Kə̀fwàʼ 2 - To kə Kəzə̀ kə̀ Fughu ko

Tsuʼ fəla Zuʼ tə̀ Zɔlɔ tə mò bugho a te

¹ A m bùghò tsuʼ u Pɛntɛ̄kɔ̀st ù kpe tsughu, tsə̀təndə̄ghā tə n dzeŋe dòʼ alo kəlùʼù kə mɔ̀ʼ ghee a dzə̀m.

² Ghe mo e zuw dəm kə̀ li kə nughù kwûu sə tsughu wô alo kəwālā to zəŋ lô tsəghāa, kə n nyə̀ ŋgwùu tsùghu ndughu zəa ghe mò doʼ a te e dzə̀m.

³ Saʼà tə li tə m gbə̀n sə kɔʼ fughu am bvʉ e ghee tò saʼà tə uwə̀n, sə̀ sɛ̀ɛ è tsughu, nyàʼa dòʼò kǎaŋ ndùw an tuw u ghee yì à dzə̀m.

⁴ Zuʼ tə̀ Zɔlɔ tə̀ m bùghò avʉ̀a ghee yì à dzə̀m, ghəŋlo è tsughu ghe ŋ kàʼ ndùw alesaʼā kâaŋ sàʼà tə nàʼà tə̀ nughù tò.

⁵ À fə̀ an nə̀gha zən lǒ mò Tə̀dzûu, ghî ghəla ghe gaʼ tsughu fə̀ŋ aŋ ghəa e Kəzə, mughu an Yɛ̀lusalɛ̀m, ghe sə kaaŋ wo an nàʼà mə̀n n dzə̀m fɛ am mbī.

⁶ Ghî ghə̀n à dzə̀m n zuw tsughu dəm kən, nyə̀ŋ zùŋlò è wo, bùghò těe enyə dzəəm, bòʼ chìa fə̀ zuuwkɛlɛ nduw shwaʼ u enaʼ u wə̄n an dzughu a ghee ghəla ghe mò boō fughu tsughu â Yɛso.

⁷ Ghəa zə n tsə̀ghàsə ghee, ghe mo an tùw kə̀ kpuuw ko enyəa, “Ghən mgbàŋ yò ghî a Galèlîi a dzə̀m ghe kə̂aa ghəa gho a?

⁸ À sə̀ lǒ kwò ghe kə̂aa kaāŋ ghəa gho an sàʼà tə nàʼà tə sɛ̌ a?

⁹ Ghàʼ sə kaaŋ wò an nàʼà n nùghù mò, am Patìa, am Mɛdɛ̀s wò, an Elamàet àsùghò ghì ghəla ghe mughu am Mɛ̀sòpòtɛmìa, an Dzùdîa àsùghò Kàpàdoshìa, Pontùs, àsùghò an Ɛshìa,

¹⁰ am Flaedzìa àsùghò am Pàmfilìa, an Edzìpt àsùghò an də̀ŋò kə Lebìa kəla kə lo a tsəlà Sìlêen, àsùghò ghì ghəla ghe bwîin nyə wo, ghe nughù wo an Lumà.

¹¹ mò ghî à li yia a lô Dzûu àsùghò Tòʼò zò mo ghəəŋ ndùw ghəa a zə̀ kə Dzùdîa, ghàʼ à li yia a sə wo an Kə̀lêt àsùghò ghì Alàb ghò — ghe yia ghe kə̂aa ghəa gho, ghàʼ a dzə̀m yia a zuuw nduw ghee ghe kə̂aa wô ghəa gho an sàʼà tə tənàʼà taʼa aŋghəa ghe dzâa kɔ tə aghəa tə̀ səŋò təla Zə̀ kə̀ lo mo kə m fwàʼ.”

¹² Dzughu zə n zuu ghee a dzə̀m, tuw kə m kpuuw sùghò ghee, ghe m bvʉa tsughuu ko alo eghùe enyəa, “Zən lò ghə̀a è kwò zò enyəa à?”

¹³ À li ghə ŋ kuuwn lò ko təma ko nduw enyəa, “Ghî ghən kala nù.”

