Kə̀fwàʼ 19 - To kə Kəzə̀ kə̀ Fughu ko

Pôl kə̀a shwaʼ u Kəzə̀ an Ɛfɛ̄sùs

¹ Ghəa Apolòs lò aŋ Kɔlèent, Pôl n tsə̀gha kɔʼ ndùw naʼ ènaʼ ndùw nyə̀ ndùw an naʼ zə Ɛfɛsus. Ù n ndùw kòʼ ndùw tsə̀təndə̄ghā tə Yɛso tə̀ li to fughu.

² Ù m bvʉ â ghee enyəa, “Zuʼ tə̀ Zɔlɔ tə mafə nyə a zəŋò ghɛ̀ aŋghəa ghɛ̀ mò boō tsughuu a?” Ghe mo enyəa, “Ɛ̂ŋgaŋ dzə̂, ghàʼ kaam bûʼ zùw kòʼ enyəa fəgha kə̀ li lo nû tò Zuʼ tə̀ Zɔlɔ to.”

³ Ù n daŋso bvʉ â ghe, “À kǔuwn lǒ ŋgòʼ è mùghù ŋ Kə̀zə̀ ŋ ghɛ̀ mò ghe mò fughu â ghɛ̀ a?” Ghe mo enyəa, “À mò lo mùghù ŋ Kə̀zə̀ kùu ndùw ghəa ghə̀là Dzɔ̌n fə̀ zoʼnlō.”

⁴ Pôl n dzɛ̀ â ghee enyəa, “Dzɔ̌n fə̀ fughuu mùghù ŋ Kə̀zə̀ â ghì ghəla ghe lo mo ghe ti kuwnlo fə̂ŋ tə ghee tə̀ biigh to, dzàa ndùw â ghî ghò enyəa ghe boō fughu tsughu â ghûw wəla ù mò ki alebùghò a bǎa wə̄n, tɔɔŋ Yɛso.”

⁵ A m bùghò ghe zuw tsughu shwaʼ wə̄n wo, ghe m boo è tsughu, ghe fughu tsughu ghee â mùghù ŋ Kə̀zə̀ mò an zən e Mughù u te Yɛso.

⁶ A m bùghò Pôl daŋso gaʼ tsughu ghu a wə̄n gho an tuw u ghee, Zuʼ tə̀ Zɔlɔ tə n daŋso nyə tsughu a zəŋò ghee; ghe ŋ kàʼ ndùw alesāʼ saʼà tə nàʼà tə̀ nughù tò, kə̀aa ndùw shwaʼ u Kəzə̀.

⁷ Ghe fə̌ fughu dzeŋe lo tǒ aghî èghəm à ghè ghò a bə̀ghà.

⁸ Pôl n nì kɔ̀ʼ tədzɔŋɔ tə təgha mò ù mgbɛ̌ɛ ndùw nyəa dòo kə̀aa ko aghəa ghèe ghee an ndughenē, pfʉa tsə̀ghà èdzughu fughu ghèe ghee, mgbɛɛ ko aŋ ghəa e fɔ̀e ù Kəzə̀ an ndughune.

⁹ A m bùghò ghee à li a tughūu â tuw ko, tuu alebōo, ndzɛlɛ kə̀aa sùghò shwaʼ ù biigh wo kùu ndùw Dzì zəla Mughu ù te ləghaa, Pôl n zə̀ghàa tàʼà tsùghu ghee, nì nùghù ndùw tsə̀təndə̄ghā tì, ghèe ghee ndûu kə̀aa zêe àghəa an sàŋkpàa kə Taelānùs.

¹⁰ Ghəa ghən n nì kə̀bala alo tənùu tə bə̀ghà, ghî ghə̀n à dzə̀m ghe mughu an Ɛshìa, Tə̀dzûu ghèe ghê ghì Gə̀lês ghò, ghe n zuw tsughu shwaʼ u Mughu ù te enyə.

Wɛ a Sheva à ghəŋlo enyəa ghe shʉ̂aan sə̌a zʉ̀ ù biigh wo

¹¹ Zə̀ kə̀ m fughu tsughu Pôl â daʼa ko, ù n dêe ndùw nsə̀ghàa mo ghe kaān kôʼ kòʼ.

¹² Ghî ghə̀ nîi kɔ̀ʼɔ bàa mə̀ ndzʉ məla Pôl mò zêe sʉ u wə̄n wo a te, àsùghò mwaʼnlo u kəfwàʼ u wən ndùw zìi ndùw a zəŋò ghì à dzaŋā gho, dzaŋà tə̀ n zəghàan ghee, zʉ̀ ù biigh wə n sə̄a nùghùnlò a zəŋò ghee.

¹³ Dzûu tə̀ li to ghe mò dzûu sə̌a kaaŋ wò zʉ̀ ù biigh wo a zəŋò ghì ghò, ghe n nùghù kaʼ tsughu aletɔɔŋ kaaŋ zən e Mughu ù te Yɛso an tuw u ghì ghəla ghe ki zʉ̀ ù biigh wo, ghe n dzâa tsùghuu enyəa, “M̀ dzɛ̂ enyəa ghɛ̀ sə nughu an zən e Mughu ù te Yɛso wəla Pôl zɔ̀ŋɔ̀ kaŋlō.”

