Hibùlù 9 - To kə Kəzə̀ kə̀ Fughu ko

Ŋkɔʼso alo kəwalā àsùghò aŋ ghueekətsə̄

¹ Kàa n sûesʉ mən fə̀ kì lwâŋ wəla u deē aŋghəa a ki alefughuu kɔʼso mò a te â Zə̀ kò àsùghò luʼū kə̀ baa kəla a ki alendùw fughuu Zə̀ kò â kɔʼso mò a te am mbī.

² Ghe fə̀ ti kɔʼ kəpfʉ̌a, ghe m gbò dzùghùun tsughu alo dzughu a bə̀gha alo evʉa, an dzughu e sûesʉ zə, à n lo ti kə lam a te àsùghò ndaŋ kəla ghe gaʼā naāŋ bɛ kəla ghe fughuu â Zə̀ kò, ghe n tɔŋɔ tsughu luʼū kə te ko enyəa, Luʼū kə̀ Baa ko.

³ An dzughu e kə̀ bə̀ghà zən, ghe tɔŋɔ tsughu enyəa à lo Luʼū kə̀ bâabaa ko.

⁴ A fughu a te, à n lo ti kə etsɛ alekpɛɛn nyee zo a te àsùghò tɛtɛ kə ŋkāa kò mo ghe m bɔ̀me kaaŋ wò alo etsɛ, an tɛtɛ kən, tôo fə etsɛ̀ fə̀ li fə n lo a te àsùghò fʉ̀ghàzəa wəla ghè tɔŋlo enyəa à lo manà a te, àsùghò mbàŋ è Ɛlɔ̀n è nyə̀nlo mo fôo tə m fùw sə̀ kɔʼ a te, àsùghò bwaaŋ wə atia wə ŋ kàa mən mò u bʉ̀ghà.

⁵ An tuw kə kətɛtɛ kən, à n lo fʉgha ù li wo ù ki ghûo tò mo ghe tɔŋlo enyəa à lǒ tə̀chɛlòbîn tə dêe tsughuu enyəa Zə̀ kə lo nu fughu, mo ghûo tə ghee tə n tsən kele tsughu luʼu kəla ghe mò ghuuwmaʼn bôo tə aghì to a te. A kuuwn yò dzə̂ aletɔʼɔ teso dzâa wô ghɛ̀ â ghəa ghən gho êzəŋ a dzə̀m.

⁶ Ghəa ghe bian naŋa tsughu ghəa gho, fɔ̀e tə n ndûuw zěe ko dzughu e kəpfʉ̌a e sûesʉ zən, ghe nduw fwaʼā fwàʼ kə ghee kəla ghe ki alefwàʼ ghè kò.

⁷ A fə̀ kuuwn nyəa ko tuw kəfɔ̀e an dzughu e kəpfʉ̌a e kə̀bəghà zən wə̄n à nəŋ ko, ù fə̌ fughu nyəa ko enəgha e mɔ̀ʼ alo kənùm; mò ù so e nyəa fughu, ù ŋ ki təkâŋ alenyəa fughuu nduw â Zə̀ kò an tuw kə wə̄n àsùghò am tuw u ghì ghəla ghe mò ghəəŋ bôo tò mo ghe kwo yo.

⁸ Zuʼ tə̀ Zɔlɔ tə fə̀ deē tsughu aŋ ghəa ghən enyəa dzì aletsəgha nyə an luʼu kə̀ Bâabaa ko kaam ghue wə n tsʉ dzə̀ aŋghəa dzughu e kəpfʉ̌a e sûesʉ zən fə̀ naām lo dzə.

⁹ Zən lǒ tsəa zəla è dèe nəgha zəla a lo ezəŋ a te. E dêe enyəa fʉgha wən àsùghò nyòm təla ghe fə̀ sâa fughu nduw â Zə̀ ko yò dzə̂ aleghəəŋ fə̀ŋ e ghùw wəlà ù fughu kɔʼso n te mò enyəa zə̀ e zɔlɔ.

