Kə̀fwàʼ 15 - To kə Kəzə̀ kə̀ Fughu ko

Dzeŋe kəla tum tə mò kwu an Yɛ̀lusalɛ̀m

¹ Ghî à li ghə ŋ kòom ndùw nùghù tsùghù ko an Dzùdîa, bùghò kàʼ wò ghì ghəla ghe boō fughu â Kə̀lestò an Antìok a lùʼù tsʉā wo enyəa, “À gɔ̀ʼɔ̀ mo ghe sugho tigh kə̂a aŋ ghəa bughōo kə Musî kə̀ deē, ghù yò dzə̂ alezə̄ kə̄tūw.”

² A m bùghò Pôl ghèe Bànabàs ŋge zughūu aŋ ghəa a te gho ghèe ghê ghì yì, ŋge pfʉ tsughu edzughu enyə à tè, ghî ghəla ghe boō fughu â kə̀lestò n tsɔʼ kɔʼ ghee a bə̀ghà àsùghò ghì à li gho enyəa ghe kɔʼɔ ndûw an Yɛ̀lusalɛ̀m ghe kɔʼɔ̄ koʼò ndûw tə̀tum à tsoʼ to aŋ ghəa e te zo.

³ A m bùghò ghe sô lo an dziī ghəa ghî a Kə̀lestò à tum sə tsughu ghee, ghe n tsə̀ghà nyə̀ ndùw dzì am Fòenishìa àsùghò an Sàmalìa, nàʼn ndùw ghəa Toʼò è fəlà doʼn wô ghî à Kə̀lestò ghò a te. Shwaʼ wən n dzə̀n ndùw kə̀duʼnlo am fə̀ŋ tə waakə̀lestò yì à dzə̀m.

⁴ A m bùghò ghe bughò nyə wo an Yɛ̀lusalɛ̀m, ghî a Kə̀lestò ghə̀ m kpènì ghee ghèe ghê tum to à tsoʼ to, ghe n dzɛ̀ tsùghù ghəa ghə̀n à dzə̀m Zə̀ kə̀ yôsò kɔʼ ghee enyəa ghe ghəə̄ŋ ndûw.

⁵ Ghî à li gho an dzeŋe kə Falàsîi ghe fə̀ boō fughu tsughu â Kə̀lestò, n nùghù è kɔʼ kàʼ ndùw alekə̀aa enyəa, “E dzɔ̂ɔ nù enyəa to Toʼò è mô sùghoo tsūghûu twii e ghee, ghe e naaŋ tsughuu lâŋ kə Musî kò.”

⁶ Tum tə n zùuŋ tsùghu ghèe ghê tsoʼ to alebùghò lɛɛ̄n nyəā tsughu ghəa zən.

⁷ A m bùghò ghe pfʉ dzughu zo aŋ ghəa e te zo, pfʉ; Pità n nùghù è kɔʼ dzɛ̀ â ghee enyəa, “Waazə̂ ghaŋa gho ghɛ̀ kwo nû enyəa sûesʉ Zə̀ kə fə̀ shiā sə wo mugho am bvʉa zɛʼɛ̄ enyəa Ǹ naʼà ndûw shwaʼ ù dzûŋ wən â Tòʼò zò, to ghe zuw, ghe boō fughuu tsughu.

⁸ Zə̀ kəla kə kwo fə̀ŋ è ghùw, kə n dè wò e m boo, fùghù ndùw sùghò ghee â Zuʼ tə̀ Zɔlɔ to, aŋ ghəa ù fə̀ bɔɔ̄m fughu sugho â sɛ̀;

⁹ Ù n sùw màʼà sùghò bòo tə ghee bòʼ ghe gaʼ tsughu fə̀ŋ aŋ Kə̀lestò. Ù bàa yò kpiī wo sɛ̀ à ghê Tòʼò zò.

¹⁰ À sò èzəŋ lo kwò ghɛ̀ sô lo tò ghɛ̀ mɔ̂ɔkòʼò Kə̀zə̌ a alenìi boʼò fughuu tsughu kəmbùŋ â tsə̀təndə̄ghā to mò ghê tselè sɛ̀ mò yo alebòʼò, sɛ̀ yia yô sughò alebòʼò lo a?

¹¹ Sɛ̀ fɛ kuuwn kwo ko enyəa sɛ̀ lo zəa nù tuw ko am bàm e dzùŋù m Mughùbè Yɛso, aŋ ghəa Toʼò è lo bɔɔ̄m zəā sugho.”

¹² Ghî yì à dzə̀m m bɔɔm zuuw ko mɔŋ; zəəŋ ndùw ko â Bànabàs ghèe Pôl aŋ ghəa ghe taŋsō sə̀ghà mə̀là Zə̀ kə̀ lo mo kə n dè â Tòʼò zò am bàm e ghee.