Shwaʼ u Pità

¹⁴ Pità fi daŋso nyɛʼɛ nùghù těe tsə̀ghàsə̀ wò nù ghèe ghê tum tə̀ li tì èghəm à ghè zò e mɔ̀ʼ, dzɛ̀ kɔ̀ʼ â nɔ̀e kə aghì chi an dzə̂ è tughu enyəa, “Dzûu tò, à ghɛ̀ à li ghə̀n à dzə̀m ghɛ̀ mughù fɛ an Yɛ̀lusalɛ̀m, tsʉ kɔʼ nlò tuūŋ wɛʼɛ wo, ghɛ̀ zəən tsughu shwaʼ waŋa wo.

¹⁵ Ǹ so Ŋ̀ kûu dzâa wô â ghɛ̀ enyəa ghî ghən kala dzə̀ yò aŋghəa ghɛ̀ moʼō.

¹⁶ Ghən fɛ laam lò ghəa ghəla ghùwshʉ̀ghà Dzûɛl fə̀ dzɛ̂ naŋā enyəa,

¹⁷ ‘Zə̀ kə̀ dzɛ̂ enyəa, “Kən lò fəgha kəla Ǹ lo fwaʼa an tsuʼ məla ŋ gùnsò tsughu; Ǹ lo fughuu tsughûu ghì ghə̀n à dzə̀m â shʉ̀ghà waŋa wo. Wɛ ghɛʼɛ à nûu ghò àsùghò a zən gho e ke naʼn wo fəgha kə̀là Zə̀ kə̀ dzɛ â ghee. Waafəghàŋ ghə̀ e ke koʼo sə gho, dzǒo mə̀ e ke tsəən noo mò məla n dwə̀n tsughu.

¹⁸ A kê bughò an tsuʼu n te mò sughò, Ŋ̀ kê buʼù fughuu tsughuu sughò kɔ̀ɔ maŋa n nùu mò àsùghò n zə̌n mò â Zuʼ taŋa to; ghe e ke naʼn nduw shwaʼ waŋa wo.

¹⁹ Ŋ̀ kê dêe tsughu nsəghàa alo kəwālā, Ǹ dêe tsughuu sughò tə̀tsə̌a aŋ ghueekətsə̄. Ghî à kê kôʼ nuŋ alo enaʼ, naʼ zə e ke pfʉa, nyoʼ u kê dzʉ̂a tsughu təluʼū;

²⁰ Ləm kə kê nughù bvʉ̂a tsughu enyə alo enaʼ, tsə̀ è ke koōm tughuu yo, ndzɔŋ kê nughù baŋà doʼò tsughu enyə tò təkâŋ Ghəa ghən kê nìi dzə̀ kə̀bəla sěe tsuʼu Mughu ù te u kê bughōo, tsuʼ u wən ù nêene wo.

²¹ Zəa e ke lo sugho enyəa, mò à kè tɔ̀ŋɔ tsughu ko ndùghò zən e Mughu ù te zo, ù n zə kətuw.”

²² Pità n daŋso dzɛ̀ tsùghù enyəa, “Wo ghî ghə Ezə̀lɛ̂ ghò, zəən wò nlò shwaʼ wə̄n wo. Yɛso, ghùw u Nazalɛ̀t wən fə̀ lo ghùw wəla Zə̀ kə fə̀ boō tsughu, dè sə kɔʼ am bvʉ̄a zɛʼɛ̄, ghəəŋ tsughu enyəa ù è deē sə̀ghàa mò aŋghəa ghuūghùe zɛʼɛ̄ e mgbaŋ kwo sugho.

²³ Ghe ŋ kwù fùghù wò Yɛso wən â ghɛ̀ an dziī zəla Zə̀ kə fə̀ fôʼ naŋā, ghɛ̌ yia mò nî fughu nduw wə̄n aŋ ghu kə ghì à biigh ko, ghe n nì tə̀ghàa wì è kɔʼ.