¹⁰ Ghəa ghən a dzə̀m ghe ghənlo, ghe ghəəŋ ndùw ko bòʼ dzughu è zəa zo àsùghò fʉgha ù mʉa wo, àsùghò ghəa à fughuu â ghûw ghò â mùghù ŋ Kə̀zə̀ mò. Wən lò ko lwâŋ wəla u yo dzə alekuuwn fə̀ŋ è ghùw, mo lwâŋ u te u fə̀ fwaʼ bugho kum tsughu ko an nəgha zəla Zə̀ kə fə̀ ghəəŋ tsughu enyəa aghəa a dzə̀m dòʼò à fughu gho.

Kə̀lestò lǒ fughu kəla kə kpe

¹¹ Kə̀lestò ŋ kuuwn m bugho tò tuw kə fɔ̀e aŋ ghəa à dzûŋ ghəla a lo mo ghə m bùgho. Pfʉ̌a kəla ù fwaʼà ghəa a wə̄n gho a te, kə ghaʼa nù, chia kə tɔ̀ʼ fəghaan ti sugho tsəghàsə pfʉ̌a ù li wən, mò à kà ghùw bəgha dzə̀, (à fi lo enyəa pfʉ̌a kə te kə yo dzə̂ fɛ am mbī zən)

¹² Aŋghəa Kə̀lestò a fə̀ nyə nduw an luʼu kə̀ baa ko, u ka fə nyəa dzə̀ â kàŋ tə dzə to ŋkāa tə mbɔ̀ŋ tò, ù fə̀ a fughu nyə ko enəgha e mɔ̀ʼ, nyə tən ko êsəŋò, aŋghəa ù fə̀ nî kɔʼ kâŋ tə wə̄n to, ù n zùe sə̀ wò tuw u sɛ̀ a te, zue tən ko ê səŋò.

¹³ Fɔ̀e tə mò bugho ghe ŋ waan ndùw kàŋ tə tədzə àsùghò kàŋ tə təmbɔ̀ŋ tò àsùghò dzwə̀m u tsʉa u mbɔ̀ŋ zəla ghe kpâa kɔʼ a zəŋo ghì ghəla ghe dzəā an sə kə Kəzə̀ an nəgha zəla ghe mò suūw ghî gho a te, ghî a te ghə n zɔ̀n e tsughu.

¹⁴ Kâŋ tə Kə̀lestò tə̀ ŋge tùghù tsə̀ghàtàʼà sə ghəa ghən a dzə̀m! Am bàm e Zuʼ tə Kəzə təla tə doʼò tən ù m fùghù ndùw ghue u wən an tuw u sɛ̀ tǒ fughu kəla kə kpe â Zə kò. Kâŋ tə wə̄n tə lo sûuw zɔnso fə̀ŋ tə sɛ̀ aŋ ghəa ghəla a nîi wô vʉ zo, enyəa to sɛ̀ e lo alefwaʼā Zə̀ kəla kə lo â tuw ko.

¹⁵ À fi lo enyəa Kə̀lestò lǒ ghùw ù nî wô kàa m fughu mò enyəa ghî ghəla Zə̀ kə mò tɔŋɔ ghee e lo alekele fəgha kəla ghe mo to naŋa enyəa ghe lo kele tə̀n. Ghəa ghən lo səa nù bòʼ Kə̀lestò mafə kpuw alezuū səa wô tuw u ghee am bòo tə ghee təla ghè ghəə̄ŋ tsəgha tì kəla kàa n sûesʉ m fə̀ naām ki daʼa ko a zəŋò ghee.

¹⁶ Â to ko alekele kə̀daʼa, a ki aledèe tsughu enyəa ghùw wəla ù to naŋa to kə te ko m kpuw.

¹⁷ To kə daʼa kə kele ko abugho ghùw wəla ù mò to naŋa to kə te ko buw â tuw ko. To kə ki tsəgha yo fwàʼ ko abugho mughu wəla ù mò to naŋā to kə te ko naam lo â tuw ko.

¹⁸ Zən lò e ghee kàa n sûesʉ mən fə̀ bûʼ yo aleghə̂əŋ ghəa e li zo mo kâŋ tə yo.

