Kə̀fwàʼ 14 - To kə Kəzə̀ kə̀ Fughu ko

Pôl ghèe Bànabâs nàʼn Làbəlà è Dzùŋ an Ekonìum

¹ Pôl ghèe Bànabàs ndùw nyə tsughu an ndùghùne è Tə̀dzûu an Ekonìum, kə̀a àghəa a fughu an dziī zəla ndə̀mà tə Dzûu ghèe ghê Gə̀lêk tə̀ m boo fughu ndùw â Kə̀lestò.

² Dzûu təla ghe mò kuūwn boōm yo n tsùʼ sòʼ kɔ̀ʼ Etoʼò, tsʉ̀ bǒon tsughu ghee, ghe n nùghù nùghù ndùw an tuw kə tsə̀təndə̄ghā.

³ Ghê Pôl n dòʼò fùghù èzə an də̀ghàa kə kəgha, dòo kə̀aa ko àghəa kùu ndùw Mughu ù te. Mughù ù te n dè fùghù wò ghəa a te gho a dzə̀m enyəa à lò êsəŋò an sə̀ghàa məla ghe mò deē.

⁴ Ghî ghəla ghe mughu fughu alo enaʼ n nùghù ndzùghùun dòʼò è tsughu; à li ghə n tàʼ ndùw ghèe ghê Dzûu tì, à li ghə n tàʼ ndùw ghèe ghê tum to.

⁵ Ghəa Toʼò è nughù fôʼn kɔʼ ghèe ghê Dzûu tò à dwə̀ŋ u ghee wo enyəa ghe se ndzaŋso ghee, ghe təə̄m tsughu ghee alo atīa,

⁶ tum tə ŋ kelê ghəa yì, tì nùghù ndùw an naʼ e Lystlà àsùghò an naʼ e Dɛbì, naʼà tə Lìkaunìa, àsùghò aŋ ŋgwə̀là tə te to;

⁷ ndùw dàŋso ko â sə ko alenaʼn nduw tùm è dzùŋ è te.

Pôl ghèe Bànabàs nàʼà Làbəlà è Dzùŋ an naʼ e Lystə̀là àsùghò an naʼ e Dɛbì

⁸ Ghùw ù lòʼ n doʼ an Lystə̀là mo fwee e fwaʼà yòʼ, mò ù kaam tso bwìi sə̀ kòʼ wò, nu ghe fə̌ wə̄n dzə sə tsughu wo ko mò ù lǒ kə̀ŋgwûundughu.

⁹ Ù n zə̂ən kô shwaʼ u Pôl, Pôl n tɔʼɔ̀ fwèe sùghò wə̄n, ghəa ù kòʼ tsughu enyəa ù m fə̀ŋ gaʼ aŋ Kə̀lestò vʉ̀ ù kpe to a e baŋlo wə̄n.

¹⁰ Pôl n nùghù dzɛ̀ sə kɔʼ an dzə̂ è tughu enyəa, “Nùghu tee kɔʼ edzūŋ am fwee zəghà.” Ghùw vʉ n daŋso ghàʼ nùghù těe è kɔʼ, bwìi sə̀ è nduw.

¹¹ A m bùghò nɔ̂e wə aghì yi kôʼ ghəa yia Pôl fwàʼ tsughu, ghe m buʼnlo m̀bɔ̀ŋ an shwāʼ u tə Lỳkaunìa enyəa, “Zʉ̀ wə̀ n sə̀ tsùghù wò a vʉ̀a sɛ̀ aŋ ghuè e aghì.”

¹² Ghe n tɔŋɔ ndùw Bànabàs enyəa à lò Zêus, tɔŋɔ ndùw Pôl enyəa à lò Hɛ̂ɛms, bòʼ à mò ghəa a biso kəā wə̄n.

¹³ Fɔ̀e è Zêus, wəla tsughu e wə̄n e mò kuʼù doʼò sə ndûw ko a fǔuŋghɔ̄ŋ wə enaʼ, n ndùw nì wò num a təmbɔ̀ŋ à twii u sə̀ŋ wò, bùghò těe wò â fʉgha vʉ a fǔeghɔ̄ŋ; ghèe ghê nɔ̀e kə aghì chi n ləghaa alefughu ghê Pôl â fughu ko.

¹⁴ A m bùghò Bànabàs ghèe Pôl zuw tsughu ghəa yì, ghe n sùʼn bàan màʼà tsùghù təndzʉ a zəŋo e eghùe e ghee, nyə̀ŋ nyə̀ ndùw am bvʉa e ghee buʼn ndùw m̀bɔ̀ŋ enyəa,

¹⁵ “Ghɛ̀ ghəa ghən ghəŋlo aŋ kwò a naʼ zo a? Ghàʼ lo sugho aghî, aghî ènyə tò ghɛ sùghò, ghàʼ fɛ bughò alebùghò naʼà wô ghɛ̀ â Làbəlà è Dzùŋ, enyəa ghɛ̀ koom ni nughu wo fə̂ŋ tɛʼɛ to aŋ ghə̀a à kwu ghən, ghɛ̀ doʼo wo ghɛ̀ à ghê Zə̀ kəla kə lô â tuw ko; Zə̀ kəla kə bɔm wala ko à ghueekətsə̄ ko, bɔ̀m sùghò tədzughù, àsùghò fʉgha wə̀n ù dzə̀m u lo a te.

