Bìoball air-loidhne

Kə̀fwàʼ 17 - To kə Kəzə̀ kə̀ Fughu ko

Ghe fughu ghê Pôl â tsu wò an Tɛ̀sàlonikà

¹ A m bùghò Pôl ghèe Saelàs tsə̀ghasə wo Amfipolès àsùghò Àpòlonìa, ghe n sə̀ wò an Tɛ̀sàlonikà, mò ndùghùne è ghì a Dzûu lǒ fughu.

² Pôl m bùghòo nàŋa tsughu enyəa ù e nduūw tsəgha an Ndùghùnè è Tədzûu. Ù n nì kɔ̀ʼ Tsuʼutəntsə̄ tə təgha mò ù tsòo ndùw kə̀aa zěe ko àghəa ghèe ghê ghì ghò a fughu, tɔɔŋ səa kɔʼɔ àghəa am Mwàʼsò kə Kəzə̀,

³ ù n teso dzâa â ghee, dèe ndùw sùghò alo tətsə̌a enyəa Kə̀lestò mò ki nû alefalā, ù kpuūw tsughu, ù zòo nughù kɔʼɔ̄ sughò alo evʉ̄. Ù n dzâa ndùw sùghò enyəa, “Yɛso wəla Ǹ dzâa wô fɛ â ghɛ̀ ma, à lǒ wə̄n Bəghambī.”

⁴ Dzûu tə̀ li tə n zuw shwaʼ u Pôl ghèe Saelàs, boo fùghù è tsughu, təmdzəəŋ ndùw ghee; to ghî Gə̀lês ghəla ghe mò boō fughu tsughu â Zə̀ kò fə̀ ghəŋlo àsùghò sə fə ghìzən à səŋò à li gho, m boo fùghù ndùw sùghò â ghê Pôl.

⁵ Dzûu tə̀ li tə ŋ kuūwn ghòʼ ndùw nù ghəa e te zo, nì sə̀ wò àghì aŋ ghì à tughuu kətūw gho, zùuŋ tsùghù aghî, nùghù tìso naŋa kɔʼ enaʼ alo efwēe; ndùw bàʼ kwu kɔʼ be kə Dzasòn, ghe kəŋo alenìi fughuu səā wô Pôl ghee Saelàs â ghì ghò.

⁶ A m bùghò ghe doʼŋkè kôʼ ghee, ghe ŋ kwu kɔʼ Dzasòn à waazə̂ à li gho, sè ndùw ghee a vʉ̀a ghê sàʼàtə̀saʼ, buʼn dzàa ndùw alo mbɔ̀ŋ enyəa, “Ghî ghəla ghe tso tiso naŋā kɔʼ mbī zən alo efwee m bùghò sə̀ sùghò fɛ,

⁷ Dzasòn vʉ̀a ù nì naŋā tsughu ghee; mo ghe bɔɔm zaʼa ndùw kô lwàŋ u Də̀ŋ kə Lumà kə̀ ne ko, mbuufīa ghe dzâa wô enyəa də̀ŋ kə̀ li kə lo nû mò à lò Yɛso.”

⁸ Ghəa ghî à zuw tsughu ghə̀a yì àsùghò ghê sàʼàtə̀saʼ, zə m fəmso ndùw ghee enyə.

⁹ A m bùghò ghe ghəə̄ŋ tsughu Dzasòn ghèe ghê ghì a Kəzə̀ à li yi tsə tsughu fəgha kela ghe mò ləghaa ghè kò, ghe n zə̀ghàa màʼà ndùw ghee.

Ghe fughu ghê Pôl â tsù wò am Bɛ̀lîa

¹⁰ A m bùghò waazə̂ à li yi nî ndûw təmā zəghàa ndûw Pôl ghèe Saelàs â tsuʼ wo am Bɛ̀lîa; ghe n ndùw fughu, ndùw nyə̀ ndùw an ndùghùne è ghì a Dzûu.

¹¹ Dzûu tən fɛ mò nəəŋ kuuwn mbvuʼū ghəəŋ nû tsə̀ghàtàʼà təla tə mò lo an Tɛ̀sàlonikà, nu ghe mò zəən shwaʼ u te wo alo mmbuuw, tɔ̀ʼn zěe səa kɔʼɔ am mwàʼsò kə Kəzə̀ enyəa ghəa ghən lo to ezə̀ à.

¹² An dziī zən, ndə̀mà tə Tə̀dzûu tə̀ m boo fùghù è nduw à ndə̀ma tə ghì a Gə̀lês à səŋò ghò to ghînûu a ghee a fə̀ boō fughu sugho.