¹⁹ Zə lo e ghee aŋghəa Musî fə̀ tɔɔ̄ŋ dzɛ̂ mɛʼɛ nduw lwâŋ u Kəzə̀ wò aŋghəa ghe tɔm naŋa â ghì gho a dzə̀m, u n tsûu kɔ̀ʼɔ̂ kâŋ tə təmbɔŋ àsùghò tə tədzə to àsùghò mùghù mò a te an nyùŋ təndzì tə baŋa to mo ghe nyeme kɔʼ alo təkəŋo waan ndùw am mwàʼsò kə kəlàŋ kə te ko àsùghò a zəŋò ghì yì a dzə̀m.

²⁰ A m bùgho ù walā nduw, ù n dzâa tsughuu enyəa, “Tən lò kâŋ tə kàa məla Zə̀ kə̀ dzɛ̂ enyəa ghɛ̀ è bwiī a te.”

²¹ An dziī è mɔ̀ʼɔ, ù ŋ waan kaaŋ wò kàŋ tə te to am pfʉ̌a chì àsùghò am fʉgha wən ù dzə̀m ghe mò nî kɔʼso tsəgha Zə̀ kò a te.

²² Kùmkùm alo kəlàŋ, e lo ko tò a e soō a fʉgha wo u dzə̀m sûuw ko alo təkàŋ, àsùghò enyəa abugho kâŋ tə̀ doʼkè tsughuu tsughu Zə̀ kə̀ yo sughò aleghuūw maʼà tə̀bòo.

Kə̀lestò fə̀ kpuw alenîi nughùu bòo tə sɛ̀

²³ E mò kuūm lo nû enyəa to ghe mô sûuw maʼà tsughu fwèen kə ufʉgha u kəwala wən fɛ am mbī mo ghe sɛ̂ fùghù ndùw tənyòm, ghe kuuwn sûuw maʼà fʉgha u kəwala wo mo ghe sɛ̂ fughu ndùw fəgha kəla kə ŋge tsəghàtaʼà sə nyôm tò.

²⁴ Kə̀lestò kà nyə̀ ndùw dzə̀ an lùʼû kə̀ baa kəla ghe bəgha aŋ ghu, mò à lǒ fwěen kəla kə kûm lo, ù fə̀ laam nyə daŋso nduw alo kəwālā, alendùw tee a vʉa Zə̀ kò an tuw u sɛ̀.

²⁵ Tuw kə fɔ̀e kə Tə̀dzûu kə nyəa tsəgha an tsughu è dəghà zò nûu tə̀ nùu à kàŋ tə nyôm tò. Kə̀lestò kà fə kuuwn nyə̀ ndùw dzə̌ fughu enyəa e ndûw fughu tuw kə wə̄n, ù e koōm fughuu kwenlo.

²⁶ Abugho e mò lo ezə̀, à fi lo enyəa to Kə̀lestò mò fala ndə̀mà tə̀nəgha alekaʼa nughù wô aŋghəa mbī mò kaʼ tsughu. E fɛ kuuwn lo enyəa, ù fə̀ tee sə tən wo ko e nəgha e mɔ̀ʼ aŋghəa mbī fə̀ kaʼa wo alemìaa, alesùuw maʼà èbo aŋghəa ù fə̀ nî fughu sə wô ghue u wə̄n wo a te tò kefughu.

²⁷ Ghuw kì ko alekpuw enəgha e mɔ̀ʼ, ghe n daŋso saʼ tsughu saʼ e wə̄n.

²⁸ E lo sugho êzə̀ enyəa ghe mǒ Kə̀lestò fɛ sɛ tən nduw ko enəgha e mɔ̀ʼ alenìi nughù bòo tə ndə̀mà tə aghì. Zəa e lô sugho enyəa ù kè kòom bùgho kpèʼe nù alebùghò kôʼ ghî ghəla ghe mbûuŋ keē wə̄n, mò ù kòom bùghò yo alebùghò sûuw maʼà bòo tə aghì, mò ù bùgho alebùghò bəghāsə̄ ghee.