Kə̀fwàʼ 13 - To kə Kəzə̀ kə̀ Fughu ko

Ghe tsɔʼ kɔʼ Bànabàs ghèe Sôol tùm sə̀ è nduw

¹ Aŋ ghì a Kə̀lestò ghən an Antìok ghiīshʉ̀ghà a Kəzə̀ a fə̀ lo a te ghèe ghê wàdè; Bànabàs ghèe ghê Sǎemòn (wəla ghe mò tɔŋlo enyəa à lǒ Ghùw ù Lə̀ŋo), àsùghò Lusìus, (ghùw ù Sìlêen), ghèe ghê Mànâen (mò noo a tsəlà Hɛlɔ̀d wəla ù fə̀ lô gɔvə̀nò), àsùghò Sôol.

² Ghəa ghe kɔʼsō Mughubè ù te, baa sùghò èdzughu, Zuʼ tə̀ Zɔlɔ tə n dzɛ̀ tsùghù enyəa, “Tsɔʼ naŋa sə̀ wò nlǒ Bànabàs ghèe Sôol am fwàʼ kə̀là Ǹ lo mò mùghǒ ŋ ghee a te tɔŋɔ.”

³ Êzə̀ŋ ghəa ghe bɛ mɛʼɛ̀ tsughu dzughu zo, gɔ̀ɔŋ mɛ̀ʼɛ̀ è tsughu, ghe ŋ gaʼ tsughu ghu a ghee an tuw u ghee, gɔ̀ɔŋ tsùghù enyəa Zə̀ kə̀ bughuso tsughu ghee, zə̀ghàa ndùw ghee.

Bànabàs ghèe Sôol nàʼà Tùm è Dzùŋ an Saepə̀lùs

⁴ Êzə̀ŋ ghəa e màʼa fə̀ lo mò à ghee tum sə tsughu Zuʼ tə̀ Zɔlɔ to, ghe n tsùghù ndùw an Sɛ̀lusìa; ghe n nùghù tsùghu fughu, ghe m bàŋ dàŋ sə̀ ndùw ghee alo kəkwə̀n an Saepə̀lùs.

⁵ A m bùghò ghe ndûw tɛ̂ tsughu aŋ kɔn u Sàlamìs, ghe n nàʼà ndùw tùm è Kə̀zə̀ a fughu an Ndughutə̀ne tə Tə̀dzûu tò. À n lo mo ghe maā Dzɔ̀n Mâk nî kɔ̀ʼ enyəa ù è tɔɔ̄m wo ghee am fwàʼ kə te ko.

⁶ A m bùghò ghe tsəghà sə mɛʼɛ̀ nduw naʼà fìa dzùghù mò dzə̂əŋ ŋgəa kɔʼ ndùw lɔ̀ʼsò tɛ̀ mìasò ndùw am Pafòs, ghe n ndùw kpěen tsughu ghèe ghê ghùw ù fə̀nlo ù lì, ghùw Dzudà ù lì ù fɔɔ̄ tsəghà sə a ghì ghò enyəa e lo ghùwshʉ̀ghà Kə̀zə̀. Zən e wə̄n e mò lo Bal-Yɛso.

⁷ Ù n lo ghùw fə̀n ù ghùw wəla ù mò lô tuw ko am mbùʼ è te, tɔɔŋ Sɛ̀dzius Pàolùs. Sɛ̀dzius Pàolùs wən mò lo ghùw ù tɔ̌ɔ ù lì ù mò tɔŋɔ̄ naŋā tsughu Bànabàs ghèe Sôol enyəa e ləghaa alezə̂ən shwaʼ u Kəzə̀.

⁸ Ghùw ù ghə̀a à fəən vʉ̀, ghe mò tɔɔ̄ŋ sughò enyəa à lǒ Ɛ̀laemàs an shwaʼ u Gə̀lês, ŋ kuuwn komso ndùw ghee, də̀mà ko enyəa e təghàsò maʼà to gɔvə̀nò lò naāŋ wô tuūŋ ko an Làbəlà è Dzùŋ zə̀ ù lò boōm fughuu wo a te.

