs ghèe Sɛ̀kundùs, ghî a Tɛ̀sàlonikà. Gayòs, ghùw Dəlbì, n lo àsùghò Timotì; Tykə̄kùs n lo àsùghò Tə̀lòfimùs, ghî a Ɛshìa.

⁵ Ghî ghən n nùghù ndùw â sə ko, ndùw lə̀ma ndùw ghàʼ an naʼ e Tə̀lôas.

⁶ A m bùghò a zə kɔʼ Zə kə bɛ kəla mbvùŋ buw a te, ghàʼ n zə̀ghàa tsùghu Felèpîi, bwìi tsùghù ntsuʼu n tɛ̀ alo kəkwə̀n, ndùw kòʼ ndùw ghee an Tə̀lôas, an dòʼò fughu ewən.

Ghe zôm nùghù kɔ̀ʼ Yùtikùs alo evʉ̄ an Tə̀lôas

⁷ An tsuʼ u sûesʉ wo alo ewə̄n, ghàʼ n tsùghù dòʼò gùŋsò tsùghù aleboʼn zəā kɔʼ Kùun tə Mughu ù te. Pôl ŋ kaʼ tsughu ghəa à kəaa gho, kə̀aa àghəa â ghì ghò ènyə, kə̀aa ènyə, ndùw tɛ̀ ndùw â fə̀ŋ è utsùʼ, ù màʼà ki alezə̀ghàa səa tsughu an tsuʼ ù li vʉ̀.

⁸ À n lo mò ndə̀m è tə̀lâm bàaŋ kǎaŋ tsə̀ghà fughu an dzughu e ndughu zə̀a ghàʼ dzeŋe dōʼ a te fùghù edzuŋ.

⁹ Wɛ̂ɛnùu ù lì n doʼ a fughu an tɔŋ e ndughu ghe fə̀ tɔŋlo enyəa à lò Yutikùs, a m bùghò Pôl so tsôo kûu ndûuŋ ndûw ko aŋ ghə̀a à kəaa gho, wɛ vʉ ŋ kàʼ ndùw à aledzwoʼo bwii. Wɛ vʉ n dzoʼ bwii ko, bùghò kàʼ ndùw tə̀mgbii alefə̀ŋ. Ghəa mgbii tə tsəghàsə tsughu ghî fi fo, fə n nùghù tə̀ghaa kɔʼ fughu an tɔŋ è ndughu, lɔʼso bvʉ̀ mìasò sə̀ tsùghù wò à ghueetsə̄, mò à lò təndughu tə təgha alekɔʼɔ̄ ndûw; ghe m bùghò bɔŋ kɔʼ ko ègwən.

¹⁰ Pôl n nùghù sə̀ tsùghù è nduw, tsughu ghaa tsughu a tsəlà wə̄n, nì nughù kɔʼ wə̄n, bala kwukele nyə̀ ndùw wə̄n, dzɛ̀ tsùghù enyəa, “Kà nlò fə̂ŋ tə̀ bâŋsò, ù kaam kpuw dzə̀!”

¹¹ A m bùghò ù nùghù kɔʼ nduw ebàm edzūŋ, ghe zə kɔʼ kûun tə Mughu ù te to, Pôl ŋ kə̀aa àghəa ghèe ghee enyə, kə̀aa ènyə, tsuʼ wə n zùw sə̀ è wo, ù n daŋso zə̀ghàa è tsughu, è nughu.

¹² Ghe n nì ndùw wɛ̂ɛnùu vʉ an ndughu mò ù lò â tuw ko, fə̂ŋ tə̀ n ndòʼ kòom nyə̀ wò sùghò ghee.

Pôl zə̀ghà tsùghu Tə̀lôas nùughù ndùw an Mìletùs

¹³ Ghàʼ n daŋso ndùw nyə kɔʼ alo kəkwə̀n, bàŋ dàŋsə̀ ndùw an naʼ e Asòs; alenìi daŋà tsəghà Pôl a fughu, ù màʼa fə̀ naʼà naŋā tsughu êzə̀, kuuwn nùghù wò alo aghùw.

¹⁴ A m bùghò ù bùghò kwuūn wô ghaʼ an Asòs, ghàʼ à ghee n dzeŋe nyə̄ kɔʼ alo kəkwə̀n, nùghù ndùw an Mìtə̀lenì.

