Kə̀fwàʼ 10 - To kə Kəzə̀ kə̀ Fughu ko

Pità nàʼà tùm è Dzùŋ â Kɔ̀nelìus

¹ Ghùw ù lì n lo aŋ Kàesalìa ghe mò tɔŋlo enyəa à lǒ Kɔ̀nelìus, mò ù lǒ ghùwnē an saʼ kə təsùghugòʼ kəla kə mò sə wo an Etalì.

² À mò lo ghùw ù gaʼ fə̀ŋ aŋ ghəa e Kə̀zə̀, ghèe ghê kèndughu kə wə̄n ko kə dzə̀m m fughuu ŋkɔʼso â Zə̀ kò; ù m mwaʼà, fughuu àghì â yòsò zò, gɔ̀ɔŋ zěe sùghò â Zə̀ kò.

³ Tsuʼ ù li wo an nə̀ghà tə ezūuw tə təgha â tsə̀ to, dzoō wə n nùghù tsə̌ən wò wə̄n, ù ŋ kòʼ tsùghu tsə̀ndə̄ghā è Kə̀zə̀ e nyəā wo, dzàa wò â wən enyəa, “Kɔ̀nelìus.”

⁴ Ù n lɛɛn ko tsə̀ndə̄ghā zə alo etsə̄ŋ alo etsə̄ŋ, nùghù bvʉ tsughu enyəa “À lǒ kwò à Mughùbè?” Tsə̀ndə̄ghā zə m bɛ̀lɛ̀ tsùghù enyəa, “Zə̀ kə̀ tsoʼn nù am fwàʼ kə̀a kə̀ dzûŋ kə̀là ghù fwàʼa, chia kə zuw sughò gɔ̂ɔŋ zə̀ghà zò.

⁵ Ezə̄ŋ, tum ndǔw ghùw an naʼ e Dzopà, to ghe ndûw tɔŋɔ fughu wô ghù â ghùw ù lì a fughu ghe tɔŋlo enyəa à lǒ Sǎemòn Pità.

⁶ Ù mò nduw nyə alô Sǎemòn, ghùw ù lì ù fwàʼà aŋ gùw tə nyòm, ndùghù è wən ti a ŋgùŋ è dzùghùntsòʼ.”

⁷ A m bùghò tsə̀ndə̄ghā zə̀ è mò kə̂aa ghəa gho â wə̄n nughù tsughu, ù n tɔŋɔ sə̀ wò kɔ̀ ŋ wə̄n m bə̀ghà àsùghò sùghugòʼ è wə̄n e mɔ̀ʼ mò ù bǒo fùghù sùghò aŋ ghəa a Kəzə̀, mò ù fə̀ lo ghùw u mɔ̀ʼ an sùghugòʼ təla tə fwaʼa â wə̄n,

⁸ Ù n dzɛ̀ tsughù fəgha kəla kə mô tsəgha kə dzə̀m â ghee, daŋso tùm ndùw ghee an naʼ e Dzopà.

⁹ A m bùghò â ŋgàlà tsə̀ to an tsuʼù lì vʉ̀, aŋghəa ghe lo an dziī, mo ghe sô kùʼso ndùw naʼ e te zo, Pità n nùghù kɔ̀ʼ ndùw aŋ gɔ̀ŋ kə ndughu alekɔʼɔ̄ gɔ̂ŋlò.

¹⁰ Dzə̀ŋ n za tsughu wə̄n, ù n ləghaa alezəā ndûw kə̀fəgha. A m bùghò ghe naām biān ghəa a te gho, tɔ u wən wə n nùghù sòʼ sə̀ kɔʼ dzwoō wə n tsəaa wò wə̄n.

¹¹ Ù ŋ kòʼ ndùw wala kə nughù tsʉ tsughu, fəgha kə̀ li ko tǒ mgbàʼà kə mbà kə kəfəgha kə̀ li ko, kə n səa tsughuu wò mò à sèe tsùghuu wò buw ghə a dzūghū a te gho a chìakò.

¹² Nyôm tə̀n tə̀ dzə̀m tə bwiī, təla tə ghâaŋlo, àsùghò nwə̀n mò, ghe n lo am fəgha kə te ko.