⁹ Zuʼ tə̀ Zɔlɔ tə ŋ ghəəŋ tsughu Sôol wəla ghe tɔɔ̄ŋ sughò enyəa à lò Pôl ù n tughùsò lɛ̌ɛn tɔɔn nyəa ndùw ko ghùw ù fə̌ən vʉ tsəghatsəgha alo asə,

¹⁰ dzɛ̀ â wən enyəa, “Wɛ̀ ù àvʉatsə̄a wə̄n, ghùwkə̀tuw â ghəa a tsəghatsəgha ghən à dzə̀m, dziī tə̀ tseē tə aghì tə̀n tə̀ dzə̀m, à tə̀ wiin tə aghì tò, à kwò nduw ko ghû, à lò enyəa ghù wən bughuu naaŋ yo aleŋgɔɔ̄n maʼn kaaŋ dziī tə tsəghatsəgha tə Mughu ù te to a?

¹¹ Êzə̀ŋ kòʼô, Mughù ù te baa tsughuu mbɛ an tuw kə̂a, ghù fòo nù, ghù doʼo gha ko mò ghù kòʼò yò luʼū to.” Dzən kə n daŋso nùghù bvʉ̀ wò an sə a wə̄n àsùghò ləm ko, ù ŋ kaʼ tsughu alekə̄ŋ ghùw wəla ù lò aletɛ̀ɛ ndûw wən aŋ kwē.

¹² A m bùghò gɔvə̀nò kòʼ tsughu ghəa yia a sə kɔʼ, ù m boo fùghù è nduw, tɔŋlo enyəa ghəa ghəla ghe mò zoʼnlō kùu ndùw Mughubè ù te a mò kpuuw wə̄n â tuw ko.

Bànabàs ghèe Sôol nàʼà Làbəlà è Dzùŋ an Antìok am mbùʼù Pìsidìa

¹³ Pôl n daŋso nì kɔ̀ʼ kəkwə̀n ghèe ghê ghì a wə̄n gho zə̀ghàa tsùghù Pafòs dàŋ sə̀ wò am Pɛlgà am Pàmfilìa. Dzɔ̌n Mâk m bùghò zə̀ghàa tàʼà tsùghu ghee a fughu, nùghù ndùw èbàm an Yɛ̀lusalɛ̀m;

¹⁴ ghe ŋ kuūwn nùghù dàŋso è nduw, zə̀ghàa tsùghù Pɛlgà, nyə̀ wò am Antìok am mbùʼù Pìsidìa. A m bùghò tsuʼntsə̄ ghe n ndùw nyə̀ gàʼ dòʼò tsùghù an ndùghùnè.

¹⁵ Ghəa ghe tɔɔ̄ŋ mɛʼɛ̀ tsughu ghəa ghəla ghe nî sə kɔʼ an làŋ kə Musî àsùghò am mwàʼsò u ghì ghǐishʉ̀ghà tuw kə ndùghùne kə n tùm wò tùm è lì â ghee enyəa, “Waazə̂ ghaŋa ghò, ghàʼ mô lə̀ghaa enyəa ghɛ̀ lô kpaʼ ki ghəa zo aletoōn ndûw ghì ghə̀n a te, ghɛ̀ ŋ kə̀a è nduw.”

¹⁶ Pôl fi nughù těe kɔʼ nû, fòʼn ndùw aŋ ghu enyəa ghe doʼò tsughu mɔŋ, kàʼ ndùw ghəa à kəaa gho, “Wo ghî ghə Ezə̀lɛ̂ ghò, àsùghò ghɛ̀ à li ghə̀là ghɛ̀ tsəŋō Zə̀ kò, zuw nlo ghɛ a.

¹⁷ Zə̀ kə ghì ghə Ezə̀lɛ̂ kə̌ fə̀ ghê tselè sɛ̀ shiāa kɔʼ nû, ghəəŋ tsughu ghî a te ghə n tughuu, ghəa ghe mò mughù tsəgha an naʼ zə Edzìpt, ù n nì nùghù sə̀ wò ghee an daʼa kə wə̄n kə̀ səŋò kò.

¹⁸ Ù n lɛ̄ɛn kɔ̀ʼ wò ghèe ghee aŋ ŋgwən aŋ ghə̀m n tə̀nùu n chìakò.

¹⁹ A m bùghò ù bu sâʼ tsughu naʼà tò sə̄ghāmbə̄ghā aŋ ghueekətsə̄ kə Kanàan, ù n nì fughu tsughu ghueekətsə̄ kə te ko â ghee enyəa ghe kele.

