Bìoball air-loidhne

Kə̀fwàʼ 18 - To kə Kəzə̀ kə̀ Fughu ko

Pôl kə̀aa shwaʼ u Kəzə̀ aŋ Kɔlèent

¹ A m bùgho ghəa ghən tsəghà tsughu, Pôl n zə̀ghaa tsùghu Atɛ̀ns, nùghu ndùw an naʼ e Kɔlèent.

² Ù n ndùw kpěen tsughu ghèe ghùw Dzûu ù lì ghe mò tɔŋlo enyəa à lǒ Akwilà, ghèe wì ù wən Pə̀lèsilà. Tûw wən mò lo ghùw ghe dzə am Pɔntùs, ù kùʼù nughù wo an Etalì bòʼ Klaudìus tsə̀ghàsò tsughu lâŋ kò enyəa Tə̀dzûu tə dzə̀m zəghàa tsughu Lumà. Pôl n nùghù ndùw alendùw kôʼ ghee.

³ Ghe mò lo ghî ghəla ghe mò taā tsəghà fʉgha wo aŋ gùw tə tənyòm, aleghəŋlo m̀pfʉa a te. A m bùghò Pôl ndùw kôʼ tsughu enyəa ghe fwaʼà sùghò fwàʼ kəla e fwaʼā ghè kòʼ, ù m mùghùu nyə̀ ndùw ghèe ghee, ghe n dzeŋe taa ndùw fʉghu aŋ gùw tə tənyòm.

⁴ Pôl ŋ kɔʼɔ pfʉa zee tsə̀ghà ko èdzughu an ndùghùnē tsuʼntəntsə̄ tə Tə̀dzûu tən tə̀ dzə̀m, ù də̀mà alekɔɔ̄ŋ Tə̂dzûu tə̀ n zuuwkɛ̄lɛ̄ wò wə̄n ghèe ghê ghì a Gə̀lêk ghò.

⁵ A m bùghò Saelàs nùghù wo an Màsɛ̀donìa ghèe Timotì, Pôl n nì kɔ̀ʼ nəgha e wə̄n e dzə̀m alekəaa ko shwaʼ u Kəzə̀ wò, teso ndùw tuŋlō u ghì a Dzùdîa enyəa Yɛso lo Kə̀lestò ù te.

⁶ A m bùghò ghe sô komso wə̄n a fughu, sùuwn sùgho wə̄n a fughu, ù n zə̀ghàsò màʼà tsùghù kəgbə̂n an ndzʉ tə wə̄n, aledèe tsughu enyəa e fɛ nyuʼu dzə̀m â ghee. Ù n dzɛ̀ â ghee enyəa, “Vʉ zɛʼɛ e lɛɛn ko ghɛ̀, ghu kaŋa kə yo a te. Alenùghù tsughu êzə̄ŋ ndùw â sə ko, Ǹ lô ghəa gho êzəŋ nduw kəaa â Tòʼò zò.”

⁷ Ù n zə̀ghàa tsùghù a fughu ndùw alô ghùw ù Etoʼò ù lì ghe mò tɔŋlo enyəa à Taetòs Dzustùs, ù kɔʼso tsəgha Zə̀ kò; mò ndùghù è wən kuʼù dòʼò tsùghu ko enyə ghèe Ndùghène è Tə̀dzûu.

⁸ Kə̀lispùs, ghùw wəla ù mò lô tuw ko an Ndùghène è Tə̀dzûu è te, ghèe ghê ghì â wə̄n gho an ndughu m boo fughu ndùw am Mughu ù te; ndə̀mà tə ghì a Kɔlèent ghəla ghe mò zuw shwaʼ u Pôl wò, ghe mo è boo, nì kɔ̌ʼ mùghù ŋ Kə̀zə̀.

⁹ Mughu ù te n daŋso bùghò mgbaŋ dè mɛ̀ʼɛ̀ tsùghù â Pôl â tsuʼ wo an dzǒo enyəa, “Kà fəgha kə̀ li kə tsəŋ, e kəaa səa nduw ghəa gho, e kwo ghù lò zuūw doʼn mɔŋ;

¹⁰ tɔŋlo enyəa Ǹ lo ghàʼ à ghù, kǎakàa fə̀ lô ghù kɛ̂ yò; nu Ŋ̀ ki ndə̀m è àghì fɛ alo enaʼ.”

¹¹ Ù n dòʼò tsughu a fughu kənûm à ndzɔŋɔ to tǔu ghèe ghee, tsʉ̀a ko ghee fughu an shwaʼ u Kəzə̀.

¹² A n ndùw bùghò Galìo bùghò doʼò tsughu tuw ko am mbùʼ è Àkaeyà, Dzûu tə̀ n nùghù maŋkwu kɔʼ Pôl, sè wò wən aŋ kaŋsì,

¹³ bùghò dzɛ̀ â ghee enyəa, “Tûw wən kɔɔŋ nùghùun ndùw àghì enyəa ghe e kɔʼso Zə̀ kò an dziī zəla lâŋ kə sɛ̀ kə̀ doʼŋkè boo.”

¹⁴ Â Pôl aletsoō kɔʼɔ̄ kʉ̄ɛɛ, Galìo n dzɛ̀ â Dzûu ti enyəa, “Oō Dzûu tò, abugho à mò lô enyəa ù ghə̌əŋ ghəa è biigh è li zo tò ghəa e kəfwə̀s ŋkāa bo è li zo, to M̀ mô lò nû alezuūw wô ghɛ̀,

¹⁵ yia bugho à tsò lô ko fom tə̀ baaŋ to alo aghəa, à zən gho, àsùghò an lwàŋ wɛʼɛ, ghɛ̀ fəm kaaŋ nduw a te; Ǹ tue nû alesāʼ ŋgòʼ ghə̀a ghən.”