²⁴ Zə̀ kə̀ ŋ kwuun zè zə̀ghàa tsùghu wə̄n am fàŋà kə evʉ̄, nì nùghù kɔ̌ʼ wə̄n alo evʉ̄, tɔŋlo enyəa vʉ e kaā kɔʼ kpè dzə̀ alenì wə̄n.

²⁵ Dɛvìd mafə̄ kə̂aa sùghò ghəa gho kùu ndùw wə̄n enyəa, ‘Mùgho fə̀ koʼ ziī nduw Mughu ù te mo ù lò tən tsəghà ko an sə kaŋā alo tənə̀gha tə dzə̀m, nu ù tì aŋ kwe waŋā ù təma wo enyəa fəgha kə lô fəmso mugho.

²⁶ Zən lò e ghee fə̀ŋ zaŋa zɔlɔ̄, yìa M̀ fughuu wə̄n â kɔʼso mò an dzə̂ zaŋā; yia m fəghaan mughù sugho, bɔɔm chìi ndùw ko tùʼ am fəgha kəla Zə̀ kə̀ lo ghəŋlo â mùghò:

²⁷ Tɔŋlo enyəa ghù kè nǎaŋ tàʼn yò ghue waŋa wo an naʼ zə evʉ̄, ghù kè zə̀ghàan màʼn sùghò yò enyəa Wɛ wʉ̂a ù Dzùŋ fìaa buŋù ndûw.

²⁸ Ghù vʉ̀a ghù dè mugho â dzì zəla Ŋ̀ ki alekele èmùghùu a te; Ghù lo ghəəŋ tsughuu nù mùghò è ŋgee duʼnlo aŋghəa ghù lǒ ghàʼ à ghù.’

²⁹ Waazə̂ ghaŋa ghò, Ǹ so Ǹ ndzəmà kə̂aa wô àghəa â ghɛ̀ kùu ndùw tsele ù ghê tsele ù sɛ̀, Dɛvìd, enyəa ù fə̀ kpuw tsughu nû, ghe n tsəla tsughu wə̄n, shîaa e wə̄n zəa e naām lo fɛ sɛ̀ bùghò sə̀ nɛ̄.

³⁰ Ǹ so Ǹ dzâa tsughu enyəa ghəa Dɛvìd wən màʼa fə̀ lo mò ù lò ghûwshʉ̀ghà ù Kə̀zə̀, vʉ̀a ù mò kwo sughò enyəa Zə̀ kə̀ mafə to naŋa enyəa kə lo tsuʼu naaŋ ù Dɛvìd an ndàŋ è kədə̀ŋ tò aŋghəa Dɛvìd fə̀ lô sugho də̀ŋ kò,

³¹ Dɛvìd ŋ kòʼ zìi ndùw ghəa yì gho â sə ko, kə̀aa wò ghəa Bəghambī lo kɔʼɔ̄ səā a te alo evʉ̄ aŋghəa ù fə̀ dzɛ̂ tsughu enyəa: ‘Ghe ka mo wə̄n naŋatàʼà dzə̀ â naʼ zə evʉ̄ zo, gwən e wə̄n zə ŋ kè fîaa buŋù sughò.’

³² Zə̀ kə̀ maā Yɛso wən zôm nì nùghù kɔ̀ʼ, ghàʼ ghən à dzə̀m fɛ ti ko aŋ ghəa e te zo.

³³ Zə̀ kə̀ ŋ wən kɔʼso naŋa, vʉ̀a ù lò êzəŋ aŋ kwe u Kəzə̀ ù təma wo, vʉ̀a ù mò nî kɔʼ Zùʼ tə̀ Zɔlɔ təla Zə̀ kə fə̀ to naŋā aŋ ghùu Tsele ù te. Fəgha kə̀là ghɛ̀ koʼō ezə̄ŋ à kə̀là ghɛ̀ zuūw, à kwə̀n fughu tsughu wə̄n â ghàʼ.

