Dzɔ̌n 19 - To kə Kəzə̀ kə̀ Fughu ko

¹ Paelɛ̀t n daŋso nì fùghù ndùw Yɛso enyəa ghe te sa a wə̄n alo ekwùu.

² Sùghugòʼ tə n nyəm kɔʼ mbɛ kə tə mgbē, dzə̀là tsughu an tuw kə Yɛso, daŋso dzə̀la tsughu wə̄n â dàla è nyə̀ghàan bàŋa zəla à fə̀ dzə̂ən tsəghà ko də̀ŋ kò;

³ ghe m bùghò těe wò a vʉ̀a wə̄n, sùuwn nduw wə̄n, dzàa tsùghù enyəa, “Mbɛ̀ɛ, fə̀kâʼ à tuw wo a te, də̀ŋ kə Tə̀dzûu.” Ghe n səghàan bǔu wə̄n an uswɛ̄ɛ.

⁴ Paelɛ̀t ŋ kòom tsə̀ghàsə̀ è wo, dzɛ̀ â ghee enyəa, “M̀ fɛ nìi sə̌aa wò wə̄n a vʉ̀a ghɛ̀ enyəa ghɛ̀ kele tsughu enyəa Ŋ̀ ka kòʼ ghəa è biigh è li zo ù ghəŋlo.”

⁵ Yɛso fi sə wò nù, à mbɛ chi ko alo kətūw àsùghò dàla è kə̀də̀ŋ zə̀ a zəŋo ughùe. Paelɛ̀t n dzɛ̀ â ghee enyəa, “Ghùw ù te wəlà.”

⁶ A m bùghò tuw u təfɔ̀e ghèe ghê gbè tə Ndùghù è Kə̀zə̀ è ne tə kôʼ ndûw Yɛso, ghe n dì sə wò enyəa, “Tə̀ghaa wə̄n alo kədàŋlo, tə̀ghaa wə̄n alo kədàŋlo!” Paelɛ̀t n dzɛ̀ â ghee enyəa, “Ghɛ̀ nduw təghāa nlò wə̄n aŋ ghu kɛʼɛ̄, nuu Ŋ̀ kâ kôʼ ghəa è biigh zəla ù ghəŋlo.”

⁷ Ghî a ne a Tə̀dzûu a te ghə̀ m bɛ̀lɛ̀ ndùw wə̄n enyəa, “Ghàʼ ki kəlâŋ, lâŋ kə te dêe enyəa ù ki alekpūw bòʼ ù dzɛ̀ enyəa e lo Wɛ ù Kə̀zə̀.”

⁸ Ghəa Paelɛ̀t zuw ndûw ghəa a te gho, ù ŋ kòom tsə̀ŋ mìaso ndùw ènyə

⁹ Ù n nùghù nyə ndùw ebàm am mbɛ̀, nyə bvʉ â Yɛso enyəa, “Ghù bìso nùghù wò ghɛ̀?” Yɛso ŋ kè kuūwn bɛ̀lɛ̀ wə̄n.

¹⁰ Paelɛ̀t fi bvʉ nû â wə̄n enyəa, “Ghù bɛ̀lɛ̀ yò mùghò a? Ghù kwò yo enyəa Ŋ̀ ki nû daʼa kə te ko alezə̀ghàa maʼà ghù, ghù nughu a, ŋkāa àsùghò alenìi təghàa ghù alo kədàŋlo a?”

¹¹ Yɛso m bɛ̀lɛ̀ ndùw wə̄n enyəa, “Ghù yò alekelê daʼa kə̀ li ko a zəŋò mùghò mo kə ka sə̀ tsùghù wò aŋ ghùu Zə̀ kò; e fi lo nû enyəa à dùw tsə̀ghà bo e ghùw wəla ù nì fughu sə wô mugho aŋ ghulô ghɛ̀.”

