Hibùlù 8 - To kə Kəzə̀ kə̀ Fughu ko

Yɛso, Tuw kə Fɔ̀e kə sɛ̀

¹ Tiso kə eghəa aŋ ghəa ghəla a kə̂aa fɛ lò enyəa, a ki tuw kə fɔ̀e tò kəla a kə̂a ghəa a wə̄n gho fɛ, mò kə dòʼ aŋ kwe ù təma wo an ndàŋ è Kwifɔ̀e alo kəwala.

² Ù fwaʼa an tsughu è dəghà zò, àsùghò aŋ kùm kə kəpfʉa kəla Mughu u te mò tiso kɔʼ, mò a kà ghuw wə̀ nsɔ̌ɔŋnchùw bəgha dzə̀.

³ Ghe tuw u təfɔ̀e wən u dzə̀m tsuʼu naaŋ kɔʼɔ enyəa ghe e fughuu fughu wo, sàa ndùw ùfʉgha â Zə̀ kò an tuw u aghì, tuw kə fɔ̀e kə sɛ̀ kə fi telè ki sugho nû fəgha ko alefughu.

⁴ Tɔŋlo enyəa abugho ù mò lô fɛ aŋ ghueekətsə̄ to ù kà mô fɔ̀e doʼo dzə̀, nu ghî à ki lò tsəgha nû ghe fughuu fughu wəla lâŋ kə Musî kə̀ dzɛ.

⁵ Ghəa ghəla ghe ghəŋlo lo tò kəzəŋso am fəgha kəla kə lo an tsughu è dəghà zò alo kəwala. Tɔŋlo enyəa aŋghəa Musi fə̀ so e tiso kɔʼ pfʉ̌a kə te ko, Zə̀ kə̀ n dzɛ̀ â wə̄n enyəa, “Kòʼo tsughu enyəa ghù ghəəŋ tsughu ghəa a te gho a dzə̀m doʼo tsughu am fôʼ zəla mùgho mò de â ghù aŋ ukwàʼ.”

⁶ E fɛ kuuwn lò enyəa Kə̀lestò bùghò kele kɔʼ fwàʼ kə fɔ̀e kəla kə dzɔ̂ tsəgha fwàʼ kə fɔ̀e tə wii to, tò aŋghəa kâa məla ù nì wo aŋ ghùu Zə̀ kò bùghò â ghè mo â ghì gho n dzɔ̂ tsəghà taʼa n sûesʉ mò, bòʼ enyəa ndə̀mà tə aghəa a dzûŋ tə̀ lo səa wò a te.

⁷ Abugho ghəa è li e mô boo yo aŋ kàa n sʉesʉ mò, to n lǐ mò ŋkâa kà mò kòom sə̀ kɔʼ dzə̀.

⁸ Zə̀ kə koʼ tsughu enyəa ghî a te a ghəəŋ bonlo aghəa, kə n dzɛ̀ tsughu enyəa, “Mùghò Tsə̂ntə̀mbî, Ǹ dzɛ̂ enyəa, Tî kə̀ bughòo nu, kəla Ǹ lo zəa kàa m fughu mò ghàʼ à ghê kèndughu kə Ezə̀lɛ̂ kò àsùghò ghàʼ à ghê kèndughu kə Dzudà kò.

⁹ Kə lo yo dzə̀ tǒ kàa məla mùgho fə̀ zə ghaʼ à ghê tselè tsele aŋghəa mùgho fə̀ kwu tsughu ghee an ukwe nì nùghu sə̀ kɔʼ wò ghee an naʼ zə Edzip. Ghe fə̀ koom bwiī dzə yo am fəgha kəla mùghò fə̀ zə naŋa kàa mò a te ghàʼ à ghee, mugho ŋ kôom kì yo nəgha e ghee zo.

¹⁰ Tsə̂ntə̀mbî dzɛ̀ enyəa, ‘Mən lǒ kàa məla Ǹ lo zəā kɔʼɔ ghàʼ à ghê kèndughu kə Ezə̀lɛ̂ kò abugho tsuʼu n te lo tsəghà tsughu. Ǹ lo dzə̀là nǎaŋ ndùw lwàŋ waŋa an tuw kə ghee, Ǹ tɔɔ̄ naŋa ndûw sugho am fə̀ŋ tə ghee, Ǹ lo doʼò tsughu Zə̀ kə ghee, ghe doʼò tsughu ghî ghaŋa.’

¹¹ Ghùw lo e yo dzə̂ alezoʼn nduw fən ŋkāa wàazə enyəa, ‘Ghù ki alekwo Mughu ù te.’ Tɔŋlo enyəa aghî a dzə̀m lo kwo nû mugho alekaʼā nughù tsughu am bvùʼu mən kɔʼ tɛ ndùw aŋ ghi à səŋò ghò.

¹² Ŋ̀ kê ghuūw maʼà ghəa a ghee a biigh gho. Mùgho è ke koōm moʼn yo fɔ tə aghəa təla ghe fə̀ buʼù ghəə̄ŋ tsəgha.”

¹³ Ghəa ù fə̀ dzɛ̂ tsughu enyəa, kàa mən lo m fùghu mò, ù fə̀ fi ghəəŋ tsughu nû n sʉesʉ mə n doʼò tsughu ŋ wǐi mò. Abugho fəgha kə doʼò dzə kə̀ wii ko, chia kə laā nduw, kə fi so e bughò mia sə.