²⁰ Ghəa ghə̀n à dzə̀m mò ni bɔ̀m n tə̀nùu n chìakò à ghə̀m n tə̀nùu mò n tɛ̀. A m bùghò zə tsəghà tsughu ù m fùghù kɔ̀ʼ wò ghee â ghì ghəla ghe lɛɛ̄n naʼ zo, bùghò kɔ̀ʼ tɛ̀ wò an tì kə ghùwshʉ̀ghà Sǎmwɛ̀l mò bughò a te.

²¹ Ghe n daŋso bvʉ tsughu kədə̀ŋ; Zə̀ kə̀ m fughu tsughu ghee â Sôol, wɛ̀ ù Kîsh, ghùw ù sə an tiigh kə Bɛndzàmɛ̂n, ù n zə ndàŋ aŋ ghə̀m n tə̀nùu n chìakò.

²² Zə̀ n daŋso sùw sə̀so tsughu wə̄n, nì tsuʼ tsughu Dɛvìd an də̀ŋ kə ghee. Ù ŋ kə̀aa ghəa a Dɛvìd, dzɛ̀ tsùghù enyəa, ‘Mùghò ŋ kòʼ Dɛvìd, wɛ̀ ù Dzɛssɛ̀, tǒ ghùw wəla Ǹ ləghaa, ù lò alefwàʼ ghəa ghə̀là Ǹ ləghaa a dzə̀m.’

²³ Aŋ waawɛ̄ a tûw wən, Zə̀ kə̀ n nì fùghù sə̀ wò Ezə̀lɛ̂ â Bəghambī ù te, Yɛso, aŋ ghəa ù mò boō naŋā.

²⁴ Tò ù è bughò à n lo mò Dzɔ̀n mafə̄ ghî ghə Ezə̀lɛ̂ ghò a dzə̀m zoʼnlo enyəa ghe maʼà ghəa a ghee à biigh gho ghe nî mùghù ŋ Kə̀zə̀.

²⁵ A m bùghò sùghò aŋghəa Dzɔ̌n sô mîasò tsughu fwàʼ kə wə̄n ko, ù n dzɛ̀ tsùghù enyəa, ‘Ghɛ̀ moʼò enyəa Ǹ lo ndughoo a? Ǹ yo dzə̄ ghùw wəla ghɛ̀ ləmlo wə̄n. Ɛ̂ŋgaŋ, ghùw ù lì bùghòo èbàm; Ŋ̀ kâ bùʼ kɔ̀ʼ kpe alelo ghùw ù kə̀fwàʼ ù wə̄n wəla ù alebuʼu tsɔʼɔ nughuun tsughu ko gûw tə wə̄n to alo kə kəghùw.’ ”

²⁶ Ù n nì tsùghù enyəa, “Ghî ghə Ezə̀lɛ̂ ghaŋa gho, wɛ ghə Abə̀làhâm ghò, à Tòʼò zən è dzə̀m ghe kɔʼso Zə̀ kò fɛ, à lò â sɛ̀ ghe tum wô tum zən enyəa sɛ̀ lo zəa nù tuw ko.

²⁷ Ghî ghəla ghe mughu aŋ Yɛ̀lusalɛ̀m ghèe ghê ghì ghəla ghe lɛnlō â ghee, ghe fə̀ kwo dzə yo enyəa à lǒ wə̄n Bəghambī ù te ghe ŋ kè zuūwkɛlɛ̄ sughò shwaʼ u ghǐishʉ̀ghà wəla ghe mgbaŋā tɔɔ̄ŋ zeē ko tsuʼntəntsə̄ tən tə̀ dzə̀m. Ghe maā kuuwn ghəŋlo shwaʼ u ghǐishʉ̀ghà wə̀ n sə̀ wò êsəŋò, ghəa ghe dzûw maʼà tsughu Yɛso.

²⁸ Ghəa ghe mò doʼŋ̀kè buʼù kôʼò ko èghəa to ghe e tsəghàsò kə̀làŋ enyəa ù kpuw a te, ghe m mgbɛɛ dzɛ̀ ndùw ko â Paelɛ̀t enyəa ù ghəə̄ŋ tsughu enyəa ghe wiī maʼà tsughu wə̄n.