¹³ Pità mo ezuw ghùw ù lì sò dzàa wò â wən enyəa, “Nùghu kɔʼ a Pità, winlô, ghù pfʉ.”

¹⁴ Pità mo enyəa, “Ɛ̂ŋgaŋ a Mughùbè; Ŋ̀ kaām zə kòʼ fəgha ko mo kə dzɔ̂ɔ yò ŋkāa mo bughōo kə enaʼ kə kâ bǒo.”

¹⁵ Ghùw vʉ n dzɛ̀ kpèʼe wò â wən enyəa, “Fəgha kə̀là Zə̀ kə̀ sûw naŋā tsughu ghù kì yo aledzɛ̀ enyəa bughōo kə enaʼ kə kâ bǒo.”

¹⁶ Ghəa ghən n sə tənəghā tətəgha, ghe n daŋso nì nùghù kɔ̀ʼ ndùw fəgha kə te ko alo kəwālā.

¹⁷ Ezə̄ŋ, ghəa tuw kə naām kpuūw Pità aŋ ghəa ghəla e lô aleghəə̄ŋ səā kɔʼ am fəgha kəla e kôʼ tsughu an dzǒo, ghî ghəla Kɔ̀nelìus tum wo m fùw sə̀ èkɔʼ. Ghe n ti a fù u ughɔ̄ŋ ghəa ghe bvʉʉ̄n kele kɔʼ ndùghù è Sǎemòn.

¹⁸ Ghe n tɔɔŋ nyəa wò an dzə̂ è tughu alebvʉā zuw enyəa Sǎemòn wəla ghe tɔŋlo enyəa à lò Pità lò kpɛʼɛ̄ mughu a fughu.

¹⁹ Ghəa Pità naām kəŋo tuw ko aŋ ghəa yì ù kòʼ tsughu an udzǒo, Zuʼ tə̀ Zɔlɔ tə te tə n dzɛ̀ â wən enyəa, “Ghù wɛ̀ɛ, tuw tə aghì tə̀ li tə lo fɛ tə təgha, ghe kəŋo ghû.

²⁰ Nùghù kɔʼ êzə̄ŋ, sə tsùghù ndùw, ghù nyoʼn nughu nduw ko ghɛ̀ à ghee mò ghù kà sə̀mlò; tɔŋlo enyəa Ŋ̌ ghee tum nû.”

²¹ Pità fi sə tsùghù kòʼ ndùw nù ghî yì gho, dzɛ̀ â ghee enyəa, “Ǹ lo ghùw wəla ghɛ̀ kəŋo ma; à ghɛ̀ fɛ nì wò kwò à?”

²² Ghe m bɛ̀lɛ̀ tsùghù enyəa, “Komndzughu ù tə̀ sùghugòʼ Kɔ̀nelìus tùw wò ghàʼ, u lǒ ghùw ù dzùŋ, vʉ̀a ù boō fughu sugho â Zə̀ kò, Dzûu tia tə fughuu sugho wə̄n â kɔʼso mò. Tsə̀ndə̄ghā è Kə̀zə̀ mò teso tsughu â wən enyəa ù tuū tɔŋɔ wô ghù enyəa ghù bugho alô wə̄n, e zuw ghəa ghə̀là ghù ki alekə̀a.”

²³ Pità fi tɔŋɔ nyə wò nǔ ghee, dè ndùw ghee â luʼū kə̀ bwii ko. Tsuʼ ù li vʉ̀ ù n nùghù nùghù ndùw ghèe ghee, waazə̂ à li ghəla ghe boō fughu sugho â Kə̀lestò an naʼ e Dzopà n nùghù ndùw ghèe ghee.

²⁴ Ghe n nyəaa ndùw aŋ Kàesalìa an tsūʼ ù li vʉ̄a u dzûum wo. Ghəa Kɔ̀nelìus mò kwo enyəa ghe bughòo nù, ù n nàʼà tsùghù tom a wə̄n, àsùghò fə̀n a wən à tughu gho.

²⁵ Aŋ ghəa Pità nyəa ndûw ènyə, mò Kɔ̀nelìus sə̀ tǐ ghèe wə̄n daŋso tə̀m ndùw tə̀ŋguʼ a tsəlà wə̄n, fùghù ndùw wən â kɔʼso mò.