¹² A m bùghò Paelɛ̀t zuw tsughu êzə̀, ù ŋ kàʼ alekə̄ŋ tə dziī alezə̀ghàa maʼà Yɛso. Dzuū tə ŋ kuuwn tughuu səa kɔʼɔ ko â dzə̀ tò enyəa, “Abugho ghù zə̀ghàa maʼà nduw ghùw wə̄n, à fi lo enyəa ghù dɔ̀ɔm yò dzə̂ fən ù Də̀ŋ kə Lumà kò; nu ghəəŋ tsə̀ghà dzə̀ ghùw fɛ alo enaʼ enyəa e lo kədə̀ŋ, à fi lo enyəa ù tsʉ̂ʉn tuw kə Də̀ŋ kə Lumà.”

¹³ Ghəa Paelɛ̀t zuw ndûw shwaʼ u te wo, ù n nì tìso sə̀ wò Yɛso, tsùghù dòʼò tsughu am ndàŋ zəla ù saʼā ghî ghò a te, mò è ki mgbàʼà kə ebugho, ghe tɔŋlo an shwaʼ u Hibùlù enyəa à lǒ Gàbatà.

¹⁴ An nə̀gha zə̀ èzə̀, am bən lò â zuw e kɔʼɔ teme zo, an tsuʼ fəla zə kə̀ zəŋso naaŋ kə bvʉ̂a bwiī a te, Paelɛ̀t n dzɛ̀ â Dzûu tò enyəa, “Də̀ŋ kɛʼɛ kə̀là.”

¹⁵ Ghe n tughuu səa kɔʼɔ ko â dzə̀ enyəa, “Wi wə̄n, wi wə̄n, təgha wə̄n alo kə dâŋlo!” Paelɛ̀t m bvʉ â ghee enyəa, “A wi dəŋ kɛʼɛ a?” Tuw u təfɔ̀e wə m bɛ̀lɛ̀ ndùw wə̄n enyəa, “Ghaʼ ki yo də̀ŋ kə̀ li ko, à gɔ̀ʼɔ̀ ko yo Də̀ŋ kə Lumà kò.”

¹⁶ Paelɛ̀t fi daŋso nì fùghù tsə̀ghà ndùw nû Yɛso â ghee enyəa ghe ndûw təghàa alo kədàŋlo.

Ghe təghà Yɛso

¹⁷ Sùghugòʼ tə̀ n daŋso nì kɔ̂ʼ Yɛso aŋ ghu kə ghee. Ghe n nì sə̀ ndùw Yɛso mò u m bòʼò kèle dâŋ ko, nì ndùw wə̄n aŋ kwàʼ u kaŋ kə kətuw, mo e moʼnlò an shwaʼ u Hibùlù enyəa à lò Gɔɔlgɔtà.

¹⁸ Ghe n tə̀ghà kɔ̀ʼ Yɛso fughu èzə̀. Tə̀ghà dzə̌əŋ kɔʼ ghî à tsɔŋɔ à li gho am bùghù tə wə̄n a bə̀ghà [u mɔ̀ʼ aŋ kwe ù təma wo, ù lì aŋ kwe ù kwûu wò].

¹⁹ Paelɛ̀t n tɔ̀m tsùghù sùghò àghəa alo kəbaŋlo enyəa, “Yɛso, ghùw ù Nazalɛ̀t, də̀ŋ kə Tə̀dzûu!” Ghe m bɛ naŋa kɔʼ edzūŋ an dǎaŋ kə wə̄n.

²⁰ Ghe fə̀ wə̄n bɛ kɔʼ am bùghù e dziī, ndə̀mà tə Tə̀dzûu n tsəghàa tɔ̌ɔŋ dàŋà tsə̀ghà ghəa a te gho; a màʼà fə̀ lô an shwaʼ u Hibùlù, Gə̀lêʼ, àsùghò an shwaʼ u Latə̀n.

²¹ Fɔ̀e tə̀ tughu tə Tə̀dzûu tə̀ n dzɛ̀ â Paelɛ̀t enyəa, “Kà tɔm dzə̀ enyəa à lǒ də̀ŋ kə Tə̀dzûu, tɔm tsughu enyəa, ‘Ù mò dzɛ̀ enyəa, “Ǹ lo də̀ŋ kə Tə̀dzûu.”

