Hibùlù 7 - To kə Kəzə̀ kə̀ Fughu ko

Dzì è Mɛ̀chisɛdɛ̀k è ghə̌əŋ zo aghəa tǒ fɔ̀e

¹ Mɛ̀chisɛdɛ̀k wən fə̀ lo də̀ŋ kə Salɛ̀m, ù n lò sughu fɔ̀e è Zə̀ kə̀ Ghaʼa ko. Ghəa Abə̀làhâm bughoo ebam mò ù n dwəŋ wən wo ù chʉakò an tsam ndùw tə̀m zə̀ wò, Mɛ̀chisɛdɛ̀k m bùgho kòʼ wò wə̄n, fughu tsughu wə̄n â bughuso zo.

² Abə̀làhâm n nì kɔʼ fʉgha wən ù dzə̀m ù mò təm zə wo an tsam dzùghùu tsughu alo ukwaʼ eghəm, nì sə̀ wò kəkaʼ kə mɔʼ a te fughu nduw â Mɛ̀chisɛdɛ̀k. Zən e Mɛ̀chisɛdɛ̀k zən mòʼnlo enyəa, “Də̀ŋ kə tsəghatsəgha ko.” Mo e moʼn sùgho enyəa, “Dəŋ kə Salɛ̀m kò.” Tɔ̂ɔŋ “Dəŋ kəla kə nîi wô bughuun zo.”

³ À lo ghùw mò a kwo yo tsele ŋkāa zə̂, ŋkāa kèndughu kəla u sə a te, kwo sugho yo tsuʼ fəla ghe fə dzə wə̄n a te àsùghò fəla ù fə̀ kpuw a te. Ù fwěen ko wɛ ù Kə̀zə̀, vʉ̀a ù lo fɔ̀e zəla è dòʼò tən.

⁴ Kòʼ aŋghəa tuw wən mò ghaʼa a te a! Ghuūghùe wə Abə̀làhâm tsele ù ghê tselè tsele a sɛ̀ n nì fə̀ndzùghòo am fʉgha wəla ù mò təm zə wo an tsam, fùghù ndùw â ghee.

⁵ Ghî ghəla ghe sə an tigh kə Lɛvi, ghe doʼn fɔ̀e tò, à lò kəlâŋ â ghee enyəa ghî a ki alefughu wo ghee â ndzùghòo am fʉgha u ghee wəla ghe kele tsughuu, mo ghî a te a lo waazə̂, aŋghəa waazə̂ a te a bûʼ lô ko mo ghee sə an tigh kə Abə̀làhâm.

⁶ Ghùw wən, mò ù kà fughu alo kətigh kuuwn sə, ù nì ndùw ndzùghòo fia Abə̀làhâm mò bughò fughu wo â wə̄n, fughu Abə̀làhâm â bughuso zo Abə̀làhâm wəla Zə̀ kə fə̀ to naŋā fʉgha u te wo â wə̄n.

⁷ E kûm lò nû enyəa à ghùw telè bughuso ko ghùw wəla ù tsə̀ghàtàʼà sə wə̄n.

⁸ Am bùʼ kən, à ndzùghòo fə̀ fɛ nîi ghì ghə nsɔ̌ɔŋnchùw mo ghe lo kpuuw nù Yia a kuuwn bugho am bùʼ kə Mɛ̀chisɛdɛ̀k, à fə̀ ni wə̄n wəla ghe tɔm naŋā am mwàʼsò kə Kəzə̀ enyəa ù naām lǒ â tuw ko.

⁹ Aŋghəa a lô alebùʼù dzâa sughò enyəa ghuūghùe u Lɛvì, (tsele â ghî ghəla Abə̀làhâm fə̀ ndûw kɔʼ fughu ndzùghòo fə wə̄n fo â ghee), ù fughuu sùghò nǔ ndzùghòo fə wə̄n fo am fʉgha u wə̄n wəla ù kele kɔʼɔ̄ bòʼ Abə̀làhâm.

¹⁰ À fə̀ lo mo ghe kafə kaam dzə Lɛvì aŋghəa Mɛ̀chisɛdɛ̀k fə̀ kpeēn ghèe tselè ghê tsele tɔɔŋ Abə̀làhâm.

Yɛso lò ko tǒ Mɛ̀chisɛdɛ̀k

¹¹ Abugho e lò enyəa fɔ̀e təla tə sə an tigh kə Lɛvì fə̀ fwaʼa dzɔɔ̄ nu fwàʼ kə ghee ko, (nu à fə̀ lo a tsəlà ghee ghî a mò zuuw nduw lâŋ ko) to Zə̀ kə̀ ka fə tum wò dzə fɔ̀e e nughù an dzə̀ tə Mɛ̀chisɛdɛ̀k, mò à yò dzə̂ an dzə̀ tə Ɛlɔ̀n.

¹² Abugho fɔe kə təfɔ̀e kə̀ kuūwn kɔʼ, laŋ kə n telè kì sugho alekuūwn kɔʼɔ.

¹³ Tɔŋlo enyəa ghùw wəla ghe kə̂aa ghəa a wə̄n gho sə an tigh kə̀ nughù kò, mò fɔ̀e è li kaām sə kòʼ tsə̀gha fughu an tigh kə te ko alenyəa saā fʉgha wo alo ekəŋ.

