Kə̀fwàʼ 12 - To kə Kəzə̀ kə̀ Fughu ko

Ghe ŋgee nāam bwìi ndùuŋ ndùw ko an tàaŋ tə efwēe tə ghì a Kə̀lestò

¹ A m bùghò sùghò an tì kə te ko, Hɛlɔ̀d, kə̀də̀ŋ n nùghù kaʼ tsughu aletsəm ghaŋ a ghì a Kə̀lestò à li gho.

² Ù n dzɛ̀ enyəa tsuʼn wi Dzɛ̂ms alo fənyə̄, tɔɔŋ wàazə̀ Dzɔ̌n.

³ Ghəa ù kòʼ tsughu enyəa Dzûu tə mò duʼn nû aŋ ghəa e te zo, ù ndùw dàŋso ko â sə ko enyəa e kwuu sùghò nù Pità. (Ghəa ghən fə̀ lo mo ghe zə̂a Zə kə bɛ kəla mbvùŋ buw a te.)

⁴ A m bùghò ghe kwu kɔʼ Pità, ghe n dzə̀n ndùw wə̄n an ndùghùtsāʼ, fughu naŋa ndùw wə̄n enyəa swaʼ u təsùghugòʼ u chùakò è chiīn wə̄n, kwo enyəa abugho Zə kə̀ zəŋso naaŋ kə tsəghà kɔʼ, e nîī fughuu səa wô wə̄n an tia e saʼ an sə kə a ghì.

⁵ Pità fi kɔʼ nu ndùghùtsāʼ, ghî a kèlestò ghə̀ ŋ kuuwn dòʼò tsughu ko fɛ̀ è bàm mgbɛɛ gɔ̀ɔŋ ko Kə̀zə̀ an tuw kə wə̄n.

Ghe səso Pità an ndùghùtsāʼ

⁶ A m bùghò â tsuʼ wo vʉa Hɛlɔ̀d lo so e gbəla nughù nîi fughuu səā wô wə̄n â ghì ghò, à n lo êzə̀ mo Pità nyə̀əŋ bwǐi tsə̀ghà am faʼnlo e sùghugòʼ tə̀ li to tə bə̀ghà, mo ghe ŋ wən kûm nàŋa alo tətsāʼ tə bə̀ghà, chì tə̀ n ti a fǔundughu ghe chiīn ndùghùtsāʼ.

⁷ Tsə̀ndə̄ghā è Mughu ù te n tsò vùuŋ gbə̀n sə kɔʼ ko enyə a sə̀a Pità, tsə̀ è lì n nùghù tughu tsughu a fughu an ndughu fə kələ̄m. Tsə̀ndə̄ghā zə m mɔ̀ɔm tsùghù Pità alo ebùghu, zòm nùghùu kɔʼ wə̄n, dzɛ̀ â wə̄n enyəa, “Mba nùghu kɔʼɔ̀.” Tsaʼ tə te tə n daŋso tsɔʼn sə tsughu aŋ ghu a wə̄n.

⁸ Tsə̀ndə̄ghā zə n daŋso dzɛ̀ â wən enyəa, “Dzə̀la kɔʼ ndzʉ to àsùghò gûw tə̀ghà tò.” Pità n dzə̀là kɔ̀ʼ ufʉgha. Tsə̀ndə̄ghā zə n dzɛ̀ â wən enyəa, “Dzə̀la kɔʼ ndzʉ tə edzūŋ təghà tò, ghù bugho a bàâ mùghò.”

⁹ Pità n nùghù sə̀ wò a bǎà wə̄n, sə̀ nùghù wò an ndùghùtsāʼ, kwo sugho yo enyəa ghəa yìa tsə̀ndə̄ghā zə ghəŋlo lo kùmkùm tə aghəa, kuuwn kwo enyəa à wən waa tsənlo ùdzoō.

¹⁰ A m bùghò ghe tsəghà kɔʼ chì tə sûesʉ to àsùghò təla tə məghàa wo, ghe m bùghò tɛ̀ tsùghù a fǔughɔ̄ŋ u ubvūʼ, u səa nduw enaʼ. Wə n tsʉ tsughu ghee â mughu ko, ghe n daŋso tsə̀ghà sə̀ è wo, bùghò nì ndùw dzì è lǒʼ a fughu, tsə̀ndə̄ghā zə n daŋso zə̀ghàa tsùghu wə̄n.

¹¹ Tɔ u Pità wə̀ ŋ kwə̀n nyə̀ è wo, ù n nùghù dzɛ̀ tsùghù enyəa, “Mùgho n tɔ̀ʼ kèle êzəŋ enyəa Mughu ù te tum wò tsə̀ndə̄ghā è wən, zə̀a è bùghò bəghasə̄ tsughu mugho aŋ ghùu Hɛlɔ̀d àsùghò aŋ ghəa ghən à dzə̀m Dzûu tə̀ mò moʼò enyəa a so e nî kə̀bala.”

