Hibùlù 6 - To kə Kəzə̀ kə̀ Fughu ko

¹ Sɛ̀ ki aledə̀mà təla tsughu alezoʼn ghue e sɛ̀ zo aŋghəa ghəla a lo aleghəŋlo enyəa sɛ̀ məla tsughu, àsùghò enyəa sɛ̀ e moʼn nduw ghəa ghəla a tsəghàsə ghəa a sûesʉ ghəla ghe mò bû zoʼn dzə sɛ̀ a te kùu ndùw Kə̀lestò. Sɛ̀ kôom ki yo alekə̀aa zee ghəa gho kùu ghəa ghən enyəa, sɛ̀ ki aletiī kuwnlo aŋ ghəa ghəla a nîi wô vʉ zo, ŋkāa aŋghəa sɛ̀ ki alegaʼ fə̀ŋ a te a zəŋò Zə̀ kò.

² Sɛ̀ kôom kì sugho yo alekəā ghəa gho kùu ndùw alezoʼnlo aghì aŋ ghəa à fughu ghûw ghò â mùghù ŋ Kə̀zə̀ mò, ŋkāa aŋ ghəa a ghu à gaʼā nduw gho, ŋkāa aŋ ghəa à kɔʼɔsəa gho alo evʉ, ŋkāa ghəa a dzughu e saʼ zəla e doʼò tən.

³ To sɛ̀ mô ndzə̂a â sə ko, ghàʼ lo zoʼn nù ghɛ aŋ ghəa ghəla a tsəghàsə ghən, abugho Zə̀ kə̀ tsəm.

⁴ Ghùw yò alekòom nîi wô ghì ghəla ghe mò bùʼ kele dzə̂ ghəa ghən gho ebàm, ghî ghəla ghe lo mo ghe maā mɔ̂m zuw fughu u kə kəwala wo, ghe yia a lo mo ghe mafə Zuʼ tə̀ Zɔlɔ tə kele sùghò,

⁵ mo ghe mafə zuw shwaʼ u Kəzə̀ wò, bùgho zuwkɛlɛ tsughu enyəa u dzɔ̂ɔ nù, mo ghe mafə zəən zuw tsùghù sùghò dwaʼa u mbī zəla e bùghoo â sə ko.

⁶ Ghì a te yia a bùghò zəghàa maʼà tsughu Zə̀ kəla ghe mò gaʼ fə̂ŋ tò a te. A kôom yò dzə̂ aleghəŋlo enyəa ghe tii fəla wô ebàm am bòo tə ghee, tɔŋlo enyəa ghe fi təghàan kpèʼe Wɛ̀ ù Kə̀zə̀, dənsò tuw kə wən an ndɛ.

⁷ Ghueekətsə̄ kəla kə mʉā mùghù mə̀ e ghuuw mə̀la n tsughuu teen tsughu a te, kə ghəŋlo enyəa fʉgha u ghì ghəla ghe gwəə̄n sum zo a te e nomlo, kə bughuso e kele wò aŋ ghù Zə̀ kò.

⁸ Abugho ghueekətsə̄ kə kuuwn fughuu kɔʼɔ̄ nyɔ̌ɔŋmgbê wò àsùghò ghè ù tsuʼn wo, kə ŋ ki yo fwàʼ kò, kə n lo ko to ghe n lòʼ naŋa. Ghe m bùgho kpàa màʼà kɔ̀ʼ ghueekətsə̄ kə te ko.

⁹ Aŋghəa ghàʼ buʼù kə̂aa ko ghəa gho fɛ a waʼāwāʼ, ghàʼ kwo tən nû enyəa ghəa a dzûŋ a lo nû â ghɛ̀, â ghɛ̀ ghəla ghe lo mo ghe ghɛ̀ bəghāsə̄.