²⁹ A m bùghò ghe sô ndôʼ fwâʼ mɛʼɛ̀ tsughu sughò ghəa gho a zəŋò wə̄n aŋghəa ghe tɔm naŋa am Mwàʼsò kə Kəzə̀ kùu ndùw wə̄n, ghe n nì nùghùu sə̀ tsùghù wò wə̄n alo kədàŋlo, nì tsə̀la tsughu wə̄n.

³⁰ Zə̀ kə̀ ŋ kòom nì nùghù kɔ̌ʼ wə̄n alo evʉ̄,

³¹ ù n ndùw dè sə̀ ughue an ndə̀mà tə n tsuʼu â ghì ghəla ghe mò bwîi wo dzì ghèe ghee alenùghù tsughu aŋ Galèlîi bùghò tɛ̀ an Yɛ̀lusalɛ̀m. Ghe êzəŋ fɛ lò ghî ghəla ghe teso dzâa ghəa a wə̄n gho â ghì ghə Ezə̀lɛ̂ ghò.

³² Ghàʼ fɛ bùghò tùm è dzùŋ è te alebùghò naʼà â ghɛ̀,

³³ enyə: fəgha kə̀là Zə̀ kə fə̀ to naŋā enyəa e lo ghəŋlo â ghê tselè sɛ̀, ù mo êzəŋ ghəŋlo â sɛ̀ ghəlà sɛ̀ lô wɛ a ghee gho, ghəa ù nì naŋā wô Yɛso â tuw ko. Aŋ ghəa ghe tɔm naŋā an ndzàŋ è kə̀bə̀ghà am mwàʼsò kə n ndzàŋ enyəa, ‘Ghù lǒ wɛ waŋā; tsuʼ u nɛ wə̄n mùghò n dòʼo Tsùghò.’

³⁴ Ghən lò sugho ghəa ghə̀là Zə̀ kə fə̀ dzɛ̂ kùu ndùw ghəa a niī nughūun kɔʼɔ a wə̄n gho alo evʉ̄ enyəa ù lo fìa buŋù yò alo eshìa. Ù fə̀ dzɛ tsughu enyəa; ‘Ǹ lo kùm fùghuu tsughuu ghɛ̀ â bughunlo è zɔlɔ zəla mùgho fə̀ to naŋā â Dɛvìd.’

³⁵ Ù dzɛ̀ tsùghù sùghò an ndzàŋ è lì enyəa, ‘Ghù lo zə̀ghàan yò gwən e kɔ̀ɔ fə̀ghà fə̀ dzûŋ fò e fîa alo eshìa.’

³⁶ À fə̀ â Dɛvìd, tɔŋlo enyəa Dɛvìd fə̀ bɔɔm fwaʼ ko fwàʼ u Kəzə̀ ènyə, bùghò kpùw è nduw, ghe n tsəla dzəəŋ tsughu wə̄n ghèe ghê tsele, gwən e wə̄n zə m fìa bùŋ ndùw alo eshìa.

³⁷ Zən ka fə kuuwn sə̀ dzə̀ â zəŋò ghùw wəla Zə̀ kə̀ mò nî nughù kɔʼ alo evʉ̄.

³⁸ Ghàʼ ləghaa enyəa ghɛ̀ kele tsughu a waazə̂ ghaŋa gho, enyəa à lò am bàm e wə̄n a fughuu wo tùm zən enyəa Zə̀ kə̀ lo ghuuw màʼn nù ghəa a aghì à biigh gho,

³⁹ àsùghò enyəa ghùw wəla ù boō fughu tsughu â Zə̀ kò, Zə̀ kə m bəghasə tsughu wə̄n aŋ ghùu bòo tə̀n tə̀ dzə̀m lâŋ kə Musî kə̀ mò yô alezèe zəghàa wən a te.