¹⁴ Ghî à li ghəla ghe mò ghəəŋ sughò ghəa ghən fə̀ lo wɛ a Shevà à nûu ghò sə̀ghàmbəgha, Sheva wəla ù mò lo Tuw kə Fɔ̀e kə Tə̀dzûu kò.

¹⁵ Tsuʼ ù li wo ghe ghəəŋ kaaŋ wô sugho ghəa ghən, zə̀a fə̀ biigh fə̀ te fə m fwə̀n bɛ̀lɛ̀ wò ghee enyəa, “Ŋ̀ kwo nû Yɛso, yìa ŋ kwo sughò Pôl; ghɛ̀ kuuwn lò ghê ndùghò?”

¹⁶ Ghùw wəla zə̀a fə̀ biigh fə te fə̀ mò lo a zəŋò wən n nùghù nùghù ndùw a zəŋò ghee, bu tsughu ghee, bàan màʼà tə̀ndzʉ a zəŋò ghee, tùghù tsə̀ghà tsùghù ghee, ghe n tiin sə fughu an ndughu mo ghe lo ko fəŋ a fəŋ, à ghue è zum zo.

¹⁷ Tə̀dzûu àsùghò Tòʼò zən è dzə̀m ghe mò mughu an Ɛfɛ̄sùs n zuw ghəa ghən, fə̂ŋ tə̀ n sə tsughu ghee a dzə̀m ènyə: ghe daŋso kaʼ ndùw alefughu ŋkɔʼso â Mughu ù te Yɛso.

¹⁸ Ndə̀m è àghì aŋ ghì ghəla ghe mò boō fughu tsughu m bùghò zɛ̀ vùŋ u ghee dzàa fùghuu wò ghəa ghəla ghe mò lo mo ghe maā ghəŋlo.

¹⁹ Ghî à li gho sughò aŋ ghi ghəla ghe mò ghəə̄ŋ ghəa à fəən gho, ghe ŋ kuum wò mwàʼsò ù ghəa a ghee a te gho bùghò kpàa kɔ̀ʼ an sə kə ghi ghə̀n à dzə̀m; ghe n taŋ tsughu kɔ̂n kə mwàʼsò kə te ko, kə m fughu kɔʼ kua ù səŋò wò.

²⁰ Êzə ko, êzə ko, shwaʼ u Mughu ù te wə n noom kɔʼɔ mìan ndùw; kele ndùw àghaŋ am bvʉa e aghì.

Ndə̀m kəla kə fə̀ sə an Ɛfɛ̄sùs

²¹ Aŋghəa ghəa ghən a dzə̀m ndòʼ tsəghà tsughu, Pôl n tsə̀m tsùghù am fə̂ŋ è wə̄n enyəa e tsəghàa sə̌a ndùw dzì am Masɛ̀donìa àsùghò an Àkaeyà, e ndûw an Yɛ̀lusalɛ̀m, ù mo enyəa, “Abugho Ǹ lo ndûw tɛ̂ tsughu fughu Ǹ lo ki sugho alekòʼ Lumà.”

²² Ù n daŋso nì kɔ̀ʼ Timotì ghèe Elastùs, ghî ghəla ghe mò tɔ̂ɔm wo wə̄n, təma zə̀ghàa ndùw ghee am Màsɛ̀donìa, ghuūghùe u wə̄n wə ŋ kuuwn tsùuŋ dòʼò kə̀ŋo ndùw an Ɛshìa.

²³ An tì kə te ko tsû wəla u mò nughù sə kɔʼ a fughu an naʼ zə Efɛsùs kùu ndùw Dzì è Mughu ù te fə̀ yo dzə̄ nyàaŋ fə utsù.

²⁴ Tûwbʉ̀ghà ù lì ù fə̀ lo tsə̀anàm mo zən e wən e lo Də̀metə̀lùs, mò ù tsəa tsəgha nyàaŋ mə̀ n ndughu u zə̀ kə̀ zən kəla ghe fə̀ tɔŋlo enyəa à lò Atɛmìs, ù fə̀ ghəəŋ nû ghî a kəfwàʼ a te ghə ŋ kuu an nàm chìa ù mò tsəā.

²⁵ Tûw wən n tɔŋɔ zùuŋ nàŋa tsughu ghî yì a dzə̀m ghe mò tsəa sughò nâm kò tǒ wə̄n, dzɛ̀ â ghee enyəa, “Waazə̂ ghò, ghɛ̀ kwo nû enyəa kən lǒ fwàʼ kə̀là sɛ̀ zəā a te.

²⁶ Ghɛ̀ koʼò nù, ghɛ̌ yəa zuuw sughò enyəa à kà yò ko fɛ an Ɛfɛ̄sùs Pôl wən lo mo ù n nɔɔm nùghù ndə̀m è àghì, à lò an mbuʼ Ɛshìa e dzə̀m, enyəa so zʉ̀ wəla a bɔɔ̄ tsughuu aŋ ghu yo dzə̂ uzʉ̀.