²⁶ Pità n nîi nùghùuŋ kɔ̀ʼɔ wə̄n dzàa tsùghuu enyəa, “Nùghu tee kɔʼ edzūŋ; Ǹ lo sugho ghùw.”

²⁷ A m bùghò ù kə̀aa ndûw ghəa gho ghèe wə̄n ù n tsə̀ghà nyə̀ ndùw an ndughu, nyə̀ kòʼ ndùw àghì mo ghe n tsūŋ.

²⁸ Ù n dzɛ̀ â ghee enyəa, “Ghuē è ghùe zɛʼɛ̄ e mgbaŋ tɔ̀ʼ kwò sugho nû enyəa lâŋ kə̀ kâ bǒo dzə̀ enyəa ghùw Dzûu dòʼò dzəŋlo ŋkāa ù ndùw bwîin kôʼ Ètòʼò; Zə̀ kə̀ ŋ kòom dè tsùghù â mùghò enyəa e kwo Ǹ lô niī ghùw ù lì tǒ làŋà kə ghûw ŋkāa tò udzʉ bòʼ bughōo kə enaʼ kaŋā.

²⁹ Zən lò e ghee aŋ ghəa ghe mò tum tɔŋɔ̄ wô mugho, mùghò n daŋso sə̀ tɛ̀ wò ko nù, kè sə̂mlò. Êzə̄ŋ, Ǹ lo nû alekpaʼā bvʉā tsughu ghəa zəla ghɛ̀ tɔŋɔ̄ mugho fɛ à tè à?”

³⁰ Kɔ̀nelìus m fùghù ndùw fə̀n kə edzughu â wən enyəa, “A fə̌əgh ù lǐ ù vʉ̂, an nə̀gha zən sùghò ènyə, mùghò ŋ gɔ̂ŋlò an nə̀ghà tə ezūuw tə təgha â tsə̀ alô mùghò an ndughu, mùghò me kôʼ ghùw sə̀ tì an sə kaŋā an ndzʉ̄ tə̀ nyəghaan to.

³¹ Ghùw vʉ mo enyəa, ‘Kɔ̀nelìus! Zə̀ kə̀ ŋ gɔ̀ɔŋ zə̀ghà è zuw, chia kə kòʼ sugho fughu kə̂a kò.

³² Tum ndùw ko ghùw êzəŋ an Dzopà ù ndùw bvʉā tsughu Sǎemòn; wəla ghe tɔŋlo enyəa à lò Pità; ù mùghù an ndughu alô Sǎemòn, ghùw ù lì ù fwàʼà aŋ gùw tə tənyòm, a ŋgùŋ è dzùghùntsòʼ.’

³³ Mùghò n daŋso tum tsughu ghùw enyəa ghe mbaā bughò tɔŋɔ̄ fughu ghû, ghù vʉ̀a ù tso ŋge dzɔ̂ sugho, è bugho. Ghàʼ fɛ êzəŋ lo nû, an sə kə Zə̀, alezəə̄n mɛʼɛ̀ ghəa ghə̀n à dzə̀m Mughubè ù te dzɛ̂ enyəa ghù kəaa wo.”

³⁴ Pità fi kaʼ tsughu nû ghəa à kəaa gho. Ù n nì tsùghù enyəa, “Kùmkùm mùghò ŋ kòʼ enyəa Zə̀ kə̀ bâa yò kpiī wo,

³⁵ abugho à tso lô ko ndugho, an nàʼà mə̀n ndzə̀mdzə̀m, ù tsəŋ tsughu wə̄n, ghəəŋ ndùw ghəa ghəla a lô tsəghatsəgha, ù n nì nàŋa wə̄n.

³⁶ Ghɛ̀ kwo nû tum zəla ù fə̀ tum nduw â ghì ghə Ezə̀lɛ̂ ghò, tsʉ̀a ndùw àghì aŋ ghəa ghe lô alekele èbughunlo a te am bàm e Yɛso Kə̀lestò (ù lò Mughùbè ù ghì ghə̀n à dzə̀m).