¹³ A m bùghò Dzûu tə̀ li to an Tɛ̀sàlonikà tə̀ zuw tsughu enyəa Pôl kə̀aa sùghò shwaʼ u Kəzə̀ an Bɛ̀lîa, ghe n ndùw bùghò sùghò fughu, bùghò tsùʼ sòʼ tìso naŋa kɔʼ enaʼ alo efwēe.

¹⁴ Waazə̂ a ghê Pôl à li yi n daŋso nì dzə̀n kɔ̀ʼ Pôl alo kəkwə̀n, təma zə̀ghàa ndùw wə̄n, Saelàs ŋ kuūwn dòʼòdòʼò tsùghu fughu ghèe Timotì.

¹⁵ Ghî ghəla ghe mò so e bughò təma Pôl n lɔʼso bùghò tɛ̀ wò ghèe ghee an Atɛ̀ns; Pôl n dzɛ̀ tsùghù â ghee enyəa ghe ndûw dzâa ndûw enyəa Timotì ghèe Saelàs mbaā bughò koʼò wô ghee an Atɛ̀ns tsuetsue, ghe n daŋso zə̀ghàa è tsughu.

Pôl kə̀aa shwaʼ u Kəzə̀ an Atɛ̀ns

¹⁶ A m bùgho Pôl sə̀ lo an Atɛ̀ns ù ləə̄m Saelàs ghèe Timotì, ghəa ù kòʼ tsughu mo naʼ e te zo e dzə̀m mò à ndùuw ko m̀mùʼù, ghəa e te zə m fəmso mìasò ndùw wən enyə.

¹⁷ Ù fi kaʼ nû alekele kaaŋ shwaʼ wo an ndùghùnē ghèe ghee Dzûu tò àsùghò ghì ghəla ghe boō fughu tsughu, àsùghò ghèe ghê ghì ghəla ghèe ghee bughò kpeen tsəghà am fwànlo tsuʼu mən n dzə̀m.

¹⁸ Ghê dèekə̀mwàʼsò a naʼe Ɛpìkulìa à li gho àsùghò a Stôik ghò, ghe ŋ kele sùghò ùshwaʼ ghèe ghee. À li ghə m bvʉ enyəa, “Ghùw wən biso ləghaa aledzɛ̀ è ndūghō a mo shwaʼ u te u kwuu yo ghəa zo?” À li ghə n so enyəa, “À lò ko tò ù kə̀aa ghəa a zʉ̀ ù tətùu.” Ghe mò êzə kəaa bòʼ Pôl màʼa fə̀ kə̂aa ghəa a Yɛso ghò â ghee àsùghò ghəa a wən à kɔʼɔsəa ghən alo evʉ̄.

¹⁹ Ghe n nì wò Pôl êzəŋ an vʉ̀a kaŋsì an Aleopagùs, luʼu kəla kaŋsì mò bughò kwuū tsəgha a te, dzɛ̀ â wən enyəa, “Ghàʼ mô ləghaa nù alekelê fəgha kela tsʉ̂ è fughu zəla ghù fughuu moʼō ghè zò.

²⁰ Ghəa ghə̀là ghù kə̌aa à li a lo a te mò à lò ghəa à fughu gho â ghàʼ, ghàʼ ləghaa nù alekelê fəgha kəla ghea a te a moʼnlo.”

²¹ (Tɔŋlo enyəa ghî a Atɛ̀ns a dzə̀m àsùghò tùu təla tə mughu fughu mò ni naŋa tsughu nəgha e ghee e dzə̀m aledzaā ŋkāa alezə̄ən ghəa à fughu ghən a sə.)

²² Pôl fi nughù těe kɔʼ nû an sə kə kaŋsì an naʼ e Aleopagùs, dzɛ̀ â ghee enyəa, “Ŋ̀ kôʼ tsùghù enyəa ghɛ̀ a ghî ghə Atɛ̀ns ghò, ghɛ̀ lo ghî a kəzə̀ alo tədzìi tə dzə̀m.

²³ Nu aŋghəa mùgho mò bwîi lɛɛ̄n kaāŋ wô luʼū təla ghɛ̀ ndûw kɔʼsō zʉ̀ wò a te, mùghò n ndùw kòʼ tsùghù kəŋ è li ko mo ghe n tɔm naŋa a te enyəa, ‘Â Zə̀ kəla a kwo yo.’ Zə̀ kə̀là ghɛ̀ kɔʼso fì êzə̀, ghəa ghɛ̀ bûʼ bən kwo ko yo ghè kò, à lǒ Zə̀ kəla Ǹ dzâa wô â ghɛ̀ fɛ êzə̄ŋ.