¹⁴ E zɔlɔ nu enyəa Mughùbè ù sɛ̀ mò sə an naʼ e Dzudà, Musî ka mo ghəa è li e kə̂a kùu ndùw tum kən aŋghəa ù fə̀ kə̂aa ghəa gho kùu ndùw tə̀fɔ̀e.

¹⁵ Zə ŋ kùm bughò sə an ndɛ enyəa fɔ̀e è nùghù m bùgho sə kɔʼ mò è lò sugho tǒ Mɛ̀chisɛdɛ̀k.

¹⁶ Ù ka fə bughò dòʼò dzə̂ fɔ̀e aŋghəa lâŋ kə̀ deē, ù fə̌ fɔ̀e kuuwn bugho doʼō bòʼ daʼa kəla kə lo am mùghù e wə̄n mò fəgha kə yo aledzùuw maʼà.

¹⁷ Ghe teso dzàa am Mwàʼsò kə Kəzə̀ kùu ndùw wə̄n enyəa, “Ghù kè lǒ fɔ̀e è dòʼò tən an dzə̀ tə Mɛ̀chisɛdɛ̀k.”

¹⁸ Ghe mò laŋ kə̀ wii kə baʼ naŋa kɔʼ bòʼ kə mò ki yo daʼa ko, ki sugho yo fwàʼ kò.

¹⁹ Laŋ kə te kə fə̀ ghəəŋ dzə yo enyəa ghəa zə e dzɔɔ̄, aŋghəa e mô ki alelo a te. Ghe n dzì è dzùŋ zəla a lo alechìi tùʼ a te dê â sɛ̀, mo a lo aletsəgha a te alendùw a vʉ̀a Zə̀ kò.

²⁰ Dzì è fughu zəla ghe naāŋ fɔ̀e tò a te fə̀ bəla kə ni mò à fə̀ kɛ tsughu Kəzə̀, kə n zə kɔʼ ŋkâa. Zə̀ ka fə zə dzə̌ kàa mò aŋghəa ghe fə̀ buʼù naāŋ tsəgha waawɛ a Ɛlɔ̀n gho alo təfɔ̀e

²¹ Yɛso ŋ kuuwn bùghò dòʼò tsùghu fɔ̀e mò Zə̀ kə̀ zə kɔʼ ŋkâa, kə to naŋa tsughu â wə̄n enyəa, “Tsə̂ntə̀mbî ŋ kɛ̀ e tsughu, mò ù kè kǔuwn kòʼ yo fə̀ŋ e wə̄n enyəa, ‘Ghù lǒ fɔ̀e zəla è dòʼo tən.’ ”

²² Bòʼ kàa mən êzə̄ŋ, Yɛso m bùghò ghəŋlo sɛ̌ yia a kwo tən enyəa kàa məla a zə sɛ̀ à ghê Zə̀ kò êzə̄ŋ tsəghàsə ŋ wii m mî

²³ Kɔ̂n kə tə̀fɔ̀e kə̀ wii kə mò nduuw nû bòʼ vʉ e mò sɔŋɔ̀ fughuu zeē ghee â mbàŋ, ghe ŋ kôom yò alefwàʼ fwàʼ kə ghee

²⁴ Wən kuuwn yò alebughu doʼò kôʼ mò ù fwàʼa yǒ fwàʼ kə fɔ̀e kə wə̄n ko, tɔŋlo enyəa ù dòʼò tən nû.

²⁵ Zən lò e ghee ù lò alebəghaasə aghî nəgha tən tə̀ dzə̀m, ghî ghəla ghe kuʼso nduw Zə̀ kò mo ghe tsəgha am bam e wə̄n, ghəa ù lǒ mò ù tso mughu tsəgha ko nû alebuʼ kəghu an tuw u ghee.

²⁶ E mò kpe nû enyəa a kele tsughu ŋgòʼ è tuw kə fɔ̀e tò kən, ghùw mò u zɔlɔ nù, ki yo tsû wò, ki yo dzʉ wo, yò dzəəŋ dzə̂ ghèe ghê ghì à biigh gho, mò Zə̀ kə̀ ŋ wə̄n alo kəwala kɔʼso naŋa kɔʼ.

²⁷ Ù ndòʼ kì yo alesaā fughuu fʉgha wo tsuʼu mən n dzə̀m, am bòo tə wə̄n àsùghò alo tə ghì tò, tò aŋghəa tuw u təfɔ̀e ù li wən fə̀ ghəŋlo; ù mò ghəa a te a ghəəŋ tən ko aŋghəa ù mò fughu nduw tuw kə wən ko tò kəfughu.

²⁸ Lâŋ kə Musî kə fə̀ boom nû ghî gho mo ghe tɔʼ ti yo enyəa ghe doʼò tuw u təfɔ̀e; A m bùgho Zə̀ kə̀ zə kɔʼ kàa mò aŋghəa kə fə̀ to naŋā, mo e fə̀ bugho a bǎa làŋ kò, kə n tsuʼ kɔʼ Wɛ ù wə̄n mò ù dòʼo tən tsəghatsəgha.