Hibùlù 4 - To kə Kəzə̀ kə̀ Fughu ko

Tsuʼ fəla Zə̀ kə fə̀ to naŋa enyəa a zʉʉn ghue zo a te

¹ Ghəa to kə̀ nyea ko an lùʼû kə̀ zʉʉn kə ughue kən naam ti dzə, bùgho nlò sɛ̀ ghôom tsughu enyəa ghùw wɛʼɛ u mɔ̀ʼ lò doʼnlo mò ù kà fughu an lùʼû zʉʉ̄n kə ndûw nyə̄.

² Tɔŋlo enyəa ghe maā làbəlà e dzùŋ zən â sɛ̀ naʼa wò, to aŋghəa ghe fə̀ naʼà ndûw sugho â wɛ ghə Ezə̀lɛ̂ ghəla ghe fə̀ lo aŋ ŋgwən. Làbəlà zəla ghe fə̀ naʼa nduw â ghee ŋ kè kuuwn kwu eghəa, bòʼ ghî ghəla ghe fə̀ zuw làbəlà e te ka fə nî naŋa dzə̀ am fə̀ŋ tə ghee.

³ À lo ko sɛ̀ ghəla sɛ̀ boō tsughu a lo nyəā taā an lùʼû kə̀ zʉʉ̄n kə ughùe kə te ko, aŋghəa Zə̀ kə̀ dzɛ̂ tsughu enyəa, “M̀ fi to nu to ko an nʉ̀gha ù pfʉa wo enyəa, ‘Ghe kê nyə̀ tɛ̀ koʼ yo an luʼu kaŋa kə̀ zʉʉ̄n ko.’ ” Aŋghəa e mò bûʼ lo ko enyəa ù maā biaan naŋa mɛ̀ʼɛ̀ ghəa gho a dzə̀m aŋghəa ù fə̀ gbə̂n wo mbī.

⁴ Tɔŋlo enyəa kə ŋ ghəa a kə̂a kùu nduw tsuʼ u sə̀ghàkəmbəgha wo an də̀ŋò kə̀ li ko an shwaʼ wən enyəa, “A m bùgho Zə̀ kə̀ fwâʼ mɛʼɛ̀ tsughu fwàʼ kə wən ko kə̀ dzə̀m, kə n zʉ̀ʉn tsughu an tsuʼ u sə̀ghàkəmbəgha wo.”

⁵ Vʉ̀a ù dzɛ kpeʼe tsughu an də̀ŋo kən enyəa, “Ghe kê nyə̀ tɛ̀ kòʼ yò an lùʼû kə̀ zʉʉ̄n kəla mùghò fə̀ to naŋā â ghee.”

⁶ E naam lò ko nû enyəa ghî a li a lo nyəa nù an lùʼu kə̀ zʉ̀ʉn kə te ko. Ghî a li yia a lô ghəla ghe mò bûʼ naʼā wo làbəlà e te â ghee, ghe ŋ kè nyə fughu bòʼ tuw kə ghee kə tughuu ko.

⁷ Zə kə ŋ kòom naŋa kpeʼe tsughu tsùʼ fə̀ li fo, ù n tɔŋɔ tsughu tsuʼ fə te fo enyəa, “Nɛ.” Ù ŋ ghəəŋ tsughu enyəa Dɛvìd bùghò kə̀aa wô ghəa a te gho mo gha kə n sə aŋghəa ghe fə̀ dzɛ̂ naŋa enyəa, “An tsuʼu u nɛ wən, abugho ghɛ zuw tsughu dzə̀ e wə̄n, e kwo ko ghɛ lô so e tughuso nâaŋ fə̀ŋ tɛʼɛ.”

⁸ Abugho Dzushùa mò ghəŋlo enyəa ghe nyəa an lùʼû zʉʉ̄n kəla ghe mò to naŋā â ghee, to Zə̀ kə̀ ka mō kôom bùgho kə̀aa dzə̀ ghəa zo ebàm kùu nduw tsuʼ ù li wo.

⁹ À fi lo enyəa Tsuʼ ù zʉnlo ughùe ù naam lò nû â ghì à Kəzə̀ ghò.

¹⁰ Ghî ghəla ghe nyə nduw an lùʼû kə̀ zʉʉ̄n kə ughùe kəla Zə̀ kə fə̀ to naŋā â ghee lo bɔɔm zʉ̀ʉn sùgho eghue am fwàʼ kə ghee aŋghəa Zə̀ kə̀ mò zʉ̂ʉn tsughu aŋghəa ù bɔm mɛʼɛ̀ tsughu mbī.

¹¹ E fi lo enyəa sɛ̀ ki aledə̀mà təla tsughu alendùw nyə fughu an lùʼu kə̀ zʉʉ̄n kə te ko. E kwo ko ghùw lò tsəghaa tə̂əŋ tsughuu an tuw kə ghee kə̀ tughuu kə te ko, ù dòʼò tsughu mò u kà ndùw nyə an lùʼû kə̀ zʉʉ̄n kə te ko.

¹² Kùmkùm shwaʼ u Kəzə̀ ù ki kədaʼa, fwàʼa sùgho aghəa, u tɔ tsə̀gha nyə fəla fə tɔɔ̄ bâa tò tə bə̀gha, u nyəa məən ndùw ghuw am fəŋ àsùghò aŋ ghùe u ghûw, nyəa məən ndùw an nyùŋ u ughùe àsùghò alo mgbaŋ mgbaŋ. Shwaʼ u te u tsʉa dèe kɔ̀ʼɔ̂ mòʼnlo e ghûw àsùghò fəgha kəla ghùw biso lo ghè kò.

¹³ Fəgha kə̀ li yo dzə fɛ am mbī Zə̀ kə fə̀ gbə̂n wo kə nân doʼo an sə kə wə̄n. Ghəa ghən a dzə̀m tsò tsʉ̀ doʼo ko enyə an sə kə wə̄n. Sɛ̀ ki aletaŋso dzɛ̂ ghəa ghən a dzə̀m sɛ̀ lo mo a m fwàʼ â wən.

Kə̀lestò lo tuw kəfɔ̀e kə sɛ̀ kə̀ tughu ko

¹⁴ Ghəa e lô dzə enyəa sɛ̀ ki nû Yɛso, Wɛ u Kəzə̀, tɔɔŋ Tuw kə fɔ̀e ù tughu wəla ù lǒ mò ù n tsə̀ghànyə alo kəwālā; to sɛ̀ mô tɔʼɔ̀ sɔʼn tsughuu ko ŋkāa am boo zəla sɛ̀ ki â Zə̀ kò.

¹⁵ Tɔŋlo enyəa Tuw kə fɔ̀e kəla sɛ̀ ki, à yò dzə kəla kə buw alekwuso èse a zəŋò sɛ̀ abugho sɛ̀ bvʉ̂ kôom tsughu; sɛ̀ laam ki Tuw kə fɔ̀e kəla kə lǒ mo ghe ŋ wə̄n tsoom kaŋlo alo tədzìī tə dzə̀m, to ghe mò tsoōm kôʼ sugho sɛ̀, ù ŋ kè kuūwn ŋgəmso ghəŋlo èbo.

¹⁶ Abugho sɛ̀ ləghaa fəgha ko, a n dò nduẁ bvʉ̀ ndùw â Zə̀ kə̀ sɛ̀ kəla kə dêe sɛ̀ â dzɔ̀ e wə̄n zo, a ŋ kwo tən enyəa kə sô dèe nù sɛ̀ â se e wə̄n e kwuso zo, kə fughuu sughò sɛ̀ â fəgha kəla kə kpe â sɛ̀.