¹⁵ A m bùghò tsuʼ u tsʉtsʉ vʉ̀, ghàʼ n zə̀ghàa tsùghu fughu, ndùw sə̀ ndùw am bà kə̀ li ko mo a lɛɛn dàŋà ndùw naʼ e Kios. A m bùghò tsʉtsʉ ù lǐ vʉ̀, ghàʼ n zə̀ghàa tsùghu fughu ndùw sə̀ ndùw an Samòs; kòom zə̀ghàa tsùghù Samòs tsʉtsʉ vʉ̀, daŋso bùghò sə̀ wò an naʼ e Mìlɛtùs.

¹⁶ À mò êzə lo Pôl màʼà ləghaa aletsə̀ghàa taʼà Ɛfɛ̄sùs enyəa e lô boōn nəgha zo am mbùʼ è Ɛshìa, aleghəə̄ŋ tsughu enyəa mo e bo ko ènzə̂n e lo alenyə an Yɛ̀lusalɛ̀m tsuʼu Pɛntɛ̄kɔ̀st.

Pôl kə̀a gùŋsò shwaʼ u wə̄n â tsoʼ tə ndughùkə̀zə̀ tə Efɛsùs

¹⁷ A m bùghò Pôl lò am Mìlɛtùs, ù n tum tɔŋɔ tsughu tsōʼ tə dzeŋe kə ghì a Kəzə̀ tə Ɛfɛ̄sùs enyəa ghe bughò kôʼ ghee.

¹⁸ A m bùghò ghe bughò kôʼ wo wə̄n, ù n dzɛ̀ â ghee enyəa, “Ghɛ̀ a dzə̀m kwò nû mughùu zaŋa zo aŋ ghəa sɛ̀ mughùu kɔʼ wo alenìi nughù tsughu tsuʼ fəla mugho fə̀ tiso tsughu ghuw ko fɛ am mbùʼ è Ɛshìa.

¹⁹ Ghɛ̌ yia mgbaŋ kwo ghəa ghəla mùgho mò tɔ̂ʼ maʼà tsughu ghue wo a te alefwàʼ â Mughùbè ù sɛ̀, alo efālā àsùghò sə̀ mò alo kətūw aŋ ghəa ghəla Dzûu tə̀ mò geē naāŋ kaŋlō an tuw kaŋā.

²⁰ Ghɛ̀ kwo nû enyəa Ŋ̀ ka mō sə̂əm kòʼ tsəghà aletsʉ̀ ghɛ̀ ŋkāa aleghə̂əŋ ghəa zə̄lā e ki aleyòso ghɛ̀; ghəa mùgho mò zoʼn tsəghà ghɛ dzîi dziī àsùghò ndùghù tə̀ndughu,

²¹ geen ndùw ghì a Dzûu àsùghò Tòʼò zò enyəa ghe a dzə̀m kuūwn kɔʼ emwam, ghe boo ndûw â Zə̀ kò àsùghò â Mughùbè ù sɛ̀, Yɛ̀so Kə̀lestò.

²² Ǹ nyəa ndùw èzəŋ an Yɛ̀lusalɛ̀m aŋghəa Zuʼ tə̀ Zɔlɔ tə ləghaa; Ŋ̀ kwo yo fəgha kela kə lo səā fughu a zəŋò mùghò.

²³ Fəgha kə̀là Ŋ̀ kwo ghè kò, à lò fəgha kə̀là Zuʼ tə̀ Zɔlɔ tə te dzâa wo â mùghò an nàʼà tə̀n tə̀ dzə̀m Ǹ nduūw enyəa ghe lo dzə̀là nù mugho an ndùghètsaʼ àsùghò enyəa tsû ù lo kwuu nù mugho.

²⁴ Ŋ̀ kâ bùʼ nì tuw kaŋa tò kəfəgha abugho M̀ kpaʼ lô dzə̂ alemìasò kɔʼ ŋgəa zəla Ŋ̀ ŋgəāa kaŋlō àsùghò fwàʼ kə̀là mùghò fə̀ nî kɔʼ aŋ ghùu Mughu ù te Yɛso Kə̀lestò, alezùghòo làbəlà è dzùŋ kùu ndùw dzɔ̂ e Kəzə̀.