¹² Ghəa ù kele tsughu dzə̂ ghəa ghən, ù n ndùw an ndughu alô Mèle, zə̂ Dzɔ̌n wəla zən e wə̄n è li e mò lô sughò Mâk, mò ndə̀m è àghǐ m fughu zûuŋ dòʼò, gɔ̀ŋlò.

¹³ A m bùghò ù tsʉʉ̄n tsughu fuū u ughɔ̄ŋ wo, kɔ̂ɔ fə̀ zən fə̀ li fo ghe mò tɔŋlo enyəa à lò Lhodà n ndùw bùghò alebùghò tsʉ.

¹⁴ Ghəa ù zuwkɛ̄lɛ̄ sə nduw dzə̀ è Pità, ù n duʼn mìasò ndùw ènyə, kè kôom tsʉ kəbâʼ, kòom bàla nyə̀ ndùw â ghuw ko ebàm, nyə̀ nàʼà ndùw enyəa Pità mò tì a fǔughɔ̄ŋ.

¹⁵ Ghe mo â wən enyəa, “Ghù zə̀ghaa nù à?” Fə ŋ kuūwn mgbɛɛ dzàa ko enyəa à mò lò Pità. Ghe mo enyəa, “À lǒ tsə̀ndə̄ghā è wə̄n!”

¹⁶ Pità n zuuw ko bàʼ kə̀ tsʉʉn ko; a m bùghò ghe daŋso bughò tsʉ tsughu bâʼ kò, ghe ŋ kòʼ kɔ̌ʼ wə̄n, dzughu zə n zum ghee.

¹⁷ Ù m fòʼ kɔ̀ʼ aŋ ghu kə wə̄n â ghee enyəa ghe doʼò tsughu mɔŋ, daŋso teso dzɛ̀ ndùw ghəa Mughubè ù te mò nî nughù sə wo wən a te an ndughutsāʼ â ghee. Ù m bùghò bàʼso tsughu enyəa, “Dzǎa ndùw ghəa ghən â Dzɛ̂ms ghèe ghê ghì ghəla ghe lo mo ghe m boo.” Ù n daŋso nùghù è tsughu nùghù ndùw luʼū tə wə̄n.

¹⁸ A m bùghò tsuʼ u zuw wo, luʼū tə n nûu enyə â zəŋò sùghugòʼ tò enyəa Pità ndùw ghɛ̌ a.

¹⁹ A m bùghò Hɛlɔ̀d kəŋ wə̄n kè kôʼ, ù m bvʉnlo àghəa â chì tò, fughu kəlâŋ enyəa ghe wi ghee. Ù n daŋso zə̀ghàa tsùghu Dzùdîa, tsùghù tsùuŋ mùghùu kə̀ŋo ndùw aŋ Kàesalìa.

Vʉ e Hɛlɔ̀d

²⁰ Êzə̀ŋ Hɛlɔ̀d n lo mò ù kì tsəgha kəzùghùu ghèe ghê ghì a Tâe ghò àsùghò ghì a Sidɔ̀n ghò. Ghî a Tâe àsùghò a Sidɔ̀n ghə̀ n ndùw dzeŋe bùghò kòʼ wò wən enyəa ghèe ghee kə̂aa tsughu aghəa; a m bùghò ghe bughò fughu tsughu shwaʼ wo â Bə̀latùs tɔɔŋ chì è tɔʼ, ù n zùw wò â ghee, ù m bùʼ ndùw kə̀ghu enyəa ghe biaān tsughu; nu naʼ e ghee e mò mughu mo fʉghàzəa u ghee u səa wò an naʼ e Hɛlɔ̀d.

²¹ A m bùghò tsuʼ fəla ghe naŋā tsughu bùghò kpe tsughu, Hɛlɔ̀d n tə̀m sə̀ wò dàla è kə̀də̀ŋ è wə̄n, kɔʼ nyaʼa kɔʼ an ndàŋ è wə̄n alo kətsāʼ, kə̀a ndùw àghəa â ghee.

²² Ghî a te ghə n tsôo bùʼn ko m̀bɔ̀ŋ, dzàa tsùghùu enyəa, “Zən lǒ dzə̀ è Kə̀zə̀, à yǒ è ghùw!”

²³ Tsə̀ndə̄ghā è Mughubè ù te ŋ kùm màʼà wò wə̄n, Ghəa ù dòʼò tsughu mò ù kà fùghù ndǔw kɔʼso n te mò â Zə̀ kò, nyuuŋ tə mùʼ n ko wə̄n enyə, ù m bùghò kpùw è nduw.

²⁴ Shwaʼ u Kəzə̀ wə̀ ŋ kuuwn nùghù ndùuŋ ndùw ko alenduūw â sə ko, noom dùuw ndùw ko â sə ko.

²⁵ A m bùghò Bànabàs ghèe Sôol daŋso mîasò tsughu fwàʼ kə ghee ko, ghe n nì kɔ̌ʼ Dzɔ̌n, wəla zən e wə̄n è li zən mò lô Mâk, nùghù ndùw ghèe ghee ebàm an Yɛ̀lusalɛ̀m.