Kə̀fwàʼ 11 - To kə Kəzə̀ kə̀ Fughu ko

Ghəa ghəla Pità mò dzɛ̂ nduw â Ndùghù è Kə̀zə̀ an Yɛ̀lusalɛ̀m

¹ Tum tə Yɛso à waazə̂ a ghî a Kəzə̀ à li ghəla ghe mò lo an Dzùdîa n zuw tsughu enyəa Toʼò zə̀ m boo sùghò shwàʼ u Kəzə̀ wò.

² A m bùghò Pità sò kɔʼ nduw an Yɛ̀lusalɛ̀m, Dzûu təla tə mò lo mo ghe m boo Zə̀ kò ŋ kàʼ ndùw wən a lùʼù saʼa wo,

³ dzàa ndùw â wən enyəa, “Ghù mò nyəa zəaa dzəəŋ kaaŋ ghɛ̀ à ghê Tòʼò zò an ndughu tə ghee.”

⁴ Pità ŋ kàʼ è tsughu, teso dzɛ̀ kɔ̀ʼ ndùw biso kə eghəa kəla kə fə̀ sə ghè kò â ghee, enyəa,

⁵ “Mùgho mò lo an naʼ e Dzopà, mùghǒ ŋ gɔ̂ŋlò, ghəa à li ghə n ndùw ghə̌əŋ wò mùghò ènyə tò udzoō, mùghò ŋ kòʼ fəgha kə̀ li ko tǒ mgbàʼà kə mbà kə kəfəgha kə səā tsughuu wô alo kəwālā, mo ghe yia fughuu səa tsughuu wô am buw a fəgha kə te ko a chìakò; kə n sə̀ tsùghù bùghò tɛ̀ tsùghù a vʉ̀a mùghò.

⁶ Aŋghəa Ǹ tɔ̂ʼ fwê nyə tsughu, mùgho ŋ kòʼ nyə tsughu nyòo mə̀n n dzə̀m n dzə̀m, təla ghî à nyəsō, tə ŋgwə̄n to, tə̀ ghaāŋ to, àsùghò nwə̀n mò.

⁷ Mùghò n daŋso nùghù zuw tsughu dzə̀ è ghùw ù lì, zə̀ n dzâa wò â mùghò enyəa, ‘Nùghu kɔʼɔ̄ Pità, ghù wiin pfʉ.’

⁸ Mùghò m fəŋso bɛ̀lɛ̀ tsughu ko enyəa, ‘Ǹ dɔ̂m yò aleluʼ a Mughùbè, nu Ŋ̀ kaām fəgha ko an dzughu zaŋā gaʼ kòʼ mo a baa tsə̀ghà nù.’

⁹ Dzə̀ è te n dzɛ̀ tsughu kpeʼe wò alo kəwālā enyəa, ‘E kwo ko ghù lo nî fəgha ko enyəa kə dzəa nù, mò Zə̀ kə̀ ŋ ghəŋlo enyəa kə e zɔlɔ.’

¹⁰ Ghəa ghən fə̀ sə tənəghā tə təgha; ghe n daŋso kòom sè nùghù kɔ̀ʼ ndùw fʉgha vʉ̀ ù dzə̀m alo kəwālā.

¹¹ An nə̀gha e te zo ghî ghə̀ n ndùw bùghò an ndughu zəla ghǎʼ mò lo a te ghee a təgha, ghe tum wo a vʉ̀a mùghò, ghe nughù sə wo aŋ Kàesalìa.

¹² Zuʼ tə̀ Zɔlɔ tə n dzɛ̀ â mùghò enyəa Ǹ nughù ndûw ghàʼ à ghee mò Ŋ̀ kâ sə̀mlò. Ghàʼ à ghê waazə̂ ghaŋa à nûu à li ghən tǔu ghe mò lo mo ghe m boo fughu, ghe nughùu wo an Dzopà, ghàʼ à ghee n təəm ndùw sùghò èghue à dzə̀m an Kàesalìa, a n ndùw nyə̀ ndùw an ndughu alô Kònelìus.

¹³ Ù n dzɛ̀ wò â ghàʼ aŋghəa ù mò kôʼ kɔʼ tsə̀ndə̄ghā è Kə̀zə̀ è ti an ndughu alô wə̄n, zə̀ n dzâa wò enyəa, ‘Tum tɔŋɔ wò ghùw ù li an Dzopà ghe tɔŋlo enyəa à Sǎemòn Pità tò u bùghò —

¹⁴ ù bùghò kə̂aa wô ghù â shwaʼ ù li wo, ghù kè zəa tuw ko a te ghɛ̀ à ghê ghì ghə̀a ghò a dzə̀m an ndughu.’

¹⁵ A m bùghò Ǹ daŋso kaʼ tsughu ghəa à kəaa gho, Zuʼ tə̀ Zɔlɔ tə n tsùghù bùghò nyə̌ən tsughu a zəŋò ghee, to aŋghəa tə fə̀ nyəə̄n sughò ghaʼ a te, sûesʉ.

¹⁶ Mùgho n daŋso tɛ̀ mòʼn wo shwaʼ u Mughu ù te aŋghəa ù fə̀ dzɛ̂ enyəa, ‘Dzɔ̌n fə̀ ghî ghò â mùghù ŋ Kə̀zə̀ m fughuu alo mmùghu, ghe lô ghɛ̀ â mùghù ŋ Kə̀zə̀ kuuwn fughuu an Zuʼ tə̀ Zɔlɔ to.’

