Hibùlù 5 - To kə Kəzə̀ kə̀ Fughu ko

Tuw kə fɔ̀e kəla kə ki muūwn ko

¹ Ghe tuw kə fɔ̀e kə̀ telè tsɔ̀ʼɔ səa wo am bvʉa e waazə̂, ghe n tsuʼ naŋa kɔʼ wə̄n enyəa ù è saʼā tuw u ghee wò, sàa fùghuu ùfʉgha, nìi fùghuu sùghò kəfughu â Zə̀ kò enyəa to kə mô ghuūw maʼà bòo tə aghì.

² Tuw kə fɔ̀e kə lo kwo nû alemaʼn tsughu ghue wo ghèe ghê ghì ghəla ghe mgbə̂ŋ mughu, àsùghò ghəla ghe lo mo ghe n nyəŋ làʼ, tò aŋghəa ghuūghùe wə̄n u lo nu alebvʉ̀a kôom sughò aŋ ghəa a wə̄n à biigh gho.

³ Zən lò e ghee ù ki aletele saā fʉgha wo â Zə̀ kò am bòo tə wə̄n, àsùghò alô tə ghì a wə̄n gho.

⁴ Ghùw mɔʼɔ̄ tsɔʼɔ̄ dzə̀ yò ghue u wə̄n wo aledòʼò Tuw kə fɔ̀e bòʼ ù lə̀ghâ ŋkɔʼso mo, à wə̄n telè tsɔ̀ʼɔ kɔʼɔ̄ Kə̀zə̀ tò aŋghəa kə fə̀ tɔŋɔ Ɛlɔ̀n.

⁵ À lò sugho eghəla aŋghəa à fə̀ yo dzə Kə̀lestò ù fə̀ kɔʼso naŋā kɔʼ ghue u wə̄n wo an Tuw kə fɔ̀e, à fə̀ laam lo Kəzə̀ kə fə̀ naŋā kɔʼ wə̄n aŋghəa kə fə̀ dzɛ â wə̄n enyəa, “Ghù lǒ wɛ waŋa ù nùu, nɛ an tsuʼ fə nɛ fən mùghò n dòʼo ti ūsûŋ wʉ̀a.”

⁶ Ù dzɛ̀ sùghò an də̀ŋò kə̀ li ko am Mwàʼsò kə Kəzə̀ enyəa, “Ghù kè bɔ̌ɔm tèlè dòʼn təla ko tuw kə fɔ̀e tò aŋghəa Mɛ̀chisɛdɛ̀k fə̀ lo.”

⁷ Ghəa Yɛso mò mughù fɛ am mbī, ù ŋ gɔ̂ɔŋ Kə̀zə̀, dìi an tùʼ è diī zo, buʼnlo m̀bɔ̀ŋ, sə̀ mə̀ n tsughuu, ù dìi dzâa nduw â ghùw wəla ù fə̀ lò alebəghaasə wən alo evʉ̄. Bòʼ ù màʼà fə̀ ŋge gaʼ fə̀ŋ a zəŋò Zə̀ kò, Zə̀ kə̀ n zuw dî e wə̄n.

⁸ Ghəa ù bûʼ lô ko enyəa e lo Wɛ u Kə̀zə̀, ù n zoʼn kele kɔʼ alezuw â Zə kò am fala zəla ù fə̀ fala ghe zò.

⁹ A m bùghò ù bùghò doʼò kɔʼ fəgha kəla ù mò ki alelo ghè kò, Zə̀ kə ŋ ghəə̄ŋ tsughu enyəa ghî ghəla ghe boō fughu a wə̄n e lo alezə tuw kəla kə doʼò tən.

¹⁰ Zə̀ kə̀ n tsuʼ naŋa kɔʼ wən enyəa ù dòʼò tsughu ŋgòʼ è tuw kə fɔ̀ə zəla Mɛ̀chisɛdɛ̀k fə̀ lo ghè wò.

E kwo ko ghɛ̀ lô bughuu doʼnlo aleboō fughu â Kə̀lestò

¹¹ A ŋge ki ghəa à kəaa gho aŋ ghəa ghən, zəa e kuūwn tughuu aleteso dzâa wô ghəa a te gho â ghɛ̀, e sô tughuu â ghɛ̀ alembaa zuuw tɔ eghəa.

¹² Ghɛ̀ mô ki alelo ghî ghəla ghe zoʼn kaāŋ ghî ghò êzəŋ alo aghəa, ghùw ù lì kuuwn ki alefəghaan zoʼn kpeʼē wô ghɛ̀ aŋghəa ghəa a sûesʉ ghəla ghɛ̀ mò bûʼ zoʼn dzə kùu ndùw shwaʼ u Kəzə̀. Ghɛ̀ lo tò wɛ à bughuu gho ghe naam nyɔŋɔ ghe zo, mò ghe yo alezəa fʉghàzəa ù tughu wo.

¹³ Ghùw wəla ù nyɔŋɔ ghe zo, ù nǎam lo tǒ wɛ ù bughuu, u kaam mən dzə̀ an shwaʼ wəla u naaŋ ghùw ù tsəghatsəgha.

¹⁴ Fʉghàzəa ù tughu u lɛ̂ɛn ghì ghəla ghe noō kpe tsughu, ghî ghəla ghe n zoʼn naŋa tsughu ghue e ghee zo aŋ ghəa ghəla ghe ghəəŋ zeē, ghe yia kwo nəŋonə̄ŋ aŋ ghəa è dzûŋ zo àsùghò alô è biigh zo.