¹⁶ Sʉ̂esʉ, Zə̀ kə̀ n zə̀ghàa tsùghù ghî ghə̀n à dzə̀m enyəa ghee e ghəəŋ nduw ghəa a ghee gho.

¹⁷ Ù fɛ kuuwn mgbɛɛ dèe tsə̀ghà ko enyəa e lo nû bòʼ ghə̀a à dzûŋ ghə̀là ù ghəŋlo: ù fùghuu tsughuu wò ghɛ̀ â ghuuw zo alo kəwālā, ghəŋlo enyəa fʉghàzəa wə enomlo an usum an nə̀gha è dzûŋ zò; ù fùghuu ghɛ̀ a fʉ̀ghàzəa wo, dzə̀là wò kə̀tsoʼnlo am fə̀ŋ tɛʼɛ.”

¹⁸ A m bùghò ghe bûʼ kə̂a ndûw ko shwaʼ vʉ̀ èzə̀, ghe n naam ŋgè də̀m tsùghù ènyə alebughū naŋa enyəa ghî yi ka nyôm ti sɛ̂ fùghù â ghee.

¹⁹ Dzûu tə̀ li tə n ndùw nughù wò an Antìok àsùghò an Ekonìum bughò kòom fɔ tsughu tɔ u ghì yì, ghe ŋ kòom kàʼ ndùw Pôl alo atia aletə̄mlō, sè nùghù sə̀ ndùw wən alo enaʼ mòʼò ko enyəa ù m kpuw.

²⁰ A m bùghò waazə̂ à li ghən nyəŋ zûuŋ wo a vʉ̀a wə̄n, ù n daŋso nùghù è kɔʼ, kòom nùghù nyə̀ ndùw è bàm fughu alo enaʼ. A n daŋso nùghù wò tsʉtsʉ vʉ̀ ghèe Bànabàs n nùghù nùghù dàŋso ndùw an naʼ e Dɛbì.

²¹ A m bùghò ghe naʼā tùm è dzùŋ zən fughu alo enaʼ kele kɔʼ ndə̀m è àghì, ghe ŋ kòom nùghù ndùw è bàm an Lystlà, ndùw nùghù dàŋso ndùw an Ekonìum, ndùw tsə̀ghà dàŋso ndùw an Antìok.

²² Ghe n dzəlà ndùw tsə̀təndə̄ghā tə ghee â sə̀ŋ zò, toon ndùw ghee enyəa ghe e ti ko am fə̂ŋ zəla ghe gaʼ tsughu aŋ Kə̀lestò. Ghe n dzâa ndùw sùghò â ghee enyəa, “A ki ko alenyə am Fɔ̀e u Kəzə̀ mo an tèlè fàla tsughu dzə̀.”

²³ À m bùghò ghe ndûw kôʼ ndûw dzeŋe kə ghì ghəla ghe boō fughu â Kə̀lestò alo kəlùʼu, ghe n tsɔʼ kɔʼ tətsoʼ a fughu an dzeŋe kə te ko, ghe m bam tsughu edzughu è gɔnlo alefughūu zəghàa ndûw ghee â Mughubè ù te wəla ghe boō fughu â wə̄n.

²⁴ Ghe n daŋso tsə̀ghà sə̀ ndùw dzì an Pìsidìa, nyə̀ wò am Pàmfilìa.

²⁵ A m bùghò ghe kə̂aa tsughu shwaʼ u te wo am Pɛlgà, ghe n nùghù tsùghù ndùw an naʼ e Àtalìa,

²⁶ zə̀ghàa tsùghu fughu, nùghù dàŋ ndùw an Antìok alo kəkwə̀n an naʼ zəla ghe mò fughu ghee â dwaʼa u Kəzə̀ wò alendùw fwâʼ fwàʼ chia ghe fwâʼ mɛʼɛ̀ kɔʼ.

²⁷ A m bùghò ghe ndûw nyə nduw, ghe n tɔŋɔ naŋa tsughu ghî à Kə̀lestò, dzɛ̀ kɔ̀ʼ ndùw ghəa ghə̀n à dzə̀m Zə̀ kə̀ lo mo kə m fwǎʼ ghèe ghee àsùghò ghəa ù tsʉ tsughu dzì enyəa Toʼò tə̀ è lo alegaʼ a sughò fə̀ŋ aŋ Kə̀lestò.

²⁸ Ghe ŋ kòom tso muʼn mùghùu kə̀ŋo ndùw kə̀gha fughu ghèe ghê ghì yia ghe boō fughu tsūghu aŋ Kə̀lestò.