³⁴ Dɛvìd kafə̄ kuūwn kɔ̀ʼ dzə̀ alo kəwālā, ghuūghùe u wə̄n wə ŋ kuuwn dzɛ̀ tsughu ko enyəa, ‘Mughu ù te Kə̀zə̀ fə̀ dzɛ â Mughubè waŋā enyəa, Dòʼo tsughu aŋ kwe waŋā ù təma wo,

³⁵ ghù ləma tsughu Ŋ̀ ghəə̄ŋ tsughu ghîikətuw ghə̂a à doʼò tsughu fəgha kə̀a kə̀ gaʼŋ kə aghùw kò.’

³⁶ À fi lo enyəa ghɛ̀ ghî ghə Ezə̀lɛ̂ kele tsughu enyəa Yɛso wəla ghɛ̀ mò nî təghāa, Zə̀ kə̀ ŋ wən naŋa am Mughu àsùghò aŋ Kə̀lestò.”

³⁷ A m bùghò ghe zuw tsughu ghəa yì, fə̂ŋ tə̀ m bàa tsùghu ghee ēnyə̄, ghe m bvʉ â Pità ghèe ghê tum tə̀ li ti enyəa, “Waazə̂ ghò, ghàʼ êzəŋ e dzə̂ ènzə̂n?”

³⁸ Pità n dzɛ̀ â ghee enyəa, “Ti màʼa nlò bo zo, ghɛ̀ ni kɔʼ mùghù ŋ Kə̀zə̀ mò an zən e Yɛso Kə̀lestò, to ghe ghuūwmāʼà bòo tɛʼɛ; ghɛ̀ lo bɔŋ kele sugho Zùʼ tə̀ Zɔlɔ to.

³⁹ To kən lò â ghɛ̀ à ghê wɛ ghɛʼɛ̄ gho, àsùghò â ghì ghəla ghe lɔʼsō mughùu nduw, mò à lò ghî ghə̀n à dzə̀m Mughu ù te, Zə̀ kə sɛ̀ lǒ mò ù ŋ ghee tɔŋɔ.”

⁴⁰ Pità ŋ ŋge buʼ tsughu kəghu â ghee enyə, kə̀aa kpèʼe sùghò ndə̀mà tə ushwaʼ tə̀ li to, dzàa ndùw â ghee enyəa, “Baaŋ sə nlò ghue zɛʼɛ zo aŋ ghùu bəən tə aghì tə nɛ ten.”

⁴¹ Ghî ghə̀ n zuw shwaʼ u Pità vʉ̀ boo fùghù è nduw, ù m fughu tsughu ghe â mùghù ŋ Kə̀zə̀ mò; kam tə aghì tə̀ m baʼso wò am fɔe kə ghee tə təgha an tsuʼ fə̀ efì.

⁴² Ghe n tēe ten tsughu ko alezuuw tsʉ̂ è tətum zə̀ àsùghò aŋ ghəa a ghee à ghəəŋ dzəəŋ gho, zəa dzəŋlo, gɔ̀ɔŋ dzə̌əŋ sùghò.

Mughùu e ghì ghəla ghe boō fughu

⁴³ Tum tə te tə n dè sə̀sə tsughu nsəghàa ènyə, ghî ghə̀n à dzə̀m mo ètsəŋ.

⁴⁴ Ghî ghəla ghe mò boō tsughu n dòʼò kɔʼ ko alo fətùʼù, dzeŋe têen dzə̂əŋ fʉgha wən ù dzə̀m ghe ki.

⁴⁵ Ghe n nì fèe tsùghù fʉgha u ghee, dzùghùu fughu kɔʼ kua u te wo â ghì ghə̀n ghe mò ki yô fəgha ko.

⁴⁶ Ghe n dzeŋe ndùw zěe tsə̀ghà ko an ndughu è Kə̀zə̀ e nē tsuʼ ndzə̀mdzə̀m, bwìi zə̌a kaaŋ ndùw ndughu tə̀ ndughu, ghe n zə̂aa fʉgha u ghee tsoʼnlo etsoʼnlo am fə̂ŋ e mɔ̀ʼ.

⁴⁷ Ghe ŋ kɔʼso Kə̀zə̀, ghî ghə̀n à dzə̀m n ləghaa ghee. Mughubè ù te m bəghaasəa tsughuu àghì tsuʼu n tsùʼu, baʼso wò aŋ kɔ̀n kə ghee.