¹⁷ E kûu zɔ̀lɔ nù êzəŋ enyəa Zə̀ kə fə̀ fughu sugho Toʼò e te zo â namso kə̀ mɔʼɔ̄ kəla Ù fə̀ fughu â sɛ̀ aŋghəa sɛ̌ fə̀ boō tsughu â Mughu ù te, Yɛso Kə̀lestò, mùgho mò lo ndughoo aletə̀ghàsò Kə̀zə̀ aŋ ghəa ghəla kə mò ki aleghəŋlo à?”

¹⁸ Ghəa ghe zuw tsughu ghəa ghən gho, ghe m bughu naŋâ ghəa ghəla ghe mô kəaa ghè ghò, kàʼ ndùw alefughu ŋkɔʼso â Zə̀ kò, dzàa tsùghuu enyəa, “Zə̀ kə̀ m fùghù sùghò ghî ghəla ghe yô Dzûu tò â bùʼ kò alemàʼà bòo tə ghee, to ghe kelê mùghù zəla e doʼò tən.”

Ghî a Kəzə̀ ghən an Antìok

¹⁹ Ghî ghəla ghe fə̀ tiīn sɛ̂ɛ tsughu bòʼ aŋghəa ghe fə̀ fɔeso tsughu Sìtofɛ̀ a te, ghe m bwìi ènyə lɔʼso ndùw sə̀ mìasò ndùw am Fɔ̀enishìa, àsùghò an Saepə̀lùs, àsùghò an Antìok, kòom kə̀aa yò shwaʼ u te wo â ghùw ù lì, kə̀aa tə̀la ko â Dzûu tò.

²⁰ Ghî a Saepə̀lùs à li gho àsùghò a Sìlêen ghò, ghəla ghe boō fughu â Kə̀lestò, ghe ŋ ŋgəəŋ lò sugho am bvʉa e ghì yì an Antìok, ghe ŋ kə̂aa ndùw ghəa a Mughùbè Yɛso â Tòʼò zò.

²¹ Zə̀ kə̀ m fughuu ghee â daʼa ko, ndə̀mà ndəmà tə aghì tə m boo fughu â Kə̀lesto, fə̀n dòʼò wò ghì a Mughu ù te.

²² Ghî a Kə̀lestò ghən an Yɛ̀lusalɛ̀m n zuw làbəlà zən, tùm ndùw Bànabàs an Antìok.

²³ A m bùghò ù bùghò kôʼ tsughu enyəa Zə̀ kə̀ mò ti an tuw kə ghee, ù mo èduʼnlo, fəghaan tɔ̀ʼ tsʉ̀ tsùghu ghee enyəa ghe nəghāa kɔʼ fənyə aŋ ghəa e Mughu ù te, ghe teē təla tsughu a te am fə̂ŋ è ghee e dzə̀m;

²⁴ tɔŋlo enyəa ù fə̀ lo ghùw ù dzùŋ mò à wən ki tən ko Zuʼ tə̀ Zɔlɔ, tughuu sùghò am fə̂ŋ zəla ù gaʼ tsughu aŋ Kə̀lestò. Ghe m fəghaan nì kpèʼe wò ndə̀mà tə aghì a vʉ̀a Mughu ù te.

²⁵ Bànabâs n daŋso nùghù ndùw an Talsùs alendùw kəŋ Sôol.

²⁶ A m bùghò ù ndòʼ kôʼ tsughu sugho wə̄n, ù n nì wò wən an naʼ e Antìok. Zə m bughò dòʼò tsùghù nû enyəa nûm kə te ko kə dzə̀m ghe n ndûw dòʼn zěe tsə̀ghà ko ghèe ghê ghì a Kə̀lestò ghò, zoʼn tsughu ndə̀màndə̀mà tə aghì ènyə. À n lo sugho fɛ an naʼ e Antìok ghe fə̀ zeʼē tɔŋɔ̄ tsughu ghî ghəla ghe boō fughu â Zə̀ kò enyəa à lò Ghî a Kə̀lestò.

²⁷ An tì kə te ko ghiīshʉ̀ghà a Kəzə̀ à li ghə n nùghù tsùghù an Yɛ̀lusalɛ̀m tsùghù wò an Antìok.

²⁸ Ghùw ù ghee u mɔ̀ʼ zən e mò lô Àgabùs n nùghù těe è kɔʼ, dzɛ̀ wò ùshʉ̀ghà enyəa dzə̀ŋ è bǐigh è bǐigh è lì kê nyə̌a am mbī e dzə̀m; ghəa ghən m bɔɔm bùghò sə̀ ko an dzə̂ è wə̄n an tì kəla Kòlodìus fə̀ lo də̀ŋ ne ko.

²⁹ Tsə̀təndə̄ghā tə te tə m boo tsughu enyəa, aŋ ŋgəŋ è ghee chìa è də̀mà tsughu ko aletuū fughuu ndûw èyòsò â ghì ghəla ghe mughu aŋ Dzùdîa mo ghe m boo fughu sùghò â Kə̀lestò.

³⁰ Ghe ŋ ghəŋlo è tsughu, tuu fughuu ndùw ko aŋ ghùu tsoʼ tə dzeŋe kə ghì a Kəzə̀ tò an Yɛ̀lusalɛ̀m, ghe n ndûw fùghuu ndùw â Bànabàs ghèe Sôol.