¹⁰ Zə̀ kə̀ lo tsəghatsəgha, kə yo dzə̂ alenìizə̂ fwàʼ kə̀la ghɛ̀ mò fwaʼ ŋkāa ləgha zəla ghɛ̀ mò de tsughu â wə̄n tɔɔŋ Kəzə̀ an yoso zəla ghɛ̀ mò fughu â ghì a Kəzə̀ à li gho, ghɛ̀ yia naam fughuu ko êzəŋ.

¹¹ Ghàʼ ləghaa enyəa ghɛ̀ a dzə̀m de tsughu sugho ghəa a te gho alendùw kûu mɛʼɛ̀ ndûw, aleghəə̄ŋ tsughu enyəa tùʼ zəla ghɛ̀ chiī ghè zò ghɛ̀ è kwo enyəa e kê lò nû ezə̀.

¹² Ghàʼ ləghaa yo enyəa ghɛ̀ bugho lɛɛ tsughu, ghàʼ laam ləghaa enyəa ghɛ̀ e lo tò ghî ghəla ghe fə̀ ka tsughu zə zo, boo fùghù e tsughu alezə fəgha kəla Zə̀ kə̀ fə̀ to naŋā.

Fəgha kəla Zə̀ kə̀ to naŋa kə̀ tèlè lò êzə̀

¹³ A fə̀ bugho Zə̀ kə̀ toō to ko â Abə̀làhâm, a m bùgho fəgha kə̀ li kə yo kə tsəghasə â wə̄n a alekàa tsughu a te, Zə̀ kə̀ ŋ kɛ̀ tsùghu an zən e wə̄n,

¹⁴ enyəa, “Kùmkùm Ǹ lo fughuu ghù â bughuso zo, Ŋ̀ ghəə̄ŋ tsughu kɔ̂n kə waawɛ ghə̂a kə̀ dûuw tsughu.”

¹⁵ A m bugho Abə̀làhâm ndòʼ ka tsughu sugho zə zo ləma è koo, u m bùgho kèle kɔʼ fəgha kə̀là Zə̀ kə fə̀ to naŋā.

¹⁶ Abugho ghî a zəa kàa mò, ghe kâa tsughu an zən e ghùw wəla ù tsə̀ghasə ghee aŋ ghəa a ghee. Abugho ghî a boōm dzəə̄ŋ yo, ghùw n lo alekàa tsughu aleghəŋlo enyəa ghe tsughuu boō tsughu alo edzughu e mɔ̀ʼ.

¹⁷ A m bùghò Zə̀ kə̀ ləghaa aletɔ̀ʼɔ̀ dêe tsughu â ghì ghəla ghe lo kele fʉgha wəla kə fə to naŋa â ghee enyəa e kuuwn tsə̀ghà yo fə̀ŋ e wə̄n, kə̀ ŋ kɛ̀ tsughu an zən e wə̄n enyəa kə lo ghəəŋ nù êzə̀.

¹⁸ Zə̀ kə fə̀ enyəa an zen e wə̄n kɛ tsughu aledèe tsughu enyəa am bàm e ghəa ghən a bə̀ghà a kuuwn koʼò tsəghà yo, ghəla a ki ghəa ghəla a dêe enyəa Zə̀ kə̀ yo dzə̂ alekaʼ e gha, sɛ̀ ghəla sɛ̀ ti nân wo, a tee tsughuu an tùʼ zəla sɛ̀ chiī ghè zò.

¹⁹ Tùʼ zəla a chiī lo ko tǒ tə̀m â ghue e sɛ̀ zò, yia a tɔ̂ʼ kwo enyəa e lò êzə̀, tɔʼ tì a te, ghùw wəla a chī tùʼ a zəŋò wən lo wəla ù nyəa daŋso ndùw an tsughu e baa zo a bǎa evʉa alo kəwalā.

²⁰ Yɛso mafə chwɛ dzì aŋghəa ù fə̀ nyə nduw fughu an tuw u sɛ̀, ghe n tsuʼ naŋa kɔʼ wə̄n tò tuw kə fɔ̀e an nə̀gha tən tə̀ dzə̀m tǒ Mɛ̀chisɛdɛ̀k.