²⁵ Êzəŋ, aŋ ghɛ ghə̀là Ǹ lo mò mùgho n zùghòo kǎaŋ wò fɔ̂e ù Kəzə̀ wò am bvʉa zɛʼɛ̄, Ŋ̀ kwo nû enyəa ghùw wɛʼɛ u mɔ̀ʼ lo kòom kòʼ kòʼ yò kwaʼ u sʉ waŋā wo.

²⁶ M̀ fɛ kùu dzàa wò nù â ghɛ̀ nɛ an tsuʼ fən, enyəa Ŋ̀ ki yo ghu ko am vʉ e ghûw wɛʼɛ ù lì,

²⁷ nu Ŋ̀ ka mō shwaʼ u Kəzə̀ wò â ghɛ̀ nân dzə̀.

²⁸ Nǐ nlò ghôom zò aŋ ghùe zɛʼɛ̄ àsùghò a zəŋò ghì ghəla Zuʼ tə̀ Zɔlɔ tə fughu naŋā enyəa ghɛ̀ è lɛnlo. Ghɛ̀ è lɛɛn sugho â dzeŋe kə ghì a Kəzə̀ zəla ù fə̀ zue sə wo aŋ kàŋ tə wɛ̀ ù wə̄n.

²⁹ Ŋ̀ kwo nû enyəa abugho Ǹ lo buw am bvʉa zɛʼɛ̄, ghî à li a lo ndùw bùghòo nù tò ubʉgha, ghe bughò saʼà maʼà tsughu ghɛ.

³⁰ Ghî à lī lo buʼù səā kɔʼɔ̄ sugho am bvʉa zɛʼɛ̄ ghe e kaʼn wo ghā gho, alekwuū ŋgwûu tsughu tɔ u ghì a Kəzə̀ enyəa ghe nughù wo a bàâ ghee.

³¹ Ghɛ̀ ki aletisō kɔʼ kətuw, ghɛ̀ è moʼn tsughuu tsʉ̂ zəla mùgho mò fughuu tsəgha â ghɛ̀ tsuʼu mən ndzə̀m alo tənùu tə təgha.

³² M̀ fɛ êzəŋ fughuu nyəa tsughuu ghɛ̀ aŋ ghu kə Kəzə̀, àsùghò an shwaʼ u wən ù dzûŋ wò; wəla kə lo alebɔɔ̄ tīsō ghɛ̀, wəla ghəə̄ŋ sughò ghɛ̀ zə fʉgha wəla u lɛɛ̄n ghî ghəla ghe lo mo ghe ŋ ghee sûw màʼà.

³³ Ŋ̀ kaām ndzʉ tə ghûw tə̀ mbaaŋ nì kòʼ, ŋkāa kua u ghûw.

³⁴ Ghuūghùe zɛʼɛ̄ e kwo nû enyəa mùgho mò fwaʼ tsughu aŋ kwe zaŋā zən alekele fʉgha wəla mùgho mò ləghaa, àsùghò u ghì ghə̀là ghàʼ à ghee mò lò a dzə̀m.

³⁵ Aŋ ghəa ghən a dzə̀m, mùghò mò â ghɛ̀ fɛ dē tsughu enyəa abugho ghù fwàʼà tsughuu alo esə̀ŋ, ghù kì aleyosō ndûw ghî à lɛɛ gho, mòʼn tsùghûu shwaʼ u Mughu ̀u te Yɛso, ghəa ù fə̀ dzɛ̂ tsughu enyəa, ‘Bughuso e lo aŋ ghə̀a à fughuu nduw a ghûw ghə̀n tsə̀ghàsə ghəa à mgbɛɛ nɛlɛ a kəghū ghən.’ ”

³⁶ A m bùghòo ù kə̀a tsughu êzə̀, ù n tsughu nyaʼa è tsughu, ghèe ghee ŋ gɔ̀ŋlò è tsughu.

³⁷ Ghee a dzə̀m m gbən tsughu edî, dìi, mǎaŋ kaaŋ tsə̀ghà Pôl

³⁸ Ghe mò fəghaan dìi sùghò bòʼ, ghəa yia Pôl mò dzɛ̂ tsughu enyəa ghe lô kwàʼ u usʉ̄ u ghee kôom kòʼ kòʼ yòʼ. Ghe n daŋso ndùw tə̀ma nyə kɔʼ wə̄n alo kəkwə̀n.