¹³ A m bùghò ghe ndôʼ kə̂aa mɛʼɛ̀ tsughu, Dzɛ̂ms m bɛ̀lɛ̀ ndùw enyəa, “Waazə̂ ghò, zuw tsughu nlò ghɛ;

¹⁴ Sǎemòn n teso kɔ̀ʼ wò ghəa Zə̀ kə̀ mò zeʼē bâŋ kôʼ Toʼò zò, shìa sə̀ wò àghì am bvʉ e ghee enyəa à lò ghî a wə̄n.

¹⁵ Ghəa ghən fɛ bɔɔm boo dzə̄əŋ ndùw ghèe shwaʼ u ghǐishʉ̀ghà wəla ghe tɔm naŋā enyəa Mughu ù te mò dzɛ enyəa,

¹⁶ ‘Abugho ghəa ghən tsəghà tsughu, Ǹ lo bughò èbàm, M̀ bughò bəghāa kɔʼ ndùghù è Dɛvìd, zəla è lǒ mò è sɛ̀ɛ dòʼò nù; Ǹ lo kôom zûuŋ kaāŋ wô kèndughu kə te ko M̀ bəghāa tiso kɔʼ,

¹⁷ to ghî à li ghən kəŋo wô sughò Mughò, àsùghò Tòʼò zə̀n è dzə̀m Ǹ tɔŋɔ̄ enyəa ghe doʼò tsughu ghî ghaŋa.

¹⁸ Mughu ù te mò ghəəŋ tsughu enyəa ghî à kelê ghəa ghən â wǐiwì.’ ”

¹⁹ Dzɛ̂ms ŋ kə̀a ndùuŋ ndùw enyəa, “Moʼn zaŋa e mô fɛ lo enyəa e kwo sɛ̀ lô fəmsō Toʼò zəla e lo mo zə m boo â Zə̀ kò,

²⁰ a laām tɔɔ̄ dzâa ndûw â ghee enyəa e kwo ko ghe lô zəā fəghàzəa ko mo ghe n sɛ̀ alo uzʉ̀kɔ̂ŋ, ghe ka e nuūŋ kaŋlo, ghe ka e pfʉa nyòm mo ghe bɔe wī nû, ghe ka mʉ sùghò kâŋ tò.

²¹ Sʉ̂esʉ ghî a fə̀ lo tsəgha nû an nàʼà tə̀n tə̀ dzə̀m ghe mò dêe tsəghà ghəa ghən an làŋ kə Musî an ndughutə̀ne to tsuʼntəntsə̄ tən tə̀ dzə̀m.”

Ghe tum ndùw Kə̀mwàʼsò kə nduūw aŋ ghùu Tòʼò zəla e boō tsughu

²² Tum tì ghèe ghê tsoʼ to àsùghò ghì ghəla ghe boō tsughu ŋ kòʼ tsùghù enyəa e dzɔ̂ɔ nù enyəa to ghe mô dzə̂a kɔʼ aghî am bvʉa e ghee ghe tuū ndûw an Antìok ghèe ghê Pôl à Bànabàs. Ghe n tsɔ̀ʼ sə̀ wò ghì ghəla ghe mò lɛɛ̄n ghî ghò am bvʉa e waakə̀lestò e te zo a bə̀ghà. Ghe n nì sə̀ wò Dzudàs wəla ghe fə̀ tɔŋlo enyəa Bàsabàs àsùghò Silàs, tùm è nduw,

²³ à mwàʼsò kò kə dzâa tsughuu enyəa, “Ghàʼ tə̀ tum, à tsoʼ to, waazə̂ ghɛʼɛ, ghàʼ tum tɔ̄ɔŋ wò waazə̂ ghaʼa a dzə̀m ghəla ghe dzə tsughu tò Etoʼò; ghəla ghe mughu an Antìok, an Sylìa, àsùghò an Cilisìa.

²⁴ Ghəa ghàʼ lô mò ghǎʼ n zuw enyəa ghî à li a mò sə kɔʼ fɛ am bvʉa zaʼā bùghò fə̀mso ghɛ̀ an tsʉ̀ è li zo, sàʼ màʼà tsùghù môʼn zɛʼɛ, mò à kà ghǎʼ ghee bûʼ tùm sùghò.

²⁵ Ghəa ghàʼ tsughu doʼò tsughu an dzə̂ e mɔ̀ʼ yia kôʼ tsughu enyəa e dzɔ̂ɔ nù enyəa a dzə̂a kɔʼ aghî, a tuū wô a vʉ̀a ghɛ̀ ghèe ghê waʼwawāʼ Bànabàs àsùghò Pôl.

²⁶ Ghən lò aghî mo ghe n nəgha nyəfo aŋ ghəa e Mughùbè ù sɛ̀ Yɛso Kə̀lestò.