²² Paelɛ̀t n dzɛ̀ â ghee enyəa, “Fəgha kə̀là Ǹ tɔm tsughu, mùghò n tɔ̄m.”

²³ A m bùghò sùghugòʼ tə bɛ naŋā kɔʼ Yɛso alo kədàŋlo, ghe n nì kɔʼ ndzʉ tə wə̄n bàan tsùghu alo u gbà u chʉ̀akò, dzùghùun tsùghù aŋ ghùe e ghee. A ŋ kuuwn bùghò alô tə tèetee to, tə n lo mo tə ki yo nyùŋ kò, mo tə bɔɔm dà dàŋso tsùghù ndùw ko nù.

²⁴ Ghe mo aŋ ghùe e ghee enyəa, a ka banlò, a kuuwn təma tsughu bòʼ alekòʼ ghùw wəla ù sò kele. Zən fə̀ lo aleluesō tsughu shwaʼ u Kəzə̀ wəla ghîisùghà a fə̀ tɔm naŋā enyəa, “Ghe m dzùghùu tsughu ndzʉ taŋā an ghùe e ghee, təm zə kɔʼ ndzʉ̄ am bòʼ.

²⁵ Kən lò fəgha kə̀là sùghugòʼ tə fə̀ fwaʼ ghè kò.” A m bùghò ghe bɛ naŋā Yɛso êzə̀, ghî ghəla ghe fə̀ ti a vʉ̀a dǎaŋ kə Yɛso kò fə̀ lo ghê zə̀, asùghò wàazə̀ zə̀ ù zən, àsùghò Mèle, tɔɔŋ wi ù Kəlopàs, àsùghò Mèle Màʼdalɛ̂n.

²⁶ A m bùghò Yɛso kòʼ ghəa ghəla zə̂ ghèe tsə̀ndə̄ghā è wə̄n zəla ù mò ŋgeē zəla ù ləghaa ti a vʉ̀a wə̄n, Ù n dzɛ̀ â zə̀ enyəa, “Nughò, kôʼ wɛ wʉ̂a lo!”

²⁷ Ù n daŋso dzɛ̀ ndùw sugho â tsə̀ndə̄ghā zə enyəa, “Kòʼô, zughù vʉ̀a!” Tsə̀ndə̄ghā zə n daŋso nì ndùw zə̂ an ndughu lô wə̄n.

²⁸ A m bùghò ghəa ghən tsəghà tsughu, Yɛso sò kwo enyəa aghəa a dzə̀m ghə m mǐaa, (aleluesō shwaʼ u Kəzə̀ wəla ghiīshʉ̀ghà a fə̀ tɔm naŋā) ù n dzɛ̀ enyəa, “Fə̀ŋ zùʼso mùghò.”

²⁹ Faa kə nlʉ̀ kə̀ li kə n ti fughu am mbɔm, ghe m fan kɔʼ ndùghù zə̀ edzǔu an tɔ̀ŋ kə kəfəgha tsùm sə kɔʼ faa kə nlʉ̀ kə te ko a te, gàʼ ndùw an dzughu e Yɛso.

³⁰ Yɛso n swɛ mʉ kɔʼ lʉ̀ n te mò, daŋso dì sə̀ wò enyəa, “Zə mô êzəŋ e mîaa.” Ù n kum tsughu tuw kə wə̄n, daŋso zwìi mɛ̀ʼɛ̀ kɔ̀ʼ è wo.

Ghe sughò ti zə ebùghu e Yɛso

³¹ Aŋghəa tsuʼ fəla ghe fə̀ bɛ Yɛso a te alo kədàŋlo màʼa fə̀ lo tsuʼ fəla zə kə̀ Zəŋso Naaŋ bvʉ̂a bwiī a te, aleghəə̄ŋ tsughu enyəa gwə̄n e li e lô doʼn doʼnlo alo kədàŋlo, (nu tsuʼ u kəzə u mò lo tsuʼ ù nê wo), ghì à ne a Tə̀dzûu tə̀ n dzɛ à Paelɛ̀t enyəa, “Dzɔ̀ lo enyəa to a mô bvuʼn maʼà fwe e ghee, a nîi nughù tsughu wô gwən a ghee.”