⁴⁰ Ghɛ̌ fi ki aleghòom tsughu e kwo ghəa ghəla ghiīshʉ̀ghà a fə̀ kə̂a naŋā wo a lô səa a zəŋò ghɛ̀: Ghe fə̀ dzɛ naŋa enyəa,

⁴¹ ‘Kòʼô nlǒ a ghɛ̀ ghəla ghɛ̀ tsoʼō fəgha kə̀là Zə̀ kə̀ dzaā! Tuw kə ki alekpuūw wī ghɛ, tɔŋlo enyəa an tì kɛʼɛ kən M̀ fwaʼà fwàʼ kə̀ li ko, kə̀fwàʼ ghɛ̀ kê boōm koʼò yo, abugho ghùw bùʼ dzɛ̂ sə wô ko â ghɛ̀.’ ”

⁴² Ghəa Pôl ghèe Bànabàs səā nughùun wo, ghî yi ghə n dîi dzàa wò â ghee enyəa to ghe mô bughò kə̂aa kpeʼē wô ghəa ghən an Tsuʼntsə̄ u vʉa u mò kəə̄ŋ wo.

⁴³ A m bùghò dzeŋe kə ndùghùne kə sɛ̂ɛ tsughu, ndə̀mà tə ghì a Dzudà, à ghì ghəla ghe fə̂n doʼò wô Dzûu tò, ghe n sə̀ dzùum ndùw ghê Pôl, ghe ŋ kə̀aa àghəa â ghee dzɛ̀ â ghee enyəa ghe doʼò təla tsughuu ko am mwàʼ e Kəzə̀.

⁴⁴ Tsuʼntsə̄ ù li vʉ̀ ghî ghə enaʼ yi m fə̄m to ghe e səā mɛʼɛ̀ wô à dzə̀m alebùghò zəə̄n kô shwaʼ u Mughubè ù te.

⁴⁵ A m bùghò Dzûu tə̀ fwə̂n kôʼ tsughu nɔ̂e wo aghì wò, ghe ŋ kàʼ ndùw alemʉnlo; alesùwnlò, alesùwnlò, ghe ŋ waʼn màʼà kɔ̀ʼ ghəa yia Pôl mò kəaa.

⁴⁶ Pôl ghèe Bànabàs n daŋso dzeŋe dò kə̀a sə̀ wò àghəa, dzàa ndùw enyəa, “E mô kpè nû enyəa a buʼù kə̂a wô dzə̂ shwaʼ u Kəzə̀ â ghɛ̀. Yia abugho ghɛ̀ tue maʼā, nì tsùghù enyəa ghɛ̀ kâ kɔ̀ʼ kpè tò ghɛ̀ è zə etsɛlɛ̀, ghàʼ fwəlà fùghuu ndùw êzəŋ â Tòʼò zò.

⁴⁷ Nu à lò êzə̀ Mughu ù te dzɛ̂ wò â ghàʼ enyəa, ‘Mùghò ŋ ghɛ̀ naŋa enyəa ghɛ̀ doʼo tsughu kɛ̀ʼɛ̀ kò â Tòʼò zò, ghɛ̀ lô kpɛʼɛ̄ ghəŋlo mbī edzə̀m zə kətuw.’ ”

⁴⁸ A m bùghò Toʼò è zuw tsughu ghəa ghən, ghe n duʼnlo, kɛɛ Mughubè ù te bòʼ shwaʼ u wə̄n; ghî ghə̀n à dzə̀m Zə̀ kə fə̀ tsɔʼ naŋā tən enyəa ghe kê zə etsɛlɛ̀, ghe m boo fùghù ndùw à Kə̀lestò.

⁴⁹ Êzə ko, ê zə ko, shwaʼ u Mughu ù te wə n nyəŋ ŋgəa tsughu mbùʼ è te e dzə̀m.

⁵⁰ Ghî à ne a Tə̀dzûu ghə̀ ŋ kuuwn tsuʼn kaaŋ kô ghì à tughu gho alo enaʼ àsùghò ghìzən à ne ghəla ghe mò lo mo ghe m boo aŋ Kə̀lestò, ghe n nùghù kàʼ ndùw Pôl ghèe Bànabàs alebɛ̀, dzùm sə kɔʼ ghee am mbùʼ è ghee.

⁵¹ Ghe fi buʼ màʼà tsùghù nû gbwə̂n kò aŋ ghùw a ghee aledèe tsughu enyəa ghî ghə enaʼ yi kâ bǒo dzə̀ ghəa a ghee gho, nùghù ndùw e ghee zo an Ekonìum.

⁵² Tsə̀təndə̄ghā tə n duʼnlo, Zuʼ tə̀ Zɔlɔ tə n lo ghèe ghee.