²⁷ Zən lò e ghee ghàʼ tum wô Dzudàs ghèe Saelàs, enyəa ghuūghùe e ghee e bughò dzâa wô ghəa è mɔʼɔ̄ zo alo edzughu.

²⁸ E mò dzɔ tsughu nû â Zuʼ tə̀ Zɔlɔ to aŋ ghəa tə mò ghəə̄ŋ tsughu enyəa ghàʼ koʼò tɔɔ̄ kɔʼ enyəa to a kâa bòʼò fùghù dzə̀ ghɛ â kə̌a kə̀ dalā ko tsə̀ghàsə̌a ghəa ghən:

²⁹ nyəa ghɛ̀ bughu naŋa alezə̄a fʉgha wəla ghe sâa ndûw alo uzʉ̀kɔ̂ŋ, kǎ nlò è mʉa kâŋ tò, kǎ nlò pfʉa nyòm zəla ghe wi mo ghe bɔe wī nû, ghɛ̀ zəghaa maʼa sugho ghəa à nu kaaŋ gho. Abugho ghɛ̀ zəghàa maʼà tsughu ghəa ghən, à lo lǒ dzɔ̀ â ghɛ̀. Dòʼo nlò kədzûŋ.”

³⁰ Ghe fi tum sə̀ ndùw nǔ ghee, ghe n tsùghù ndùw an Antìok; a m bùghò ghe zûuŋ naŋā tsughu waakə̀lestò yi alo fətùʼù ghe n dzə̀ fùghù ndùw mwàʼsò kə te ko.

³¹ A m bùghò ghe daŋso tɔɔ̄ŋ kɔʼ, ghe n tsoʼn ndùw ènyə an shwaʼ vʉa ghe dzə̂n wo fə̀ŋ è ghee a te.

³² Dzudàs ghèe Saelàs, mo ghuūghùe e ghee e lo sugho ghê wàkə̀a, ghe m fəghaan kə̀aa kpèʼe ndùw ndə̀mà tə aghəa tə̀ li to â ghee, dzə̀n kpèʼe ndùw fə̀ŋ tə ghee, dzə̀n ndùw sùghò ghee â sə̀ŋ zò.

³³ Ghəa ghe tsûuŋ doʼò kəŋo ndûw sugho fughu ghèe ghee, ghe mo e ndûuw èbàm a vʉ̀a ghì yia ghe mò tum ghee, waakə̀lestò yi n ndòʼ tə̀ma kɔ̀ʼ sùghò ghee, dzɛ̀ â ghe enyəa ghe ndûw kədzûŋ.

³⁴ [Saelàs ŋ kòom nùghù ləgha tsughu aledòʼòdoʼò fughu.]

³⁵ Pôl ghèe Bànabàs n dòʼòdòʼò tsùghù an Antìok, tsʉ̀a ndùw àghì, kə̀aa ndùw sùghò shwaʼ u Mughu ù te, ghèe ghê ndə̀m è àghì à li gho sughò.

Pôl sɛ̀ɛ ghèe Bànabàs

³⁶ A m bùghò tsuʼu n tsəghà tsughu n sòʼ ènyə Pôl n nùghù dzɛ̀ tsùghu â Bànabàs enyəa, “Bùghò sɛ̀ kôom ŋgəa bwîin koʼò kaāŋ ndûw waazə̂ a sɛ̀ an nàʼà tə̀n tə̀ dzə̀m sɛ̀ lo mo an ndùw nàʼà kǒʼ tùm è Dzǔŋ fughu, a ndûw kôʼò kaāŋ wô enyəa ghe fughu lo kaaŋ nduw ênzə̂n.”

³⁷ Bànabàs n ləghaa alenìi kɔʼ Dzɔ̀n wəla ghe mò tɔŋlo enyəa à lò Mâk enyəa ghèe ghee ndûw à dzə̀m.

³⁸ Pôl ŋ kuuwn mòʼò enyəa e mô dzɔ̀ɔ yò alenì ghùw mò ù mò bugho kōom nughu nduw ebàm am Pàmfilìa, kè mîasò kə̀fwàʼ ghèe ghee.

³⁹ Ghe n nùghù nǔum zùghùu tsùghu fughu alo eghùe, daŋso sɛ̀ɛ è tsughu; Bànabàs n nì kɔ̀ʼ Mâk nùghù dàŋ ndùw ghèe wən an Saepə̀lùs alo kəkwə̀n,

⁴⁰ Pôl ŋ kuuwn shìa kɔ̀ʼ Saelàs, waazə̂ à li ghən ŋ gɔ̀ɔŋ tsùghù enyəa Mughu ù te e nyaŋlo â ghee, daŋso tə̄mā zə̀ghàa kɔ̌ʼ ghee.

⁴¹ Pôl n tsə̀ghà nyə̀ ndùw dzì an Sylìa àsùghò an Sìlishìa, dzə̀là ndùw ghì a Kə̀lestò â sə̀ŋ zò.