³² Sùghugòʼ tə fi bugho bvuʼn tsughu nû fwee e ghì à li yì à bə̀ghà ghe mò təghàa dzəə̄ŋ kɔʼ ghèe ghê Yɛso.

³³ Â ghee alebùghò a zəŋò Yɛso, ghe ŋ kòʼ kɔ̂ʼ enyəa ù māa kì kpuw, ghe ŋ kê kôom bvuʼn fwee e wə̄n.

³⁴ Sùghugòʼ e mɔ̀ʼ an sùghugòʼ tə te to n nì kɔʼ eghɔŋ tsuʼ nyə kɔ̀ʼ ndùw ti e ebùghu e Yɛso a te, mùghù mə̀ n sə̀ tsùghù wò a te àsùghò kàŋ tò.

³⁵ (Ghùw wəla ù fə̀ kôʼ ghəa ghən gho, mafə̄ bughò teso dzɛ̀ ghəa a te gho — shwaʼ u wə̄n u lo êsəŋò. Vʉ̀a ù ndòʼ kwo sugho enyəa fəgha kəla e teso dzâa wo lǒ êsəŋò — enyəa to ghɛ̀ mô lò aleboō fughu â Zə̀ kò.)

³⁶ Nu ghəa ghən fə̀ enyə sə aleluesō shwaʼ u Kəzə̀ wəla ghiīshʉ̀ghà a Kəzə̀ a fə̀ tɔm naŋā enyəa, “Ghe kê bvùʼ kòʼ yò ghoo kə wə̄n kə̀ li ko.”

³⁷ Mo shwaʼ u Kəzə̀ ù li u dzɛ̂ kpèʼe sùghò enyəa, “Ghe kê lɛɛ̄n kɔʼɔ ndûw ghùw wəla ghe sughùu nyə ndûw ti e ebùghu e wə̄n zo.”

Ghe tsəla Yɛso

³⁸ A m bùghò ghəa ghən bughò tsəghà tsughu, Dzusɛ̀f, ghùw ù Àlìmatìa wəla ù fə̀ tsɔŋ lô sugho tsə̀ndə̄ghā è Yɛso bòʼ ù fə̀ tsəŋō ghî à ne a Tə̀dzûu ghò n ndùw bvʉ̀ â Paelɛ̀t enyəa ù fughuu wô ghee â daʼa ko to e ndûw boʼò nughù gwə̄n e Yɛso. Paelɛ̀t mo è boo, dzɛ̀ â wə̄n enyəa ù ndùw boʼò nughù. Ù daŋso bùghò bòʼò nùghù ndùw gwən e te zo.

³⁹ Dzusɛ̀f m bùghò dzə̌əŋ ghèe Nìkòdɛmùs ghùw wəla ù fə̀ buʼ bughò kôʼ dzə̂ Yɛso â tsuʼ wo an tsuʼ ù li wo. Nìkòdɛmùs m bùghò â fə̀ghà n lə̀mlo n li mò, mo ghe m fɔɔn dzə̄əŋ kɔʼ ghe tɔŋlo enyəa à lò Mayà àsùghò Alòs; mò lò alekwū kwo ù səŋò wò.

⁴⁰ Ghe a bəghà n nì bɔm kɔ̀ʼ Yɛso alo kəbəghalāŋ mo ghe n tsoʼso fə̀ghà n lə̌əm mi aŋ gwən e wə̄n, aŋghəa à lò bughōo kə Tə̀dzûu aletsəən ghî ghò êzə̀.

⁴¹ À n lo êzə̀ mo sum u kuʼù lô an luʼu kəla ghe mô təghàa Yɛso a te alo kədàŋlo. Shîaa zə̀ n lo fughu an sum mo ghe kaam ghùw a te n tsəla kòʼ.

⁴² Aŋghəa à fə̀ tsən lô sughô tsuʼ fəla zə kə Tə̀dzûu kə̀ bvʉ̀a bwîi a te, shîaa e te zə n nyɔ̂ʼ kùʼ n lò sugho, ghe n tsəla naŋa nyə̀ ndùw Yɛso fughu.