²⁴ Kə̀zə̀, kəla kə mò bɔm mbī àsùghò fʉgha wə̀n ù dzə̀m a te, à lǒ wə̄n Mughu ù kəwala àsùghò ghueekətsə̄ ko, mò ù mùghù dzə yo an ndughu mò à bɔm tsughu ghùw.

²⁵ Ù bùʼù làʼà sùghò yò fəgha kə̀ li ko sɛ̀ lo alefwàʼà fughuu ndûw â wə̄n tɔŋlo enyəa à lò ghuūghùe u wə̄n ù naāŋ ghî ghò â tuw ko à ghəa à li ghə̀n à dzə̀m â ghì ghò a dzə̀m.

²⁶ Ù fə̀ ni kɔʼ ghùw u mɔ̀ʼ bɔm tsughu ghî a nàʼà tə̀n tə̀ dzə̀m tə̀ dzə̀m fɛ am mbī, ghəəŋ tsughu ghe m mùghùu ŋgə̀a wò mbī e dzə̀m. Ghuūghùe u wə̄n wə m fəghaan naŋa zìi tə̀n tsùghù sùghò nəgha tə te to, naŋa kaaŋ ndùw sùghò tee e lùʼù təla ghe kê mughùun kaāŋ nduw a te.

²⁷ Zə̀ kə fə̀ ghəa ghən ghəəŋ tsughu enyəa ghe lo kəŋo wo ghee, kwo enyəa ghe lo nughùun buūŋ kɔʼɔ alekòʼ ghee, ù ŋ koʼ tsùghu ghee, ghəa Ù bùʼ lo ko enyəa Ù kuʼù lò ko a vʉ̀a chìa an sɛ̀ ghən à dzə̀m;

²⁸ tò ghùw ù lì dzɛ̂ tsughu enyəa, ‘À lò aŋ wə̄n a mughu, bwìi kàŋlo, lò sugho alo eghùe.’ E lo sugho to ghî à tɔɔ ghɛʼɛ à li a fə̀ dzɛ̂ tsughu enyəa, ‘Sɛ̀ mbɔŋ lò sugho wɛ a wə̄n.’

²⁹ Ghəa sɛ̀ lo mo a lo wɛ a Kəzə̀, a ki yo alemòʼnlò enyəa Zə̀ kə̀ lo fəgha kə̀ li ko ghùw dè tsughu ghu a kəfwàʼ a wə̄n gho a te, tò alo ètsɛ̀, an Silvà, ŋkāa alo etīa.

³⁰ Zə̀ kə̀ n wuwmàʼà ghəa à biigh ghəla ghî a mò ghəŋlo an tì kəla ghe fə̀ kwo tsəghà yo wə̄n, vʉ̀a ù fughu tsughu lâŋ kò êzəŋ â ghì ghò a dzə̀m an lùʼù tən tə̀ dzə̀m enyəa ghe maʼà ghəa à biigh gho.

³¹ Ù fə̀ lâŋ kən fughu tsughu bòʼ Ù n naŋa tsuʼ fo ù kè saʼā mbī e dzə̀m a te mò à sàʼa ghùw wəla ù tsɔʼ kɔʼ enyəa ù bùghò saʼ mbī an sàʼ è zɔ̀lɔ. Ù ŋ ghəa e te e dê fùghù â ghì ghə̀n à dzə̀m, ghəa ù nì nughù kɔʼ wən alo evʉ̄!”

³² A m bùghò ghe zuw Pôl bùghò mɔm tsughu ghəa à nîi nughūun kɔʼɔ gho alo evʉ̄, ghee à li ghə ŋ kàʼ ndùw wən a lùʼù sɔʼso wo, à li ghə ŋ kuuwn so enyəa, “A lo fəghaan tɔ̀ʼɔ̀ zǔuw nù ghən aŋ ghùu ghù.”

³³ Pôl fi daŋso zə̀ghàa tsùghù nû dzeŋe chì.

³⁴ Ghî à li ghə n ŋgə̄əŋ təmdzəəŋ ndùw ko ghee, boo fùghù è nduw. Aŋ ghì ghəla ghe fə̀ boo fughu nduw, à mò lo ghùw ù lì ghe mò tɔŋlo enyəa à lǒ Dèoneshìus, ghùw Aleopagùs; nughò ù lǐ n lo sugho ghe mò tɔŋlo enyəa à lǒ Dàmalès, àsùghò ghì à li gho ghèe ghee mò lo a dzə̀m.

« Roimhe

Air adhart »

2020

Lean sinn:

Ceanglaichean taic

Sanasan