²⁷ Tsəŋ e fɛ kà yò ko dzə̂ enyəa fwàʼ kə sɛ̀ kən lo alebō, to tsughu e Atɛmìs, zə̀ kə sɛ̀ kə̀ səŋò kò bəlā bughò doʼò bəla kə̀ zum ko, àsùghò enyəa ghe lo alenìi nughù kɔʼso məla ù ki ghè mò, wən wəla Ɛshìa e dzə̀m kɔʼsō à mbī e dzə̀m.”

²⁸ A m bùghò ghe zuw tsughu ghəa ghən ghe n zùghù ndùw ènyə kaʼ tsughu bɔ̀ŋ m bǔʼn mò dzàa tsùghù enyəa, “Altɛmìs wəla a kɔʼso fɛ am Ɛfɛsus ghaʼ tsəgha ùzʉ̀ u dzə̀m!”

²⁹ Naʼ e te e fi daŋso tee kɔʼ nû alo efwēe, ghe n daŋso mbà nyə̀ŋ zùuŋ wò an sàŋ ghee, mo ghe ŋ Gayòs kwù kɔ̀ʼ ghèe Àlestālkùs, wɛ a Màsɛ̀donìa ghe mò dzeŋe bwîi kaāŋ wo ghèe ghê Pôl.

³⁰ Pôl n ləghaa enyəa e nyəā tēe tsughu an sə kə saʼ kə aghì chì, ghî ghəla ghe fə̀ boo fughu ŋ kè kuūwn boo.

³¹ Ghî à ne à li gho fughu am mbuʼ ghe fə̀ lô fən a Pôl ghò, ghe n tum nàʼà wò sùghò â Pôl enyəa e kwo ù lò luʼū alenyə fughu an sàŋ.

³² A n lo ezə̀, ghe n tughuu fughu â dzə̀ tò, chia ŋ kə̂aa ndùw e wə̄n zo, wàazə̀ ŋ kə̂aa ndùw e wə̄n zo; nu ndughu è te fə̀ ti alo efwēe, tɔŋlo enyəa ndə̀m è ghee à li a mò buʼ kwo yo fəgha kəla kə nî wo ghee fughu.

³³ Dzûu tə̀ li tə n dzɛ̀ enyəa Àlɛ̀kszandà səā kə̂aa wô àghəa, Àlɛ̀kszandà m fòʼn ndùw àghu enyəa ghe doʼò tsughu mɔŋ, to e teso fəgha kəla kə lo ghè kò.

³⁴ A m bùghò ghî a te a kôʼ tsughu enyəa ù lǒ Dzûu ghe n nùghù dzeŋe tughu sə kɔʼ â dzə̀ tò tǒ ghùw u mɔ̀ʼ enyəa, “À tsə̀ghà Atɛmìs ù ghì a Ɛfɛ̄sùs!” Ghe ŋ ghə̂əŋ ghəa yì kɔ̀ʼ sə̀ ndùw tǒ tàm tə ezūuw tə bə̀ghà.

³⁵ Ghùwkə̀mwàʼsò wə̀ enaʼ è te ŋ ke naŋa tsughu ghee, dzɛ̀ â ghee enyəa, “Oō ghî ghə Ɛfɛ̄sùs gho, à lò ndugho ù məghāa enyəa naʼ e ghì a Ɛfɛ̄sùs è lo ghî ghəla ghe lɛɛ̄n tsughu Atɛmìs wəla ù ghaʼā, chìin sùghò tia è baa zəla e tsughu wô alo kəwālā à?

³⁶ Ghəa e lo dzə̂ enyəa a kôom yò aletuū maʼà, dzɔ̀ lò ko enyəa ghɛ̀ doʼo tsughu ko mɔŋ, ghɛ̀ ka tsû ù sôʼ.

³⁷ Ghɛ̀ ghî ghən fɛ nì wò mo ghe kâ fəgha kə tsɔŋ dzə̀ an tsughu e sɛ̀, ghe kâ zə̀ kə sɛ̀ kə̀ tso sùuwn sùghò.

³⁸ Abugho à lò enyəa Dèmetelìus ghèe ghê ghì a wə̄n a ki sāʼ ghèe ghê ghùw, tsuʼn tə̀saʼ n lo nû à ghì à saʼa gho, ghe ndûw kwuū ndûw ghue e ghee fughu.

³⁹ Mò à kǔuwn lò enyəa ghɛ̀ kôom kə̀ŋô ghə̀a è li zo, am bian ko an ndughùnē.

⁴⁰ Nu ghəa a lô fɛ ghe lo alebəlā kwū sɛ̀ nɛ enyəa sɛ̀ sôʼ kə̀ndə̀m, sɛ̀ ki yo ghəa zo aledzɛ̀ aŋ ghəa ghəla a dəmà fɛ a tè.”

⁴¹ A m bùghò ù kə̀aa tsughu ezə̀, ù n dzɛ̀ enyəa ghe sɛ̂ɛ.