¹⁶ Ù n dzùm nùghù sə̌ ghee fughu aŋ kaŋsì.

¹⁷ Ghe m fwə̀n nùghù kwu kɔʼ Sɔ̀stɛ̂ns, tûw wəla ù mò lô tuw ko an ndùghùne fughu, bu wən fughu an sə kə kaŋsì. Galìo ŋ kè tsoō naŋā kə̀tuŋlō a te.

Pôl ndùw èbàm an Antìok

¹⁸ Aŋghəa ghəa ghən tsəghà tsughu, Pôl ŋ kòom tsùuŋ dòʼò kpèʼe kəŋo ndùw ndə̀m è ntsùʼu fughu, ghèe ghê waazə̂ yì fughu n tɔɔŋ tsughu eghue, ù n dàŋsə̀ ndùw an Sylìa alo kəkwə̀n ghèe ghê Pə̀lèsilà àsùghò Akwilà. Tò ù è bughò an Sylia à n lo mò ù n tuw kə kɔm màʼà an Kɛŋkəlêa, bòʼ ghəa ù mò kɛ̂ naŋa.

¹⁹ Ghe daŋso bùghò an Efɛsùs, ù n zə̀ghàa tàʼà tsùghu ghee fughu; ndùw wən â nəŋ ko an ndùghùnè è te, ndùw kàʼ ndùw dzughu è pfʉa zo fughu ghèe ghê Dzûu tò.

²⁰ A m bùghò ghe dzɛ̂ â wən enyəa ù tsùuŋ doʼò kpeʼē kəŋo ndûw ghèe ghee, ù mo è tue.

²¹ Ghəa ù se kuuwn zə̀ghàan ghee, ù n dzɛ̀ â ghee enyəa, “Ǹ lo kòom bùghò kòʼò nù ghɛ abugho Zə̀ kə̀ boō.” Ù n daŋso bùghò nì kɔ̀ʼ kəkwə̀n, zə̀ghàa tsùghù Ɛfɛ̄sùs.

²² A m bùghò ù bùghò sə tsughu aŋ Kàesalìa, ù ŋ kɔʼ tɔɔŋ zùw ndùw ghì a Kəzə̀, nùghù tsùghù ndùw an Antìok.

²³ Ghəa ù tsùuŋ doʼò tsughu fughu, ù n nùghù è tsughu ŋgəa kaaŋ ndùw nàʼà tə̀nàʼà, tsə̀ghàsə̀ ndùw mbùʼ è Gàlashìa àsùghò è Flygə̀a, dzə̀là ndùw ghì ghəla ghe boō fughu â Kə̀lestò â sə̀ŋ zò.

Àpolòs kə̀a shwaʼ u Kəzə̀ an Ɛfɛsus àsùghò and Kɔ̀lent

²⁴ Ghùw ù Dzûu li n lo zən e mò lo Àpolòs, mò sə̀ an naʼ e Àlɛ̀kszandà, ù n ndùw bùghò an Ɛfɛ̄sùs. À n lo mò lo dzɔ̀ɔdzə̀, ù m biso kwo sugho mwàʼsò kə Kəzə̀.

²⁵ À n lo mo ghe ŋ wən zoʼnlo an dzìi tə̀ Mughu ù te; a m bùghò ù sə̀ ŋgeē ləghaa ghəa a te gho am fə̂ŋ, ù ŋ kə̂aa wò alekə̀aa biso zoʼn tsughuu sùghò àghì alo efəŋ aŋ ghəa a Yɛso a te gho, mò ù mò buʼ kwo ko ghəa ghəla Dzɔ̌n wəla ù fə̀ fughu ghî ghò â mùghù ŋ Kə̀zə̀ mò fə̀ zoʼn tsəghà ghî ghò a te.

²⁶ Ù ŋ kàʼ ndùw aledoō kəaa ghəa gho an ndùghùne è te; a m bùghò Pə̀lèsilà ghèe Akwilà zəə̄n tsughu shwaʼ u Àpolòs wò, ghe n nì ndùw wən alô ghee, ndùw fəghaan tɔ̀ʼ tèso tsughu tuŋlo u wən aŋ ghəa a Kəzə̀.

²⁷ A m bùghò ù tsə̀m kɔʼ aledàŋ an Àkaeyà, waazə̂ a ghî a Kəzə̀ ghə̀ n dzə̀n ndùw wən â sə̀ŋ zò alo kəmwàʼsò ghe tɔm nduw â waazə̂ a ghî a Kəzə̀ à yi a fughu enyəa ghe nîi naŋā tsughu wə̄n. A m bùghò ù ndǔw fughu, ù ŋgè yòsò ghì ghəla ghe mò tsô boō tsughu sugho mò à ghee yosò Kə̀zə̀,

²⁸ tɔŋlo enyəa ù mò təmazəa tsughuu Tə̀dzûu ènyə mgbaŋ mgbaŋ, dèe tsùghuu alo kəmwàʼsò enyəa Yɛso lǒ Kə̀lestò.

« Roimhe

Air adhart »

2020

Lean sinn:

Ceanglaichean taic

Sanasan