³⁷ Ghe n nàʼà tùm è te an Dzùdîa e dzə̀m, alenìi nughù tsughu aŋ Galèlîi an nə̀ghā zəla Dzɔ̌n fə̀ naʼā mɛʼɛ̀ tsughu mùghù ŋ Kə̀zə̀ mò.

³⁸ Ghɛ̀ kwo nû ghəa ghə̀là Zə̀ kə fə̀ tsuʼ tsughu Yɛso, ghùw ù Nazalɛ̀t wə̄n, fughu tsughu wən â Zuʼ tə̀ Zɔlɔ to àsùghò dwaʼa wo. Ghɛ̌ yia kwo sughò ghəa ù mò ŋgəaa ghəə̄ŋ kaāŋ ndûw dzɔ̂ zò, baāŋ ndùw ghì ghəla vʉatsə̄a a naŋā ŋgòʼ a zəŋò ghee, tɔŋlo enyəa Zə̀ kə̀ mò ti a bǎà wə̄n.

³⁹ Ghàʼ lo ghî ghə̀là ghàʼ kwo ghəa ghə̀là ù mò ghəŋlo an naʼ e Tə̀dzûu e dzə̀m àsùghò an Yɛ̀lusalɛ̀m. Ghe ŋ wi tsughu wə̄n mo ghe wə̄n təghàa kɔ̀ʼ alo kədàŋlo;

⁴⁰ Zə̀ kə̀ ŋ kòom nì nùghù kɔ̌ʼ wə̄n an tsuʼ u kə̀təgha wo, zə̀ghàa tsùghù enyəa ù dèe wô ùghue.

⁴¹ Ù ka mo ghue wo â ghì ghò a dzə̀m dê dzə̀, ù mò de wo ko â ghàʼ ghəla ghàʼ tɔ̂ʼ ti aŋ ghəa e wə̄n Zə̀ kə̀ mò tsɔʼ naŋā, aghî ghe mò zə dzə̄ŋlō, mʉ dzəəŋ sùghò ghèe ghee, ghəa ù zòo nughù wo alo evʉ̄.

⁴² Ù n dzɛ̀ â ghàʼ enyəa ghàʼ è kəaa nduw shwaʼ ù dzûŋ wò â ghì ghò, dzàa fùghuu ndùw enyəa Yɛso lǒ ghùw wəla Zə̀ kə̀ mò tsuʼ naŋā enyəa ù è saʼa tuw u ghì ghəla ghe lô â tuw ko à ghì à kpuuwn gho.

⁴³ Ghiīshʉ̀ghà ghə̀n à dzə̀m fə̀ fɛ kâa ko wə̄n enyəa ghùw wəla ù boō fughu tsughu dzə̄ â wə̄n, ghe n ghuuw màʼà bòo tə wə̄n bòʼ Wə̄n.”

Toʼò è kelê Zùʼ tə̀ zɔlɔ to

⁴⁴ Ghəa Pità naām kə̂aa ghəa gho, Zuʼ tə̀ Zɔ̀lɔ tə n tsughu nyəə̄n tsughu a zəŋò ghì yì à dzə̀m ghe mò zəə̄n shwaʼ vʉ̀.

⁴⁵ Dzûu təla ghe mò boō fughu tsughu, nùghù wò a bǎà ghê Pità, dzughu zə n zuu ghee, bòʼ ghe mò kwən fughu dāŋso sugho Etoʼò â namso kə Zuʼ tə̀ Zɔlɔ to;

⁴⁶ nu ghe mò zuuw nduw ghe kə̂aa ghəa gho an sàʼà tə tənàʼà tə̀ nughù tò, ghe kɔʼso Zə̀ kò. Pità n daŋso dzɛ̀ sə̀ wò enyəa,

⁴⁷ “Ghùw ù lì lò nû alekòom kwuū naŋâ mùghù ŋ Kə̀zə̀ ŋ ghì ghən mo ghe n Zuʼ tə̀ Zɔlɔ tə kele sùghò tò sɛ̀ mò kele a?”

⁴⁸ Ù fi dzɛ̂ nù enyəa ghe fughu ghee â mùghù ŋ Kə̀zə̀ mò an zən e Yɛso Kə̀lestò. Ghe n daŋso nàʼà tsùghu wə̄n enyəa ù muʼn doʼò kəŋo ndûw ntsuʼu ghèe ghee.